Miilfʋ Sɛbɛ 19 - A NAAŊMƖN PƲLƖ̃-TA-PAALAA

¹ A ala ɩ̃ baar, ɩ̃ wõ na kɔkɩ-kpɛn na wɔ̃ taa nɩ nɩ-yaw kɔkɩɛ a saꞌlon na yele: “Aleluya! A faafʋ, a yo-yifʋ nɩ a kpɛ̃w ɩ na a sɩ Naaŋmɩn ben,

² a-na-ɩ a ʋ ƴɛrɩ̃ guorfʋ ɩ na yel-mɩ̃ɛ ɩ̃ mɩ tor. A Naaŋmɩn ƴɔ̃w na a pɔw-baa ʋlɔ na yi a yuor yel, a ʋlɔ na dãa sãwna a tẽw ʋ jaa nɩ a ʋ burbur maalfʋ. Ʋ wɛl ʋ na bar a ʋ tʋ̃tʋnbɔ ʋ na kú ɩnɛ.”

³ Ba lɛ yelʼã go: “Aleluya! A tẽ-kpɛ̃ɛ ʋlɔ jʋʋr ure na a daar a jaa.”

⁴ Ɩ̃ a nɩ-bɛrɛ lɩjɛrʼɩ̃ anaan nɩ a yel-mimie anaan lo na gburĩ a dume a Naaŋmɩn ʋlɔ na jɛ a naa-dakɔw juu nii-sɔw, ɩ̃ pɛwrɛ ʋ yele nɩ: “*Amɛn! Aleluya!”

A NAAŊMƖN PÉLE KUL-TAA FƐTƖ

⁵ Kɔkɩr kãw yi na a naa-dakɔw jie, ɩ̃ yel: “A nyɩmɩ na ɩ a Naaŋmɩn tʋ̃tʋnbɔ, ɩ̃ mɩ jɔrɔ ʋ, a bibiir nɩ a nɩ-bɛrɛ jaa, nyɩ́ pɛwrɛ a sɩ Naaŋmɩn!”

⁶ Ɩ̃ lɛ wõ na dam na wɔ̃ taa nɩ nɩ-yaw kɔkɩɛ na hele kʋ̃ɔ kpɛ̃ɛ kaarɩ̃, nɩ a saa na tana nɩ kpɛ̃w, a yele: “Aleluya! A sɩ Nɩ-kpɛ̃ɛ Naaŋmɩn na ɩ a kpɛ̃w a jaa Sʋbɔ de na a tẽw.

⁷ Nyɩ́ ɩ a sɩ tɛrɛ nʋ̃ɔ cɩlɛ nɩ, kʋrɔ nɩ ʋ a ju-kpɛ̃ɛ, a-na-ɩ a Naaŋmɩn Péle kulfʋ daar ta na, a ʋ baraa parɩ̃sɩ.

⁸ Ba kʋ ʋ na sɔr ʋ vaar a cẽcẽ-ɓɔmɔ pɩlpɩl na nyɩlɛ.” (A cẽcene ala miile na a Naaŋmɩn deme tʋ̃-torisɩ.)

⁹ Ɩ̃ a sɩ-tʋnaa yel ma na: “Sɛb a asɩmɛ: A ma ɩ na nʋ̃ɔ a bala jie ba na bʋɔl a Naaŋmɩn Péle kulfʋ fɛtɩ jie.” Ɩ̃ ʋ lɛ yel ma na: “A ƴɛrɩ̃sɩ asɩmɛ ɩ na a Naaŋmɩn yel-mɩ̃ɛ ƴɛrɩ̃sɩ.”

¹⁰ Ɩ̃ lo gburĩ a dume a ʋ gbɛɛ pulẽe bʋɔrɔ ɩ̃ puor ʋ, ɩ̃-cɛ ʋ yel ma na: “Taa maal a lɛ wa. Ɩ̃ ɩ na a tʋ̃tʋnɔ a fʋ̃ʋ nɩ a fʋ yɛɛr kaarɩ̃ na tɛrɛ a *Jeeju yel-mɩ̃ɛ ƴɛrɩ̃. Pɛwrɛ a Naaŋmɩn!” A Jeeju yel-mɩ̃ɛ ƴɛrɩ̃ ɩ na a ʋlɔ na tɔwrɔ a Naaŋmɩn pʋ-tɩɛrʋ̃-bʋʋrbɔ a ba ƴɛrɩ̃sɩ pʋʋr.

A ƲLƆ NA DO A WI-PƖLAA JUU

¹¹ Ɩ̃ ɩ̃ nyɛ na a saa juu ʋ yuo, ɩ̃ a wi-pɩlaa ɩraa a be. A ʋlɔ na do ʋ yuor dɩ na a Dẽdẽ nɩ a Yel-mɩ̃ɛ Sʋbɔ, a-na-ɩ a ʋ ƴɛrɩ̃ guorfʋ nɩ a ʋ jɛb jɛbfʋ torʼã,

¹² A ʋ mimie nyɩnyɩlɛ na vũu kaarɩ̃, ɩ̃ ʋ kpa *sɛlmɛ sapir yaw a ʋ juumɩ. Ba sɛbʼã a yuor ƴɔ̃w ʋ, a ʋlɔ ʋ yẽ tɛw na bɔ̃w.

¹³ Ʋ su na cẽcen na ɩ jɩ̃ɩ ʋ jaa. A ʋ yuor dɩ na, “A Naaŋmɩn Ƴɛrɩ̃.”

¹⁴ A saa juu sɔdaalsɩ na su a cẽcẽ-pɛlɛ pɩlpɩl do na wi-pɛlɛ tuure nɩ ʋ.

¹⁵ A sɔ-bãjɩn-dɩraa yi na a ʋ nʋɔr pʋɔ, ʋ na cɩɛrɛ nɩ a ten bʋrɔ bʋrɔ. Ʋ na tɛrɛ ba na nɩ a kpɛ̃w ʋlɔ na wɔ̃ a kur kaarɩ̃. Ʋ na nɛbʼã a dɩvɛ̃ tɩ-wɔmɔ a bɔw kpɛ̃ɛ pʋɔ a dɩvɛ̃ kʋ̃ɔ jɔrɔ, a miile a Naaŋmɩn na ɩ a kpɛ̃w a jaa Sʋbɔ su-tuo na nyɩrɩ̃ tomo.

¹⁶ Ba sɛbʼã a ʋ yuor ƴɔ̃w a ʋ cẽcen juu, nɩ a ʋ gbɛ-kpɛ̃ɛ pʋɔ a nɔhɔ̃: “Jamansɩ Jamana, nɩ a nɩ-bɛrɛ Nɩ-kpɛ̃ɛ.”

¹⁷ Ɩ̃ lɛ nyɛ na sɩ-tʋnaa kãw na ɩraa a mɔtɔ̃w sɔɔlɩ̃sɔw ɩ̃ wuurʼɩ̃ kɔkɩr kpɛ̃w yel a wɛ-lili ba jaa na yʋɔrɔ a saꞌlon: “Nyɩ́ wa kpaarɩ̃ taa a Naaŋmɩn fɛtɩ kpɛ̃ɛ ɩnɛ!

¹⁸ Nyɩ́ wa dɩ a jamansɩ nɩn, nɩ a nɩbɛ ba jaa nɩn: a fãgã deme, nɩ a gãdar, a wibe, nɩ a bala na do ba, a bala na sɔ a ba mɩ̃ɛ, nɩ a bala na ɩ a gbãgbaar, a bibiir nɩ a nɩ-bɛrɛ ba jaa nɩn.”

¹⁹ Ɩ̃ lɛ nyɛ na a wɛ-dʋ̃ɔ, nɩ a tẽw pʋɔ jamansɩ, nɩ a ba sɔdaalsɩ, a ba kpaarɩ̃ taa bʋɔrɔ ba jɛbʼɩ̃ a ʋlɔ na do a wiir, nɩ a ʋ sɔdaalsɩ.

²⁰ Ba nyɔw na a wɛ-dʋ̃ɔ ʋlɔ, nɩ a jir-ŋma-ƴɛr-hiere ʋlɔ na dãa maal a nɔ-kofʋ tʋmɔ a wɛ-dʋ̃ɔ nii-sɔw, bɛlɛ nɩ a bala na dãa pɔw a ʋ jɩbaa puoro nɩ a ʋ bʋtɩɩb. Ba nyɔw ba na ba jaa ayi lɔb ƴɔ̃w a vũu bɔw pʋɔ, a jie ʋlɔ a kʋsɩ-ꞌlerisɩ na dɩrɛ.

²¹ A bala na cɛ, a ʋlɔ na do a wiir juu kú ba na nɩ a sɔ-bãjɩnɛ ʋlɔ na yi a ʋ nʋɔr pʋɔ, ɩ̃ a wɛ-lili dɩ a ba nɩn pi.