Matie Sɛbɛ 28 - A NAAŊMƖN PƲLƖ̃-TA-PAALAA

A JEEJU KŨU-PƲƆ-IRFƲ

¹ A mɩnɛ a *bibi-ciiraa na tɔl, a Madala Maarɩɩ nɩ a Maarɩɩ ƴen sʋbɔ ca na cen a jɩmaasɩ dʋ̃ꞌwʋlɩ̃ ɓaaraa a yaa ꞌwuorfʋ.

² Ɩ̃ a jie naan a tẽw damʼã nɩ kpɛ̃w, a Naaŋmɩn sɩ-tʋnaa kãw yi a saꞌlon ɩ̃ suu wa bɩlɩ̃ a kubir a yaa nʋɔr yuo bar, ɩ̃ do jɛ.

³ Ʋ nyɩnyɩlɛ na wɔ̃ taa nɩ a saa na nyɩɩlɛ, a ʋ cẽcene mɩ pɛlɩ̃ na a gon kʋɔraa kaarɩ̃.

⁴ Dãbɩ̃ɛ nyɔw na a bala na gu a yaa, a ba mine, lɩɛb wɔ̃ taa nɩ kũusɩ.

⁵ Ɩ̃-cɛ a sɩ-tʋnaa yel a pɔɔbɔ bala: “Nyɩ taa jɔrɔ dãbɩ̃ɛ wa. Ɩ̃ bɔ̃w na bɔ̃w ka a *Jeeju ʋlɔ ba na dãa kpa a nɩ-kʋ-daa juu, ʋlɔ nyɩ bʋɔrɔ.

⁶ ꞌWaa cãa ka wa. Ʋ irʼã lɛ tɛrɛ a baafʋ, a mɩnɛ ʋ na dãa yel. Nyɩ́ wa nyɛ a jie ʋlɔ ba na dãa gaal ʋ.

⁷ Nyɩ́ cen fɔfɔw, na yel a ʋ *par-tuurbe, á ʋ irʼã a kũu pʋɔ, á ʋ de ba na nĩe cen a Galile; á be ba na nyɛ ʋ. A ƴɛrɩ̃ nɩ a ʋlɔ, ɩ̃ na yel kʋ nyɩ.”

⁸ A jie naan ba yi na a yaa par, a dãbɩ̃ɛ nɩ a nʋ̃ɔ kpɛ̃ɛ nyɔw ba, a ba jɔrɔ cere a ʋ par-tuurbe yelfʋ jie.

⁹ Ɩ̃ a mɩnɛ ba na cere, a Jeeju tuorʼɩ̃ ba na, ɩ̃ puor ba á Yaanɩ! A ba taw ta ʋ, lo gburĩ a dume a ʋ pulẽe, ɩ̃ nyɔw ʋ a gbɛɛ puoro nɩ ʋ.

¹⁰ A Jeeju yel ba: “Nyɩ taa jɔrɔ dãbɩ̃ɛ wa. Nyɩ́ cen na yel kʋ a ɩ̃ yɛɛr, á bá wɩ be a Galile; á be ba na nyɛ ma.”

A YAA GUFƲ ƳƐRƖ̃

¹¹ A lɛ a pɔɔbɔ na cãa be a sɔr pʋɔ cere, a sɔdaalsɩ bala na dãa gure a yaa ŋmɛɛ lɩɛbʼã kul a tẽw pʋɔ na man a *baar-lo-nɩ-bɛrɛ a ala a jaa na ta,

¹² a ba kpaarɩ̃ taa nɩ a ni-dierbe guor taa, ɩ̃ ya a sɔdaalsɩ a libie yaw, ɩ̃ yel ba:

¹³ “Nyɩ́ ma yel a nɩbɛ á ʋ *par-tuurbe ɩ̃ wɩ a tɩsɔw ju yaa a kũu a lɛ sɩ na gur baar.

¹⁴ Ɩ̃ a jamana wa wõ a ƴɛrɩ̃ naa, sɩ na bɔ̃w na a mɩnɛ sɩ na mana ʋ, ʋ kɔ̃ wa ɩ nyɩ bom wa.”

¹⁵ A sɔdaalsɩ de na a libie ɩ̃ maal tu nɩ a mɩnɛ ba na man ba. Ala-ɩ̃-sɔ a ƴɛrɩ̃ na yɛrʼã pɔw a Jufisɩ sɔ̃w wa ta nɩ a dɩnaa.

A TƲMƆ ALA A JEEJU NA KƲ A Ʋ PAR-TUURBE

¹⁶ A *par-tuurbe pie-nɩ-bõ-ƴen cenʼã a Galile wɩɛr, a tãw ʋlɔ juu a *Jeeju na dãa tʋ̃ miil ba.

¹⁷ Ɩ̃ a lɛ ba na nyɛ ʋ, ba lo na gburĩ a dume ɩ̃ puoro ʋ, ɩ̃-cɛ a nɩŋmɛɛ cãa baala.

¹⁸ A Jeeju taw ta ba ɩ̃ yel: “A ɩ̃ Sãa kʋ ma na a kpɛ̃w ʋ jaa, a saa juu nɩ a ka a tẽw juu.

¹⁹ Ala-ɩ̃-sɔ, nyɩ́ cen a nɩ-bʋrɔ bʋrɔ jiir a jaa, na maal ba a ba ɩ a ɩ̃ par-tuurbe, de nɩ a Sãa yuor nɩ a Bie yuor nɩ a Naaŋmɩn Sɩɛ yuor mʋrʼɩ̃ ba a kʋ̃ɔ,

²⁰ ɩ̃ jaan ba a ba maala a ala a jaa ɩ̃ na man nyu Ɩ̃ nyɩ́ bɔ̃wnaa, ɩ̃ na be nɩ nyɩ na a daar a jaa, wa ta nɩ a tẽw baarfʋ daar.”