1 Hayyoota 1 - KITAABA WAAQA

Hayyu Daudi ka jaare hobae

¹ Hayyu Daudini jaare hobae jennaani jari isaa woya iti uyise, ammo woyaani sunileeni d'aamocha isa ind'owarre.

² Duuba jari isaa waan isaani jed'e, Ee hayyicha, eegi, dubra si barbaanna, ta sii wahelchite si qorqorattu. Isiini ha si d'aatu ch'iifte nafa si owiftu.

³ Jennaani Israeli ch'ufa keesa nama ergani, dubra mimid'aadu barbaadani, lafa Shunami keesati intala toko ta Abishagi jed'ani argani hayyuutini d'ufani.

⁴ Isiini guddo mid'aadu, hayyichaa hojatte guddo isaa qorqorate, ammo inni taka bira imbulle.

Aka Adoniani hayyu ufi tolche

⁵ Duuba Adoniani, ilmi Hagi, ufi guddise waan ufiini jed'e, Anini hayyu taha; jennaani gaari fardi hirkisufi nama farda yaabatule tolfate, nama shantama ka isa dura yaule tolche.

⁶ (Abbaani isaa taka, atini maanifi akana tata jed'e isaa indalansimne. Inni guddo fuula mid'aaga, d'alootale Absalomuti aana.)

⁷ Inni Yoabu ilma Seruyatifi qaallicha Abiatharini wolhaasaani, worrileeni dubbi isaa gula gale qarqaare.

⁸ Ammo qaallichi Sadoki jed'anifi, Benaiya ilma Yehoiaditifi raaga Nathani jed'anifi Shimeifi, Reifi askartini Daudi eedduleeni, goli Adonia tau didde.

⁹ Guyya toko Adoniani holafi loonifi yabbiye gagabbo qale, fulla d'akha Bofa jed'ani, ta d'aatu maddo Enrogeliti, sorio baase. Inni ilmaani hayyu Dauditifi hojattu hayyu ta gosa Yuda jila suniti yaame,

¹⁰ ammo oboleesa isaa Solomonifi raaga Nathani jed'anifi Benaiyafi askarti Daudi eeddu taani tokole iyyaamne.

Aka Solomoni hayyu tolchani

¹¹ Jennaani Nathanini Bathsheba haad'a Solomoni d'aqe, waan jed'eeni, Atini aka Adoniani ilmi Hagithi ka Daudini quba inqamne hayyu ufi tolche ind'ageenne?

¹² Hojja atini lubbu tanteetifi ta gurba kanke Solomoni baasu feete, gorsa kiyya kana d'agayi,

¹³ hayyu Daudi d'aqi, waan jettuuni, ee hayyichi, atini duri nati kakhatte, ilmi kanke Solomonini fulla tiyya hayyu taha nani injenne? Adoniani akami amma hayyu tahe re?

¹⁴ Duuba ato atini teete dubbi suni isati himtu anileeni d'ufe dubbi tante d'ugeesa.

¹⁵ Jennaani Bathshebani gara hayyu d'at'e, fulla inni ch'iisuti iti d'ufte. Inni waan jaare hobae, Abishagi intala lafa Shunamiti d'ufte taaniti isa qorqorachu jira.

¹⁶ Bathshebani d'ufte isa durati gadi jette jennaani inni waan jed'eeni, Atini maani feeta?

¹⁷ Isiini waan jetteeni, Atini duri maqa AABBO Waaqa kanketini nati kakhate, ilmi kanke Solomonini eegi tiyya hayyu taha nani jette, ee hayyicha.

¹⁸ Ammo Adoniani yayu hayyu tahe, ka atini quba inqamne.

¹⁹ Inni ya loonifi yabbiye gagabboofi hooliye heddu qale, qaallicha Abiathari jed'anifi, Yoabu gudda askarti teeti jila sorio suniti yaame, ammo ilma kanke Solomoni iyyaamne.

²⁰ Amma tana, ee hayyicha gurri nama Israeli ch'ufti sii ch'aqasa, aka atini nama hayyuma siraa fuud'u lalabdu.

²¹ Yo atini akasi tolchu didde, guyyuma atini dootu naafi ilma kiyya Solomonile aka nama hamama woi balleeseti nu heregani.

²² Ato isiini teete dubbatu, raagi Nathani jed'ani kaani iti olseene.

²³ Jennaani aka Nathanini arti jiru hayyuti himani, Nathanini d'ufe isa durati gadi jed'e,

²⁴ Waan jed'eeni, Ee hayyicha, atini aka Adoniani hayyuma siraa fuud'u ya lalabde.

²⁵ Inni arra yayu d'aqe loonifi hooliyeefi yabbiye gagabbo heddu qale, ilmaani tanteetifi Yoabu gudda askarti tanteetifi qaallicha Abiatharile jila suniti yaame, amuma worri tae hayyu Adonia lubbuuni tante ha d'eeratu! jed'e eebisufi jira.

²⁶ Ammo inni anaafi qaallicha Sadoki jed'anifi Benaiyafi yokhaani Solomoni tokole iyyaamne.

²⁷ Ee hayyichi, waan kana ch'ufa d'uguma siti tolche, ka nama hayyuma siraa fuud'u hojattu tante tokoleti inhimini?

²⁸ Jennaani hayyu Daudini waan jed'eeni, Beeni, Bathsheba gayyaami, duuba isiini d'ufte isa dura ejite.

²⁹ Jennaani inni waan isiini jed'e, Anini maqa AABBO Waaqa, ka gaargala ch'ufa keesaa na baaseni kakhad'a,

³⁰ aka arra kakhu anini duri maqa AABBO Waaqa Israelitini si kakhad'e, ta anini ilmi kanke Solomonini hayyuma nara fuud'a sini jed'e guutu.

³¹ Jennaani Bathshebani durati jilbifate waan jetteeni, Gudda kiyya, hayyu Daudi, lubbuuni tante ha d'eeratu!

³² Jennaani hayyu Daudini Sadokifi Nathanifi Benaiya nama iti erge yaame. Worri d'ufe,

³³ jennaani waan jed'eeni, Jara na hojatu; yaama woliini yaa, ilma kiyya Solomoni gaange tiyya yaabachisaa, maddo Gohini geesa,

³⁴ achiti Sadokifi Nathanini ha isa muudani, hayyu Israeli tolchani. Duuba magalata d'aa, hayyu Solomoni lubbuuni isaa ha d'eeratu jed'a lalaba!

³⁵ Ammalle hojja inni barch'uma kiyya ka hayyuma ira teesuma gadeebule gula yaa. Inni fulla tiyya hayyu taha, wonti akanatiifi inni nama anini fohad'e ka Yudafi Israeli fidu.

³⁶ Benaiyani waan jed'eeni, Hayye ha tatuuti, AABBO Waaqi kanke guutinna.

³⁷ Akuma AABBO Waaqi si eebise, ee hayyicha, inni ha Solomonile eebise hayyuma isaa tantele ira jabeesu.

³⁸ Duuba Sadokifi Nathanifi Benaiyafi askartini hayyu eeddu Solomoni gaange hayyu Daudi yaabachisani maddo Gihoniti geesani.

³⁹ Achiti Sadokini d'ad'a buuda keesa jiru, ka inni Waaro Woyyuma keesa d'ufeenini muude. Jennaani magalata d'aani, nami ch'ufti, lubbuuni hayyu Solomoni ha d'eeratu jed'e lalabe,

⁴⁰ duuba isa gula yaani fulludo d'aani, lalabani gammadani, lafa chochoosani.

⁴¹ Adoniafi worri inni yaame kaani, ato gololfachu jiranu lalaba kaani d'agayani Yoabuni lalaba suni d'agaye jennaani waan jed'e, Iyyanti dira keesa d'ufti tunini maani?

⁴² Ato inni dubbachu jiru, Yonathanini, ilmi qaallicha Abiathari, gad'ufe jennaani Adoniani waan jed'eeni, Kooti olseeni, nami dansaani aka keeti kunini silaaftu odu dansa ind'abu.

⁴³ Yonathanini waan jed'eeni, Hiyo akasiiniti, hayyichi Daudini yayu Solomoni hayyu tolche.

⁴⁴ Inni yayu Sadokifi Nathanifi Benaiyafi askarti hayyu eeddu isa gula erge worri gaange hayyuu isa yaabachiise,

⁴⁵ duuba qaallichi Sadoki jed'anifi Nathanini fulla maddo Gihoniti isa muudani. Jennaani worri gammade, iyye lalabe dira duude, tanaafi amma diri ch'ufti ya chochoe. Lalabi isani reefu d'ageetani suni,

⁴⁶ hayyuuni amma Solomoni.

⁴⁷ Tana malele jari hayyu hojatu, hayyicha Dauditi olduude, nagaya fuud'e eebiseefi waan jed'e, Waaqi kanke ha Solomoni sira gurra baafachise hayyuma isaale tante iraa guddisuti. Jennaani hayyu Daudini sire isaa irati gajed'e,

⁴⁸ Waaqa kad'ate waan jed'e, Koota, AABBO Waaqa keenna ka Israeli faarsina, ka arra ilmaani tiyya keesa nama toko fulla tiyya hayyu tolche, nale lubbu bulche, waan kana na garsiise.

⁴⁹ Jennaani nami Adoniani yaame kaani ch'ufti aka hama mudame, kae gargari namu kara ufi baqate.

⁵⁰ Adoniani, ka guddo Solomoni sodaate, kae gara Waaro Woyyuma d'aqe, gaafa waan mesa fakaata kaani qabate.

⁵¹ Jennaani waan Solomonini jed'ani, Adoniani si sodaate gaafa waan mesa fakaata kaani qabate waan jed'e, Hayyu Solomonini ha qara nati kakhatu aka goraadeeni na inijeemne.

⁵² Solomonini waan jed'e, Yo inni d'eete wollaala ufi iraa deebie, wonti tokoleeni ta isa tolchani injirtu; ammo yo wollaala irati argani inni kauma duu.

⁵³ Jennaani hayyu Solomonini nama erge Adonia yaame, gaafa inni qabatu kaani biraa fuud'ani. Adoniani gara hayyu d'aqe durati gajed'e jennaani hayyuuni, Beeni gali jed'eeni.