Matie Sɛbɛ 21 - A NAAŊMƖN PƲLƖ̃-TA-PAALAA

A JEEJU YO-YIFƲ A JERUJALƐM KPƐFƲ DAAR

¹ A lɛ ba na pɩɛlɛ a Jerujalɛm ba ta na a Bɛfaje-tẽw na be a *Olivi-tɩɩr tãw juu, a *Jeeju tʋ̃ a ʋ *par-tuurbe ayi

² ɩ̃ yel ba: “Nyɩ́ cen a tẽ-bile ʋlɔ na be a nii-sɔw, ɩ̃ a mɩnɛ nyɩ na kpɛɛrɛ nyɩ na nyɛ na a bʋ̃ɔ ba na lũ bar, ʋ ɩraa nɩ a ʋ bile. Nyɩ ꞌlor ba, wa nɩ kʋ ma.

³ A nɩrɛ wa soor nyɩ, nyɩ yel ʋ, áa Nɩ-kpɛ̃ɛ ɩ̃ bʋɔrɔ, ɩ̃ a jie naan ʋ na bar nyɩ na a nyɩ waara.”

⁴ A ala maalʼã a lɛ, a na ɩ a ala a Naaŋmɩn ƴɛr-hiere na dãa yele:

⁵ “Nyɩ́ yel a *Sɩ̃ɔ-tẽw nɩbɛ: Nyɩ́ nyɛ a nyɩ jamana na waara a nyɩ sɛ̃! Su-ɓaar sʋbɔ ʋ, ɩ̃ do a bʋ̃ɔ juu, a bʋ̃-bile a bʋ̃ɔ na dɔw.”

⁶ A Jeeju par-tuurbe cen na maal a ala ʋ na man ba.

⁷ Ba taw na a bʋ̃ɔ nɩ a ʋ bile wa nɩ a ʋ sɛ̃, ɩ̃ de a ba cẽcene dɔɔl a ba jur, ʋ do jɛ.

⁸ A nɩ-yayaw yɛrɛ na a ba kparsɩ pɔwrɔ a sɔr, ɩ̃ a nɩŋmɛɛ ŋmara a tɩɩr wulbie yɛrɛ pɔwrɔ a sɔr.

⁹ A nɩbɛ bala na de a Jeeju nĩe nɩ a bala na tuure, cɩlɛ na pɛwrɛ nɩ ʋ: “Davɩtɩ Bie, *Oojana!” “A Nɩ-kpɛ̃ɛ Naaŋmɩn ú be nɩ a ʋlɔ na waara nɩ a ʋ yuor!” “A Naaŋmɩn na be a saa juu, Oojana!”

¹⁰ Ɩ̃ a mɩnɛ a Jeeju na kpɛ a Jerujalɛm, a tẽw dama na ʋ jaa, a ba sooro: “Ala nɩ a nanɩ?”,

¹¹ a nɩ-yaw bala yel: “A Naaŋmɩn ƴɛr-hiere Jeeju ʋ, a ʋlɔ na yi a Najarɛtɩ-tẽw a Galile wɩɛr.”

A JEEJU NA KPƐ A NAAŊMƖN YIR PƲƆ

¹² A *Jeeju kpɛ na a Naaŋmɩn puor-yir kpɛ̃ɛ pʋɔ ɩ̃ diw a bala ba jaa na ƴaba nɩ a bala na daara a yele a be, mɩ cãgbalɩ̃ nɩ a bala na tɛwrɛ a libie tabalsɩ bar, nɩ a bala na ƴaba a naŋmama dakɔɔr,

¹³ ɩ̃ yel ba: “A sɛbʼã a Naaŋmɩn Sɛbɛ pʋɔ: ‘A ɩ̃ yir na dɩ na a Naaŋmɩn puor-yir kpɛ̃ɛ,’ ɩ̃-cɛ a nyɩ de ʋ maal ʋ ɩ nyanyube sɔɔlɩ̃fʋ jie.”

¹⁴ Ɩ̃ a jɔn nɩ a gbɛɛ taw na ta ʋ a be a Naaŋmɩn puor-yir kpɛ̃ɛ pʋɔ ʋ kpaar ba.

¹⁵ Ɩ̃-cɛ a mɩnɛ a Naaŋmɩn *baar-lo-nɩ-bɛrɛ nɩ a *ƴɛr-kpɛn-bɔɔnbɔ na nyɛ a ana nɔ-kofʋ tʋmɔ ʋ na maala, ɩ̃ mɩ wõ a mɩnɛ a bibiir na cɩlɛ a Naaŋmɩn puor-yir kpɛ̃ɛ pʋɔ puoro nɩ ʋ, á Davɩtɩ Bie, á *Oojana, a tɔ ba na,

¹⁶ a ba soor ʋ: “Fʋ wonaa na a ala a bibiir na yele?” A Jeeju sɔw, ɩ̃ soor ba: “Nyaa dãa ꞌwuor a Naaŋmɩn Sɛbɛ pʋɔ a mɩnɛ a na yel: ‘Fʋ ƴɔ̃w na a bibi-bil nɩ a bi-pɩɩlsɩ a ba na tʋɔ pɛwrɛ fʋ’ wa mɩɩ?”

¹⁷ Ɩ̃ ʋ bar ba na ɩ̃ yi a tẽw pʋɔ, cen a Betani na gã a be.

A JEEJU NA PƆ ƳƆ̃W A FƖGƖ TƖƐ

¹⁸ A dʋ̃ꞌwʋlɩ̃ ɓaaraa, a mɩnɛ ʋ na lɩɛb cere a tẽw pʋɔ, a kɔ̃ nyɔw ʋ na,

¹⁹ ʋ nyɛ a fɩgɩ tɩɛ ʋ ɩraa a sɔr nʋɔr, ʋ taw ta ɩ̃ nyɛ ʋ tɛrɛ a vɛɛ tɛw, ʋ yel a tɩɛ: “Fʋ kɔ̃ lɛ tɛrɛ wɔmɔ fɩ̃ɩ go wa!” A jie naan a fɩgɩ tɩɛ ko ʋ jaa ɩraa.

²⁰ A ʋ *par-tuurbe nyɛ a lɛ, a nɔɛ ko ba, a ba soor ʋ: “Mɩnɛ a fɩgɩ tɩɛ wa ɩ ɩ̃ ko a jie naan a lɛ?”

²¹ A *Jeeju yel ba: “Yel-mɩ̃ɛ ɩ̃ yele nyɩ, a ala ɩ̃ ɩ nyɩ tɛrɛ na a ƴɔ̃w-nyãa, ɩ̃ ma baala wa, aa ɩ a ala ɩ̃ na maal a fɩgɩ tɩɛ tɛw nyɩ na maala wa, ɩ̃-cɛ nyɩ na ma tʋɔ na yel a tãw naa, á ʋ aw cen na lo a man kʋ̃ɔ pʋɔ, ɩ̃-cɛ a na ma maalʼã a lɛ.

²² A bom jaa lɛ nyɩ na sʋɔrɔ a Naaŋmɩn jie na a ƴɔ̃w-nyãa nyɩ na pɔw na.”

A JEEJU TƲƆFƲ YIFƲ JIE

²³ A *Jeeju kpɛ na a Naaŋmɩn puor-yir kpɛ̃ɛ pʋɔ ɩ̃ jaana a nɩbɛ, ɩ̃ a *baar-lo-nɩ-bɛrɛ na a Jufisɩ ni-dierbe wɩ na na soor ʋ: “Tʋɔfʋ buor fʋ maala na a yele asɩmɛ? Ala ɩ̃ kʋ fʋ a tʋɔfʋ ʋlɔ?”

²⁴ A Jeeju yel ba: “Ɩ̃ na mɩ soor nyɩ na bom bõ-ƴen. A nyɩmɩ wa kʋ ma a sɔwfʋ, ɩ̃ na mɩ miil nyɩ na a tʋɔfʋ buor ɩ̃ na maala na a yele asɩmɛ.

²⁵ A Jã-Batii kʋ̃ɔ mʋrfʋ, nyɩnɛ ʋ yi? A Naaŋmɩn jie ʋ mɩɩ a nɩbɛ jie ʋ?” A ba nyɔw ɩ̃ pɛrɛ ƴɔnɔ taa yele na: “A sɩmɩ yel á Naaŋmɩn jie ʋ yi, ʋ na soor sɩ na, ɩ̃-cɛ mɩnɛ saa tɩɛrɛ ʋ wa?

²⁶ A sɩmɩ lɛ yel ʋ, á nɩbɛ jie ʋ yi, sɩ jɔrɔ na a nɩbɛ dãbɩ̃ɛ, a-na-ɩ ba jaa sɔw na de ʋ ʋ ɩ a Naaŋmɩn ƴɛr-hiere.”

²⁷ A ba yel a Jeeju: “Saa bɔ̃w wa.” A Jeeju mɩ lɩɛb yel ba: “A maa mɩ, maa mɩ yele nyɩ a tʋɔfʋ buor ɩ̃ na maala na a yele asɩmɛ wa.”

A BI-DABSƖ AYI SƲKPA

²⁸ “Mɩnɛ nyɩ tɩɛr a ƴɛrɩ̃ nanɩ pʋɔ? Daba dãa na be be na tɛrɛ bi-dabsɩ ayi. Ʋ wa taw na ta a dãdãw sʋbɔ ɩ̃ yel ʋ: ‘Ɩ̃ bi-daba, cen na tʋ̃ a tʋmɔ a dɩvɛ̃ tur puo pʋɔ a dɩnaa.’

²⁹ Ʋ yel: ‘Maa tʋɔrɔ cere wa.’ Ɩ̃ a fɩ̃ɩ pʋɔ ʋ lɩɛbʼã a tɩɛrʋ̃ ɩ̃ cen a puo pʋɔ.

³⁰ A sãa lɛ taw ta a gbɛɛ ayi sʋbɔ ɩ̃ mɩ yel. Ʋ a lɛ. Ʋ yel á ‘ɔɔ,’ á ʋ na cenʼã, ɩ̃ ma cen wa.

³¹ Buor sʋbɔ ɩ̃ maal a ʋ sãa pʋ-tɩɛrʋ̃?” A bana Jufisɩ ni-dierbe yel áa dãdãw sʋbɔ ʋ. A *Jeeju yel ba: “Yel-mɩ̃ɛ ɩ̃ yele nyɩ, a lãpo-dierbe na a pɔw-baar diere nyɩ na a nĩe a Naaŋmɩn fãw pʋɔ.

³² A-na-ɩ a Jã wɩ na a nyɩ sɛ̃ miil nyɩ a torfʋ sɔr, ɩ̃ a nyaa tɩɛrɛ ʋ wa, ɩ̃-cɛ a bala na ɩ a lãpo-dierbe na a pɔw-baar, bala tɩɛrɛ v. Ɩ̃ a mɩnɛ nyɩ na nyɛ a ala, nyaa mɩ lɩɛb a nyɩ yɛ̃ ɩ̃ tɩɛrɛ v wa.”

A TƲ̃TƲ̃-BEBE SƲKPA

³³ “Nyɩ́ cɛlɛ a sʋkpa ƴen sʋbɔ. Yi-kpɛɛrɛ kãw dãa na be be na sɛl a dɩvɛ̃ tur a ʋ puo pʋɔ ɩ̃ wɔw pɔw kolĩ, ɩ̃ mɩ tuu a bɔw ʋ ɩ a tur ala wɔmɔ nɛbfʋ jie, mɩ mɛ na a yel-gure jaajie, ɩ̃ pãa de a tʋ̃tʋnbɔ ƴɔ̃w a puo pʋɔ ɩ̃ cen jie kãw.

³⁴ Ɩ̃ a mɩnɛ a tɩ-wɔmɔ daar na ta, a yi-kpɛɛrɛ tʋ̃ na a ʋ tʋ̃tʋnbɔ a ba cen a po-ꞌwuorbo bala jie na de a ʋ tɩ-wɔmɔ wa na kʋ ʋ.

³⁵ Ɩ̃-cɛ a po-ꞌwuorbo nyɔɔr ba na, fɔb a ƴen sʋbɔ, ɩ kú a kãw, ɩ̃ lɔb a bõ-ƴen na kubie.

³⁶ Ʋ lɛ tʋ̃ a ʋ tʋ̃tʋnbɔ ŋmɛɛ na waa gãw a dãdãw deme, ɩ̃ a ba lɛ maal ba a lɛ go.

³⁷ A ala ɩ̃ baar, ʋ pãa na tʋ̃ a ʋ bi-daba ɩ̃ yel: ‘Ba na jɔ na a ɩ̃ bi-daba.’

³⁸ Ɩ̃ a mɩnɛ a po-ꞌwuorbo na nyɛ a bi-daba, ba yelʼã taa: ‘Nyɩ́ nyɛ a ʋlɔ na ɩ a gã-diere. Nyɩ́ ɩ a sɩ kú ʋ bar, ɩ̃ tɛrɛ a ʋ gãw.’

³⁹ Ɩ̃ ba nyɔw ʋ na, taw yi na a puo pʋɔ, ɩ̃ kú ʋ.”

⁴⁰ Ɩ̃ a *Jeeju soor ba: “A lɛ a puo sʋbɔ nɔɔ lɩɛbɛ waara, bõ ʋ na maalʼɩ̃ a po-ꞌwuorbo bala?”

⁴¹ A ba yel ʋ: “A bana nɩ-bebe, a ba baarfʋ daar na hierʼã. Ɩ̃ ʋ na de na a dɩvɛ̃ tur puo kʋ a nɩ-kpeesɩ na sɔwrɔ kʋrɔ ʋ a ʋ wɔmɔ a yomo a jaa.”

⁴² A Jeeju lɛ soor ba: “Nyaa dãa ꞌwuor nyɛ a mɩnɛ a na sɛb a Naaŋmɩn Sɛbɛ pʋɔ wa? ‘A kubir ʋlɔ a dacin-mɩɛrbɛ na dãa jaar bar lɩɛbʼã ɩ a dacin gbɛr kubir kpɛ̃ɛ. A Nɩ-kpɛ̃ɛ maalʼã a lɛ, a sɩ na nyɛ a nyɩrɩ̃ vɩɛlɛ.’

⁴³ Ala-ɩ̃-sɔ ɩ̃ yele nyɩ na, ba na ir nyɩ na bar a Naaŋmɩn fãw pʋɔ, ɩ̃ cɛ bar kʋ a nɩ-kpeesɩ na maala a Naaŋmɩn pʋ-tɩɛrʋ̃. [

⁴⁴ Ɩ̃ a ʋlɔ nɔɔ loro a kubir ʋlɔ juu, ʋ na ŋmɛrʼã pũpurĩ, ɩ̃ a ʋlɔ juu a kubir ʋlɔ nɔɔ loro, ʋ na pũpurĩ ʋ na, ʋ lɩɛb ɩ a tãbuulĩ.”]

⁴⁵ Ɩ̃ a lɛ a *baar-lo-nɩ-bɛrɛ na a *Farɩsɩ nɩbɛ na wõ a Jeeju sʋkpar, ba bɔ̃w na ka a bala ʋ ƴɛrɛ,

⁴⁶ ɩ̃ bʋɔrɔ a sɔr a ʋ nyɔwfʋ, ɩ̃-cɛ a dãbɩ̃ɛ nyɔw ba a nɩ-yaw ɩnɛ, a-na-ɩ a ba jaa de na a Jeeju ʋ ɩ a Naaŋmɩn ƴɛr-hiere.