1Tasaloonqe 4 - KITAABA WAAQA

¹ Dubbi buufata, oboleyaani, isani aka teetani Waaqa gammachiiftani nura ya barattani. Haguma duriiti isani akasuma teetani. Amma nu isani kad'anna, maqa Aabbo Yesotiini, aka isani hagasile ira jabaattani.

² Wonti akasitiifi waan nu jabeenna Aabbo Yesotiini isani barsiimne imbeetani.

³ Wonti Waaqi isani iraa fed'u tana: inni isanii qulqullooftani algalooma lagattani fed'a.

^4-5 Nami d'iira ch'ufti aka worra Waaqa imbeenne, ka d'araa nafaa hamtu gula yau intolchiini; ammo ha kara dansa qulqullooni niiti ufi woliini tau.

⁶ Akanaani nami tokoleeni oboleesa ufiti dabe waan isaa iraa imfud'atiini. Nu waan kana qara isaniti himne, ya isani guddo gorsine, aka Aabbooni worra waan akana kana tolchu balleesu.

⁷ Waaqi, Algalooma keesa taa nuuni injenne, ammo Qulqullooma keesa taa jed'e.

⁸ Tanaafi nami barsiisa tana dide ch'ufti nama indinne ammo Waaqa ka Lubbu ufi Qulqullo isanii kennu dida.

⁹ Wonti anini, Nama d'ugefatu jaalad'a jed'e t'aafuufi injirtu. Waaqi ya aka isani woli jaalattani isani barsiise.

¹⁰ Ammalle oboleyaani Makedonia keesa jirtu ch'ufa ya akasi jaalattani. Tanaafi nu isani kad'anna, oboleyaani, aka hagasira jaalattani.

¹¹ Jabaad'a, nagayaani taa, waan biyyaa keesa inseeniina, harka keesaniini hojad'a, akuma nu qara isaniti himne.

¹² Akanaani worri ind'ugefatiini isanii ch'eere foka, duuba akasiini waan feetani nama tokole inkad'attani.

Waan d'ufiisa Aabbo

¹³ Oboleyaani, nu isanii waan d'uga ka worra due dabre barattani feena, aka isani aka worra abdi inqamne ilaalefanne.

¹⁴ Nu aka Yesoni due kae d'ugefanna; tanaafi aka Waaqi worra d'ugefate ka duele isa woliini d'ufuuni ind'ugefanna.

¹⁵ Barsiisaani Aabbo ta nu isani barsiimnu tana: nu worri gaafa Aabbooni deebiu jirru, worra qara due kaani dura iyaanu.

¹⁶ Qonqo jabeennati d'ufa, qonqo malaika guddo, qonqo magalata Waaqa, Aabbooni gaafasi gubbaa gadi bua! Worri ato Kristo d'ugefatu due qara duisa keesaa kaa;

¹⁷ nu worra gaafasi jirru ch'ufa dumansa keesati worra kaani woliini wolti guurani, gubbati Aabbooni wolwoldeenna. Duuba guyya ch'ufa Aabbo woliini teena.

¹⁸ Tanaafi dubbi tanaani woljabeesa.