Miilfʋ Sɛbɛ 18 - A NAAŊMƖN PƲLƖ̃-TA-PAALAA

A BABƖLƆ̃-TẼW WƐLFƲ

¹ A ala ɩ̃ baar, ɩ̃ nyɛ na sɩ-tʋnaa ƴen subɔ na nyɩrɩ̃ tɛrɛ a tʋɔfʋ, v yi a saꞌlon ɩ̃ suure, ɩ̃ a v caarɩ̃fʋ caarɩ̃ pɔw a tẽw ʋ jaa.

² Ʋ wuurʼã nɩ kɔkɩr kpɛ̃w yele: “Ʋ lo na! A *Babɩlɔ̃ tẽ-kpɛ̃ɛ lo na! Ʋ lɩɛbʼã ɩ a kɔ̃tɔn gaajie, nɩ a kɔ̃tɔn-kpansɩ bʋrɔ bʋrɔ, nɩ a lili-kpansɩ bʋrɔ bʋrɔ a nɩrɛ na ma bʋɔrɔ wa, kpɛfʋ jie.

³ A-na-ɩ a tẽ-bʋrɔ bʋrɔ a jaa nyu na a ʋ gã-ta-burbur dãa, a bɔr ba a juu. A tẽw jamansɩ maalʼɩ̃ ʋ na a burbur, ɩ̃ a ten a jaa ƴaƴabsɩ le na a ʋ yele ƴɔfʋ ɩnɛ.”

⁴ Ɩ̃ lɛ wõ na kɔkɩr ƴen sʋbɔ na yi a saꞌlon ɩ̃ yel: “Ɩ̃ nɩbɛ, nyɩ́ yi a tẽw na sɔ̃w, a mɩnɛ a nyɩ kɔ̃ wa be tɔ a ʋ maal-faar pʋɔ, ɩ̃ mɩ pɔw a ana yel-kpansɩ nɔɔ tara ʋ wa.

⁵ A-na-ɩ a ʋ maal-faar dɔɔlʼã taa wa ta nɩ a saꞌlon, ɩ̃ a Naaŋmɩn cãa na bɔ̃w nɩ a ʋ gõgolĩ-tʋmɔ.

⁶ Nyɩ́ maal ʋ a mɩnɛ ʋ na dãa maal nyɩ. Nyɩ́ ya a ala ʋ na maal nyɩ, ɩ̃ lɛ dɔɔl ʋ. Nyɩ́ sɛw a dãa a ŋman ʋlɔ ʋ na dãa kʋ nɩ nyɩ gbɛɛ ayi kʋ ʋ ʋ nyu.

⁷ Ya ʋ a won nɩ a nãw ala tu nɩ a mɩnɛ ʋ na dãa bʋɔrɔ a ju-kpɛ̃ɛ, wono nɩ a nʋ̃ɔ. A-na-ɩ ʋ ma yelʼã a ʋ suur pʋɔ: ‘Ɩ̃ be na ka pɔɔ-naa kaarɩ̃. Maa ɩ kpɩ̃ɩ-pɔw wa. Nãw ma tara ma fɩ̃ɩ wa.’

⁸ Ala-ɩ̃-sɔ, a jãjĩ-yele ala ba na bin a ʋ ɩnɛ, a kũu, a nãw, nɩ a kɔ̃-kpɛ̃ɛ na ta ʋ na bibir bõ-ƴen tɛw. A vũu na dɩ ʋ na, a-na-ɩ a Nɩ-kpɛ̃ɛ Naaŋmɩn ʋlɔ na guor a ʋ ƴɛrɩ̃, tɛrɛ na kpɛ̃w.”

⁹ A tẽw jamansɩ na dãa maalʼɩ̃ ʋ a burbur, mɩ wõ nɩ ʋ a nʋ̃ɔ, na waala na kono nɩ, a mɩnɛ ba nɔɔ nyɛrɛ a vũu ʋlɔ na dɩrɛ ʋ jʋʋr.

¹⁰ Ba na ɩraa na nɩdaa a ʋ kpowfʋ dãbɩ̃ɛ ɩnɛ ɩ̃ yele: “Babɩlɔ̃ tẽ-kpɛ̃ɛ na tɛrɛ a kpɛ̃w, fʋ ɩ na nãw nãw, a-na-ɩ a lɛɛr-bõ-ƴen pʋɔ a kpãafʋ tɔɔ ta fʋ.”

¹¹ A tẽw pʋɔ ƴaƴabsɩ na mɩ kono na waala nɩ a ʋ ɩnɛ, a-na-ɩ nɩrɛ ma lɛ daara a ba ƴaƴab-yele,

¹² na ɩ a sɛlmɛ, a kur-pɛlɛ, nɩ a kʋsɩ-ɓɔmɔ, a lɛr-bie, a cẽcẽ-ɓɔmɔ bʋrɔ bʋrɔ, nɩ a ŋmɛɛ na ɩ a bʋlɔ, a ŋmɛɛ sala bʋlɔbʋlɔ, ɩ̃ a ŋmɛɛ ɩ jɩɩn kpakpa. A yele mɩ ɩ na a da-vɛlɛ, nɩ a yel-bʋrɔ bʋrɔ ba na maalʼɩ̃ a da-vɛlɛ ala, nɩ a wab-cɩlɛ, nɩ a kur-jɩ̃ɛw, nɩ a kur-salaa nɩ a kʋsɩ-pɛlɛ,

¹³ a tɩɛ bi-nɔr, a jɛɛ yel-nyuursɩ, a kã-nyu-vɩlaa, a tɩ̃ɩ bunaa, a *tɩ̃ɩ-nyu-vɩlaa, a dɩvɛ̃, a kãa, a jɔ̃, a ci, a bʋn, a piir, a wibe, a kaarsɩ ala a wibe na ma tawra, nɩ a gbãgbaar nɩ a nɩ-daarsɩ.

¹⁴ A ƴaƴabsɩ bala yelʼã a tẽw ʋlɔ: “A yel-vɛlɛ ala a fʋ suur na dãa nʋ bũburĩ na. A fʋ na-yele nɩ a fʋ yo-bɔb yele bɔrʼã. Faa lɔɔ pɔwrɔ ba fɩ̃ɩ wa.”

¹⁵ A ƴaƴabsɩ bala na dãa pɔw a ba mɩ̃ɛ a ʋ ɩnɛ na mɩ ɩraa na a nɩdaa a ʋ kpowfʋ dãbɩ̃ɛ ɩnɛ kono waala nɩ,

¹⁶ yele nɩ: “A tẽ-kpɛ̃ɛ nanɩ ɩ na nãw nãw! Ʋ ma dãa na su a cẽcẽ-ɓɔmɔ jɩɩn kpakpa, parɩ̃sɩ nɩ a sɛlmɛ yele, nɩ a kʋsɩ-nyɩlɩsɩ nɩ a lɛr-bie,

¹⁷ ɩ̃ a ana na-yele a jaa tɔɔ bɔr a lɛɛr-bõ-ƴen pʋɔ.” A bala na duure nɩ a gbor-bɛrɛ, nɩ a bala ba na de, nɩ a gbor pʋɔ tʋ̃tʋnbɔ, nɩ a bala ba jaa na be a manɩ̃, ɩraa na a nɩdaa

¹⁸ ɩ̃ wuure, a mɩnɛ ba na nyɛ a tẽw na dɩrɛ ure a jʋʋr, na ba yele: “Tẽ-buor be ka ɩ̃ ta a tẽ-kpɛ̃ɛ nanɩ?”

¹⁹ Ba ꞌwɔ̃wnɔ na a tana ƴɔnɔ a ba jurɩ̃, waala kono yele nɩ: “A tẽ-kpɛ̃ɛ nanɩ ɩ na nãw nãw! A bala na dãa tʋnɔ a gbor-bɛrɛ pʋɔ pɔwrɔ na a ba mɩ̃ɛ a ʋ na-yele ɩnɛ, ɩ̃-cɛ a lɛɛr-bõ-ƴen pʋɔ a ʋ yele bɔrʼã a jaa.”

²⁰ Saa juu deme, nyɩ́ cɩlɛ! A Naaŋmɩn nɩbɛ, nɩ a ʋ *nɩ-tʋnɩsɩ, nɩ a ʋ ƴɛr-hierbe, nyɩ́ mɩ cɩlɛ a ʋna tẽw kpãafʋ ɩnɛ, a-na-ɩ a Naaŋmɩn guorʼã a ʋ ƴɛrɩ̃ tu nɩ a ala ʋ na dãa maal nyɩ.

²¹ A ala ɩ̃ baar, a sɩ-tʋ̃-gãdaa de na kʋsɩ-kpɛ̃ɛ na jɛ̃ taa nɩ nɩɛr lɔb ƴɔ̃w a man kʋ̃ɔ pʋɔ, ɩ̃ yel: “A nɔhɔ̃ ba nɔɔ lɔb a Babɩlɔ̃ tẽ-kpɛ̃ɛ bar, a nɩrɛ ma lɔɔ nyɛrɛ ʋ wa.

²² Baa lɔɔ wono a korĩjom ŋmefʋ, nɩ a yel-cɩɛrbɛ, nɩ a wɩɛ kuon, nɩ a ɩl-pɛɛlbɛ a fʋ jie wa. Baa lɔɔ nyɛrɛ tʋ̃tʋnɔ kãw ʋ lɛ tʋnɔ tʋn kãw a fʋ jie wa. Baa mɩ lɔɔ wono jɔ̃-ƴɛrbɛ dam a fʋ jie go wa.

²³ Lãpa kãw ma lɔɔ caara a fʋ jie wa. A polbile nɩ a pɔsabile na kul taa kɔkɩɛ ma lɔɔ yire a fʋ jie wa. A fʋ ƴaƴabsɩ ɩ̃ dãa yi a yuor a tẽw pʋɔ, ɩ̃-cɛ a fʋ tɩsɔɔlʋ̃ʋ pʋɔ fʋ bɛlɩ̃ na a tẽ-bʋrɔ bʋrɔ a jaa.”

²⁴ A Babɩlɔ̃ tẽ-kpɛ̃ɛ ʋlɔ, ba wɛl ʋ na a lɛ, a-na-ɩ ba nyɛ na a Naaŋmɩn ƴɛr-hierbe jɩ̃ɩ a ʋ jie, lãa nɩ a Naaŋmɩn nɩbɛ jɩ̃ɩ, nɩ a bala ba jaa ba na dãa kú a tẽw pʋɔ jɩ̃ɩ.