Matie Sɛbɛ 22 - A NAAŊMƖN PƲLƖ̃-TA-PAALAA

A KUL-TAA FƐTƖ SƲKPA

¹ A *Jeeju lɛ nyɔw na ɩ̃ lɔbɔ a sʋkpar ƴɛrɛ nɩ ba.

² Ʋ yelʼã: “A saa juu fãw wɔ̃ na taa na a jamana na gbɛɛrɩ̃ a ʋ bi-daba kul-taa fɛtɩ.

³ Ʋ tʋ̃ na a ʋ tʋ̃tʋnbɔ a ba cen na yel a bala ʋ na dãa bʋɔl a fɛtɩ ɩnɛ, ɩ̃-cɛ baa bʋɔrɔ a wɩfʋ wa.

⁴ Ʋ lɛ tʋ̃ a tʋ̃tʋ̃-kpeesɩ a ba cen na yel a bala ʋ na bʋɔl a fɛtɩ ɩnɛ: ‘A ma ɩ̃ gbɛɛrɩ̃ na baar. Á ɩ̃ kú na a nadɛɛ nɩ a dʋn karɩ̃sɩ ɩ̃ mɩ cɔɔrɩ̃ a yele a jaa baar. Á ba wa a fɛtɩ jie.’

⁵ Ɩ̃ aa bá ba wa, a ba jaar Ɩ̃ cere a ba tʋmɔ jie; a bõ-ƴen cenʼã a ʋ puo pʋɔ, ɩ̃ a kãw cen a ʋ ƴab jie,

⁶ ɩ̃ a ŋmɛɛ nyɔɔr a tʋ̃tʋnbɔ bala, kpow ba ɩ̃ kú.

⁷ Ala-ɩ̃-sɔ a jamana nyɛ a suur, ɩ̃ tʋ̃ a ʋ sɔdaalsɩ a ba cen na mɩ kú a bana nɩ-kʋrbɔ, ɩ̃ su a ba tẽw bar,

⁸ ɩ̃ pãa yel a ʋ tʋ̃tʋnbɔ: ‘Ɩ̃ gbɛɛrɩ̃ na a fɛtɩ dɩb baar, ɩ̃-cɛ a bala ɩ̃ na bʋɔl ma sɛw na dɩ wa.

⁹ Ala-ɩ̃-sɔ, nyɩ́ cen a nɩbɛ tɔlfʋ jiir, ɩ̃ a nɩrɛ lɛ nyɩ na nyɛrɛ, nyɩ́ bʋɔl ʋ ʋ wa a fɛtɩ jie.’

¹⁰ A tʋ̃tʋnbɔ bala yi na cen a sɔɛ pʋʋr ɩ̃ kaal a nɩbɛ ba jaa ba na nyɛ, a nɩ-sono na a nɩ-kpansɩ, a fɛtɩ die sɛw na a nɩbɛ na wɩ a dɩb dɩfʋ.

¹¹ “A jamana kpɛ na a die pʋɔ ʋ ꞌwuor a dɩb-dɩrbɛ kãa, ɩ̃ ʋ nyɛ na daba kãw be na ma su a fɛtɩ kparʋ wa,

¹² ʋ yel ʋ: ‘Ɩ̃ baraa, mɩnɛ fʋ ɩ ɩ̃ kpɛ a ka ɩ̃ ma su a fɛtɩ kparʋ wa?’ A daba sine.

¹³ A jamana yel a ʋ tʋ̃tʋnbɔ: ‘Nyɩ́ nyɔw ʋ, lũ a gbɛɛ na a nur, lɔb ʋ bar a yẽw a libe pʋɔ, a jie ʋlɔ a nɩbɛ na kono nyɩrɛ na a nyɩmɛ.’

¹⁴ A-na-ɩ a bala ba na bʋɔl waa na, ɩ̃ a bala ba na vɛl ir pabʼã.”

A OROM JAMAN-KPƐ̃Ɛ LÃPO ƳƐRƖ̃

¹⁵ A ala ɩ̃ baar, a *Farɩsɩ nɩbɛ cenʼã na guor taa a mɩnɛ ba na ɩrɛ ɩ̃ lɩɛbɛ nyɔwrɔ a *Jeeju na a ʋ ƴɛrɩ̃sɩ.

¹⁶ Ba tʋ̃ na a ba *par-tuurbe ŋmɛɛ na a *Ɛrɔdɩ nɩbɛ, a ba cen na yel a Jeeju: “Jãjaana, sɩ bɔ̃w ka fʋ ɩ na a yel-mɩ̃ɛ sʋbɔ ɩ̃ mɩ jaana a nɩbɛ a Naaŋmɩn sɔr na yel-mɩ̃ɛ. Faa ꞌwuoro a nɩbɛ kpee kpee wa, a-na-ɩ fʋ maa ꞌwuor a ala a nɩrɛ na ɩ wa.

¹⁷ Yel sɩ a ala fʋ na tɩɛrɛ. Sɔr be na be a sɩ na ya a lãpo kʋ a Orom jaman-kpẽɛɛ, mɩɩ sɔr ma be be wa?”

¹⁸ Ɩ̃ a mɩnɛ a Jeeju na bɔ̃w a ba tɩɛrɩ̃-faar, ʋ yel ba na: “Nyɩna poe ayi deme naa, bõ ɩnɛ nyɩ bʋɔrɔ nyɩ bɩɩr ma a lɛ?

¹⁹ Nyɩ́ ir a libir ʋlɔ ba na ma ya a Orom jaman-kpɛ̃ɛ ɩ̃ je-kãa.” A ba ir, wɩ na kʋ ʋ,

²⁰ ʋ soor ba: “Ala nii-sɔw na ala yuor ɩ̃ be tɔ?”

²¹ A ba yel: “A Orom jaman-kpɛ̃ɛ ʋ.” Ʋ yel ba: “Ala-ɩ̃-sɔ, nyɩ́ kʋrɔ a Orom jaman-kpɛ̃ɛ a ala na ɩ a Orom jaman-kpɛ̃ɛ ben, ɩ̃ mɩ kʋrɔ a Naaŋmɩn a ala na mɩ ɩ a Naaŋmɩn ben.”

²² A mɩnɛ ba na wõ a ala, a nʋɔr ko ba na, a ba bar ʋ ɩ̃ cere.

A KŨU-PƲƆ-IRFƲ ƳƐRƖ̃ MANFƲ

²³ A ʋna bibir bõ-ƴen naa pʋɔ, a *Saduse nɩbɛ na ma yel áa kũu-pʋɔ-irfʋ ma be be wa, taw na ta a *Jeeju ɩ̃ man ʋ a nɔhɔ̃:

²⁴ “Jãjaana, a Mowisi dãa na yel sɩ, áa nɩrɛ wa kul a pɔw, ɩ̃ ma dɔw a bie wa, ɩ̃ kpi, á v yɛbɛ sɛw na na de a kpɩ̃ɩ-pɔw dɔw a bibiir a v yɛbɛ yuor ɩnɛ.

²⁵ Yɛɛr anuu-nʼayi dãa na be ka a sɩ sɔ̃w. A dãdãw sʋbɔ kulʼã a pɔw, ɩ̃ ma dɔw a bie wa, ɩ̃ kpi ɩ̃ bar a kpɩ̃ɩ-pɔw, a ʋ yɛbɛ de kul.

²⁶ A lɛ a mɩ wɔ̃ na a ʋ tuuraa, na a gbɛɛ ata sʋbɔ, wa ta na a ba jaa anuu-nʼayi,

²⁷ ɩ̃ a pɔw wa bɩɛr kpi.”

²⁸ A Saduse nɩbɛ bala pãa soor a Jeeju: “A kũusɩ irfʋ daar wa ta, ala na sɔ a pɔw? A-na-ɩ a ba jaa dãa na tɛrɛ v.”

²⁹ A Jeeju yel ba: “Nyɩ bɔrʼã, a-na-ɩ nyaa bɔ̃w a Naaŋmɩn Sɛbɛ ƴɛrɩ̃sɩ par na a Naaŋmɩn tʋɔfʋ wa.

³⁰ A kũusɩ wa ir a kũu pʋɔ, a dabsɩ na a pɔɔbɔ ma lɛ kule taa wa, ɩ̃-cɛ ba na be na be wɔ̃ taa na a saa juu sɩ-tʋnɩsɩ.

³¹ Ɩ̃-cɛ a ala ɩ̃ ɩ a kũu-pʋɔ-irfʋ ƴɛrɩ̃ v, nyaa dãa ꞌwuor a ƴɛr-bir ʋlɔ a Naaŋmɩn na yel nyɩ a v Sɛbɛ pʋɔ wa mɩɩ? Ʋ yelʼã:

³² ‘Maa ɩ̃ ɩ a Abʋraham, na a Ɩjakɩ, na a Jakɔb Naaŋmɩn.’ A Naaŋmɩn ma ɩ nɩ-kpɩmɛ Naaŋmɩn wa. Nɩ-mimie Naaŋmɩn ʋ ɩ.”

³³ A lɛ a bana nɩ-yaw na wõ a v jaanfʋ, nʋɔr ko ba na.

A ƳƐR-KPƐ̃W ƲLƆ NA Ɩ A KPƐ̃Ɛ

³⁴ Ɩ̃ a lɛ a *Farɩsɩ nɩbɛ na wõ áa *Jeeju kpalʼã a *Saduse nɩbɛ nʋɔr, ba tiw na taa guor taa,

³⁵ ɩ̃ ir bõ-ƴen na ɩ a *ƴɛr-kpɛn-bɔ̃wnɔ, a v bɩɩr a Jeeju. Ʋ soor v na:

³⁶ “Jãjaana, a ƴɛr-kpɛn pʋɔ, buor ɩ̃ ɩ a kpɛ̃ɛ?”

³⁷ A Jeeju yel v: “‘Fʋ na nʋnɔ na a Nɛ-kpɛ̃ɛ na ɩ a fʋ Naaŋmɩn na a fʋ suur v jaa, na a fʋ baafʋ v jaa, na a fʋ tɩɛrʋ̃ a jaa.’

³⁸ A nanɩ ɩ̃ ɩ a ƴɛr-kpɛ̃w na ɩ a kpɛ̃ɛ na a dãdãw.

³⁹ A tuuraa mɩ wɔ̃ na a lɛ: ‘Fʋ na nʋnɔ na a fʋ tɔ-sʋbɔ a fʋ mɩ̃ɛ kaarɩ̃.’

⁴⁰ A basɩmɛ ayi pʋɔ a Mowisi ƴɛr-kpɛn na a Naaŋmɩn ƴɛr-hierbe jaanfʋ a jaa yi.”

ALA BI-DABA A KIRISI Ɩ?

⁴¹ A mɩnɛ a *Farɩsɩ nɩbɛ na kpaarɩ̃ taa, a *Jeeju soor ba na a nɔhɔ̃:

⁴² “Bõ nyɩ tɩɛr a *Kirisi ʋ ɩ? Ala bie ʋ?” A ba yel, áa Davɩtɩ bie ʋ.

⁴³ Ʋ yel ba: “A ala ɩ lɛ ʋ, mɩnɛ a ɩ a Davɩtɩ na dãa sɛw na a Naaŋmɩn Sɩɛ lɛ tʋɔ bʋɔl ʋ a ʋ Nɩ-kpɛ̃ɛ?

⁴⁴ A-na-ɩ a Davɩtɩ sɛbʼã a ʋ sɛbɛ pʋɔ: ‘A Nɩ-kpɛ̃ɛ Naaŋmɩn yelʼã a ɩ̃ Nɩ-kpɛ̃ɛ: Jɛ a ɩ̃ dʋrɩ̃ loor, wa ta na a lɛ ɩ̃ nɔɔ ƴɔnɔ a fʋ sama-deme a fʋ pulẽe.’

⁴⁵ A ala ɩ a Davɩtɩ bʋɔlɔ ʋ na a ʋ Nɩ-kpɛ̃ɛ, mɩnɛ ʋ na tʋɔ lɛ ɩ a ʋ bie?”

⁴⁶ Nɩ-bõ-ƴen ma lɛ tʋɔ ƴɛrʼɩ̃ a Jeeju wa. Ɩ̃, wa nyɔw na a ʋna bibir, nɩrɛ kãw ma lɛ ꞌla soor ʋ bom go wa.