Orom Sɛbɛ 12 - A NAAŊMƖN PƲLƖ̃-TA-PAALAA

A MƖNƐ A POPUORBO NA TƲƆRƆ TƲNƆ A NAAŊMƖN TƲMƆ

¹ Ala-ɩ̃-sɔ yɛɛr, a mɩnɛ a Naaŋmɩn na bɔ̃w sɩ a nãw, ɩ̃ kpãkpana nyɩ na a nyɩ de a nyɩ mɩ̃ɛ kʋ a Naaŋmɩn, a nyɩ ɩ a baar-lo-bõ-mimir na ɩ a cɛcɛ kpɛ a Naaŋmɩn nyãa; a-na-ɩ lɛ ɩ̃ ɩ a puor-son nyɩ na sɛw nyɩ puoro ʋ.

² Nyɩ taa ɩ a nyɩ maalfʋ a wɔ̃ a tẽw na nɩbɛ maalfʋ kaarɩ̃ wa, ɩ̃-cɛ nyɩ́ bar a Naaŋmɩn ʋ lɩɛb a nyɩ mɩ̃ɛ tɔr jaa, tu nɩ a mɩnɛ a nyɩ yɛ̃ na lɩɛb. A nɔhɔ̃ nyɩ na tʋɔ na bɔ̃w a ala na ɩ a Naaŋmɩn pʋ-tɩɛrʋ̃, a ala na ɩ a son, a ala na nʋmɔ, nɩ a ala na ɩ a cɛcɛ.

³ A mɩnɛ a Naaŋmɩn na sũo nɩ ma a ʋ tʋɔfʋ, ɩ̃ yele nyɩ na nyɩ jaa fɛw, a nyɩ taa tɩɛrɛ beeka nyɩ ɩ na nɩrɛ gãw a mɩnɛ a na sɛw wa, ɩ̃-cɛ nyɩ́ ɛ̃ɛ tɛrɛ tɩɛrɩ̃-vɛlɛ, tu nɩ a mɩnɛ a Naaŋmɩn na kʋ nyɩ a ƴɔ̃w-nyãa bõ-ƴene-ƴene.

⁴ A nɩ-bõ-ƴen ɩ̃gan tɛrɛ na jiir yayaw na mɩ tɛrɛ a ba tʋmɔ kpee kpee.

⁵ A lɛ ʋ mɩ, a mɩnɛ sɩ na saarɩ̃ waa, ɩ̃ ɩ̃gan bõ-ƴen sɩ ɩ a *Kirisi pʋɔ, a sɩ jaa bõ-ƴene-ƴene mɩ ɓã na taa ɩ a ʋna ɩ̃gan bõ-ƴen ɓãbie.

⁶ Sɩ tɛrɛ na a Naaŋmɩn Sɩɛ tʋmɔ kpee kpee tu nɩ a ʋ sũofʋ a sɩ jie. A ala ɩ a nɩrɛ tʋɔfʋ ɩ na ʋ na bʋʋrɔ a Naaŋmɩn pʋ-tɩɛrʋ̃, ú bʋʋrɔ tuure nɩ a mɩnɛ a ʋ ƴɔ̃w-nyãa na be.

⁷ A ala ɩ a nɩrɛ ben mɩ ɩ na ú tʋnɔ a tʋmɔ kʋrɔ a nɩbɛ, ú tʋnɔ kʋrɔ ba. A ʋlɔ ben na ɩ a nɩbɛ jaanfʋ, ú jaana ba.

⁸ A ʋlɔ ben go na ɩ a nɩŋmɛɛ kpãkpanfʋ, ú kpãkpana ba. A ʋlɔ ben na ɩ ú sũono a nɩbɛ nɩ a ʋ yele, ú tɛrɛ pʋ-pɩlaa sũono nɩ ba. A nɩrɛ kãw ben wa ɩ ú ɩ a ni-diere, ú bɔ̃w cɛlɛ tɔ maala. A ʋlɔ na pɔw a tʋɔfʋ a nãw deme sũofʋ ɩnɛ, ú sũono ba nɩ nʋ̃ɔ.

A YEL-MƖ̃Ɛ NƲFƲ

⁹ Nyɩ taa ɩ a nyɩ nʋfʋ ʋ nyanyaa nɩ a bɛlɩ̃fʋ wa. Nyɩ́ ꞌlaar a fãa, ɩ̃ mar taa nɩ a son vɩlaa vɩlaa.

¹⁰ Nyɩ́ bɔ̃w nyɔw taa nɩ a nʋfʋ a yɛɛr kaarɩ̃, mɩ cʋrɔ taa, tɛrɛ nɩ a ƴɔ̃wfʋ a nyɩ sɔ̃w.

¹¹ Nyɩ taa ɩ tõtol deme wa, ɩ̃ nyɩ́ ɛ̃ɛ ɩ tʋ̃tʋnbɔ, tʋlɔ nɩ a Nɩ-kpɛ̃ɛ tʋmɔ pʋɔ.

¹² Nyɩ́ cɩlɛ a nyɩ tɩɛrʋ̃ son ɩnɛ, tɛrɛ nɩ a su-nyɔwraa a kpowfʋ pʋɔ, ɩraa nɩ cĩcĩ a Naaŋmɩn sʋɔrfʋ pʋɔ.

¹³ Nyɩ́ sũono a popuorbo bala na be a nãw pʋɔ, ɩ̃ bɔ̃w diere a saanba bala na wɩɛrɛ a nyɩ jie.

¹⁴ Nyɩ́ sʋɔrɔ a Naaŋmɩn ʋ maal a bala na hʋɔlɔ nyɩ a vɩlaa. Nyɩ taa sɔnɔ ba wa, ɩ̃ nyɩ́ ɛ̃ɛ sʋɔrɔ a Naaŋmɩn ƴɔnɔ ba.

¹⁵ Nyɩ́ cɩlɛ nɩ a bala na cɩlɛ, ɩ̃ pɔw a bala na kono, kono nɩ.

¹⁶ Nyɩ́ pɔwrɔ taa, tɛrɛ nɩ nɔ-bõ-ƴen a nyɩ sɔ̃w. Nyɩ taa ɩ yo-bʋɔrbɔ wa, ɩ̃ nyɩ́ ɛ̃ɛ bal a nãw deme jie. Nyɩ taa de a nyɩ mɩ̃ɛ a nyɩ ɩ nɩ-kpaarsɩ wa.

¹⁷ Nyɩ taa de a fãa lɩɛb ya a fãa wa. Nyɩ́ ɩ a nyɩ tʋmɔ a ɩ tʋ̃-son a nɩbɛ ba jaa nii-sɔw.

¹⁸ A ala ɩ a nyɩ jie a yi, nyɩ́ dɩ tuo ɩ̃ tɛrɛ a pɩɛnfʋ nɩ a nɩbɛ ba jaa.

¹⁹ Ɩ̃ badɛɛ, nyɩ taa yawra a san nyɩ mɩ̃ɛ wa, ɩ̃-cɛ nyɩ́ bar kʋ a Naaŋmɩn su-tuo ʋ yaw, a-na-ɩ a sɛbʼã a Naaŋmɩn Sɛbɛ pʋɔ: “A Nɩ-kpɛ̃ɛ yelʼã, á ʋlɔ sɔ a san yawfʋ, á ʋlɔ na lɩɛb ya ba.”

²⁰ A lɛ sɛbʼã yel go: “A kɔ wa nyɔw a fʋ san-sʋbɔ, á fú kʋ ʋ a dɩb ʋ dɩ. A kʋ̃ɔ-nyuur ɩ̃ nyɔw ʋ mɩɩ, á fú kʋ ʋ a kʋ̃ɔ ʋ nyu. A fʋ̃ʋ maala a lɛ, a vĩ na lɩɛbʼã dɩrɛ ʋ wɔ̃ taa nɩ a vũu-sala fʋ na woor dɔɔl a ʋ juumɩ a dɩrɛ ʋ.”

²¹ Taa ɩ a nɩrɛ maal-bier tʋɔ fʋ wa; ɩ̃ a fʋ̃ʋ, fú ɛ̃ɛ de a fʋ maal-vɩlaa tʋɔ nɩ a maal-bier.