1 Korintho 5 - KITAABA WAAQA

¹ Hameenna algalooma hama, ka worri Waaqa imbeenneleeni intolchineti jiddu teesani jira jed'ani. Waan ani d'agaye, nami toko niiti abba isaa barate jed'ani.

² Yoosi, maafi ufi guddiftani? Ammo sila lalefachu maltani, nama waan akana kana tolche jiddu teesani keesaa balleesu malani!

³ Anini ato nafaani isani ira fago jiraad'ele, lubbuuni tiyya isani woliini jirti; ammalle maqa Aabbo Yesotiini anini ya nama waan hamtu kana tolche wollaala iti mure, akuma waan anini isani woliini jiru.

⁴ Hojja isani wolwoldeetani anini lubbu tiyyaani isaniti d'ufu, ka jabeenni Aabbo Yeso nu woliini jiru,

⁵ nafa nama kana Sheet'anati kenna aka balleesani, yoosi lubbuuni isaa Guyya Aabbo imbaafamti.

⁶ Isani ufi guddisu himmalle! Isani mammaasa, Bukho diqo tokoti woi bukheesa jed'u imbeetani?

⁷ Bukho dullati tana balleesa, aka qulqullo taatani. Yoosi aka qit'a hareesa ka bukho inqamne taatani, akuma isani d'uguma jirtani. Wonti akanatiifi jilti teenna ta Pasaka ya kurfoofte, Kristo hoola keenna ka Pasaka ya qalani.

⁸ Koota, amma sagale jila teenna nyaanna, qit'a bukho dullati qabu inyaannu, ka dabaafi hameenna qabu; ammo qit'a bukho inqamne, qit'a qulqullo ka d'ugaa nyaanna.

⁹ Tatabe anini isanii t'aafe keesati, Algaloota lagad'a jed'e.

¹⁰ Anini worra Waaqa imbeenne ka algalatiifi sabdifi ka seera ch'absufi ka waan harkaani boch'ani kad'atu injenne. Yo worra kana lagatani lafa keesaa bahu maltani!

¹¹ Wonti anini jechu jiru tana: nama oboleesa ufiini jed'e, ammo algalooma deeme, sabdae, waan harkaani boch'ani kad'ate, nama arabse, machae, seera ch'absu lagad'a. Nama akana sagalele woliini inyaatiina.

^12-13 Anini nama ala wollaala iti muru himmalle. Waaqati worra qora. Ammo isani nama gumi teesani wollaala iti muru himmalle? Akuma t'aafiini jettu, Nama akana hama kana gumi teesani keesa baasa.