Orom Sɛbɛ 8 - A NAAŊMƖN PƲLƖ̃-TA-PAALAA

A BAAFƲ ƲLƆ SƖ NA PƆW A NAAŊMƖN SƖƐ PƲƆ

¹ Ala-ɩ̃-sɔ a ƴɛ̃ƴɛrɩ̃ na, yel ma lɛ pɔwrɔ a bala na be a *Jeeju-Kirisi pʋɔ wa.

² A-na-ɩ a Jeeju-Kirisi pʋɔ ɩ̃ na be, a Naaŋmɩn Sɩɛ ƴɛr-kpɛ̃w kʋ ma na a baafʋ, faa nɩ ma a maal-fãa nɩ a kũu ƴɛr-kpɛn pʋɔ.

³ A Naaŋmɩn maalʼã a ala a Mowisi ƴɛr-kpɛn na ma dãa tʋɔrɔ wa, a-na-ɩ a nɩrɛ wãa balʼã. Ʋ tʋ na a ʋ mɩ̃ɛ Bie, ʋ tɛrɛ a ɩ̃gan buur a maal-fãa sʋbɔ kaarɩ̃ a maal-fãa ɩnɛ, ɩ̃ ƴɔ̃w ʋ a kũu pʋɔ sãw nɩ a nɩrɛ maal-fãa fãw bar,

⁴ a mɩnɛ sɩ na tʋɔrɔ maala a ala a jaa a Naaŋmɩn ƴɛr-kpɛn na bʋɔrɔ a sɩ jie, a ala ɩ saa cere tuure nɩ a sɩ wãa wa, ɩ̃-cɛ a sɩ na cere tuure nɩ a Naaŋmɩn Sɩɛ.

⁵ A-na-ɩ a bala na cere tuure nɩ a ba wãa ma ƴɔ̃w na a ba tɩɛrɩ̃sɩ a ɩ̃gan buur yele pʋɔ, ɩ̃-cɛ a bala na cere tuure nɩ a Naaŋmɩn Sɩɛ ma ƴɔ̃w na a ba tɩɛrɩ̃sɩ a ala a Naaŋmɩn Sɩɛ na bʋɔrɔ pʋɔ.

⁶ A ɩ̃gan buur yele bɔfʋ cere na a kũu pʋɔ, ɩ̃-cɛ a Naaŋmɩn Sɩɛ yele bɔfʋ tɛrɛ na a baafʋ nɩ a pɩɛnfʋ.

⁷ A ɩ̃gan buur yele bɔfʋ ꞌlaarʼã a Naaŋmɩn. ꞌWaa jɔrɔ a *Naaŋmɩn ƴɛr-kpɛn wa, ɩ̃ ꞌwaa mɩ tʋɔrɔ jɔrɔ ʋ wa.

⁸ A bala na cere tuure nɩ a ba ɩ̃gan buur tɩɛrɩ̃sɩ ma tʋɔrɔ maala a nʋmɔ a Naaŋmɩn wa.

⁹ Ɩ̃ a nyɩmɩ, nyaa cere tuure nɩ a nyɩ ɩ̃gan buur tɩɛrɩ̃sɩ wa. A Naaŋmɩn Sɩɛ nyɩ tuure, a-na-ɩ a ʋ Sɩɛ be na a nyɩ pʋ̃ɔ. Ɩ̃-cɛ a ʋlɔ na ma tɛrɛ a *Kirisi Sɩɛ wa, ma ɩ a ʋ ben wa.

¹⁰ Ɩ a ala ɩ a Kirisi be na a nyɩ pʋ̃ɔ, a ala saarɩ̃ ɩ a nyɩ ɩ̃gan na kpi na a nyɩ maal-fãa ɩnɛ, ɩ̃-cɛ a nyɩ sɩɛ pɔw na a baafʋ a nyɩ torfʋ ɩnɛ a Naaŋmɩn nii-sɔw.

¹¹ Ɩ̃ a ala ɩ a Sɩɛ ʋlɔ na dãa maal a *Jeeju ʋ ir a kũu pʋɔ mɩ be na a nyɩ pʋ̃ɔ, a ʋlɔ na maal a Jeeju-Kirisi ʋ ir a kũu pʋɔ nɔɔ mɩ kʋ na a nyɩ ɩ̃gan na ɩ a bõ-kpiiraa a baa-paalaa, a yi a ʋ Sɩɛ na be a nyɩ pʋ̃ɔ jie.

¹² Ala-ɩ̃-sɔ yɛɛr, sɩ dɩ na san a Naaŋmɩn jie. Aa ɩ ɩ̃gan buur san ʋ a sɩ na cere tuure nɩ a ɩ̃gan buur wa.

¹³ A nyɩmɩ cere tuure nɩ a fãa ala a nyɩ ɩ̃gan buur na bʋɔrɔ, nyɩ na kpi na. Ɩ̃-cɛ a ala ɩ a Naaŋmɩn Sɩɛ nyɩ sãw nɩ a nyɩ ɩ̃gan buur maal-bie bar, nyɩ na tɛrɛ na a baafʋ.

¹⁴ A bala ba jaa a Naaŋmɩn Sɩɛ na tɔwrɔ, bala ɩ̃ ɩ a Naaŋmɩn bibiir.

¹⁵ A-na-ɩ a Sɩɛ ʋlɔ sɩ na pɔw ma ƴɔnɔ sɩ a gbãgbaa ɩfʋ pʋɔ a sɩ na lɛ jɔrɔ a dãbɩ̃ɛ wa, ɩ̃-cɛ sɩ pɔw na a Sɩɛ ʋlɔ na lɩɛb sɩ á sɩ́ ɩrɛ a Naaŋmɩn bibiir, a sɩ na tʋɔ bʋɔlɔ ʋ a “Aba,” a lɛ yelʼã “ɩ̃ Sãa.”

¹⁶ A Naaŋmɩn Sɩɛ mɩ̃ɛ nɩ a sɩ sɩɛ pɔw na taa ɩ̃ man sɩ a sɩ ɩ na a Naaŋmɩn bibiir.

¹⁷ A ala ɩ sɩ ɩ na a Naaŋmɩn bibiir, sɩ na pɔw na a yel-sono ala a Naaŋmɩn na pʋlɩ̃ nɩ sɩ. Sɩ na lãa na pɔw a ala nɩ a Kirisi, a-na-ɩ sɩ lãa na be taa a ʋ hʋʋr pʋɔ, a mɩnɛ sɩ nɔɔ mɩ lãa beree nɩ ʋ a ʋ yo-yifʋ pʋɔ.

A NAAŊMƖN YO-YIFƲ YELE Ʋ NƆƆ MIILE

¹⁸ Ɩ̃ tɩɛrʼã bɔ̃w ka a won na sɩ na nyɛrɛ a ƴɛ̃ƴɛrɩ̃ na, saa tʋɔrɔ diere ʋ mana nɩ a Naaŋmɩn yo-yifʋ yele ala ʋ nɔɔ miile sɩ wa.

¹⁹ A tẽw ʋ jaa a Naaŋmɩn na maal, ɓĩɓine na cɛlɛ nɩ a daar ʋlɔ a Naaŋmɩn nɔɔ miile a ʋ bi-dabsɩ a ba yire cãa pʋɔ.

²⁰ A-na-ɩ a tẽw mɩ yara na a yaan a pɔrɔ, ɩ̃ aa ɩ ʋlɔ bʋɔrɔ wa, ɩ̃-cɛ a-na-ɩ a Naaŋmɩn ɩ̃ ƴɔ̃w ʋ. Ɩ̃ tɩɛrʋ̃ son cãa na be be,

²¹ a-na-ɩ a tẽw mɩ̃ɛ ʋlɔ a Naaŋmɩn na maal na nyɛ na a faafʋ a daar kãw a fãw ʋlɔ pʋɔ ʋ na be ɩ a gbãgbaa sãwna. Ʋ na yi na na pɔw a faafʋ ʋlɔ na be a Naaŋmɩn bibiir na-yele pʋɔ.

²² Wa ta nɩ a ƴɛ̃ƴɛrɩ̃ na, sɩ bɔ̃w ka a tẽw yele a jaa ʋʋnɔ na nyɛrɛ nɩ a nãw wɔ̃ taa nɩ a pɔw na dɔwrɔ.

²³ Ɩ̃ aa ɩ a tẽw yele tɛw ʋ wa. A sɩmɩ na tɛrɛ a Naaŋmɩn Sɩɛ na ɩ a Naaŋmɩn dãdãw bõ-pɔrɔ ʋ na kʋ sɩ, sɩ mɩ ʋʋnɔ na a sɩ suur pʋɔ, cɛlɛ nɩ a daar ʋlɔ a Naaŋmɩn na lɩɛbɛ sɩ a sɩ ɩrɛ a ʋ bibiir, mɩ faara nɩ sɩ a ɩ̃gan ʋ jaa.

²⁴ A Naaŋmɩn faa sɩ na ɩ̃ mɩ kʋ sɩ a ʋna gufʋ tɩɛrʋ̃ son naa. A ala ɩ a nɩrɛ nyɛ na a bom ʋlɔ ʋ na dãa gure, a ʋ gufʋ tɩɛrʋ̃ son ma lɛ ɩ bom wa. A bom ʋlɔ a nɩrɛ na nyɛ baar, mɩnɛ ʋ na lɛ ɩ ɩ̃ lɛ tɩɛrɛ nɩ ʋ?

²⁵ Ɩ̃-cɛ, a ala ɩ sɩ tɩɛrɛ na a bom ʋlɔ sɩ na ma nyɛ wa, su-nyɔwraa sɩ tɛrɛ cɛlɛ nɩ ʋ.

²⁶ A lɛ ʋ mɩ a Naaŋmɩn Sɩɛ ma mɩ wa sũo a sɩmɩ na bal. A-na-ɩ saa bɔ̃w a mɩnɛ na sɛw a sɩ na ma puor a Naaŋmɩn wa, ɩ̃-cɛ a Naaŋmɩn Sɩɛ mɩ̃ɛ ɩ̃ ma sʋɔrɔ a Naaŋmɩn ƴɔnɔ sɩ, ʋʋnɔ nɩ a ʋʋnfʋ ʋlɔ na ma tʋɔrɔ ƴɛrɛ wa.

²⁷ A ʋlɔ na jʋʋrɔ a nɩrɛ suur bɔ̃w na a Naaŋmɩn Sɩɛ pʋ-tɩɛrʋ̃, a-na-ɩ ʋ ma sʋɔrɔ na ƴɔnɔ a bala na ɩ a ʋ ben, tuure nɩ a mɩnɛ a Naaŋmɩn na bʋɔrɔ.

²⁸ Sɩ bɔ̃w na ka a Naaŋmɩn gbɛɛrɛ na a yele a jaa a mɩnɛ a na ɩ a son a bala na nʋnɔ ʋ jie, nɩ a bala ʋ na bʋɔl tu nɩ a mɩnɛ ʋ na ƴɔ̃w nyãa.

²⁹ A korĩ-cɛ jaa a Naaŋmɩn vɛlʼã ir a nɩbɛ bala ʋ na bɔ̃w, ɩ̃ ƴɔ̃w ba a ba na lɩɛb wɔ̃ a ʋ Bi-daba kaarɩ̃, a mɩnɛ a ʋ Bi-daba na tʋɔ ɩ a kpɛ̃ɛ a yɛɛr yaw sɔ̃w.

³⁰ A bala a Naaŋmɩn na vɛl ir ƴɔ̃w a lɛ, ʋ mɩ bʋɔl ba na. Ɩ̃ a bala ʋ na bʋɔl, ʋ mɩ lɩɛb ba na a ba tor. Ɩ̃ a bala ʋ na lɩɛb a ba tor, ʋ mɩ maal ba na a ba pɔw a ʋ yo-yifʋ yele.

A NAAŊMƖN NƲFƲ BƐRMƐFƲ

³¹ Bõ sɩ na lɛ yel go? A ala ɩ a Naaŋmɩn ɓã sɩ na, ala na lɛ tʋɔ jɛbʼɩ̃ sɩ?

³² ꞌWaa sɔw mɔ̃w sɩ a ʋ mɩ̃ɛ Bie wa, ɩ̃-cɛ ʋ de ʋ na bar ʋ kpɛ a kũu pʋɔ a sɩ jaa ɩnɛ; ala-ɩ̃-sɔ, mɩnɛ ʋ kɔ̃ lɛ kʋ sɩ a yele a jaa ɓã sɩ wa?

³³ Ala na tʋɔ ƴɔ̃w a bala a Naaŋmɩn na vɛl ir a ƴɛrɩ̃? Nɩrɛ ma tʋɔrɔ wa, a-na-ɩ a Naaŋmɩn nyɛ ba na a ba tor.

³⁴ Ala na tʋɔ ƴɔ̃w ba a yel? Nɩrɛ ma tʋɔrɔ wa, a-na-ɩ a *Jeeju-Kirisi ɩ̃ ɩ a ʋlɔ na dãa kpi. Ɩ̃ aa ɩ a lɛ tɛw ʋ wa, ɩ̃-cɛ ʋ mɩ irʼã a kũu pʋɔ ɩ̃ jɛ a Naaŋmɩn dʋrɩ̃ loor, mɩ sʋɔrɔ ʋ ƴɔnɔ sɩ.

³⁵ Ala na tʋɔ ŋmaa sɩ bar a *Kirisi nʋfʋ pʋɔ? A won, a hʋʋr, a kpowfʋ, a kɔ, a nãw nyɛfʋ, a jãjĩ mɩɩ a sɩ kúfʋ na tʋɔ na mɩɩ?

³⁶ A mɩnɛ a na yel a Naaŋmɩn Sɛbɛ pʋɔ: “A fʋ̃ʋ saa a ba ƴɔnɔ sɩ a kũu pʋɔ a bibie a jaa. Ba de sɩ na a sɩ wɔ̃ taa nɩ piir ba na cere nɩ a kúfʋ jie.”

³⁷ Ɩ̃ a ala a jaa fɛw pʋɔ, sɩ nyɩrɩ̃ na lɛ tɛrɛ a tʋɔfʋ, a yi a ʋlɔ na nʋ sɩ jie.

³⁸ A-na-ɩ ɩ̃ bɔ̃w na bɔ̃w ka bom ma be be na tʋɔrɔ ŋmaara sɩ a Naaŋmɩn nʋfʋ pʋɔ wa. A kɔ̃ ɩ a kũu, mɩɩ a baafʋ, a sɩ-tʋnɩsɩ, a kɔ̃tɔnsɩ, mɩɩ a fãwsɩ nɩŋmɛɛ ʋ wa. A kɔ̃ mɩ ɩ a ƴɛ̃ƴɛrɩ̃ yele mɩɩ a nɩdaar yele wa.

³⁹ A kɔ̃ mɩ lɛ ɩ a saꞌlon mɩɩ a kpɩɩn tẽw fãwsɩ mɩɩ a bom kãw lɛ a Naaŋmɩn na maal wa. Bom ma be be na tʋɔrɔ ŋmaara sɩ a Naaŋmɩn nʋfʋ ʋlɔ ʋ na kʋ sɩ a sɩ Nɩ-kpɛ̃ɛ Jeeju-Kirisi jie wa.