Miilfʋ Sɛbɛ 5 - A NAAŊMƖN PƲLƖ̃-TA-PAALAA

A SƐBƐ NA KPAL NƖ A PÉLE ƳƐRƖ̃

¹ Ɩ̃ nyɛ na a ʋlɔ na jɛ a naa-dakɔw juu ʋ tɛrɛ sɛbɛ ba na pilĩ pilĩ a ʋ dʋrɩ̃ nuu pʋɔ. Ba dãa na sɛb a ʋna sɛbɛ naa a pʋ̃ɔ nɩ a yene, ɩ̃ mar ʋ pɔw, ƴɔ̃w nɩ a jɩbsɩ jiir anuu-nʼayi.

² Ɩ̃ ɩ̃ nyɛ na a sɩ-tʋ̃-gãdaa na hiere nɩ kɔkɩr kpɛ̃w yele nɩ: “Ala sɛw na kar a jɩbsɩ, ɩ̃ ꞌlor a sɛbɛ na?”

³ Ɩ̃-cɛ nɩrɛ kãw ma dãa be a saa juu, mɩɩ a tẽw pʋɔ, mɩɩ a kpɩɩn tẽw na dãa tʋɔrɔ ꞌloro a ʋna sɛbɛ ꞌwuoro wa,

⁴ ɩ̃ wuure kono nɩ, a-na-ɩ nɩrɛ ma dãa be na sɛw na ꞌlor a ʋna sɛbɛ ꞌwuor wa.

⁵ A bana nɩ-bɛrɛ kãw yel ma: “Taa kono wa. Nyɛ, a ʋlɔ na ɩ a Juda bal Gbeen, na ɩ a jamana Davɩtɩ yãw pɔw na a tʋɔfʋ. Ala-ɩ̃-sɔ ʋ na tʋɔ na kar a jɩbsɩ anuu-nʼayi ala, ɩ̃ ꞌlor a sɛbɛ.”

⁶ Ɩ̃ ɩ̃ nyɛ na Péle na wɔ̃ taa nɩ bom ba na dãa kú, ʋ ɩraa a naa-dakɔw pulẽe, ɩ̃ a bana yel-mimie anaan nɩ a nɩ-bɛrɛ bala tiw kolĩ ʋ. Ʋ dãa na tɛrɛ ɩlɛ anuu-nʼayi nɩ mimie anuu-nʼayi na ɩ a Naaŋmɩn sɩɩr anuu-nʼayi ba na tʋ̃ a ten jiir a jaa pʋɔ.

⁷ Ɩ̃ a Péle taw na ta a ʋlɔ na jɛ a naa-dakɔw juu ɩ̃ de a sɛbɛ na be a ʋ dʋrɩ̃ nuu pʋɔ.

⁸ Ɩ̃ a mɩnɛ ʋ na de a sɛbɛ, a yel-mimie anaan nɩ a nɩ-bɛrɛ lɩjɛrʼɩ̃ anaan bala lo na gburĩ a dume a ʋ nii-sɔw. Ba jaa bõ-ƴene-ƴene tɛrɛ na korĩjom, nɩ sɛlmɛ lara a *tɩ̃ɩ-nyu-vɩlaa na sɛw dɩrɛ nyuure, na ɩ a Naaŋmɩn nɩbɛ puorfʋ.

⁹ Ba dãa na cɩɛrɛ yel-paalaa na yel: “Fʋ̃ʋ sɛw na de a sɛbɛ ɩ̃ kar a jɩbsɩ ala bar, a-na-ɩ ba dãa na kú fʋ, ɩ̃ a fʋ jɩ̃ɩ fʋ da nɩ a nɩbɛ na yi a bal a jaa pʋɔ, nɩ a ƴɛr-bʋrɔ a jaa, nɩ a nɩ-bʋrɔ ba jaa, nɩ a ten a jaa kʋ a Naaŋmɩn.

¹⁰ Fʋ lɩɛb ba na a ba ɩ a sɩ Naaŋmɩn fãw pʋɔ nɩbɛ, mɩ ɩ nɩ a baar-lorbo a ʋ nii-sɔw, ɩ̃ ba nɔɔ ɩ na a jamansɩ a tẽw pʋɔ.”

¹¹ Ɩ̃ ꞌwuorʼã ɩ̃ wõ a kɔkɩɛ dam a yire a sɩ-tʋnɩsɩ yaw na tiw kolĩ a naa-dakɔw, nɩ a yel-mimie, nɩ a nɩ-bɛrɛ bala. Ba na ta na ture ture kɔ̃ bɔ̃w nʋɔr,

¹² ɩ̃ cɩɛrɛ yele nɩ kɔkɩr kpɛ̃w yele nɩ: “A Péle ʋlɔ ba na dãa kú ɩ̃ sɛw nɩ a kpɛ̃w, a na-yele, a kpaarfʋ, nɩ a fãgã, a ju-kpɛ̃ɛ, nɩ a yo-yifʋ nɩ a pɛwfʋ.”

¹³ Ɩ̃ ɩ̃ mɩ wõ na a yele a jaa na be a saa juu, a tẽw pʋɔ, a kpɩɩn tẽw nɩ a man pʋɔ, a yele a jaa na be a jiir a jaa, a ba cɩɛrɛ a yele yele nɩ: “A ʋlɔ na jɛ a naa-dakɔw juu, nɩ a Péle, bá pɔw a pɛwfʋ, a ju-kpɛ̃ɛ, a yo-yifʋ, nɩ a kpɛ̃w a daar a jaa!”

¹⁴ Ɩ̃ a bana yel-mimie anaan yel a “*Amɛn,” ɩ̃ a nɩ-bɛrɛ bala lo gburĩ a dume a ba nii-sɔw ɩ̃ pɛwrɛ ba.