1 Hayyoota 19 - KITAABA WAAQA

¹ Hayyu Ahabuni waan Eliyaani tolche ch'ufa ammalle aka inni raagoota Baali ch'ufa hobaase niiti isaa Yezebeliti hime.

² Jennaani isiini qoonqo Eliyaati ergite waan jette: Waaqi na ijeesinna, hojja anini bori aka atini raagoota suni ijeefte si inijeesiini.

³ Duuba Eliyaani qoonqo suni d'ageennaani sodaate, aka lubbu ufi baasu hojattu isaa fud'ate kae, dira Beersheba ka lafa Yuda keesa jiru, baqate. Achiti hojattu isaa lakise,

⁴ ufi guyya suni ch'ufa lafa aloo keesa deema oole. Jennaani ato deemu ejate gaadisa mukha jala tae, Waaqaani, lubbu na keesa fuud'i, hojja anini due ira na jirti jed'e.

⁵ Duuba inni mukha kaani jala gach'iise rafe. Jennaani malaikaani d'ufte isa kaafte waan jetteeni, kai waan kana soorad'i.

⁶ Inni kae ufi bira millate qit'afi sorora bisaani d'aatu mata ufiti arge, nyaate, d'uge deebie gach'iise.

⁷ Malaikaani AABBO Waaqa ammalle iti deebite isa kaafte waan jetteeni, Kai, sagale soorad'i, imaltuni siti guddo.

⁸ Eliyaani kae nyaate d'uge, akanaani jajabaate, bulti afurtama gara gaara qulqullo Sinai jed'ani miilaani deeme.

⁹ Artini bahe jennaani goda d'akha toko seene bule. Jennaani AABBO Waaqa isaani dubbate waan jed'eeni, Eliya, maani armaa tolfata?

¹⁰ Inni waan jed'eeni, Ee AABBO Waaqa gudda, anini haguma duriti siuma ch'alla hojad'e, ammo worri Israeli wold'aqisa sii woliini tolfate ch'abse fulla sorio irati si baasani balleese raagoota tante ch'ufa fit'e. Nami hafe naa ch'alla, anale amma ijeesu fed'ani!

¹¹ Jennaani AABBO Waaqi waan jed'eeni, Gadibai me, gaara gubba na dura eji. Jennaani AABBO Waaqi d'aatu isaa dabre, bubbe jabdu gaara ch'ach'absite d'akha fafalansitu gadi buuse — ammo AABBO Waaqi bubbe suni keesa injiru. Bubbeeni taani dabarte jennaani lafti chochote — ammo AABBO Waaqi chochoiti lafa suni keesale injiru.

¹² Eegi lafti chochote ibidi d'ufe — ammo AABBO Waaqi ibida sunile keesa injiru, duuba eegi ibida suni, qoonqooni toko laato d'ufte.

¹³ Eliyaani qoonqo suni d'agaye jennaani woya ufitiini fuula hagogate gabahe afaani goda eje. Jennaani qoonqooni d'ufte waan jetteeni, Eliyaa, maani armaa tolfata?

¹⁴ Inni waan jed'eeni, AABBO Waaqa gudda, anini haguma duriti siuma ch'alla hojad'a, ammo worri Israeli wold'aqisa duri sii woliini tolfate ch'abse, fulla sorio irati si baasani balleese, raagoota tante ch'ufa fit'e. Nami hafe naa ch'alla, anale amma ijeesu fed'ani.

¹⁵ AABBO Waaqi waan jed'eeni, Beeni, lafa aloo ta d'aatu Damaskiti deebii, duuba dira suni — seeni, Hazaeli muudi, hayyu Shamu tolchi;

¹⁶ Yehu ilma Nimshile muudi, hayyu Israeli tolchi. Ammalle Elisha, ilma Shafathi, ka worra Abel-Mehola, muudi, fulla tante raaga tolchi.

¹⁷ Nama baqate Hazaeli duraa bahe Yehuti hobaasa, ammalle ka Yehu duraa bae Elishati hobaasa,

¹⁸ ammo taatule anini nama kuma torba, ka Israeli, ka Baali gula bahe d'ungate durati jilbifate inkad'atiini, imbaasa.

Yaamicha Elisha

¹⁹ Eliyaani kae iti d'aabate, Elisha ilma Shafathi, ka tae qotiyoni lafa qotu jiruni bahe; karaaba t'indi kud'ani tokoti isa dura yaa, ammo inni ka eegeetini qotu jira. Eliyaani woya ufi ufira fuud'e Elishati uyise.

²⁰ Jennaani Elishani qotiyo lakise, Eliyaa gula utaale waan jed'eeni, Eegi, abbaafi haad'a tiyyaani nagayati jed'e, Duuba si gula d'ufa. Eliyaani waan jed'eeni, Hayye, beeni deemi, anini si ind'owu!

²¹ Jennaani Elishani karaaba isaa ta qotiyo taani qaqale, qaampara isii ch'ufa qoraani tolche, bobeese, fooni sunini d'aabe biyyaani gololche. Duuba kae, Eliya gula deeme qarqaare.