Miilfʋ Sɛbɛ 16 - A NAAŊMƖN PƲLƖ̃-TA-PAALAA

A ALA A NAAŊMƖN SU-TUO NA MAAL

¹ Ɩ́ wõ na kɔkɩr kpɛ̃w na yi a Naaŋmɩn puor-yir, yele a sɩ-tʋnɩsɩ anuu-nʼayi bala: “Nyɩ́ cen na kpaar a Naaŋmɩn su-tuo a lara pʋɔ bar a tẽw juu.”

² A dãdãw sɩ-tʋnaa cenʼã na kpaar a ʋ ben bar a tẽw juu, a natɩ-yarɩsɩ na bier tɛ a nɩbɛ bala na tɛrɛ a wɛ-dʋ̃ɔ jɩbaa ɩ̃ mɩ puoro a ʋ bʋtɩɩb.

³ A gbɛɛ ayi sɩ-tʋnaa cenʼã na kpaar a ʋ ben ƴɔ̃w a man pʋɔ, a kʋ̃ɔ lɩɛb wɔ̃ taa nɩ kũu jɩ̃ɩ, a yel-mimie na be a kʋ̃ɔ pʋɔ kpi ba jaa.

⁴ A gbɛɛ ata sɩ-tʋnaa mɩ cenʼã na kpaar a ʋ ben ƴɔ̃w a kʋlsɩ pʋʋr nɩ a kʋ̃ɔ bunisɩ jiir, a lɩɛb ɩ jɩ̃ɩ.

⁵ A ala ɩ̃ baar, ɩ̃ wõ na a sɩ-tʋnaa ʋlɔ na ꞌwuoro a kʋ̃ɔsɩ ʋ yel: “Cɛcɛ Sʋbɔ, fʋ̃ʋ na ɩ, na mɩ dãa ɩ, fʋ torʼã a mɩnɛ fʋ na maal a nɔhɔ̃.

⁶ A-na-ɩ a bala na dãa kú a fʋ nɩbɛ nɩ a fʋ ƴɛr-hierbe, fʋ kʋ ba na a jɩ̃ɩ a ba nyuure. Ba pɔw na a ala na sɛw nɩ ba.”

⁷ Ɩ̃ lɛ wõ na a kɔkɩr na yi a baar lofʋ jie na yel: “ɔɔ, Nɩ-kpɛ̃ɛ Naaŋmɩn na ɩ a kpɛ̃w a jaa Sʋbɔ. A fʋ ƴɛrɩ̃ guorfʋ ɩ na yel-mɩ̃ɛ ɩ̃ mɩ tor.”

⁸ A gbɛɛ anaan sɩ-tʋnaa kpaarʼã a ʋ ben ƴɔ̃w a mɔtɔ̃w pʋɔ, ʋ pɔw a tʋɔfʋ vuul a nɩbɛ nɩ a vũu.

⁹ A tʋlɩ̃ kpɛ̃w vuulʼã a nɩbɛ a ba tʋrɔ a Naaŋmɩn ʋlɔ na tɛrɛ a tʋɔfʋ a ana jãjĩ-yele pʋɔ, ɩ̃ ma lɩɛb a ba yɛ̃ kʋrɔ nɩ ʋ a ju-kpɛ̃ɛ wa.

¹⁰ A gbɛɛ anuu sɩ-tʋnaa kpaarʼã a ʋ ben ƴɔ̃w a wɛ-dʋ̃-naa-dakɔw juu, a ʋ fãw wɩɛr lɩɛb sɔb, ɩ̃ a nɩbɛ ꞌwɔbɔ a nɔgbalĩbie a won na wono ba ɩnɛ.

¹¹ Ba tʋrɔ na a saa juu Naaŋmɩn a ba won nɩ a ba natɩɛ ɩnɛ, ɩ̃-cɛ baa lɩɛb a ba yɛ̃ a ba maal-bie ɩnɛ wa.

¹² A gbɛɛ ayʋɔb sɩ-tʋnaa kpaarʼã a ʋ ben ƴɔ̃w a Ɛfɩratɩ kʋl-kpɛ̃ɛ pʋɔ, a kʋ̃ɔ sɩr, bar a sɔr a tẽw parɩ̃ jamansɩ ɩnɛ nɔɔ waara.

¹³ Ɩ̃ lɛ nyɛ na sɩ-kpansɩ ata na wɔ̃ taa nɩ lɔn na yire a gbãgbacol nʋɔr pʋɔ, nɩ a wɛ-dʋ̃ɔ nʋɔr pʋɔ, nɩ a jir-ŋma-ƴɛr-hiere nʋɔr pʋɔ.

¹⁴ Ba ɩ na a kɔ̃tɔnsɩ na ma maala a nɔ-kofʋ tʋmɔ. Ba cere na a tẽw ʋ jaa jamansɩ jie, na kpaarɩ̃ ba a Naaŋmɩn, na ɩ a kpɛ̃w a jaa Sʋbɔ, bibir kpɛ̃ɛ jɛb ɩnɛ.

¹⁵ A Nɩ-kpɛ̃ɛ yelʼã: “Cɛlɛ! Ɩ̃ wɩɛrɛ na nyanyuur kaarɩ̃. Nʋ̃ɔ na be na a ʋlɔ na jʋʋrɔ jie, a ʋlɔ na bɔ̃w tɛrɛ a ʋ cẽcene, a mɩnɛ ʋ kɔ̃ɔ cere nɩ salĩɓuor a ɩ ʋ vĩ a nɩbɛ nii-sɔw wa.”

¹⁶ A kɔ̃tɔnsɩ bala kpaarɩ̃ na a jamansɩ a jie ʋlɔ ba na bʋɔlɔ nɩ a Eburo ƴɛrɩ̃ a Amagɛdɔ̃.

¹⁷ A gbɛɛ anuu-nʼayi sɩ-tʋnaa kpaarʼã a ʋ ben ƴɔ̃w a sɛsɛb pʋɔ ɩ̃ a kɔkɩr kpɛ̃w yi a naa-dakɔw ʋlɔ na be a Naaŋmɩn di-tuo pʋɔ yel: “A maalʼã.”

¹⁸ Ɩ̃ a saa nyɩnyɩlɛ, a kɔkɩɛ yire, a saa tana, ɩ̃ a tẽw ɓĩi nɩ kpɛ̃w. Wa nyɔw nɩ a lɛdaar a nɩrɛ na be ka a tẽw pʋɔ, a tẽw ma dãa ɓĩi nɩ kpɛ̃w a nɔhɔ̃ sɛr wa.

¹⁹ A tẽ-kpɛ̃ɛ ŋma na jiir ata kpee kpee, a nɩ-bʋrɔ bʋrɔ ten kar lo, ɩ̃ a Naaŋmɩn cãa bɔ̃w nɩ a tẽ-kpɛ̃ɛ ʋlɔ na dɩ a *Babɩlɔ̃, ɩ̃ de a dɩvɛ̃ nɩ a ŋman kʋ ʋ ʋ nyu, a dɩvɛ̃ ʋlɔ na ɩ a ʋ su-tuo na nyɩrɩ̃ tomo.

²⁰ A ten a jaa a kʋ̃ɔ na jilĩ kolĩ nyɩ na, nɩ a tan a jaa.

²¹ A sa-kʋsɩ-bɛrɛ a nɩrɛ na ma tʋɔrɔ ɓɔwrɔ wa, a yi a saꞌlon ɩ̃ loro pɔbɔ a nɩbɛ, a ba tʋrɔ a Naaŋmɩn a ʋna jãjĩ-bom ɩnɛ, a-na-ɩ ʋ dãa na ɩ bom na nyɩrɩ̃ bier.