Filemɔ̃ Sɛbɛ 1 - A NAAŊMƖN PƲLƖ̃-TA-PAALAA

A PUORFƲ

¹ A maa Pol ba na pɔw a kasu pʋɔ a *Jeeju-Kirisi ɩnɛ, nɩ a sɩ yɛbɛ Timote, ɩ̃ tɩɩrɛ a sɛbɛ na kʋrɔ a fʋ̃ʋ, sɩ baraa Filemɔ̃ na ɩ a sɩ lãa-tʋnɔ,

² nɩ a Afiya na ɩ a sɩ yɛ-pɔw, nɩ a Arasɩb na ɩ a sɩ jɛjɛb-tɔ sʋbɔ, ɓã taa nɩ a popuorbo bala na ma duoro taa a be a fʋ yir pʋɔ.

³ A sũofʋ nɩ a pɩɛnfʋ na yi a sɩ Sãa Naaŋmɩn nɩ a sɩ Nɩ-kpɛ̃ɛ Jeeju-Kirisi sɛ̃, á be a nyɩ jie.

A FILEMƆ̃ ƳƆ̃W-NYÃA NƖ A Ʋ NƲFƲ

⁴ Filemɔ̃, a daar a jaa ɩ̃ na ma sʋɔrɔ a Naaŋmɩn, ɩ̃ ma bɔ̃w nɩ fʋ na, mɩ pɛwrɛ nɩ ʋ,

⁵ a-na-ɩ ɩ̃ ma wõ na a ba ƴɛrɛ a fʋ nʋfʋ ƴɛrɩ̃ fʋ na tɛrɛ nɩ a Naaŋmɩn deme ba jaa, nɩ a fʋ ƴɔ̃w-nyãa fʋ na tɛrɛ a Nɩ-kpɛ̃ɛ *Jeeju jie.

⁶ Ɩ̃ sʋɔrɔ na a Naaŋmɩn a sɩ bõ-ƴen ɩfʋ a ƴɔ̃w-nyãa pʋɔ na tʋɔ maal fʋ a fʋ na sɩrɩ̃ bɔ̃w a yel-sono ala a jaa sɩ na pɔw a *Kirisi jie.

⁷ Yɛbɛ, ɩ̃ cɩlɛ na mɩ tɛrɛ nɩ a su-ɓaar a nʋfʋ fʋ na tɛrɛ nɩ a nɩbɛ ɩnɛ a-na-ɩ fʋ ɓaalɩ̃ na a Naaŋmɩn deme sube.

A POL NA ƁAALA A FILEMƆ̃ A ONEJIM ƖNƐ

⁸ Ala-ɩ̃-sɔ, a ala saarɩ̃ ɩ ɩ̃ tɛrɛ na a sɔr a *Kirisi pʋɔ na tʋɔ yel fʋ a ala fʋ na sɛw na maal

⁹ ɩ̃-cɛ ɩ̃ bʋɔrɔ na ɩ̃ sʋɔr fʋ a nʋfʋ ɩnɛ. A maa Pol na ɩ a dab-nyãw ba na lɛ pɔw a ƴɛ̃ƴɛrɩ̃ na a kasu pʋɔ a *Jeeju-Kirisi ɩnɛ,

¹⁰ ɩ̃ sʋɔrɔ fʋ na a Onejim ɩnɛ, na lɩɛb ɩ a ɩ̃ bie ɩ̃ na dɔw a ka a kasu pʋɔ.

¹¹ A korĩ-cɛ ꞌwaa dãa ɩ bom wa, ɩ̃-cɛ a ƴɛ̃ƴɛrɩ̃ na ʋ lɩɛbʼã ɩ bom a fʋ jie nɩ a ɩ̃ jie.

¹² Ɩ̃ bara ʋ na ʋ wɩɛrɛ a fʋ jie. A ƴɛ̃ƴɛrɩ̃ na ʋ ɩ na a ɩ̃ ji-gãw.

¹³ Ɩ̃ ɩ̃ dãa na tɩɛrɛ ɩ̃ tɛrɛ ʋ a ka ʋ na sũono ma a fʋ jie, a mɩnɛ ɩ̃ na be a kasu pʋɔ a Naaŋmɩn ƴɛr-son ɩnɛ.

¹⁴ Ɩ̃ maa bʋɔrɔ ɩ̃ maal bom a fʋ puo-sɔw, fɛrʼɩ̃ fʋ a fʋ maal ma a vɩlaa wa, ɩ̃-cɛ a yi a fʋ mɩ̃ɛ jie.

¹⁵ A nʋmɔ-wa-sɔw fʋ dãa na ŋmaa taa nɩ a Onejim daar fɩ̃ɩ pʋɔ a mɩnɛ a fʋ na tʋɔ lɛ pɔw ʋ, a nyɩ lɛ be taa a daar a jaa.

¹⁶ A-na-ɩ ꞌwaa lɛ cãa ɩ gbãgbaa tɛw wa, ɩ̃-cɛ ʋ gãw na a gbãgbaa; ʋ lɩɛbʼã ɩ yɛb-nʋnaa. A ɩ̃ mɩ̃ɛ jie, a lɛ a sɩrɩ̃ wɔ̃, ɩ̃ a fʋ jie a gãw na a lɛ, a mɩnɛ ʋ na ɩ a nɩsaa salaa, nɩ a mɩnɛ ʋ na ɩ a fʋ yɛbɛ a Nɩ-kpɛ̃ɛ pʋɔ.

¹⁷ Ala-ɩ̃-sɔ a ala ɩ ɩ̃ ɩ na a fʋ lãa-tʋnɔ, sɔw de ʋ a mɩnɛ a naa dãa ɩ a maa ʋ.

¹⁸ A ala ɩ ʋ sãw fʋ na bom, mɩɩ ʋ tɛrɛ fʋ na san kãw, fú bar kʋ ma ɩ̃ ya.

¹⁹ A maa mɩ̃ɛ Pol ɩ̃ sɛb a sɛbɛ na nɩ a ɩ̃ nuu: ɩ̃ na ya fʋ na. Ɩ̃ maa bʋɔrɔ ɩ̃ yel fʋ a san kpee fʋ na tɛrɛ a ɩ̃ jie wa, a baafʋ ʋlɔ fʋ na tɛrɛ.

²⁰ Ɔɔ, yɛbɛ, ɩ̃ sʋɔr fʋ na a ʋna sũofʋ a Nɩ-kpɛ̃ɛ ɩnɛ; ɓaalɩ̃ ma a suur a Kirisi pʋɔ.

²¹ A lɛdaar ɩ̃ na sɛbɛ a sɛbɛ, ɩ̃ bɔ̃w na bɔ̃w ka fʋ na cɛl ma na, ɩ̃ mɩ lɛ bɔ̃w ka fʋ na maalʼã a gãw a ala ɩ̃ na yel fʋ.

²² Ɩ̃ lɛ bʋɔrɔ na go, a fʋ gbɛɛrɩ̃ ma die kãw, a-na-ɩ ɩ̃ tɩɛrɛ na áa nyɩ Naaŋmɩn sʋɔrfʋ na sɔ-yaa na, ɩ̃ na tʋɔ wɩ a nyɩ sɛ̃.

A BAARFƲ PUORFƲ

²³ A Epafɩrasɩ na lãa be nɩ ma a kasu pʋɔ a *Jeeju-Kirisi ɩnɛ mɩ puor fʋ na.

²⁴ A Markɩ nɩ a Arɩsɩta, a Demasɩ nɩ a Luki na ɩ a ɩ̃ lãa-tʋnbɔ mɩ puor fʋ na.

²⁵ A Nɩ-kpɛ̃ɛ Jeeju-Kirisi sũofʋ ú be a nyɩ jie.