1 Hayyoota 16 - KITAABA WAAQA

¹ Jennaani AABBO Waaqi raaga Yehu ilma Hanani dubbateeni, d'aamsa kana Baashati himi jed'eeni:

² Anini si, nama woma keesa injirre fuud'e, gudda worra kiyya ka Israeli si tolche. Ammo atileeni amma ya akuma Yeroboamu ch'ubbu tolchite gumi tiyya ch'ubbu keesa buufte. Ch'ubbuuni gumi tiyya suni amma la na dallansiifte,

³ tanaafi anini amma siifi worra kanke lafa iraa balleesa, akuma anini duri Yeroboamu balleese.

⁴ Nama worra keeti ka dira keesati due ch'ufa sareeti nyaata, ammo ka alati duu ch'ufa allaatiti nyaata.

⁵ Waan Baashani tolcheefi jannooma isaa ch'ufa kitaaba Odu Hayyoota Israeli keesati t'aafaniti t'aafani.

⁶ Eegi suni Baashani due dira Tirsa keesati awaalani, jennaani ilmi isaa Elani fulla isaa hayyu tahe.

⁷ D'aamsa AABBO Waaqi Baashafi worra isaati d'aame raaga Yehu jed'aniniti d'ufeeni, wonti inni dubbi suni d'aamefi maro ch'ubbu Baashani isa durati tolcheefi. Inni ch'ubbu tolche, ammo worra Yeroboamule ch'ufa fit'e akasiini Waaqa dallansiise.

Hayyu Israeli ka Ela jed'ani

⁸ Ganna diddami jaeeso ka Asani hayyu Yuda tahe, Elani, ilmi Baasha, hayyu Israeli tahe, ganna lama Tirsa keesa lafa mohate.

⁹ Jennaani hojattuuni isaa toko, ka Zimiri jed'ani, ka gaarilee fardi hirkisu haga toko inni iti mata, isati malate. Guyya toko ka Elani Tirsa keesa mana Arsa, ka hojattu mana hayyuti mata, seene farso d'uge machae.

¹⁰ Zimirini mana suni seene isa d'ae ijeese fulla isaa hayyu tahe. Wonti kunini ch'ufti ganna diddami torbeeso, ka Asani lafa Yuda mohate, taate.

¹¹ Zimirini akuma hayyu taheeni worra Baasha ch'ufa fit'e, fiit'afi jaalani isaa tokole inhambimne ch'ufa hobaase,

¹² duuba dubbi AABBO Waaqi raaga Yehuni Baashati hime taani gula, Zimirini worra Baasha ch'ufa fit'e.

¹³ Maro waan worri boch'e kad'atuufi ammalle maro worri worra Israeli ch'ubbu keesa buusefi, Baashafi ilma isaa Elani AABBO Waaqa Israeli dallansiisani.

¹⁴ Waan Elani tolche ch'ufa kitaaba Odu Hayyoota Israeli keesati t'aafaniti t'aafani.

Hayyu Israeli ka Zimiri jed'ani

¹⁵ Ganna diddami torbeeso ka Asani lafa Yuda mohate, Zimirini bulti torba Tirsa keesa gosa Israeli mohate. Askartini Israeli dira Gibethoni, ka lafa Filisti, had'u jirti;

¹⁶ jennaani askartini suni aka Zimirini hayyuuti malate ijeese d'ageennaani artumati worri ch'ufti namicha gudda worra ka Omri jed'ani hayyu tolfate.

¹⁷ Omrifi askartini isaa Gibethoni kaate, d'at'e Tirsa haate.

¹⁸ Zimirini aka dira suni qabani arge jennaani, mana hayyu keesa fulla jabdu seene, mana suni ch'ufa ibida iti kaye, ibida suni keesati ufi ijeese.

¹⁹ Wonti woni kunini taateefi waan inni AABBO Waaqa durati ch'ubbu tolcheefi. Akuma Yeroboamu, inni ch'ubbu tolche AABBO Waaqa dallansiise worra Israelile ch'ubbu keesa buuse.

²⁰ Waan Zimirini tolche ch'ufafi ammalle aka inni hayyuuti malate ch'ufa, kitaaba Odu Hayyoota Israeli keesati t'aafaniti, t'aafani.

Hayyu Israeli ka Omri jed'ani

²¹ Worri Israeli gargari bahe hagi toko Tibni, ilma Genathi hayyu tolchu fed'e, hagi tokoleeni Omri gula bahe.

²² Ammo eege worri Omri gula bahe dabsate, Tibnini due, Omrini hayyu tahe.

²³ Duuba ganna sodomi tokeeso ka Asani hayyu Yuda tahe, Omrini hayyu Israeli tahe, ganna kud'ani lama lafa mohate. Ganna jaani qara inni dira Tirsa keesa mohate,

²⁴ duuba eege gaara Samaria, namicha Shemeri jed'ani toko ira qarsi kuma jaatiini bite. Omrini gaara suni irati dira jaare, maqa isaa Samaria baase, maqa abba gaara suni ka Shemeri jed'ani gula.

²⁵ Omrini nama isa durati hayyu tahe ch'ufa ira AABBO Waaqa durati ch'ubbu tolche.

²⁶ Akuma Yeroboamuni qara tahe, innileeni ch'ubbu tolche, biyyale ch'ubbu keesa buuse, waan harkaani boch'ani kad'achiise, akanaani AABBO Waaqa Israeli dallansiise.

²⁷ Waan Omrini tolche ch'ufafi waan inni guutele ch'ufa kitaaba Odu Hayyoota Israeli keesati t'aafaniti, t'aafani.

²⁸ Eege Omrini due, Samaria keesati awaalani, jennaani ilmi isaa Ahabuni fulla isaa hayyu tahe.

Hayyu Israeli ka Ahabu jed'ani

²⁹ Ganna sodomi saddeeteeso ka Asani lafa Yuda mohate, Ahabuni, ilmi Omri, hayyu Israeli tahe, ganna diddami lama dira Samaria keesa lafa mohate.

³⁰ Inni nama isa durati hayyu tahe ch'ufa ira AABBO Waaqa durati ch'ubbu tolche.

³¹ Inni daba Yeroboamuni tolche womatu indarre, tanaafi Yezebeli ta dubra Ethbaali hayyu Sidoni fuud'e waaqa Baali jed'ani kad'ate hojateefi.

³² Duuba Samaria keesa mana Baali iti kad'atani jaare, waan sorio irati qalani mid'aase, mana suni keesa kaye.

³³ Ammalle akheekha waaqa Ashera jed'ani mid'aase, hayyooti Israeli ta isa duraa ch'ufa ira AABBO Waaqa Israeli dallansiise.

³⁴ Bara inni lafa fide suni Hielini, ka worra Betheli, dira Yeriko maro lameeso jaare. Akuma AABBO Waaqi Yoshua ilma Nuniti hime kaani Hieli ilma isaa ka angafa ka Abiramu jed'ani, gaafa inni dira Yeriko suni yayabe iraa due, ammalle inni gaafuma fullo dira suni jaare ilma isaa maand'icha ka Segebu jed'ani d'abe.