1 Samueli 11 - KITAABA WAAQA

¹ Eegi jii toko dabre hayyu Nahashini ka lafa Amoni, askarti fud'ate dira Yabeshi, ka lafa Gileadi, marse had'e. Worri Yabeshi waan Nahashini jed'e, Wold'aqisa dubbanne, yo wold'anne nu mohatta.

² Nahashini waan jed'eeni, Anini yo toko ch'alla wold'aqisa isaniini woliini dubbad'a: Anini ila mirgiti teesani ch'ufa isani keesa yaase, akanaani worra Israeli ch'ufa ch'eersa.

³ Jaaroleeni Yabeshi waan jetteeni, Bulti torba nuu kenni, aka nu lafa Israeli ch'ufa keesa nama erginu. Yo nami nu baasu keesa injirre, hojja suni harka isaniti kennanna.

⁴ Jari ergani kaani Gibea fulla Sauloni tau d'ufe, odu tana biyyati hime jennaani biyyiti aka hama iraa laalefate boote.

⁵ Hojja suni Sauloni ka qotiyo oofu, gara oobruti d'ufuu jira. Inni waan jed'e, Maanti jira? Nami ch'ufti maafi akana boha? Jennaani worri odu ergattuni Yabeshi d'ufteeni iti hime.

⁶ Sauloni dubbi suni d'agaye jennaani lubbuuni Waaqa isa ira buute inni guddo dallane.

⁷ Jennaani inni qotiyo lama fuud'e, qale garagari ch'ire, fooni suni nama lafa Israeli ch'ufa keesa erge waan jed'e: Nama Saulofi Samueli had'iisa gula indeemne ch'ufa qotiyo isaa akana tolchani! Worri Israeli waan hegeri AABBO Waaqi tolchu sodaate, nami ch'ufti haguma gahuni wolti bahe.

⁸ Sauloni Bezekiti worra wolti baase; nami Israeli keesaa kuma d'ibba sadi, ka Yudaleeni nama kuma sodoma.

⁹ Duuba waan ergattu Yabeshitini jed'ani, Waan isani worra keesanini jettani, Bori, ato aduuni gubba ind'ufinu nyaapa keesani duraa isani baasani. Worri Yabeshi d'aamsa suni d'agaye jennaani aka male gammadani

¹⁰ waan Nahashini jed'ani, Bori harka isaniti kennanna waan feetani nu tolcha.

¹¹ Boriyyaate Sauloni askarti isaa fulla saditi garagari qoode, ganama hojja biiftuuni baate olla nyaapa worraa ka Amoniti ch'absani had'ani yo guyyaani wolqit'ae ya hobaasani, ka figeleeni gargari bahe abbu karuma ufi baqate.

¹² Jennaani worri Israeli waan Samuelini jed'e, Me, worri Sauloni hayyu keenna intau jed'e kaani? Harkati nuu keenna, worra suni inhobaafna!

¹³ Ammo Sauloni waan jed'e, Nama tokole ara inijeesani wonti akanatiifi guyyaani kunini guyya AABBO Waaqi Israeli baase.

¹⁴ Duuba Samuelini waan biyyaani jed'e, Koota, nu yaasa, Gilgali d'aanne ammalle aka Sauloni hayyu keenna jabeesine aka dansaa nama ch'ufati himna.

¹⁵ Tanaafi worri ch'ufti Gilgali d'aqe, fulla woyyumati AABBO Waaqa durati, Sauloni hayyu keenna jed'ani lalabani. Sorio wold'ageeti baasani Saulofi worri Israeli ch'ufti jila tolfatani.