1 Korintho 1 - KITAABA WAAQA

¹ Maqaani kiyya Paulo, ka fed'i Waaqatiini yaamani aka ergattu Kristo Yeso tahu, ammalle oboleesa keenna Sosthene woliini jirra —

² Gara gumi Waaqa ta Korintho jirtu ta yaamani worra Waaqa tolchani, ta maro Kristo Yesotiifi worra isaa taate, ammalle gara nama lafa ch'ufa ka maqa Aabbo Yeso Kristo yaamatu: Inni Abba keennafi ka worraati.

³ Waaqa Abba keennafi Aabbo Yeso Kristoni eebafi nagaya isanii kenniina.

Eeba Kristo keesa

⁴ Anini hojja ch'ufa maro teesaniifi Waaqa kiyya galata deebisa, waan inni Kristo Yeso keesa eeba isani kenneefi.

⁵ Wonti akasitiifi maro Kristotiifi isani ya waan ch'ufaani duroomtani, arabaafi qalbi ch'ufaleeni.

⁶ Waan oduuni Kristo isani keesati akuma d'ugaa fulla argateefi

⁷ isani eeba tokole ind'amne, ato mullacha Aabbo Yeso Kristo eedanu.

⁸ Inni haga muumme isani jabeesa, aka Guyya Aabbo Yeso Kristo isani wollaala male teetani.

⁹ Waaqa ka wold'aqisa Ilma isaa Yeso Kristo Aabbo keennati isani yaame d'ugefachu malani.

Wolmormiti gumi keesa

¹⁰ Oboleyaani tiyya, anini maqa Aabbo keenna Yeso Kristotiini isani kad'ad'a: waan jettani keesati isani ch'ufti wold'aqa, aka wolmormitani wolind'amne; wold'aqa, heregafi waan feetani ch'ufa keesati takaa taha.

¹¹ Wonti akanatiifi, oboleyaani tiyya, fiit'aani Kloe d'ufte aka isani wold'abdani nati himte.

¹² Woni anini jed'u kana: isani namu ch'ufti waan waan dubbattani. Toko waan jed'u, Anini goli Pauloti; ka d'ibiini waan jed'u, Anini goli Petroti; ka d'ibiini, Anini goli Kristo jed'a.

¹³ Kristo ya gargari qoodani? Pauloti maskali gubbati isanii due? Jara Paulo jed'ani isani batisani?

¹⁴ Anini Waaqaa galata deebisa waan anini isani tokole imbatisiiniifi, Krispofi Gayo male.

¹⁵ Tanaafi nami tokoleeni dandae jara Paulo ka inni batise isaniini injed'u.

¹⁶ (Ee d'uguma, Stefanafi worra isaale nati batise, ammo waan nama d'ibi batise insehu.)

¹⁷ Kristoni aka anini nama batisu na inergine. Inni aka anini Odu Dansa odeesuufi na erge, aka qalbi namatiini inodeesine aka akasiini duisi Kristoni maskali gubbati due jabeenna ind'amne.

Kristoni jabeennafi qalbi Waaqa

¹⁸ Odeesani duisa Kristoni maskali gubbati due worra badu daalluma fakaatti; ammo nuu worra baafamuti jiru jabeenna Waaqati.

¹⁹ Wonti akanatiifi t'aafiini waan jettu, Anini qalbi worra qaro balleese, hubacha worra wo beekhu d'owa.

²⁰ Tanaafi qarooni maani taha re? Yokhaani nami hubacha qabu? Yokhaani nami guddo wo mormu ka lafa tana maani taha? Waaqi aka qaroomi lafa tana woma imbanne ya agarsiise!

²¹ Wonti akanatiifi Waaqi qalbi ufitiini nama qalbuma worraatini ufi hubachiisu d'owe, Waaqi qalbi ufitiini daalluma odu nu odeesiinutini nama d'ugefatu baase.

²² Yahudiini beesisa waan mama feeti, Grikiini qarooma feeti.

²³ Ammo nu waan Kristo maskali gubbaa odeesina, odu Yahudi gufachiiftu, ta gochiti d'ibiini daalluma seetu;

²⁴ ammo jara Waaqi yaame, Yahudifi gosa d'ibileti, oduuni tuni Kristo, ka jabeennaafi qarooma Waaqa.

²⁵ Wonti daalluma Waaqaa fakaattu qarooma nama ira jirti, ammalle wonti laafinna Waaqaa fakaattu jabeenna nama ira jirti.

²⁶ Oboleyaani, waan duri keesa jirtani qaabad'a, gaafa Waaqi isani yaame. Toko toko male isaniini ch'ufti qarooma inqabdani yokhaani jabeenna inqabdani yokhaani ulfinna inqabdani, aka nami sehu.

²⁷ Waaqi beekhuma beekha waan nami lafa daalluma sehu fohate, aka qaro ch'eersu, ammalle waan nami lafa laaftu sehu fohatte, aka nama jajaba ch'eersu.

²⁸ Inni waan woma imbaane, ka nami tuffatu, ka woma intahiini fohate, aka waan nami waan jabdu sehu balleesu.

²⁹ Tanaafi nami tokoleeni dandae fuula Waaqa durati ufi inguddisu.

³⁰ Ammo Waaqi ya Kristo Yesoni takaa isani tolche, ammalle ya Kristo qarooma keenna tolche; maro isaatiifi nu Waaqaani wolti araaramne, ya gumi Waaqaa taane, ya balcha taane.

³¹ Tanaafi akuma t'aafiini jettu, Nami ufi koorsu fed'u ch'ufti ha waan Aabbooni tolcheeni ufi koorsu.