Miilfʋ Sɛbɛ 1 - A NAAŊMƖN PƲLƖ̃-TA-PAALAA

A ƳƐRƖ̃ JUU

¹ A yele ala a Naaŋmɩn na miil a *Jeeju-Kirisi nɩ a asɩmɛ. Ʋ miil ʋ na a mɩnɛ ʋ na ma miil a ʋ tʋ̃tʋnbɔ a ala na ma yaarɩ̃ tara wa. A *Kirisi tʋ̃ na a ʋ sɩ-tʋnaa ʋ cen na yel kʋ a Jã na ɩ a ʋ tʋ̃tʋnɔ,

² ɩ̃ a Jã manʼã a ala a jaa ʋ na nyɛ. Ʋ manʼã a Naaŋmɩn ƴɛrɩ̃, nɩ a ala a Jeeju-Kirisi na mɩ man ʋ.

³ Nʋ̃ɔ ma be na a ʋlɔ jie na ꞌwuoro a sɛbɛ na, nɩ a bala jie na mɩ cɛlɛ a *Naaŋmɩn pʋ-tɩɛrʋ̃-bʋʋrɔ ƴɛrɩ̃sɩ asɩmɛ, ɩ̃ mɩ jɔrɔ a ala na sɛb a sɛbɛ na pʋɔ, a-na-ɩ a daar tara na.

A NƖBƐ PUORFƲ NƖ A NAAŊMƖN PƐWFƲ

⁴ A maa Jã ɩ̃ sɛb a sɛbɛ na tɩɩrɛ kʋrɔ a nyɩmɩ *duo-puorbo na be a jiir anuu-nʼayi a Ajɩ wɩɛr pʋɔ. A sũofʋ nɩ a pɩɛnfʋ á be a nyɩ jie, a yi a ʋlɔ na ɩ, na mɩ dãa ɩ, nɔɔ mɩ waara jie. A mɩ yi a sɩɩr anuu-nʼayi na ɩraa a Naaŋmɩn naa-dakɔw nii-sɔw jie,

⁵ nɩ a *Jeeju-Kirisi jie. A *Kirisi ʋlɔ ɩ na a yel-mɩ̃ɛ ƴɛr-man-dẽdẽ, nɩ a dãdãw sʋbɔ na ir a kũu pʋɔ, nɩ a tẽw jamansɩ Nɩ-kpɛ̃ɛ. Ʋ nʋ sɩ na ɩ̃ ir sɩ yi nɩ a sɩ maal-faar pʋɔ, a ʋ kũu ɩnɛ,

⁶ ɩ̃ lɩɛb sɩ a sɩ ɩ a ʋ fãw pʋɔ nɩbɛ, ɩ nɩ a baar-lorbo a ʋ Sãa Naaŋmɩn nii-sɔw. A Jeeju-Kirisi ɩ̃ sɔ a yo-yifʋ nɩ a kpɛ̃w a daar a jaa. *Amɛn.

⁷ Nyɩ́ nyɛ, ʋ waara na a dɔ̃dɔrɩ̃sɩ pʋɔ. A nɩbɛ ba jaa nɔɔ nyɛ ʋ na, lãw nɩ a bala na dãa cɔr cɔr ʋ. Ɩ̃ a tẽw bal bʋrɔ bʋrɔ ba jaa na waala na a ʋ waa ɩnɛ. Ɔɔ, a lɛ a na be. Amɛn.

⁸ A Nɩ-kpɛ̃ɛ Naaŋmɩn na ɩ a kpɛ̃w a jaa Sʋbɔ yelʼã: “Maa ɩ a nyɔwfʋ jie nɩ a baarfʋ jie, a ʋlɔ na ɩ, ɩ̃ mɩ dãa ɩ, na mɩ waara.”

A BÕ-MIILAA ƲLƆ A JÃ NA NYƐ

⁹ A maa Jã na ɩ a nyɩ yɛbɛ, na lãa be nɩ nyɩ a won pʋɔ, ɩ̃ mɩ be taa nɩ nyɩ a Naaŋmɩn fãw pʋɔ, tɛrɛ nɩ a su-nyɔwraa a-na-ɩ a *Jeeju pʋɔ sɩ be. Ba ƴɔ̃w ma na be a wɩɛr ʋlɔ ba na bʋɔlɔ a Patɩmɔsɩ a man kʋ̃ɔ na viirĩ kolĩ, a-na-ɩ ɩ̃ ƴɛrʼã a Naaŋmɩn ƴɛrɩ̃ mɩ manʼɩ̃ a Jeeju yel-mɩ̃ɛ kʋ a nɩbɛ.

¹⁰ A Nɩ-kpɛ̃ɛ bibir dayen, a Naaŋmɩn Sɩɛ ir ma na ɩ̃ wõ kɔkɩr kpɛ̃w a ɩ̃ puo-sɔw na wɔ̃ taa nɩ ɩl ba na pɛɛlɛ,

¹¹ na yele: “Sɛb a ala fʋ na nyɛ ƴɔ̃w sɛbɛ pʋɔ tɩɩr kʋ a *duo-puorbo bala na duoro a ten anuu-nʼayi asɩmɛ: a Ɛfɛɛsɩ, nɩ a Sɩmɩɩr, a Pɛrgam, nɩ a Tɩyatɩɩr, a Sardɛsɩ, nɩ a Fɩladɛlfɩ, nɩ a Lawdise.”

¹² Ɩ̃ ŋmelĩ na a ɩ̃ ꞌwuor je kãa a ʋlɔ na ƴɛrɛ nɩ ma, ɩ̃ a mɩnɛ ɩ̃ na ŋmelĩ, ɩ̃ nyɛ na lãpar anuu-nʼayi na ɩ sɛlmɛ,

¹³ ɩ̃ a ana lãpar sɔɔlɩ̃sɔw, ɩ̃ nyɛ na bom na wɔ̃ taa nɩ nɩrɛ na su kpar-kpɛ̃ɛ na suu ta ʋ a gbɛɛ pʋɔ, ɩ̃ mɩ sɛ sɛlmɛ gan a nyãa juu.

¹⁴ A ʋ jukɔbɔ dãa na pɛlɩ̃ a pɛr kɔbɔ mɩɩ a gon kaarɩ̃, ɩ̃ a ʋ mimie nyɩnyɩlɛ wɔ̃ taa nɩ a vũu.

¹⁵ A ʋ gbɛɛ mɩ dãa na wɔ̃ kur jɩ̃ɛw ba na ƴɔ̃w vũu pʋɔ ʋ nyɩlɛ, ɩ̃ a ʋ kɔkɩr yire wɔ̃ taa nɩ kʋ̃ɔ kpɛ̃ɛ na hele.

¹⁶ Ʋ dãa na tɛrɛ ŋmarbie anuu-nʼayi a ʋ dʋrɩ̃ nuu pʋɔ, ɩ̃ a sɔ-bãjɩnɛ na dɩrɛ a nɔɛ a jaa mɩ yire a ʋ nʋɔr pʋɔ. A ʋ nii-sɔw nyɩnyɩlɛ na wɔ̃ taa nɩ a mɔtɔ̃w na be a ju-sɔ̃w.

¹⁷ A mɩnɛ ɩ̃ na nyɛ ʋ a lɛ, ɩ̃ lo na a ʋ gbɛɛ pulẽe, gã wɔ̃ taa nɩ nɩrɛ na kpi, ɩ̃ ʋ dɔɔl ma na a ʋ dʋrɩ̃ nuu ɩ̃ yel: “Taa jɔrɔ dãbɩ̃ɛ wa. Maa ɩ̃ ɩ a Dãdãw Sʋbɔ, nɩ a Baarfʋ Sʋbɔ.

¹⁸ Ɩ̃ mɩ ɩ na a Baafʋ Sʋbɔ. Ɩ̃ dãa na kpi, ɩ̃ a ƴɛ̃ƴɛrɩ̃ na, ɩ̃ lɛ tɛrɛ na a baafʋ a daar a jaa ɩnɛ. Maa ɩ̃ tɛrɛ a kũu nɩ a kpɩɩn tẽw dɔ̃dɔ-nɔɛ nakilsɩ,

¹⁹ Ala-ɩ̃-sɔ, sɛb a ala fʋ na nyɛ, ƴɔ̃w sɛbɛ pʋɔ: a ala na maala a ƴɛ̃ƴɛrɩ̃ na, nɩ a ala nɔɔ tara a daar kãw.

²⁰ Nyɛ a yele ala na sɔɔlɩ̃: a ŋmarbie anuu-nʼayi ala fʋ na nyɛ a ɩ̃ dʋrɩ̃ nuu pʋɔ, nɩ a sɛlmɛ lãpar anuu-nʼayi. A ŋmarbie anuu-nʼayi miile na a duo-puorbo jiir anuu-nʼayi sɩ-tʋnɩsɩ, ɩ̃ a lãpar anuu-nʼayi mɩ miile na a duo-puorbo na be a jiir anuu-nʼayi.