1 Hayyoota 8 - KITAABA WAAQA

¹ Jennaani Solomonini jaarole Israeli, ta mata gosa ch'ufa, Yerusalemuti ufiti yaame, aka Sanduqa Wold'aqisa AABBO Waaqa, dira Daudi, ka Sioni jed'ani, fuud'ani, Mana Waaqatini d'ufani.

² Worri ch'ufti guyya jila Hoosa, jia torbeeso ka Ethanimu jed'ani keesa, wolti d'ufe.

³ Jaaroleeni sunini ch'ufti wolgeete jennaani, qaaloleeni Sanduqa kaani olfuute,

⁴ Mana Waaqati geesite. Jennaani worri Lawitifi qaaloleeni Waaro Woyyumatiifi miha isii guurte Mana Waaqati geesite.

⁵ Jennaani hayyu Solomonifi worri Israeli ch'ufti Sanduqa Wold'aqisa durati wolti bahani, loonifi ree heddu muumme inqamne sorio baasani.

⁶ Duuba qaaloleeni Sanduqa Wold'aqisa AABBO Waaqa Mana Waaqa olnat'e, Fulla Fulla Ch'ufa Ira Qulqullo akheekha waan koola ka lubbu qaba kaani jala keete.

⁷ Kooli isaa ka ballisani gubba Sanduqafi kalcho baataniini d'osse.

⁸ Nama Fulla Fulla Ch'ufa Ira Qulqullo dura eju male, nami d'ibiini dandae fiit'e kalcho inargu. (Kalchooni suni arrale achuma jirti.)

⁹ Sanduqa Wold'aqisa suni keesa, d'akha hahafalicha lamaani ka Musani gaara Sinaiti keesa kaye, gaafa AABBO Waaqi worra Israeli lafa Misiriti baase wold'aqisa woliini tolfate male, wonti d'ibiini keesa injirtu.

¹⁰ Ato qaaloleeni Mana Waaqa keesa gabahuti jirtu,

¹¹ dumansi guddinni AABBO Waaqa keesaa bibiliqu d'ufe, Mana suni duuche, duuba qaaloleeni waan sunifi deebite huji ufi hojachu dad'abde.

¹² Jennaani Solomonini Waaqa kad'ate waan jed'e, Ee AABBO Waaqa, atini adu guba keete, ammo dumansaafi dukana fohate keesati galta.

¹³ Amma tana anini yayu mana gudda dansa sii jaare, ka atini haga jiru jireenna keesati galtu.

Dubbi Solomonini biyyati haasae

¹⁴ Ato biyyiti achi ejaanjitu Solomonini fuula worrati deefate worra eebise

¹⁵ waan jed'e, AABBO Waaqa Israeli ha guddisani! Inni yayu kakhu duri abba kiyya Dauditi kakhate guute, ta inni.

¹⁶ Haguma anini gumi tiyya lafa Misiri keesaa baase anini dira tokole lafa Israeli keesati fulla mana kiyya iti jaarani na kad'atani infohanne. Ammo Daudi, anini ya si fohad'e, aka atini gumi tiyya fidu jed'e.

¹⁷ Ammalle Solomonini waan worraani jed'e, Abbaani kiyya Daudini duri herege, aka Mana AABBO Waaqa Israeli iti kad'atani jaaru.

¹⁸ Ammo AABBO Waaqa waan isaani jed'e, Heregi kanke suni dansa,

¹⁹ ammo atini Mana suni na inijaartu, nami Mana suni naa jaaru ilmuma kanke.

²⁰ Amma tana AABBO Waaqi yayu kakhu ufi guute. Anini huji hayyuma abba kiyya iraa fuud'e, Mana AABBO Waaqa Israeli iti kad'atani yayu jaare.

²¹ Ammalle Mana suni keesa anini yayu fulla mid'aase, ta Sanduqa Wold'aqisa kayani Sanduqi, suni d'akha hahafalicha wold'aqisa AABBO Waaqi duri ababoota teennaani woliini tolfate, gaafa inni worra lafa Misiri keesaa baase, qaba.

Kad'acha Solomonini kad'ate

²² Jennaani Solomonini gumi ch'ufa dura d'ufe fulla sorio iti qalani eje, harka olfud'ate,

²³ Waaqa kad'ate waan jed'e, Ee AABBO Waaqa Israeli, Waaqi aka kanketi tokoleeni lafafi gubbale injiru! Atini wold'aqisa gumi tanteetiini woliini tolfatani jabeesite, jaalala tante worra garsiifta, hojja worri garaa tokooni si gula yau.

²⁴ Atini kakhu abba kiyya Dauditi kakhate yayu jabeesite, dubbini sunini ch'ufti arra yayu guutamte.

²⁵ Amma tana, Ee AABBO Waaqa Israeli, anini si kad'ad'a, aka atini kakhu d'ibi atini abba kiyyati kakhate guutu ta atini, Haguma jiru jireenna d'alooti kanke nami toko Israeli mohata jette, hojja gumiini tante, aka inni si gula deeme si gula yaatu.

²⁶ Tanaafi amma tana, Ee Waaqa Israeli, waan atini abba kiyya Daudi hojattu tanteeti kakhate ch'ufa guuti.

²⁷ AABBO Waaqa, d'uguma atini lafa irati ingalta? Gubbaleeni ato ballo akami tateele si infuutu, duuba Mani anini jaare kunini akami dandae si fuud'a?

²⁸ Ee AABBO Waaqa kiyya, anini hojattu tanteeti, kad'acha tiyya na d'agayi, waan anini arra si kad'ad'ule naa kenni.

²⁹ Halkani guyya Mana kana ka atini fohatte, iti na kad'ad'a jette tissi. Hojja anini fuula Mana kanati deefad'e si kad'ad'u na ch'aqasi.

³⁰ Kad'acha tiyyafi ta gumi tetile, hojja nu fuula armati deefanne si kad'annu, nuu d'agayi, nuu araarami.

³¹ Hojja namaani, wo yakite jed'ani himatani, fulla sorio iti qalani ta Mana kanke kana keesa jirtuuni d'ufani kakhachiisani,

³² Ee AABBO Waaqa gubbati ch'aqasi, hojattu tante dubbi worraa d'uga gula muri. Nama wollaala qabu wollaala iti muri, ka inqamne galakisi.

³³ Hojja worra kanke ka Israeli maro worri siti dabeefi nyaapi dabsate, ammo duuba eege worri siti deebie, Mana kanati d'ufe, garaa laafe araarsa si kad'ate,

³⁴ gubba worra ch'aqasi. Daba gumi tanteeti araaramifi, lafa atini ababoota worraati kennite worraa deebisi.

³⁵ Hojja atini maro worri kanke si durati wollaalefi bokaya worra roobu didde, ammo duuba hojja worri wollaala suni iraa deebie, Mana kanati fuula deefate, garaa laafeni si kad'atu,

³⁶ gubbati worra ch'aqasi. Daba hayyuutifi ka worra Israelile ch'ufa biraa deemifi waan d'uga worra barsiisi. Duuba, Ee AABBO Waaqa, lafa tante tana, ta atini d'aala worra kanketi kennite, bokaya roobifi.

³⁷ Hojja oolaani jabduuni yokhaani ch'iisi hamani lafati bue, yokhaani qilleensa hamafi raamofi awaanisafi buqatani mid'aanti buute balleesite, yokhaani hojja nyaapi gumi tante had'e, yokhaani hojja d'ukubafi fayyad'abi worrati bue,

³⁸ kad'acha worraa d'agayifi. Hojja worri kanke ka Israeli nami tokoleeni gaargala ufi arge, harka ufi gara Mana Waaqa kana qabe Waaqa kad'ate,

³⁹ kad'acha isaa d'agayifi. Mana kanke ka gubbati worra ch'aqasi, araaramifi, qarqaari. Si ch'allaati herega nama ch'ufa beekha, tanaafi nama ch'ufa waan isaa male tolchiifi,

⁴⁰ aka worri kanke, hojja lafa atini ababoota worraati kennite keesa tau, si ch'aqasu.

^41-42 Hojja nami gosa d'ibi, ka lafa fago tau, gurra kanke jabaafi waan jabdu atini worra kanketi tolchite d'agaye, aka si kad'atu Mana kanati gad'ufe,

⁴³ kad'acha isaa d'agayifi. Gubba fulla worra keetiti isaa ch'aqasi, waan inni fed'u guutiifi aka gochiti lafa keesa jirtu ch'ufti si beete sii saalfatu, akuma worra kanke ka Israeli. Duuba akanaani worrileeni imbeekha, aka Mani anini jaare kunini fulla iti si kad'atani.

⁴⁴ Hojja atini worra kanke, nyaapa had'a jette ergite, worrileeni fulla jiruti dira atini fohate kanaafi Mana anini si jaare kanaleti fuula deefate si kad'ate,

⁴⁵ kad'acha worraa d'agayifi, gubbati worra ch'aqasi, dabsacha kennifi.

⁴⁶ Hojja worri kanke siti ch'ubbame — qarale nami ch'ubbu intolchine injiru — duuba atini dallansu keesa harka nyaapati worra kennite, nyaapi suni worra boojie lafa d'ibiti geese, ato lafti suni fagole taate,

⁴⁷ kad'acha worra kanketi d'agayifi. Yo lafa suni keesati worri ch'ubbu iraa deebie si kad'ate, dabafi ch'ubbu ufi siti himate, Ee AABBO Waaqa, kad'acha worraa d'agayifi.

⁴⁸ Yo lafa suni keesati worri d'uguma daba ufi iraa deebie, lafa atini ababoota teenna kenniteefi dira atini fohate kanaafi Mana anini si jaare kanati fuula deefate si kad'ate,

⁴⁹ kad'acha worraa d'agayifi. Mana kanke ka gubbati worra ch'aqasi, nahiifi.

⁵⁰ Dabafi ch'ubbu worri siti tolche araaramifi, nyaapa worrale naasisifi.

⁵¹ Worri worruma keeti, ka atini fulla boola ibida ta lafa Misiri keesaa baafte.

⁵² Ee AABBO Waaqa gudda, hojja ch'ufa worra kanke ka Israelitiifi hayyu worrale nahiifi eebisi, hojja worri qarqaarsa si kad'ate ch'ufa d'agayifi.

⁵³ Atini worra suni gosa ch'ufa keesaa fohate, gumi tante tolfate, aka atini gaafa ababoota teenna lafa Misiri keesa baafte Musati d'aamate, worrati himi jetteeni kaani.

Kad'acha eege

⁵⁴ Solomonini kad'acha AABBO Waaqa kad'ate ira deebie jennaani, fulla sorio irati baasani, ta qara inni durati jilbifate, harka olqabate taani dura oleje

⁵⁵ qoonqo olfud'ate, gumi achiti wolti baate ch'ufa, dubbi taanaani eebise:

⁵⁶ AABBO Waaqa, ka akuma inni kakhate gumi ufiti nagaya kenne maqa isaa ha faarsani. Inni waan Musati kakhate ch'ufa yayu guute

⁵⁷ AABBO Waaqi keenna nu woliini jiraatinna, akuma inni duri ababoota teenna woliini jiraate: Inni haguma jiru nu lakise nu bira indeemini:

⁵⁸ Inni saala nu kenne, aka nu hojja ch'ufa waan inni fed'u taane aadaafi seera isaa ka inni ababoota teennaa kenne guunnu nu tolchinna.

⁵⁹ AABBO Waaqi keenna halkani guyya kad'acha anini isa kad'ad'e tana qaabatinna. Inni hojja ch'ufa worra Israelitiifi hayyu worrati waan worri hojja ch'ufa fed'atu kennina.

⁶⁰ Duuba akanaani gochiti lafa keesa jirtu ch'ufti, aka waaqi d'ibiini, AABBO male injirre, beeti.

⁶¹ Isanileeni, worri isaa, garaa tokooni AABBO Waaqa keenna d'ugeefada, aadaafi seera isaa akuma arra tolchitani kana gula deema.

Aka Mana Waaqa eebisani

⁶² Jennaanini hayyufi worri ch'ufti sorio AABBO Waaqaa baase.

⁶³ Solomonini looni kuma diddami lamatiifi hooliye kuma d'ibbafi diddama sorio wold'ageeti qale. Duuba akanaani hayyufi gumileeni Mana Waaqa suni eebifte.

⁶⁴ Guyyuma suni inni ballinna ch'icha Mana Waaqa wod'aka isaa eebise qulqulleese, achiti sorio gubanifi mid'aani Waaqaa baasanifi gabbinna hori sorio wold'ageetiti qalani Waaqaa baase, wonti mesa fakaata ka sibiila diimani mid'aasani sorio irati baasani kaani sorio tana ch'ufa infuud'u tanaafi inni fulla suni eebise sorio irati baase.

⁶⁵ Duuba achiti, fulla Mana Waaqa suniti, Solomonifi worri Israeli ch'ufti guyya torba jila hoosa tolfatani. Nami kaarra Hamathi ta mirgale ch'ufa d'ufe, ammalle bitaa gara seera lafa Misirile ch'ufa d'ufe, artiti nami ch'ufti wolti d'ufe lafa ira dabre.

⁶⁶ Guyya saddeeteeso Solomonini nama ch'ufa galche, waan AABBO Waaqi hojattu isaa Daudifi gumi Israeli ch'ufa eebiseefi, nami ch'ufti Solomoni eebise kae gammadani gale.