Matie Sɛbɛ 26 - A NAAŊMƖN PƲLƖ̃-TA-PAALAA

A NƖ-BƐRƐ NA MANA TAA A JEEJU NYƆWFƲ

¹ A lɛ a *Jeeju na man a ana ƴɛrɩ̃sɩ baar, ʋ yelʼã a ʋ *par-tuurbe:

² “Nyɩ bɔ̃w ka a *Pakɩ fɛtɩ cɛ na bibie ayi, ɩ̃ a ba na nyɔw a *Nɩbɛ Bie tɩɩr, a ba kpa ʋ a nɩ-kʋ-daa juu.”

³ A daar ʋlɔ pʋɔ, a Naaŋmɩn *baar-lo-nɩ-bɛrɛ nɩ a Jufisɩ ni-dierbe kpaarɩ̃ na taa a *baar-lo-nɩ-kpɛ̃ɛ Kayifi gbalɩ̃ pʋɔ.

⁴ Ɩ̃ ba mana na taa a mɩnɛ ba na ɩrɛ ɩ̃ sɔɔlɔ nyɔwrɔ a Jeeju kʋrɔ.

⁵ Ba yelʼã taa: “A taa ɩ a fɛtɩ daar wa, a mɩnɛ a damfʋ kɔ̃ wa be a nɩbɛ jie wa.”

A PƆW NA KPAAR A KÃA ƳƆ̃W A JEEJU GBƐƐ PƲƆ

⁶ A lɛ a *Jeeju na be a Betani-tẽw, a Sɩmɔ̃ ʋlɔ na ɩ a kɔ̃w, a ʋ yir,

⁷ a pɔw wɩ nɩ a kã-nyu-vɩlaa na nyɩrɩ̃ kpɛmɛ a dafʋ ba na dãa ƴɔ̃w a kubir yole pʋɔ a sɛw, ʋ de kpaar ƴɔ̃w a Jeeju juumɩ, a lɛ ʋ na jɛ a dɩb par.

⁸ A mɩnɛ a ʋ *par-tuurbe na nyɛ a lɛ, suur nyɔw ba na a ba sooro taa: “Bõ ɩ ʋ sãwna a kãa bara a lɛ?

⁹ Ʋ naa dãa na da pɔw a libie yaw kʋ a nãw deme.”

¹⁰ Ɩ̃ a Jeeju bɔ̃w na a ala ba na ƴɛrɛ, ɩ̃ yel ba: “Bõ ɩ a nyɩ dama a pɔw na? Ʋ maalʼã vɩlaa a ɩ̃ jie.

¹¹ A-na-ɩ nyɩ be na taa nɩ a nãw deme a daar a jaa. Ɩ̃-cɛ a maa, nyaa nyɛrɛ ma ɩ̃ beree nɩ nyɩ a daar a jaa wa.

¹² A pɔw na, a mɩnɛ ʋ na deer a kãa ƴɔ̃w a ɩ̃ ɩ̃gan pʋɔ, a ɩ̃ ũufʋ ɩnɛ ʋ gbɛɛrɩ̃ ma.

¹³ Yel-mɩ̃ɛ ɩ̃ yele nyɩ, a lɛ ba nɔɔ mana a ƴɛr-son naa a jiir a jaa, ba nɔɔ mɩ mana a ala a pɔw naa na maal, a ba kɔ̃ wa hiin ʋ wa.”

A JUDASƖ BƲƆRƆ NA A JEEJU NYƆWFƲ

¹⁴ Ɩ̃ a *Jeeju *par-tuurbe pie-nʼayi ƴen sʋbɔ na dɩ a Judasɩ Isikaryɔtɩ, cenʼã a Naaŋmɩn *baar-lo-nɩ-bɛrɛ jie

¹⁵ na soor ba: “A maa ƴɔ̃w a Jeeju a nyɩ nuumɩ, bõ nyɩ na kʋ ma?” A ba ya ʋ libi-kure lɩjɛrʼɩ̃-pie.

¹⁶ Ɩ̃ wa nyɔw nɩ a ʋna bibirʼãa, ʋ nyɔw na ɩ̃ bʋɔrɔ a mɩnɛ ʋ na ɩrɛ ɩ̃ ƴɔnɔ a Jeeju a ba nuumɩ.

A JEEJU NA LÃA DƖ NƖ A Ʋ PAR-TUURBE A FƐTƖ DƖB

¹⁷ A *bur-pʋɔr fɛtɩ bibir dãdãw dayen, a *Jeeju *par-tuurbe taw na ta ʋ ɩ̃ soor ʋ: “Nyɩnɛ fʋ bʋɔrɔ sɩ gbɛɛrɩ̃ fʋ a *Pakɩ fɛtɩ dɩb?”

¹⁸ A Jeeju yel ba: “Nyɩ́ cen a Jerujalɛm, a daba kãw jie na yel ʋ: ‘A Jãjaana yelʼã áa ʋ daar ta na, ʋ na dɩ a Pakɩ fɛtɩ dɩb nɩ a ʋ par-tuurbe a be a fʋ yir.’ ”

¹⁹ A ʋ par-tuurbe maal a mɩnɛ a Jeeju na yel ba, na ba gbɛɛrɩ̃ a Pakɩ fɛtɩ dɩb.

²⁰ A jaanʋɔr, a Jeeju lãa na jɛ nɩ a ʋ par-tuurbe pie-nʼayi a dɩb pulẽe,

²¹ ɩ̃ a mɩnɛ ba na dɩrɛ a dɩb, a Jeeju yel ba: “Yel-mɩ̃ɛ ɩ̃ yele nyɩ, bõ-ƴen be na a nyɩ sɔ̃w nɔɔ diere ma a juu.”

²² A ʋ par-tuurbe nii-sɔɔr nyɩrɩ̃ sɔb ba, a ba sooro ʋ bõ-ƴene-ƴene: “Nɩ-kpɛ̃ɛ, maa ʋ mɩɩ?”

²³ A Jeeju yel ba: “A ʋlɔ na tune ɓara nɩ ma a laa pʋɔ, ʋlɔ wa diere ma a juu.

²⁴ A *Nɩbɛ Bie na kpi na tu nɩ a mɩnɛ a na dãa sɛb a Naaŋmɩn Sɛbɛ pʋɔ a ʋ ɩnɛ. Ɩ̃-cɛ nabier na pɔw na a ʋna nɩrɛ na diere a Nɩbɛ Bie juu. A dãa na sa a nɩrɛ ʋlɔ jie, a ba kãa dãa dɔw ʋ wa.”

²⁵ A Judasɩ ʋlɔ na diere a Jeeju a juu soor ʋ na: “Jãjaana, maa ʋ mɩɩ?” A Jeeju yel ʋ: “Fʋ̃ʋ yel fʋ yẽ.”

A JEEJU NƖ A Ʋ PAR-TUURBE NA DƖRƐ A PAKƖ FƐTƖ

²⁶ A lɛ ba na dɩrɛ a dɩb, a *Jeeju de na a buru, ɩ̃ a lɛ ʋ na puor a Naaŋmɩn ƴɔ̃w, ʋ ŋma na kʋ a ʋ *par-tuurbe, ɩ̃ yel ba: “Nyɩ́ de ꞌwɔb. A naa ɩ na a ɩ̃ ɩ̃gan.”

²⁷ Ɩ̃ ʋ lɛ de na a dɩvɛ̃ nɩ a ŋman, puorʼɩ̃ a Naaŋmɩn, ɩ̃ cɛ kʋ ba yele nɩ: “Nyɩ́ de nyu nyɩ jaa.

²⁸ A-na-ɩ a naa ɩ̃ ɩ a ɩ̃ jɩ̃ɩ na cɔɔrɔ a *pʋlɩ̃-taa a Naaŋmɩn na pʋlɩ̃ nɩ a nɩ-yaw, na mɩ cire a mɩnɛ a Naaŋmɩn na de a ba maal-faar bar kʋ ba.

²⁹ Ɩ̃ ɩ̃ yele nyɩ na, maa lɔɔ nyuure a bom naa fɩ̃ɩ, wa tara nɩ a lɛdaar ɩ̃ nɔɔ lãa lɛ nyuure nɩ nyɩ a dɩvɛ̃ paalaa a ɩ̃ Sãa fãw pʋɔ wa.”

³⁰ Ɩ̃ a lɛ ba na cɛ a puorfʋ fɛtɩ yele baar, ba yi na cen a *Olivi-tɩɩr tãw juu.

A JEEJU NA MANA A MƖNƐ A PƖƐR NA CƖƖRƐ Ʋ

³¹ Ɩ̃ a *Jeeju yelʼã a ʋ *par-tuurbe: “A dɩnaa tɩsɔw, nyɩ na bɩlʼã faa nyɩ jaa ɩ̃ bar ma ɩ̃ jɔ, a-na-ɩ a sɛbʼã a Naaŋmɩn Sɛbɛ pʋɔ: ‘Ɩ̃ na ŋme na a dɔ-cɩɩnaa kʋ́, ɩ̃ a piir jɔ yaarɩ̃.’

³² Ɩ̃-cɛ a maa wa ir a kũu pʋɔ, ɩ̃ na de nyɩ na nĩe cen na gu nyɩ a Galile.”

³³ A Pɩɛr yel a Jeeju: “A ala saarɩ̃ ɩ a ba jaa na bɩlʼã faa ɩ̃ bar fʋ ɩ̃ jɔ, a maa, maa bara fʋ fɩ̃ɩ wa.”

³⁴ A Jeeju yel ʋ: “Yel-mɩ̃ɛ ɩ̃ yele fʋ, a tɩsɔw na, a nɔraa kɔ̃ kõ sɛr wa, ɩ̃ fʋ na cɩɩrɩ̃ na gbɛɛ ata, á faa bɔ̃w ma wa.”

³⁵ A Pɩɛr yel ʋ: “A ala saarɩ̃ ɩ a sɛw na ɩ̃ na kpi nɩ fʋ, maa cɩɩrɛ fʋ fɩ̃ɩ wa.” Ɩ̃ a ʋ par-tuurbe ba jaa mɩ yelʼã a lɛ.

A JEEJU NA PUORO A JESEMANE NAKƲƆR PƲƆ

³⁶ Ɩ̃ a *Jeeju taw na a ʋ *par-tuurbe cenʼɩ̃ a jie ʋlɔ ba na bʋɔlɔ a Jesemane, ɩ̃ yel ba: “Nyɩ́ jɛ a ka, ɩ̃-cɛ ɩ̃ cen beka na sʋɔr a Naaŋmɩn.”

³⁷ Ɩ̃ ʋ taw na a Pɩɛr nɩ a Jebede bi-dabsɩ ayi lãa cenʼɩ̃ a nii-sɔw, ɩ̃ a ni-sɔbaa nyɔw ʋ, lãa dama nɩ ʋ a tɩɛrɩ̃sɩ yaw,

³⁸ ʋ yel ba: “Ni-sɔbaa nyɩrɩ̃ na kpɛ ma wɔ̃ taa nɩ ɩ̃ na kpi na. Nyɩ́ ɩraa a ka; nyɩ taa wa gure wa.”

³⁹ Ɩ̃ ʋ cenʼã a nii-sɔw fɩ̃ɩ na lo gburĩ a dume ɩ̃ kpa pɔw a ʋ nii-sɔw, ɩ̃ sʋɔrɔ a Naaŋmɩn yele nɩ: “Ɩ̃ Sãa, a ala ɩ a na tʋɔ na ɩ a lɛ, ir ma a tuo ŋman naa bar, ɩ̃ kɔ̃ nyu nɩ ʋ wa. Ɩ̃-cɛ a taa ɩ a mɩnɛ ɩ̃ na bʋɔrɔ wa, ɩ̃ a ɩ a mɩnɛ fʋ na bʋɔrɔ.”

⁴⁰ A Jeeju lɩɛbʼã wa na nyɛ a ʋ par-tuurbe ata a ba gur, ʋ yel a Pɩɛr: “Nyaa tʋɔrɔ gala a gʋ̃ɔ ɩ̃ pɔwrɔ ma a lɛɛr-bõ-ƴen pʋɔ wa?

⁴¹ Nyɩ taa gure wa. Nyɩ́ sʋɔrɔ a Naaŋmɩn, kɔ̃ wa kpɛ a bɩɩrfʋ pʋɔ wa. A nɩrɛ sɩɛ bʋɔrɔ na a son maalfʋ, ɩ̃-cɛ a ɩ̃gan balʼã.”

⁴² A Jeeju lɛ bar ba na ɩ̃ cen a gbɛɛ ayi pʋɔ, na puoro yele nɩ: “Ɩ̃ Sãa, a ala ɩ a tuo ŋman naa ma tʋɔrɔ diere bara ma ɩ̃ a ala ma ɩ ɩ̃ na nyu nɩ ʋ na wa, maal a mɩnɛ fʋ na bʋɔrɔ.”

⁴³ A Jeeju lɛ wa na a ʋ par-tuurbe sɛ̃ na nyɛ ba a ba gure, a-na-ɩ a gʋ̃ɔ nyɩrɩ̃ na gãw ba,

⁴⁴ ʋ lɛ bar ba ɩ̃ cen a gbɛɛ ata pʋɔ, lɛ puor a lɛ,

⁴⁵ ɩ̃ pãa lɛ wa a ʋ par-tuurbe sɛ̃ na yel ba: “Nyɩ cãa na be ka gure? Nyɩ́ nyɛ, a daar ta na ba na ƴɔnɔ a *Nɩbɛ Bie a maal-faar deme nuumɩ.

⁴⁶ Nyɩ́ ir a sɩ cen. Nyɩ́ nyɛ, a ʋlɔ na diere ma a juu tara na ka.”

A JEEJU NYƆWFƲ

⁴⁷ A mɩnɛ a *Jeeju na cãa ƴɛrɛ, a Judasɩ na ɩ a ʋ *par-tuurbe pie-nʼayi ƴen sʋbɔ ta na. Ʋ wa nɩ na a nɩ-yaw na tɛrɛ a bãjɩnsɩ, nɩ a gʋdɛɛ, a Jufisɩ ni-dierbe nɩ a *baar-lo-nɩ-bɛrɛ na tʋ̃.

⁴⁸ A ʋlɔ na diere a Jeeju a juu dãa na kʋ ba a jɩbaa ɩ̃ yel: “A ʋlɔ ɩ̃ nɔɔ woro, a ʋlɔ ʋ. Nyɩ́ nyɔw ʋ.”

⁴⁹ A jie naan a Judasɩ taw na ta a Jeeju ɩ̃ yel ʋ: “Jãjaana, yaanɩ!” ɩ̃ worĩ ʋ.

⁵⁰ A Jeeju yel ʋ: “Ɩ̃ baraa, a ala fʋ na wa a maalfʋ, maal,” ɩ̃ ba ta na nyɔw ʋ.

⁵¹ A ƴen sʋbɔ na lãa be nɩ a Jeeju vʋ̃ɔ na a ʋ bãjɩnɛ, cɛ nɩ a *baar-lo-nɩ-kpɛ̃ɛ tʋ̃tʋnɔ toor ŋmaa.

⁵² A Jeeju yel ʋ: “Su a fʋ bãjɩnɛ a sɔkpa pʋɔ, a-na-ɩ a bala na jɛbɛ nɩ a bãjɩnsɩ, a bãjɩnsɩ ɩ̃ nɔɔ mɩ kú ba.

⁵³ Faa bɔ̃w ka ɩ̃ na tʋɔ na sʋɔr a ɩ̃ Sãa, ʋ tɩɩr a ʋ sɩ-tʋnɩsɩ a jie naan, a ba ta ture ture ɩ̃ dɔɔl, naa ba wa sũo ma wa?

⁵⁴ Ɩ̃-cɛ, a ala ɩ a lɛ ʋ, mɩnɛ a Naaŋmɩn Sɛbɛ na yel áa sɛw na a na ta a lɛ, na tʋɔ maal wa baar?”

⁵⁵ A lɛdaar a Jeeju yelʼã a nɩbɛ: “Nyanyuur ɩ̃ ɩ a nyɩ wa nɩ a bãjɩnsɩ nɩ a gʋdɛɛ na nyɔwrɔ nɩ ma mɩɩ? A bibie a jaa ɩ̃ ma dãa na jɛ a Naaŋmɩn puor-yir kpɛ̃ɛ pʋɔ mana nyɩ a Naaŋmɩn ƴɛrɩ̃, ɩ̃ nyaa dãa nyɔw ma wa.

⁵⁶ Ɩ̃-cɛ a ala a jaa ta na a mɩnɛ a Naaŋmɩn ƴɛr-hierbe ƴɛrɩ̃sɩ na tʋɔ maal baar.” Ɩ̃ a ʋ par-tuurbe ba jaa bar ʋ na ɩ̃ jɔ.

A JEEJU BA NA NYƆW CENʼƖ̃ A NƖ-BƐRƐ NII-SƆW

⁵⁷ A bala na nyɔw a *Jeeju, ba taw ʋ na cenʼɩ̃ a *baar-lo-nɩ-kpɛ̃ɛ Kayifi yir, a jie ʋlɔ a *ƴɛr-kpɛn-bɔɔnbɔ nɩ a ni-dierbe na kpaarɩ̃ taa.

⁵⁸ Ɩ̃ a Pɩɛr bɩɛrʼã tu a Jeeju cen na ta a baar-lo-nɩ-kpɛ̃ɛ yir, na kpɛ a gbalɩ̃ pʋɔ lãa jɛ nɩ a ʋ tʋ̃tʋnbɔ, bʋɔrɔ ʋ nyɛ a ala na tara.

⁵⁹ A *baar-lo-nɩ-bɛrɛ nɩ a *ƴɛr-guor-nɩ-bɛrɛ ba jaa bʋɔrɔ na a jiri ba na ŋmaara ƴɔnɔ a Jeeju, a mɩnɛ ba na ɩrɛɛ ɩ̃ nyɛrɛ a sɔr ɩ̃ kúrɔ ʋ.

⁶⁰ Ɩ̃-cɛ a ala saarɩ̃ ɩ a nɩ-yaw na wɩ ŋmara a jiri ƴɔnɔ ʋ, baa nyɛ a jiri ʋlɔ na tʋɔrɔ ƴɔnɔ ʋ a kũu pʋɔ wa. Ɩ̃ a nɩbɛ ayi pãa na wɩ ɩraa,

⁶¹ ɩ̃ yel: “A daba na yelʼã á ʋ na tʋɔ na wɛl a Naaŋmɩn puor-yir kpɛ̃ɛ, ɩ̃ lɛ mɛ ʋ bibie ata pʋɔ.”

⁶² A baar-lo-nɩ-kpɛ̃ɛ irʼã soor a Jeeju: “Faa yele bom wa? Boolo nɩ a ala a nɩbɛ na ƴɛrɛ ƴɔnɔ fʋ?”

⁶³ Ɩ̃-cɛ a Jeeju sine. A baar-lo-nɩ-kpɛ̃ɛ yel ʋ: “Pɔl a fʋ puor ɩ̃ yel sɩ nɩ a baafʋ Naaŋmɩn yuor a ala ɩ fʋ ɩ na a *Kirisi na ɩ a Naaŋmɩn Bie.”

⁶⁴ A Jeeju yel ʋ: “Fʋ̃ʋ yel. Ɩ̃-cɛ ɩ̃ yele nyɩ na, ka nɩ fɩ̃ɩ pʋɔ nyɩ nɔɔ wa nyɛ na a *Nɩbɛ Bie ʋ jɛ a Fãw Sʋbɔ dʋrɩ̃ loor, ɩ̃ waara a saꞌlon a dɔ̃dɔrɩ̃sɩ pʋɔ.”

⁶⁵ A baar-lo-nɩ-kpɛ̃ɛ ɓer a ʋ cẽcene ɩ̃ yel: “A Naaŋmɩn ʋ kpɛrɛ! Sɩ lɛ bʋɔrɔ na ƴɛr-bɔ̃w-manba go? Nyɩ nyɛ na a ƴɛ̃ƴɛrɩ̃ a mɩnɛ ʋ na kpɛ a Naaŋmɩn.

⁶⁶ Mɩnɛ nyɩ tɩɛr?” A ba yel: “Ʋ sɛw nɩ na a kũu.”

⁶⁷ Ɩ̃ ba pʋʋrɔ na a natɛɛr ƴɔnɔ ʋ a nii-sɔw, pɔbɔ nɩ ʋ, ɓara ɓara ʋ

⁶⁸ yele nɩ: “A fʋna Kirisi naa! Bɔ̃w a ʋlɔ na ŋme fʋ!”

A PƖƐR NA CƖƖRƐ A JEEJU

⁶⁹ A Pɩɛr cãa na jɛ a be a yẽw a gbalɩ̃ pʋɔ, ɩ̃ a tʋ̃tʋ̃-poole wɩ na na yel ʋ: “A fʋ̃ʋ mɩ, fʋ mɩ dãa na be nɩ a *Jeeju, a Galile nɩrɛ ʋlɔ.”

⁷⁰ Ɩ̃-cɛ ʋ cɩɩrɛ na a nɩbɛ ba jaa nii-sɔw yele nɩ: “Maa bɔ̃w a ala fʋ na ɩraa ƴɛrɛ wa.”

⁷¹ Ɩ̃ ʋ irʼã cen a gbalɩ̃ dɔ̃dɔr nʋɔr, a tʋ̃tʋ̃-poole ƴen sʋbɔ nyɛ ʋ, ɩ̃ yel a bala na be a be: “A daba na mɩ dãa na be nɩ a Najarɛtɩ Jeeju.”

⁷² A Pɩɛr lɛ cɩɩrɛ, pɔrɔ nɩ yele nɩ: “Maa bɔ̃w a daba na wa.”

⁷³ A ɩ na fɩ̃ɩ, ɩ̃ a bala na ɩraa a be ta na yel a Pɩɛr: “Sɩrɛ jaa ʋ. Fʋ ɩ na a ba nɩrɛ kãw, a-na-ɩ fʋ ƴɛrɛ na a ba kaarɩ̃.”

⁷⁴ Ɩ̃ ʋ nyɔw na ɩ̃ pɔrɔ ƴɔnɔ a ʋ mɩ̃ɛ bʋɔlɔ nɩ a Naaŋmɩn yuor yele nɩ: “Maa bɔ̃w a daba na wa.” Ɩ̃ a jie naan a nɔraa kõ na,

⁷⁵ a Pɩɛr tɩɛr yuo a ala a Jeeju na dãa yel ʋ: “A nɔraa kɔ̃ kõ sɛr, ɩ̃ fʋ na cɩɩrɩ̃ ma na gbɛɛ ata.” Ɩ̃ ʋ yi na tɩɛrɛ kono nɩ.