1 Hayyoota 20 - KITAABA WAAQA

¹ Benhadadini hayyu Shamu, askarti ufi ch'ufa wolti yaame, hayyoota sodomi lama ta fardaafi gaari fardi hirkisu qabdu woliini yaani Samaria marsani had'u d'aqani.

² Inni qoonqo dira Samaria suniti erge waan Ahabu hayyu Israelitini jed'e, Hayyu Benhadadini waan sini jed'u;

³ qarsifi worqifi nad'eenifi ijoolleeni tante dadansaleeni ch'ufti tiyyuma, jibbaad'i, naa lakisi.

⁴ Ahabuni waan jed'eeni, Ee hayyicha, la d'agaye, hataatuti anaafi wonti anini qabu ch'ufti teetuma.

⁵ Jennaani ammalle qoonqooni d'ibiini gara Benhadaditi d'ufte waan jette: Anini qoonqo siti erge, qarsifi worqifi nad'eenifi ijoolle tante jibbaad'i naa lakisi sinjed'e.

⁶ Ammo amma tana anini askarti tiyya siti erge mana kanketifi ka hojattu tanteeti ch'ufa soqad'a, waan feetani ch'ufa keesa guurad'a jed'ani. Worri bori hojja akana tana achi d'ufa.

⁷ Jennaani Ahabuni jaarole lafa isaa ch'ufa wolti yaame waan jed'eeni, Inagartaniyu, nami kunini nu balleesu fed'a. Inni qara qoonqo nati erge, nad'eenifi ijoolleefi qarsifi worqi tante jibbaad'i na lakisi nani jed'e anileeni hayye hataatu jed'eeni.

⁸ Jennaani jaaroleefi gumiini ch'ufti waan isaani jette, Dubbi suni ee jette jala inqabini.

⁹ Duuba inni worra qoonqo Benhadaditini d'ufeeni waan jed'e, waan hayyichaani jettani, Dubbi qara taani la ee jed'e, ammo ta eege tana indandau. Jennaani worri kaani kae yae, ammalle qonqo

¹⁰ Benhadadi d'ibiini gadi dachae waan Ahabuni jed'e, Benhadadini waan jed'u, Hojja anini nama dira keesani kana balleese d'ukeese, d'uke isaa fuud'e natiini galu isaniti inergini, waaqi na balleesina!

¹¹ Ammo Ahabuni waan jed'eeni, waan isani Benhadadini jettani, Abbaani duula haga nyaapa had'e dabsate ufi arguti fayyuma tana durati ufi d'aadaa indeemu.

¹² Benhadadini ka hayyoota goli isaa taani woliini farso waaro keesati d'ugu jiru d'aamsa Ahabu kaani d'agaye jennaani askarti ufi wolti baase aka worri dira suni had'u kurfeese, worrileeni hojuma suni kurfae.

¹³ Jennaani hojuma suni raagi toko gara hayyu Ahabu d'aqe waan jed'eeni, AABBO Waaqi waan siini jed'u, Duula gudda muumme inqamne suni ind'eetini! Anini arra worra ch'ufa harkuma kanketi kenna, duuba atini aka anini d'uguma AABBO Waaqa akasiini beeta.

¹⁴ Ahabuni, nami qara durati had'u eenu? jed'e gaafate jennaani raagi, si jed'eeni.

¹⁵ Duuba hayyichi askarti kakaima ta jara arda lafa suniti mataa jala jirtu gayyaame, askartini suni ch'ufti wolti nama d'ibba lamafi sodomi lama. Duuba eege inni askarti Israeli ta haga kuma torba geetu gayyaame.

¹⁶ Worri guyyuma guddaani, ka Benhadadifi hayyooti — sodomi lama ta goli isaa taani ufuma teteete waaro ufi keesati farso d'uuddu, d'ufe had'e.

¹⁷ Askartini kakaimi taani dura yaati. Askartini Benhadadini dooyaa erge dachaate waan jetteeni, Duulati gara Samariati d'ufu jira.

¹⁸ Inni waan jed'e, Ato worri nagaya barbaada yokhaani woraana yaele innijeesina, ch'ufa akanumati boojia kootaani.

¹⁹ Askartini kakaimi taani ta askartini Israeli eege yaatu, d'ufte,

²⁰ worri ch'ufti worra kaani namu nama toko toko ijeese. Worri Israeli worra reebe, ammo Benhadadini askarti fardaa fud'ate kara d'ibiini baqate bahe.

²¹ Hayyu Ahabuni worra suni reebe, fardaafi gaari fardi hirkisu iraa qabe, akanaani worra suni aka hama dabsate balleese.

²² Jennaani raagi gara hayyu Ahabu d'ufe waan jed'eeni, Beeni, askarti tante jabeesi, aka dansaa irre iti tolchi, mala d'aifi, wonti akanatiifi ganna gad'ufi hayyuuni Shamu ammalle d'ufeti isani had'a.

Aka Ahabuni ammalle Benhadadi dabsate

²³ Hojatuni hayyu Shamu waan isaani jette, Waaqi Israeli Waaqa gareeniti, tanaafi worri Israeli nu dabsate, ammo hojja nu diida keesati wolhaanu inuma dabsanna.

²⁴ Amma waan taatu, hayyoota sodomi lama taani huji worraa taani keesaa baasi fulla worra suni nama d'ibi gugurda askarti tolchi.

²⁵ Duuba duula gudda aka duula qara ka dabsatani kaani baasi, ka fardaafi gaarini fardi hirkisuleeni haguma qara kaani gahu. Yo diida keesati worra Israeli haane maro tana inuma dabsanna. Hayyu Benhadadini ee jed'e mala worra gula bahe.

²⁶ Ganni gahe jennaani askarti ufi wolti yaame dira Afekiti worra Israeli had'u iti d'aabate.

²⁷ Worra Israelile akasuma wolti yaamani lolaa kurfeesani; duuli worraa dira keesaa bahe, fuula worra Shamuti deefate fulla lama ch'ibra tae. Worri Israeli hojja worra shamu ka lafa ira dabre sunini wolti laalani, ree murnya lama fakaata.

²⁸ Raagi gara Ahabu d'aqe waan jed'eeni, AABBO Waaqi waan jed'u, Waan worri Shamu kunini, inni waaqa diidatiniti waaqa gaareeni male jed'eefi, anini duula worra ka muumme inqamne kana harka keetiti kenne, duuba siifi worri kanke aka anini d'uguma AABBO Waaqa hubattani.

²⁹ Bulti torba worri Shamutifi ka Israeli akanumati ka woli inhad'ini gamuma woldaawate. Guyya torbeeso wolhad'ani, worri Israeli worra Shamu nama kuma d'ibba toko hobaase.

³⁰ Ka hafeleeni baqate, dira Afeki duude, d'akhaani marsani dira sunini jaarani worrati jige nama kuma diddami torba hobaase. Benhadadileeni baqate, dira seene, mana toko keesati d'okhate.

³¹ Hojattuuni isaa gara isaa d'at'e waan jetteeni, Me ilaali, hayyooti Israeli naasu qabdi d'ageenne, tanaafi nu woya ch'arqi naqanne, haada mormati mamaranne gara isaa d'anna, gaafiini inni lubbu si baasafa.

³² Duuba worri ch'arqi naqate, haada mormati maraate, gara Ahabu d'aqe waan jed'eeni, hojattuuni tante Benhadadini, lubbu na baasi sini jed'a. Ahabuni waan jed'eeni, Inni ammalle injira? Dansa, inni oboleesa kiyya!

³³ Hojattuuni Benhadadi ta qara dubbi dansa isa iraa eeguti jirtu aka inni oboleesa kiyya jed'u d'ageete jennaani, dubbi suni maachite, waan jette, Ee d'uguma, inni oboleesa keeti! Ahabuni waan jed'eeni, Beena, natiini koota. Benhadadini d'ufe jennaani Ahabuni gaari ufi yaabachiise.

³⁴ Benhadadini waan jed'eeni, Dira duri abbaani kiyya abba kanke iraa fuud'e ch'ufa si deebise, atileeni akuma abbaani kiyya dira Samaria keesa Gabaya tolfate, atileeni Damaski keesa gabaya tolfad'i. Ahabuni waan jed'eeni, Maro atini akana jetteefi, anini si gad'iisa. Duuba worri akanaani wold'aqe, inni isa gad'iise.

Aka raagi Ahabu wollaala iti mure

³⁵ Jecha AABBO Waaqa gula gumi raagoota keesa raagi toko waan raagoota wahela isaa nama tokooni jed'e, Na d'ai. Ammo inni d'au dide jennaani,

³⁶ inni waan jed'eeni, Waan atini dubbi AABBO Waaqa dideefi, akuma atini na bira deemtuuni nyeench'i nyaate si ijeesa. Jennaani akuma inni kae deemeni nyeench'i d'ufe isa ijeese.

³⁷ Jennaani raagumani kaani gara raaga d'ibi d'aqe, Na d'ai jed'eeni. Jennaani raagi kaani akuma inni jed'eeni isa d'ae madeese.

³⁸ Jennaani raagi kaani aka nama ufi wollalchisu woya fuulati hagogate, d'aqe kara d'aatu eje hayyu eege.

³⁹ Jennaani ato hayyuuni arti dabru jiru, inni iti lalabe waan jed'eeni, Ee hayyicha, ato anini nyaapani woli had'uti jiru, askartichi toko nama nyaapa ka inni boojie toko nati kenne, jabeesi nani jed'e, Yo inni siraa baqate si ijeesani yokhaani qarsi kuma sadi baafta nani jed'e.

⁴⁰ Ammo ato anini tae waan d'ibi hojad'u namichi kaani kae baqate. Hayyichi waan jed'eeni, Atini ya ufumaani wollaala ufiti murte, tanaafi akasuma sii tolchu malani.

⁴¹ Jennaani raagi kaani woya taani fuula ira fud'ate, duuba hayyichi aka inni raaga hubate.

⁴² Duuba raagi kaani waan hayyuuni jed'e, AABBO Waaqi waan jed'u: Waan atini nama anini, Ijeesi jed'e, lubbu baafteefi, fulla isaa atini doote, askarti tantele ch'ufa balleesani, waan worri askarti suni gad'iiseefi.

⁴³ Jennaani hayyichi, ka nahe mudame aka hama laalefatu, worra ufi ka Samariati gale.