1 Korintho 11 - KITAABA WAAQA

¹ Akuma anini Kristo akeesu isanileeni na akeesa.

Nad'eeni mata hagogachu malte

² Anini isani guddisa waan isani hojja ch'ufa na qaabattani barsiisa anini isaniti kenne jabeesitaniifi.

³ Ammo anini aka isani aka Kristoni nama ch'ufa ira jiru barattani fed'a, d'iirsi niiti ufi ira jira, Waaqileeni Kristo ira jira.

⁴ Tanaafi nami d'iira fulla gumiini jirtuti mata hagogate kad'ate yokhaani dubbi Waaqa hasau mata ufi ch'eersa.

⁵ Nad'eeni fulla gumiini jirtuti hagogo male kad'atte yokhaani dubbi Waaqa hasooftu mata ufi ch'eersiti; isiini nad'eeni mata haadattu fakaatti.

⁶ Yo nad'eeni mata hagogachu didde, ha haadattuuti. Ammalle yo nad'eeni mata haadatte yokhaani ch'iratte waan ch'eeraati, tanaafi hagogachu malte.

⁷ D'iirti mata hagogachu himmalle, waan inni fakeennafi guddinna Waaqa agarsiisufi. Ammo nad'eeni guddinna d'iira agarsiifti;

⁸ wonti akanatiifi d'iira nad'eeni ira inuumne ammo nad'eeni d'iira ira uumani.

⁹ Maro nad'eenitiifi d'iira inuumne, ammo nad'eeni d'iirafi uumani.

¹⁰ Maro malaikatiifi nad'eeni mata hagogachu malte, aka aka jabeenna d'iirsa isii jala jirtu agarsiiftu.

¹¹ Taatule Aabbo keesa nad'eeni d'iirsa male woma keesa injirtu, d'iirtileeni nad'eeni male woma keesa injirtu.

¹² Akuma nad'eeni d'iira ira uumani akasuma nad'eeni d'iira d'alti; ammalle wonti ch'ufti Waaqa iraa d'ufti.

¹³ Ufii teesanii herega: aki nad'eeni yo hagogo mata inqamne Waaqa kad'attu fullaa?

¹⁴ Aka rifeensi d'eeraani d'iiraa ch'eera,

¹⁵ ammo nad'eeni faaya, uumami nu imbarsiisu? Rifeensi d'eeraani kunini akuma woya isii kennani.

¹⁶ Ammo yo nami tokoleeni naani mormu fed'e, wonti anini jed'u, nufi gumiini Waaqaleeni aada d'ibi imbeennu.

Sagale Aabbo qulqullo

¹⁷ Gorsa kana keesati, Isani waan dansa tolchitani injed'u; wonti akanatiifi woldeennaani teesani waan dansa intolchitu ammo waan hamtu tolchiti.

¹⁸ Ta qaraa fiit'e, aka nami woli ind'ageenne jiddu teesani jiru la d'agaye; wonti kunini, mala kiyya, hagi toko d'uga.

¹⁹ (Wonti suni tahu malte aka nama qajeela jiru argani.)

²⁰ Isani yo wolwoldeetani sagale Aabbo nyaachu ind'umne.

²¹ Wonti akanatiifi yo sagale nyaattani, nami ch'ufti hurrise sagale ufi nyaata, tanaafi nami gari beelaani gala, ato ka gari machau.

²² Worra keesati nyaattani d'uddani inqabdani? Yokhaani gumi Waaqa tuffattani, worra gaargala qabu ch'eersu feetani? Ana maani isaniini jed'u feetani? Ana waan dansa isaniini jed'u feetani? Anini waan dansa tokole injed'u.

²³ Wonti akanatiifi anini waan isani barsiise Aabbo ira argad'e: aka halkani isa gurgurani suni Aabbo Yesoni qit'a fuud'e,

²⁴ Waaqaa galata deebise ch'ach'abse waan jed'e, kunini nafa kiyya ka isanii jed'ani baasani. Waan kana tolcha na qaabad'a.

²⁵ Akasuma eegi sagale nyaatani inni mudunu fuud'e waan jed'e, Mudunuuni tunini wold'aqisa haraa ka d'iiga kiyya beesisu. Yo d'uddani ch'ufa naa qaabad'a jed'e.

²⁶ Wonti akanatiifi haga Aabbooni d'ufuuti, yo qit'a kana nyaattani mudunu tana keesa d'uddani ch'ufa isani duisa isaa odeesitani.

²⁷ Tanaafi yo nami adaba hamaani qit'a Aabbo nyaate yokhaani mudunu Aabbo d'uge, inni ya nafa Aabbootiifi d'iiga Aabboleti dabe.

²⁸ Nami ch'ufti ufi qorqorachu male, duuba qit'a nyaate mudunu ha d'ugu.

²⁹ Wonti akanatiifi yo inni ulfinna nafa Aabbo hojja inni sooratu ingarre, yo nyaate d'ugu ch'ufa qorsuma ufitiini d'ufa.

³⁰ Maro waan kanatifi isaniini hedduuni fayyaa d'abdani laaftani, hagi tokoleeni raawattani.

³¹ Nu yo sila qaraa fiit'e ufi ilaale, qorsuma Waaqa keesa induunu.

³² Ammo Aabbooti nu qore nu qajeelcha, aka nama lafa woliini nu inqorre.

³³ Tanaafi oboleyaani tiyya, yo wolwoldeetani sagale Aabbo nyaattani, woli eega.

³⁴ Yo nami beela qabaate ha mana ufiti sagale nyaatu, aka yo wolwoldeetani qorsuma Waaqa keesa inseenne. Waan hafe kaani anini hojja d'ufu mid'aasa.