1 Samueli 10 - KITAABA WAAQA

¹ Jennaani Samuelini dulo d'ad'a fuud'e, mata Sauloti naqe muude, d'ungate waan jed'eeni, AABBO Waaqati sii muude hayyu Israeli si tolche. Atini gosa isaa fidde harka nyaapa worraa keesaa baafta. Aka AABBO Waaqi si fohate hayyu worra isaa si tolche akanaani beeta.

² Hojja arra na biraa deemte atini nama lama d'aatu irreesa Raeli, ka Selsa jiru lafa Benjamini keesati, argita worri waan siini jed'u, Harreeni atini barbaada d'at'e ya galte; abbe amma waan isii iyyaadu, ammo guddo si yaaduu jira. Inni hojja ch'ufa tae, ilmi kiyya ingalle, anini amma maal taha jed'e dubbata.

³ Duuba ammalle yo arti deemte fulla mukha woyyu ka Taboritini baate nama sadi ka sorio Waaqaa baasa Betheliti yau agarta. Worri sunini toko ree sadiini deema, tokoleeni qit'a sadiini deema, ka sadeesoleeni gorjo daad'i miju harkaa qaba.

⁴ Worri sunini nagaya si fuud'e qit'a lama sii keenna; indidini, iraa fud'ad'i.

⁵ Jennaani atini gaara Waaqa ka Gibea d'ata, fulla askartini Filisti teetu. Afaani balbala fullo dira suniti raagoota heddu, ta fulla sorio iti qalani gaara ira gad'ufte, kiraari, dibbe, fulludo, ammalle dumbulo d'ooftuni wolwoldeetani. Worri sunini lalabe sirbaa yaa.

⁶ Duuba hojuma suni lubbuuni AABBO Waaqa sira buute, atini sirbafi lalaba worraa keesa seente garagalte nama haraa taata.

⁷ Hojja wonti kunini taate, waan Waaqi tolchi sini jed'e ch'ufa tolchi, insodatini.

⁸ Na durati Gilgali d'aqi, anini achiti siti d'ufe sorio gubanifi ta wold'ageeti qala. Torbaani toko achiti na eegi, haga anini d'ufe waan atini tolchu malte siti himuti.

⁹ Sauloni Samueli biraa deeme galisaa kae iti d'aabannaani Waaqi onne Saulo garagalche wonti Samuelini isati hime kaani ch'ufti guyya suni taate.

¹⁰ Saulofi hojatuni isaa Gibeani bahani jennaani raagoota hedduuni wolwoldaani. Hojuma suni lubbuuni Waaqa isa ira buute, inni sirbafi lalaba worra keesa seene.

¹¹ Biyyiti duri isa beetu waan inni tau jiru argite jennaani waan woliini jette, gurbaani Kishi maani tahe? Sauloni ya raaga tahe?

¹² Namichi toko ka achi tau waan jed'e, Raagooti taani d'ibiini ho? Yo mala keesani abbootini worra eenu? Akanaani jechi kunini gabahe; Sauloleeni ya raaga tahe?

¹³ Sauloni sirbafi lalaba iraa deebie jennaani inni fulla sorio iti qalani ta gaara gubba d'aqe.

¹⁴ Abbaani guddaani Saulo isaafi hojatu isaa gaafate haga kana ch'ufa isani eesa jirtani? jed'e. Sauloni waan jed'eeni, Nu barbaada harree jira; d'amne jennaani Samueli argu d'anne.

¹⁵ Abbaani Saulo guddaani kaani waan jed'eeni, Inni maani isaniini jed'e re?

¹⁶ Sauloni, inni waan nuni jed'e, Harreeni yayu mullate jed'e, ammo Sauloni dubbi Atini hayyu tata jed'aniini, ta Samueli jed'eeni taani iti inhimne.

Aka Saulo hayyu tolchani

¹⁷ Samuelini worra Israeli woldeenna AABBO Waaqati Mispati wolti yaame.

¹⁸ Waan jed'eeni, AABBO Waaqi Israeli waan jed'u. Anini lafa Misiri keesaa isani baase, harka worra Misiritiifi harka gosa d'ibi isani dabsate ch'ufa jalaa isani baase.

¹⁹ Anini Waaqa keesani ka gaargalafi d'ipu teesani ch'ufa keesaa isani baase; ammo isani arra na diddani, hayyu nuu kenni nani jettani. Hayye, amma tana gosafi balbala teesani gula AABBO Waaqa dura koota.

²⁰ Jennaani Samuelini gosa ch'ufa toko tokooni gayaame, AABBO Waaqi gosa Benjamini keesaa fohate.

²¹ Duuba Samuelini worra gosa Benjamini toko tokooni ga yaame worra Matri keesaa fohatani. Jennaani worri d'iira ka worra Matri gabahe isa dura d'ufe, jennaani worra keesale Saulo ilma Kishi fohatani, ammo isa barbaadani d'abani,

²² AABBO Waaqa, Nami d'ibiini jira? jed'ani gaafatani. AABBO Waaqi waan jed'eeni, Sauloni kuuno, achi miha duubati d'okhachu jira.

²³ Jennaani worri orie Saulo biyyaatini gad'ufe. Inni biyya keesa eje jennaani nama tokole ka gurmu isa bira dabru d'abani.

²⁴ Samuelini waan biyyaani jed'e, Isani nama AABBO Waaqi fohate gartu? Nami isa fakaatu tokoleeni gumi tana keesa injiru. Jennaani nami ch'ufti lalabe waan jed'e, Hayyuuni ha lubbu buluuti!

²⁵ Samuelini aadaafi huji hayyu biyyati hime eege kitaaba keesati t'aafe, fulla woyyuma AABBO Waaqa dura kaye. Jennaani Samuelini nama ch'ufaani worra keesaniti gala jed'e gad'iise.

²⁶ Sauloleeni kae, worra isa ka Gibeati gale, ammalle isa woliini nami garaa jajaba, ka Waaqi herega suni kenneefi yae,

²⁷ ammo nami waan yaku male waan d'ibi imbeenne waan jed'e, Nami kunini maani nu baha? Worri Saulo tufate woma kennuufi dide.