1 Hayyoota 11 - KITAABA WAAQA

¹ Solomonini nad'eeni heddu gosa d'ibi jaalate. Niiti dubra hayyu Misiri male inni nad'eeni gosa Hitifa ta Moabufa ta Amonifa ta Edomufa ta Sidoni fa fuud'e.

² Inni ato AABBO Waaqi worra Israelitini, nad'eeni gosa d'ibi infuud'ina, isiini hegeri qalbi teesani garagalchite Waaqa d'ibi gula isani deebifti jed'u, nad'eeni suni fuud'e.

³ Solomonini dubra d'ibba torba fuud'e ammalle nad'eeni d'ibba sadi d'ibi barate worraati galfate. Duuba nad'eeni suni Waaqa iraa isa gorsite.

⁴ Inni jaare jennaani waaqa d'ibi isa kad'achiifte inni, aka abba isaa Daudi, AABBO Waaqa isaa jaalate garaa tokooni gula indeemne.

⁵ Inni Ashtorethi waaqa worra Sidonitifi waaqa hama Milkomu jed'ani ka worra Amoni kad'ate.

⁶ Inni aka abba isaa Daudi garaa tokooni AABBO Waaqa gula deemu dide, isa durati ch'ubbu tolche.

⁷ Gaara Yerusalemuni ilaboru irati inni fulla Kemoshi waaqa hama Moabutifi Moleki waaqa hama Amoni iti kad'atani jaare.

⁸ Ammalle inni fulla waaqa iti kad'atani, ta nad'eeni isaa ta gosa d'ibi ch'ufti hit'aana iti aarsite waaqa ufiti sorio baaftu, jaare.

^9-10 Ato AABBO Waaqi Israeli Solomoniti maro lama mullate waaqa gosa d'ibi inkad'atiini jed'eenile, inni isa ch'aqasu dide iraa gore. Tanaafi AABBO Waaqi iti dallane

¹¹ waan jed'eeni, Waan atini beekha wold'aqisa nu woliini tolfanne ch'absite seera kiyya guutu dideefi anini hayyuma siraa fuud'e hojattu tante nama toko kenna.

¹² Ammo taatule anini haga atini jirtu woma si intolchu, maro abba kanke Dauditifi; ammo gaafa ilmi kanke hayyu tahu wo si tolcha.

¹³ Ammalle anini finna lafa ch'ufa isa iraa infuud'u; ammo gosa toko illakisafi, maro hojattu tiyya Dauditifi maro Yerusalemu ka anini dira kiyya tolfad'eefi.

Nyaapa Solomoni

¹⁴ Jennaani AABBO Waaqi Hadadi ka gosa Edomu, ka worri isaani hayyu, nyaapa Solomoniti tolche.

^15-16 Duri gaafa Daudini lafa Edomu had'e dabsate, namichi gudda askarti isaa ka Yoabu jed'ani achi nama awaalu d'aqe, isaafi jari isaa lafa Edomu keesa jia jaa taani. Duuba worri gaafasi nama d'iira ka Edomu keesa jiru,

¹⁷ Hadadifi hojattu abba isaa, ta gosa worra ta gari, ta lafa Misiriti baqate male, ch'ufa fit'e. (Gaafasi Hadadini ijoolle.)

¹⁸ Worri baqate sunini Midiani bahe, Parani d'ufe, achiti nami d'ibiini worrati d'ufe woliini taani. Jennaani lafa Misiri d'aqani, fulla hayyu d'ufani, hayyuuni suni lafafi manafi sagalele Hadadii kenne.

¹⁹ Faraoni Hadadi maache, intala isaa soddaa, ta oboleeti niiti isaa hayyiti Tapenesi, fuusise.

²⁰ Intalti suni ilma toko isaa d'alte, ka Genubathi jed'ani; ilma suni hayyititi mana ufi keesati ilma hayyuutini woliini guddise.

²¹ Hadadini aka Daudifi, namichi gudda askarti ka Yoabu jed'ani kaani duani d'agaye jennaani, waan hayyuuni jed'e, lafa tiyyati galu fed'a, na gad'iisi.

²² Hayyichi waan jed'eeni, Maanifi galu feeta? Waan atini arma d'abde jira? Hadadini waan jed'eeni, Woma ind'amne, na gad'iisi jed'e, kae iti d'aabate.

²³ Ammalle Waaqi Rezoni ilma Eliada nyaapa Solomoniti tolche. Rezonini sunini duri abba Hadadezeri hayyu Soba duraa baqate,

²⁴ gudda goli shifta tahe. (Wonti kunini gaafa Daudini Hadadezeri dabsate goli isaa ta lafa Shamu ch'ufa fit'e taate.) Rezonifi jari isaa yaani dira Damaski qubatani, achiti jari isaa suni hayyu shamu isa tolche.

²⁵ Inni bara Solomonini lafa fide suni nyaapa Israeliti.

Waan Waaqi Yeroboamuti kakhate

²⁶ Nami d'ibiini ka garagale Solomoniti nyaapa tahe Yeroboamu ilma Nebati, ka qara isaa hojatu; inni nama dira Sereda lafa Efraimu keesa. Haati isaa hiyyeeti d'iirsa inqamne, ta Serua jed'ani.

²⁷ Wonti inni garagale hayyuti nyaapa taheefi tana: Solomonini boola dira Yerusalemu ilaboru duuche naabo dira sunile mid'aasu jira.

²⁸ Yeroboamuni nama jajaba toko, ka guddo huji mid'aasu; Solomonini akasi arge jennaani, huji irreeni nama hojachiisani ta Manasetifi ta Efraimu ch'ufa gudda iti tolche.

²⁹ Guyya toko, ka Yeroboamuni Yerusalemu deemu, raagi Ahiya jed'ani ka worra Shilo, lafa aloo keesati, ka inni koba deemu, iti d'ufe.

³⁰ Ahiyaani woya haareeti ufi iraa qabu fulla kud'ani lama tatarsaase,

³¹ waan jed'e, Tatarsaa woya tana kud'ani fud'ad'i, wonti akanatiifi AABBO Waaqi Israeli waan siini jed'u, Anini hayyuma Solomoni iraa fuud'e, gosa kud'ani sii kenna,

³² Solomoni gosa toko ch'alla fud'ata, maro hojatu kiyya Dauditifi Yerusalemu dira anini lafa Israeli ch'ufa keesaa fohad'e kiyya tolfad'eefi.

³³ Wonti anini waan kana tolchufi Solomoniti na dide waaqa gosa d'ibi kad'ate: Ashtorethi waaqa Sidoni, Kemoshi waaqa Moabu, Milkomu waaqa Amoni. Solomonini ya waan hamtu tahe na dide, aadaafi seera kiyya ka abbaani isaa Daudini guute, iraa gore.

³⁴ Ammo anini hayyuma ch'ufa Solomoni iraa infuud'u, haga inni jirule woma intolchu, wonti anini akasi tolchufi maro hojattu tiyya Daudi ka anini fohad'e innileeni aadaafi seera kiyya guutefi.

³⁵ Anini hayyuma ilma Solomoni iraa fuud'e, gosa kud'ani sii keenna.

³⁶ Ammo gosa toko ilma Solomoniti lakisa, aka anini hojja ch'ufa nama d'aloota Daudi ka dira Yerusalemu, ka anini fohad'e, iti na kad'atani mohatu, keesa ind'amne,

³⁷ ammo anini si fuud'e hayyu Israeli si tolche, lafa atini feetu ch'ufa fidda.

³⁸ Yo atini dubbi tiyya ch'aqafte seera kiyya guute waan anini fed'u ch'ufa akuma hojattu tiyya Daudi tolchite na gammachiifte anini hojja ch'ufa si woliini jiraad'e, hayyu Israeli si tolche, akuma Daudi tolche d'aloota kankele hayyu lafa tana tolcha.

³⁹ Maro ch'ubbu Solomonitifi anini d'aloota Daudi ingaargalcha, ammo guyya ch'ufaniti.

⁴⁰ Tanaafi Solomonini Yeroboamu ijeesu fed'e, ammo inni hayyu Misiri ka Shishaki jed'aniti baqate, haga Solomonini duuti achuma tae.

Duisa Solomoni

⁴¹ Waan Solomonini tolche ch'ufa, waan inni taheefi qarooma isaa ch'ufa, kitaaba huji Solomoni jed'ani keesati t'aafani.

⁴² Inni ganna afurtama Yerusalemu keesa worra Israeli ch'ufa mohate.

⁴³ Duuba eege inni due jennaani dira Daudi keesati isa awaalani, ilmi isaa Rehoboamuuni fulla isaa hayyu tahe.