1 Korintho 6 - KITAABA WAAQA

¹ Yo nami toko oboleesa ufitiini woldide, inni akamiini jaarole Waaqa imbeenne d'aqa, ato gumiini Waaqa worra wolti inaraarsiini?

² Aka gumiini Waaqa lafa qortu imbeetani? Tanaafi yo lafa qortani, woldidiisa didiqa toko qoru indandeetani?

³ Aka nu waan malaikale qorru imbeetani? Yo akasi taate, nu waan lafa tana hagasi ira qoraaniti?

⁴ Yo wonti akana kunini d'ufte, nama gumiini inulfeesineti geesitani?

⁵ Waan ch'eeraa taatani! Nami qalbi qabu ka dandae wolti isani araarsu tokoleeni gumi teesani keesa injiru?

⁶ Ammo akasi diddani, oboleyaani teesani kora worra Waaqa imbeenneti woli geesiti!

⁷ Wolhimachaani isani himatani tunini aka isani laaftani haga hanqattani agarsiisa. Yo sila isaniti wollaalaani, ira isani injirtu? Yo sila isani dura woi saamani ira isanii injirtu?

⁸ Ammo isani wolti wollaaltani wolsaamtani, oboleyaani teesanile saamtani.

⁹ D'uguma isani aka worri daba tolchu Finna Waaqa inarganne imbeetani. Ufi insobina! Worri ch'eera foko inqamne, ka waan harkaani boch'ani kad'atu, ka nad'eeni biyya awadatu yokhaani midiisani,

¹⁰ yokhaani hattufi sabdiini yokhaani nami machaufi ka nama arabsufi ka nama sobe wo fud'atu, worri kunini tokoleeni Finna Waaqa inargatu.

¹¹ Isaniini garileeni duri akasi. Ammo amma ya isani d'iqani, ya isani qulqulleesani, ya maqa Aabbo Yeso Kristotiifi Lubbu Waaqa keennatiini Waaqaani wolti araaramtani.

Nafi keesani mana Lubbu Qulqullo

¹² Nami toko, Wonti ch'ufti na halaala jed'a; ammo wonti suni ch'ufti isa inqarqaartu. Anini, Wonti ch'ufti na halaala jechu dandaa; ammo aka wonti tokoleeni tisse na tolfatu anini ee injed'u.

¹³ Nami d'ibiini, Sagaleeni garaa malte, garaaleeni sagale male jed'a. Ammo Waaqi waan suni lachu imballeesa. Nafi namaa ka hameennaatiniti, ammo ka Aabbooti; Aabboleeni ka nafaati.

¹⁴ Waaqi ka Aabbo duisa keesaa kaase, akasuma nule jabeenna ufitiini kaasa.

¹⁵ Isani aka nafi keesani mita Kristo imbeetani? Anini mita Kristo toko fuud'e nafa sharmut'a tolcha? Hiyyo, intaatu!

¹⁶ Yokhaani aka nami sharmut'a woliini rafe nafa isaatiifi ka isii takaa tolchu imbeetani? T'aafiini diideesite himti, Worri lamaani takaa taha jetti.

¹⁷ Ammo nami Aabbooti ufi mat'ansu lubbu keesa isaani toko taha.

¹⁸ Huji sharmut'oma lagad'a. Dabi d'ibiini nami tolchu tokoleeni nafa woma intolchu; ammo nami sharmut'oma deemu nafa ufiti daba.

¹⁹ Aka nafi keesani mana Lubbu Qulqullo, ta Waaqi isanii kenne, ta isani keesa teetu imbeetani? Nafi keesani keesaniiniti, ammo ka Waaqaati;

²⁰ inni isani bite, Tanaafi nafa keesani suniini Waaqa guddisa.