Miilfʋ Sɛbɛ 2 - A NAAŊMƖN PƲLƖ̃-TA-PAALAA

A ALA A JEEJU NA YEL A ƐFƐƐSƖ-TẼW DUO-PUORBO

¹ “Sɛb a nɔhɔ̃ tɩɩr kʋ a Ɛfɛɛsɩ-tẽw *duo-puorbo sɩ-tʋnaa: ‘A ʋlɔ na tɛrɛ a ŋmarbie anuu-nʼayi a ʋ dʋrɩ̃ nuu pʋɔ, ɩ̃ mɩ cere a sɛlmɛ lãpar anuu-nʼayi sɔɔlɩ̃sɔw ƴɛrɩ̃sɩ nɩ a asɩmɛ.

² Ɩ̃ bɔ̃w na a fʋ tʋmɔ a jaa, a mɩnɛ fʋ na tʋ̃ nɩ a kpɛ̃w, tɛrɛ nɩ a su-nyɔwraa. Ɩ̃ mɩ bɔ̃w na a mɩnɛ fʋ na ma mɩ tʋɔrɔ beree nɩ a nɩ-bebe wa. Fʋ jʋʋrʼã a bala na bɛlɩ̃ yele a *nɩ-tʋnɩsɩ ba ɩ, nyɛ a ba ɩ jir-ŋmarba.

³ Fʋ nyɔw na suur, ɩ̃ fʋ mɩ pɔw na a won a ɩ̃ ɩnɛ, ɩ̃ faa bal wa.

⁴ Ɩ̃-cɛ, nyɛ a ala ɩ̃ na tɛrɛ nɩ fʋ. Faa lɛ cãa nʋnɔ ma a nyɔwfʋ daar kaarɩ̃ wa.

⁵ Ala-ɩ̃-sɔ, tɩɛr bɔ̃w a mɩnɛ fʋ na dãa be ɩ̃ wa lo. Lɩɛb a fʋ yɛ̃ ɩ̃ maala a korĩ-cɛ kaarɩ̃. A ala ɩ faa lɩɛb a fʋ yɛ̃ wa, ɩ̃ na wɩ na ir a fʋ lãpa a ʋ jie bar.

⁶ Ɩ̃-cɛ, fʋ tɛrɛ na yel-mɩ̃ɛ a mɩnɛ fʋ na ꞌlaar a Nɩkolatɩ nɩbɛ maalfʋ. A maa mɩ, a lɛ ɩ̃ mɩ be.

⁷ “ ‘A ʋlɔ na tɛrɛ a tobo wono nɩ, ú bɔ̃w cɛlɛ a ala a Naaŋmɩn Sɩɛ na yele a duo-puorbo. “ ‘A ʋlɔ na ɩrɛɛ a tʋɔfʋ sʋbɔ, ɩ̃ na kʋ ʋ na a sɔr ʋ ꞌwɔb a baafʋ tɩɛ bir ʋlɔ na be a Naaŋmɩn nakʋɔ pʋɔ.’

A ALA A JEEJU NA YEL A SƖMƖƖR-TẼW DUO-PUORBO

⁸ “Sɛb a nɔhɔ̃ tɩɩr kʋ a Sɩmɩɩr-tẽw *duo-puorbo sɩ-tʋnaa: “A ʋlɔ na ɩ a Dãdãw Sʋbɔ nɩ a Baarfʋ Sʋbɔ, na dãa kpi ɩ̃ lɛ ir a kũu pʋɔ ƴɛrɩ̃sɩ nɩ a asɩmɛ.

⁹ Ɩ̃ bɔ̃w na a fʋ won nɩ a fʋ nãw, a mɩnɛ fʋ na saarɩ̃ le. Ɩ̃ mɩ bɔ̃w na a mɩnɛ a bala na bɛlɩ̃ yel a Jufisɩ ba ɩ na koro fʋ. Ba ɩ na a Satã duo-puorbo.

¹⁰ Taa jɔrɔ dãbɩ̃ɛ a hʋʋr ala fʋ nɔɔ nyɛrɛ ɩnɛ wa. A Satã nɔɔ pɔw na a ŋmɛɛ a nyɩ sɔ̃w a kasu pʋɔ bɩɩrʼɩ̃ nyɩ, ɩ̃ nyɩ na pɔw na won maalʼɩ̃ bibie pie. Ɩraa cĩcĩ wa ta nɩ a fʋ kũu daar, ɩ̃ ɩ̃ na kʋ fʋ na a baafʋ na ɩ a tʋɔfʋ bom.

¹¹ “A ʋlɔ na tɛrɛ a tobo wono nɩ, ú bɔ̃w cɛlɛ a ala a Naaŋmɩn Sɩɛ na yele a duo-puorbo. “A ʋlɔ na ɩrɛɛ a tʋɔfʋ sʋbɔ, a gbɛɛ ayi kũu kɔ̃ sɩɩr ʋ fɩ̃ɩ wa.

A ALA A JEEJU NA YEL A PƐRGAM-TẼW DUO-PUORBO

¹² “Sɛb a nɔhɔ̃ tɩɩr kʋ a Pɛrgam-tẽw *duo-puorbo sɩ-tʋnaa: “A ʋlɔ na tɛrɛ a sɔ-bãjɩnɛ na dɩrɛ a nɔɛ a jaa ƴɛrɩ̃sɩ nɩ a asɩmɛ.

¹³ Ɩ̃ bɔ̃w na a jie fʋ na be, a jie ʋlɔ a Satã na tɛrɛ a ʋ naa-dakɔw. Ɩ̃-cɛ fʋ bɔ̃w na ɩraa cĩcĩ a ɩ̃ pʋɔ. Faa jaar a ƴɔ̃w-nyãa fʋ na tɛrɛ nɩ ma bar wa, a ala saarɩ̃ ɩ a lɛdaar ba na dãa kú a ɩ̃ yel-mɩ̃ɛ ƴɛr-man-dẽdẽ, Ãtɩpasɩ a be a nyɩ sɔ̃w, a jie ʋlɔ na ɩ a Satã jɩnaafʋ jie.

¹⁴ Ɩ̃-cɛ ɩ̃ tɛrɛ nɩ fʋ na ƴɛrɩ̃. A-na-ɩ fʋ tɛrɛ na nɩbɛ a be na tɛrɛ a Balam jaanfʋ; a Balam na dãa jaan a Balakɩ ʋ maal a *Ɩsɩrayɛl nɩbɛ a ba lo a fãa pʋɔ na ba ꞌwɔbɔ a tɩbɛ nɩnɛ ɩ̃ mɩ maala a burbur gana nɩ taa.

¹⁵ A lɛ ʋ mɩ, fʋ mɩ tɛrɛ na a nɩbɛ na mɩ sɔw a Nɩkolatɩ jaanfʋ.

¹⁶ Ala-ɩ̃-sɔ, lɩɛb a fʋ maalfʋ. A ala ma ɩ lɛ ʋ wa, ɩ̃ na wɩ na be pʋrpʋr, jɛbʼɩ̃ a bana nɩbɛ nɩ a sɔ-bãjɩnɛ ʋlɔ na be a ɩ̃ nʋɔrɩ̃.

¹⁷ “A ʋlɔ na tɛrɛ a tobo wono nɩ, ú bɔ̃w cɛlɛ a ala a Naaŋmɩn Sɩɛ na yele a duo-puorbo. “A ʋlɔ na ɩrɛɛ a tʋɔfʋ sʋbɔ, ɩ̃ na kʋ ʋ na a *maan ʋlɔ na sɔɔlɩ̃, ɩ̃ ɩ̃ na lɛ kʋ ʋ na kubir pɩlaa ba na sɛb yo-paalaa dɔɔl a ʋ juu. Nɩrɛ ma bɔ̃w a yuor ʋlɔ, ɩ̃ a ala ma ɩ a ʋlɔ tɛw na pɔw ʋ wa.

A ALA A JEEJU NA YEL A TƖYATƖƖR-TẼW DUO-PUORBO

¹⁸ “Sɛb a nɔhɔ̃ tɩɩr kʋ a Tɩyatɩɩr-tẽw *duo-puorbo sɩ-tʋnaa: “A ʋlɔ mimie na nyɩnyɩlɛ wɔ̃ taa nɩ a vũu, ɩ̃ a gbɛɛ mɩ wɔ̃ kur jɩ̃ɛw na nyɩlɛ, na ɩ a Naaŋmɩn Bie ƴɛrɩ̃sɩ nɩ a asɩmɛ.

¹⁹ Ɩ̃ bɔ̃w na a fʋ tʋmɔ a jaa, a fʋ nʋfʋ, a fʋ dẽdẽ ɩfʋ, a mɩnɛ fʋ na de tɔ a ɩ̃ tʋmɔ ɩnɛ, nɩ a mɩnɛ fʋ na nyɔw a suur. Ɩ̃ bɔ̃w na ka a fʋ tʋmɔ a ƴɛ̃ƴɛrɩ̃ na gãw na a nyɔwfʋ daar.

²⁰ Ɩ̃-cɛ nyɛ a ala ɩ̃ na tɛrɛ nɩ fʋ. Fʋ ma barʼã a pɔw ʋlɔ ba na bʋɔlɔ a Jejabɛl na ma bɛlɩ̃ yel á Naaŋmɩn pʋ-tɩɛrʋ̃-bʋʋrɔ ʋ ɩ, ʋ ma jaana a ɩ̃ tʋ̃tʋnbɔ bɛlɛ nɩ ba a ba bɔrɔ, gana nɩ taa burbur, ꞌwɔbɔ nɩ a tɩbɛ nɩnɛ.

²¹ Ɩ̃ kʋ ʋ na daar ʋ na tʋɔ lɩɛb a ʋ maalfʋ, ɩ̃ a ꞌwaa bʋɔrɔ ʋ bar a ʋ burbur wa.

²² Ɩ̃ na maal ʋ na ʋ gã wʋlɩ̃, ɩ̃ a bala na maal a burbur a ʋ kaarɩ̃, ɩ̃ na ƴɔ̃w ba na a hʋʋr pʋɔ, a ala mɔɔ ɩ ba lɩɛbʼã ɩ̃ bar a ʋna pɔw maalfʋ wa.

²³ Ɩ̃ na maalʼã a ʋ bibiir a ba kpi, ɩ̃ a duo-puorbo a jiir a jaa na bɔ̃w na ka á maa ɩ̃ ɩ a ʋlɔ na bɔ̃w a nɩbɛ sube nɩ a ba tɩɛrɩ̃sɩ. Ɩ̃ na ya nyɩ na bõ-ƴene-ƴene tu nɩ a nyɩ tʋ̃-bie.

²⁴ “A ala ɩ a nyɩmɩ na cɛ a be a Tɩyatɩɩr ʋ, a nyɩmɩ na ma sɔw tu a ʋna pɔw jaanfʋ wa, na ma mɩ bɔ̃w a ala ba na bʋɔlɔ a Satã yel-ciirsɩ wa, ɩ̃ yel nyɩ na a maa lɛ dɔɔlɔ nyɩ bom wa,

²⁵ ɩ̃-cɛ nyɩ́ nyɔw cĩcĩ a ala nyɩ na tɛrɛ, wa ta nɩ a ɩ̃ waa daar.

²⁶ A ʋlɔ na ɩrɛɛ a tʋɔfʋ sʋbɔ ɩraa nɩ a cĩcĩ a ɩ̃ tʋmɔ pʋɔ, ɩ̃ na kʋ ʋ na a tʋɔfʋ a nɩ-bʋlsɩ jie,

²⁷ a tʋɔfʋ ʋlɔ a maa mɩ̃ɛ na pɔw a ɩ̃ Sãa jie. Ʋ na tɛrɛ ba na nɩ a kpɛ̃w ʋlɔ na be a kur kaarɩ̃, ɩ̃ ma mɩ ŋmɛr ba bar lakpoor kaarɩ̃.

²⁸ Ɩ̃ ɩ̃ na mɩ kʋ ʋ na a bi-vɩɛ-ŋmarbir.

²⁹ “A ʋlɔ na tɛrɛ a tobo wono nɩ, ú bɔ̃w cɛlɛ a ala a Naaŋmɩn Sɩɛ na yele a duo-puorbo.