Orom Sɛbɛ 3 - A NAAŊMƖN PƲLƖ̃-TA-PAALAA

¹ A ala ɩ lɛ ʋ, bõ a Jufi nɩrɛ tɛrɛ gãw a nɩŋmɛɛ? Bõ a yʋɔr ŋmaafʋ ma maal a nɩrɛ?

² A ba son be na a jiir a jaa. A dãdãw ɩ na, ba ɩ na a bala a Naaŋmɩn na de a ʋ bʋʋr kʋ.

³ Ɩ̃ a ala ɩ a Jufisɩ ŋmɛɛ jaarʼã a Naaŋmɩn ƴɛrɩ̃, sɩ́ lɛ yel a bõ? A ba jaarfʋ na tʋɔ na sãw a Naaŋmɩn dẽdẽ ɩfʋ mɩɩ?

⁴ A kɔ̃ tʋɔ ɩ a lɛ wa. A sɛw na a Naaŋmɩn na ɩ a Yel-mɩ̃ɛ Sʋbɔ, a ala saarɩ̃ ɩ a nɩbɛ ba jaa ŋmara na a jiri, wɔ̃ taa nɩ a mɩnɛ a Naaŋmɩn Sɛbɛ na yel: “A nɩbɛ sɛw na ba nyɛ fʋ a fʋ tor a fʋ ƴɛrɩ̃sɩ pʋɔ; a fʋ mɩ pɔw a tʋɔfʋ a ala ɩ ba bʋɔrɔ na ba guor a fʋ ƴɛrɩ̃.”

⁵ A ala ɩ a sɩ gõgolĩfʋ tʋmɔ miile na a Naaŋmɩn torfʋ, mɩnɛ sɩ na yel? Sɩ na yelʼã áa Naaŋmɩn ɩ na Naaŋmɩn gõgolaa a mɩnɛ ʋ na nyɛ a ʋ su-tuo ƴɔ̃w sɩ mɩɩ? (A nɩbɛ tɩɛrɩ̃sɩ ɩ̃ de ƴɛrʼɩ̃.)

⁶ A kɔ̃ tʋɔ ɩ a lɛ wa. A ala ɩ a lɛ a dãa wɔ̃, mɩnɛ a Naaŋmɩn na tʋɔ guor a tẽw ƴɛrɩ̃?

⁷ A nɩrɛ kãw na yelʼã: “A ala ɩ a ɩ̃ jiri ŋmafʋ maala na a Naaŋmɩn yel-mɩ̃ɛ ʋ nyɩrɩ̃ yire, ʋ pɔwrɔ a yo-yifʋ, ɩ̃ bõ ɩnɛ a Naaŋmɩn na lɛ ƴɔ̃w ma a ƴɛrɩ̃ yelʼɩ̃ á maal-fãa sʋbɔ ɩ̃ ɩ?”

⁸ Ɩ̃ bõ ɩ a sɩ kɔ̃ maala a bier, a son wa dɔɔl wa? A lɛ a nɩŋmɛɛ ma kpɛrɛ sɩ, áa lɛ sɩ ma yel. A bana nɩbɛ naa, a ƴɛrɩ̃ ʋlɔ a Naaŋmɩn na ƴɔnɔ ba, torʼã.

NƖRƐ KÃW MA BE NA TOR WA

⁹ Ɩ̃ mɩnɛ? A sɩmɩ Jufisɩ, sɩ sa na a nɩŋmɛɛ mɩɩ? Saa sa ba wa! A-na-ɩ sɩ gɔrʼã miile nyɩ a mɩnɛ a Jufisɩ nɩ a nɩ-kpeesɩ ba jaa na ɓã taa be a maal-fãa pʋɔ.

¹⁰ A mɩnɛ a Naaŋmɩn Sɛbɛ na yel: “Nɩrɛ kãw ma be be na tor wa; bõ-ƴen ma mɩ be wa.

¹¹ Nɩrɛ kãw ma tɛrɛ a bɔ̃wfʋ wa. Nɩrɛ kãw ma mɩ bʋɔrɔ a Naaŋmɩn wa.

¹² A ba jaa barʼã a sɔr ɩ̃ vɩɛ ɓã taa lo. Nɩrɛ kãw ma maala a vɩlaa wa; bõ-ƴen tɛw ma mɩ be wa.

¹³ A ba nʋɔr wɔ̃ na taa nɩ a yaa ba na yuo bar. Ba ma de na a ba dɛlɩ̃bir bɛlɛ nɩ a nɩbɛ; a waab lɔw ɩ̃ ma yire a ba nɔgbalĩbie pʋɔ.

¹⁴ A pɔfʋ nɩ a ƴɛr-tor ɩ̃ ma yire a ba nʋɔr pʋɔ.

¹⁵ Ba maa yaarɩ̃ kú nɩrɛ wa.

¹⁶ Ba ma sãwna na a yele, maala nɩ a nabier a jie lɛ ba na tɔlɔ.

¹⁷ Baa bɔ̃w a sɔr ʋlɔ na ɩ a pɩɛnfʋ sɔr wa.

¹⁸ Baa jɔrɔ a Naaŋmɩn a ba tɩɛrɩ̃sɩ pʋɔ wa.”

¹⁹ Sɩ bɔ̃w na ka a ala a jaa a ƴɛr-kpɛn na miile, ʋ ƴɛrɛ na kʋrɔ a bala na be a ƴɛr-kpɛn pʋɔ, a mɩnɛ a nɩbɛ ba jaa nɔɛ na pɔw, ɩ̃ a tẽw nɩbɛ ba jaa na be a Naaŋmɩn nii-sɔw a ʋ ƴɛrɩ̃ guorfʋ dayen.

²⁰ A-na-ɩ a Naaŋmɩn nii-sɔw, nɩrɛ kãw torfʋ ma yire a ƴɛr-kpɛn jɔfʋ ɩnɛ wa, a-na-ɩ a ƴɛr-kpɛn ɩ̃ saa a sɩ bɔ̃w a maal-fãa.

A MƖNƐ A NƖRƐ NA TƲƆRƆ TORO A NAAŊMƖN NII-SƆW

²¹ Ɩ̃-cɛ a ƴɛ̃ƴɛrɩ̃ na, a torfʋ ʋlɔ na yi a Naaŋmɩn jie miilʼã cãa pʋɔ, ɩ̃ aa ɩ a ƴɛr-kpɛn jɔfʋ ɩ̃ saa wa. A Mowisi ƴɛr-kpɛn nɩ a Naaŋmɩn ƴɛr-hierbe mɩ dãa na ƴɛr a ala ɩnɛ.

²² A ɩ na a torfʋ ʋlɔ a Naaŋmɩn na kʋ a nɩrɛ ʋlɔ na sɔw de a *Jeeju-Kirisi, a bala ba jaa na tɛrɛ nɩ ʋ a ƴɔ̃w-nyãa, a-na-ɩ a Naaŋmɩn ma ꞌwuoro a nɩbɛ kpee kpee wa.

²³ A nɩbɛ ba jaa maalʼã a fãa, faa nɩ a Naaŋmɩn na-yele.

²⁴ Ɩ̃-cɛ a ʋ wɩɛfʋ ɩnɛ ʋ lɩɛbɛ ba a ba toro a ʋ nii-sɔw, a mɩnɛ ʋ na da ba fáa ba a Jeeju-Kirisi tʋmɔ pʋɔ a pɔrɔ.

²⁵ A ʋna *Kirisi, a Naaŋmɩn ƴɔ̃w ʋ na ʋ ɩ a baar-lo-bom, a mɩnɛ ʋ na deer a ʋ jɩ̃ɩ de nɩ a bala na sɔw de ʋ maal-faar bar kʋ ba. A nɔhɔ̃ a Naaŋmɩn bʋɔrɔ na ʋ miil a ʋ torfʋ. A korĩ-cɛ ʋ nyɔw na a suur, ɩ̃ ma kpãa a bala na maal a fãa wa.

²⁶ Ɩ̃-cɛ a ƴɛ̃ƴɛrɩ̃ na, ʋ miile na a mɩnɛ ʋ na lɩɛbɛ a nɩbɛ a ba toro a ʋ nii-sɔw; a-na-ɩ ʋ bʋɔrɔ na a ʋlɔ mɩ̃ɛ ʋ tor, ɩ̃ mɩ bʋɔrɔ ʋ lɩɛb a bala na sɔw de *Jeeju a ba na mɩ tor.

²⁷ Ala-ɩ̃-sɔ, nyɩnɛ a yo-bɔb lɛ be? ꞌWaa lɛ be be go wa. Bõ ɩnɛ? A-na-ɩ ba jɔrɔ na a ƴɛr-kpɛn mɩɩ? Kpee. Ɩ̃-cɛ, a ba ƴɔ̃w-nyãa ɩnɛ.

²⁸ A-na-ɩ sɩ nyɛ na bɔ̃w ka a nɩrɛ ma tor a Naaŋmɩn nii-sɔw a ƴɛr-kpɛn ʋ na jɔrɔ ɩnɛ wa, ɩ̃-cɛ a ʋ ƴɔ̃w-nyãa ʋ na tɛrɛ ɩnɛ ʋ.

²⁹ A Naaŋmɩn, a Jufisɩ Naaŋmɩn tɛw ʋ ɩ mɩɩ? ꞌWaa mɩ ɩ a nɩ-bʋrɔ bʋrɔ Naaŋmɩn wa? ɔɔ, má ʋ mɩ ɩ na a ba Naaŋmɩn.

³⁰ A-na-ɩ a Naaŋmɩn bõ-ƴen tɛw ɩ̃ be be, a ʋlɔ na lɩɛbɛ a Jufisɩ nɩbɛ a ba toro a ba ƴɔ̃w-nyãa ɩnɛ, ɩ̃ mɩ lɩɛbɛ a nɩ-bʋlsɩ a ba mɩ toro a ba ƴɔ̃w-nyãa ɩnɛ mɩ.

³¹ A lɛ yelʼã a sɩ sãwna na a ƴɛr-kpɛn nɩ a ƴɔ̃w-nyãa bara mɩɩ? Aa ɩ lɛ ʋ wa. Ɩ̃-cɛ, sɩ ɛ̃ɛ na maala a ƴɛr-kpɛn a ba bɔ̃w tɛrɛ a ba par.