1 Hayyoota 3 - KITAABA WAAQA

¹ Solomonini dubra hayyicha Misiri fuud'e akasiini isaani wold'aqani. Inni isii dira Dauditini d'ufe achi teesise, haga inni mana ufitifi Mana AABBO Waaqatifi Yerusalemule d'akhaani marse jaaruuti.

² Gaafasi Mana AABBO Waaqa taka injaare, tanaafi nami fulla heduti sorio Waaqaa baasa.

³ Solomonini AABBO Waaqa jaalate, dubbi abba isaa Daudi gula deeme, ammo innileeni fulla heduti sorio Waaqaa baase hit'aanale aarsefi.

⁴ Gaafa toko inni Gibeoni d'aqe sorio baase, wonti akanatiifi fullaani suni fulla fulla ch'ufa ira jabdu ta sorio iti baasani. Inni qara sorio kuma gube fulla suniti baase.

⁵ Halkani suni AABBO Waaqi oobju keesa isati d'ufe waan jed'eeni, Ana maani sii kennu feeta?

⁶ Solomonini waan jed'eeni, Atini duri hojattu tante abba kiyya Daudi guddo jaalate, innileeni guddo sii saalfate d'ugaafi qajeelumani si jala deeme. Atinileeni akasuma isaa naate, ilma arra fulla isaa lafa mohatu isaa kennite.

⁷ Ee AABBO Waaqa, atini yayu fulla abba kiyya hayyu na tolchite, ato anini daima aka nama fidu imbeenne taatele.

⁸ Anini amma jiddu gumi atini fohate jira, gumi heddu muumme inqamne.

⁹ Tanaafi amma qalbi anini gumi tante tanaani d'uga gula fidu naa kenni, aka anini waan dansaafi hamtu gargari beekhu. Yo atini qalbi naa inkennini, anini akami dandae gumi tana fida?

¹⁰ AABBO Waaqi waan Solomonini kad'ate suni iraa gammade.

¹¹ Waan jed'eeni, Waan atini jireenna kanke d'eera, yokhaani hormaata, yokhaani badi nyaapa keeti kad'achu didde, qalbi kara d'uga gula namaani fiddu na kad'ateefi,

¹² anini waan atini kad'ate suni amma sii tolcha. Anini qalbiifi hubacha ta nami haguma d'alate inargatini, yokhaani ta nami tokoleeni haguma jiru inarganne sii kenna.

¹³ Ammalle waan atini inkad'atinile sii kenna: Atini hormaatafi, guddinna, ka hayyuuni d'ibiini taka inargatini, jireenna kanke keesa argata.

¹⁴ Ammalle yo atini dubbi tiyya ch'aqafte aadaafi seera kiyya guute, akuma Abba kanke Daudi anini lubbu sii d'eereesa.

¹⁵ Jennaani Solomonini damaqe oljed'e tae, aka dubbini suni oobju hubate. Inni Yerusalemu d'aqe, Sanduqa Wold'aqisa AABBO Waaqa dura eje, sorio gubanifi sorio wold'ageeti AABBO Waaqaa baase. Eegi suni hojattu isaa ch'ufa wolti yaame jila tolcheefi.

Aka Solomonini dubbi jajabdu mure

¹⁶ Guyya toko sharmut'i lama wolhimacha hayyu dura d'ufe.

¹⁷ Toko waan jetteeni, Ee hayyicha, anaafi niitiini tunini mana tokoti woliini galla; ato isiini artuma jirtu anini ilma d'iira d'ale.

¹⁸ Anini haga d'ale lama bule jennaani isiileeni ilma d'iira d'alte. Anaafi isii male nami tokoleeni mana suni keesa injiru.

¹⁹ Jennaani halkani toko isiini danu daima isii ira ch'iifte ijeefte.

²⁰ Duuba lafaa kaate gama kiyya dabarte na duuba daima kiyya fud'atte, ka isii ka due kaani na jala keete.

²¹ Boriyyaate anini lafaa kae daima hosifad'a jennaani reefuma ch'alla arge. Anini aka dansaa ilale aka daimi sunini kiyya intahini hubad'e.

²² Ammo niitiini taani waan jette, Hiyo akasiiniti, daimi jiru kunini kiyyuma ka dueti kanketi! Niitiini qara taani waan jette, Akasiiniti, daimi due keeti ka jiru kiyya, duuba worri akasi hayyu durati wolmorme.

²³ Jennaani hayyichi waan jed'e, isani lachu daimi jiru kunini kiyya, ka dueti kanke jettani irati wolmormitani.

²⁴ Duuba hayyichi, goraadeeni na koota jed'e, jennaani d'ufaninifi.

²⁵ Duuba inni waan jed'e, Daima jiru kana wod'akati gargari kuta, nad'eeni tana lachu gama gama kennaafi.

²⁶ Jennaani niitiini haad'a daima suni aka male daima sunii naate, waan hayyuuni jette, Ee hayyicha, daima kana inijeesiini, isii kenni. Ammo niitiini taani waan jetteeni, Nuu tokole inkennini, gargari kuti.

²⁷ Jennaani hayyichi waan jed'e, Daima inijeesiina, niiti qaraa sunii kenna, haati isaa suni.

²⁸ Worri Israeli aka hayyuuni dubbi suni mure d'agaye jennaani, guddo isaa sodaatani saalfatanifi, wonti akanatiifi worri yayu aka Waaqi qalbi d'uga gula woini murani suni isaa kenne hubate.