Matie Sɛbɛ 18 - A NAAŊMƖN PƲLƖ̃-TA-PAALAA

A ƲLƆ NA Ɩ A KPƐ̃Ɛ

¹ A ʋna daarʼãa pʋɔ a *par-tuurbe wɩ na a *Jeeju sɛ̃ na sooro ʋ: “Ala ɩ̃ ɩ a kpɛ̃ɛ a saa juu fãw pʋɔ?”

² Ʋ bʋɔl a bibile ʋ wa ɩraa a ba nii-sɔw,

³ ɩ̃ ʋ yel: “Yel-mɩ̃ɛ ɩ̃ yele nyɩ, a ala ma ɩ nyɩ lɩɛbʼã wɔ̃ taa nɩ a bibiir basɩmɛ wa, nyaa tʋɔrɔ kpɛɛrɛ a saa juu fãw pʋɔ fɩ̃ɩ wa.

⁴ Ala-ɩ̃-sɔ a ʋlɔ na lɩɛb wur a ʋ mɩ̃ɛ, ɩ̃ wɔ̃ a bibile na kaarɩ̃, ʋlɔ ɩ a kpɛ̃ɛ a saa juu fãw pʋɔ.

⁵ Ɩ̃ a ʋlɔ na sɔw de a bibile kãw a nɔhɔ̃ a ɩ̃ ɩnɛ, a maa ʋ sɔw de a lɛ.

A YELE ALA NA YƆNƆ A NƖBƐ A TULE PƲƆ

⁶ “A bibile ʋlɔ na ƴɔ̃w ma a nyãa, a ala ɩ a nɩrɛ wa maal ʋ na ʋ lo a tule pʋɔ, a ala ɩ ba lũ na a nɛ-kpɛ̃ɛ ƴɔ̃w ʋ a nyɩɩmɩ, ɩ̃ ɓɔw ʋ lɔb ƴɔ̃w a man pʋɔ ʋ mʋr kpi, a na cãa na sa ʋ.

⁷ Nabier na ta na a tẽw na nɩbɛ jie, a mɩnɛ a ba maal-bie na saa a nɩŋmɛɛ loro a tule pʋɔ. A sɩrɩ̃ na sɛw a ana maal-bie na be, ɩ̃-cɛ nabier na ta na a ʋna nɩrɛ jie na saa.

⁸ “A ala ɩ a fʋ nuu, mɩɩ a fʋ gbɛr ɩ̃ ƴɔnɔ fʋ a tule pʋɔ, fú ŋmaa ʋ lɔb bar, a-na-ɩ a sa na a fʋ na kpɛ a baafʋ pʋɔ nɩ a nu-gãw, mɩɩ a gbɛ-gãw, gãw a nur ayi nɩ a gbɛɛ ayi fʋ na tɛrɛ, ɩ̃ a ba lɔb fʋ ƴɔ̃w a vũu ʋlɔ pʋɔ na ma tɛrɛ a kpiinfʋ wa.

⁹ Ɩ̃ a ala mɩ ɩ a fʋ mimir ƴɔnɔ fʋ a tule pʋɔ, ꞌlow ʋ lɔb bar, a-na-ɩ a sa na a fʋ na kpɛ a baafʋ pʋɔ nɩ a mimi-gãw, gãw a mimie ayi fʋ na tɛrɛ, ɩ̃ a ba lɔb fʋ ƴɔ̃w a wɛfʋ vũu pʋɔ.

A PƐR NA BƆR SƲKPA

¹⁰ “Nyɩ́ tɛrɛ nyɩ mɩ̃ɛ kɔ̃ wa kpɛrɛ bile bõ-ƴen a bibiir basɩmɛ pʋɔ wa. Ɩ̃ yele nyɩ na a ba sɩ-tʋnɩsɩ na be a saa juu ma ɩraa na a ɩ̃ saa juu Sãa nii-sɔw a daar a jaa. [

¹¹ A-na-ɩ a *Nɩbɛ Bie wa na na faa a bala na dãa bɔr.]

¹² “Bõ nyɩ tɩɛr? A ala ɩ a nɩrɛ tɛrɛ na a piir kʋbaa, ɩ̃ a bõ-ƴen wa bɔr, ʋ kɔ̃ bar a kʋbaa-for-bir bala a be a tãw juu ɩ̃ suu cen na bɔ a ʋlɔ na bɔr wa mɩɩ?

¹³ Ɩ̃ a ala ɩ ʋ wa nyɛ ʋ na, yel-mɩ̃ɛ ɩ̃ yele nyɩ, ʋ ma cɩlɛ nɩ ʋ na gãw a kʋbaa-for-bir bala na ma bɔr wa.

¹⁴ A lɛ a be a nyɩ saa juu Sãa nii-sɔw. ꞌWaa mɩ bʋɔrɔ a bibile bõ-ƴen ʋ wa bɔr a basɩmɛ pʋɔ wa.

A YƐBƐ WA MAAL A FÃA

¹⁵ “A ala ɩ a fʋ yɛbɛ wa maal fʋ na a fãa, cen fʋ yẽ na miil ʋ a ʋ fãa. A ʋlɔ wa sɔw, fʋ pɔw na a fʋ yɛbɛ.

¹⁶ Ɩ̃-cɛ a ʋlɔ wa jaar, taw nɩrɛ kãw mɩɩ nɩbɛ ayi lɛ cenʼɩ̃, a mɩnɛ a ƴɛrɩ̃sɩ a jaa na yi a nɩbɛ ayi mɩɩ nɩbɛ ata bala jie.

¹⁷ A ʋlɔ wa cãa jaar a ba ƴɛrɩ̃, fú yel kʋ a *duo-puorbo. Ɩ̃ a ʋlɔ wa mɩ cãa jaar a duo-puorbo ƴɛrɩ̃, fú de ʋ ʋ wɔ̃ taa nɩ tɩɩb sʋbɔ mɩɩ a lãpo-diere.

¹⁸ “Yel-mɩ̃ɛ ɩ̃ yele nyɩ, a ala nyɩ na mɔ̃w bar a ka a tẽw pʋɔ, na mɩ mɔ̃w na a saa juu, ɩ̃ a ala nyɩ na sɔw bar a sɔr a ka a tẽw pʋɔ, a sɔr mɩ be na be a saa juu.

¹⁹ “Ɩ̃ lɛ yele nyɩ na go, a ala ɩ a nyɩ pʋɔ, nɩbɛ ayi tɛrɛ na nɔ-bõ-ƴen a ka a tẽw pʋɔ, sʋɔrɔ nɩ a bom lɛ, a ɩ̃ Sãa na be a saa juu na maalʼã kʋ ba.

²⁰ A-na-ɩ a jie a nɩbɛ ayi mɩɩ a nɩbɛ ata na duo taa nɩ a ɩ̃ yuor, ɩ̃ mɩ be na be a ba sɔ̃w.”

A TƲ̃TƲNƆ NA MA BAR A Ʋ TƆ SƲBƆ SAN WA

²¹ A Pɩɛr taw na ta a *Jeeju ɩ̃ soor ʋ: “Nɩ-kpɛ̃ɛ! A ɩ̃ yɛbɛ wa maal ma a fãa, gbɛɛ amɩnɛ ɩ̃ na de bar kʋ ʋ? A na ta na gbɛɛ anuu-nʼayi mɩɩ?”

²² A Jeeju yel ʋ: “Maa yel fʋ a gbɛɛ anuu-nʼayi wa dɛ, ɩ̃-cɛ a na ta na a gbɛɛ anuu-nʼayi jiir lɩjaata-nɩ-pie.

²³ Ala-ɩ̃-sɔ a saa juu fãw wɔ̃ na taa nɩ a jamana na gbɛɛrɛ a libie a ʋ tʋ̃tʋnbɔ jie.

²⁴ Ɩ̃ a lɛ ʋ na nyɔw a gbɛɛrɩ̃fʋ, ba wɩ nɩ na a daba na tɛrɛ ʋ a san a ture ture kʋbaa.

²⁵ Ɩ̃-cɛ a ʋna daba naa, ꞌwaa tɛrɛ bom na ya a san wa, ala-ɩ̃-sɔ a ʋ nɩ-kpɛ̃ɛ yel a ba da ʋ, nɩ a ʋ pɔw, nɩ a ʋ bibiir nɩ a yele a jaa ʋ na tɛrɛ, ya a ʋ san.

²⁶ A tʋ̃tʋnɔ ʋlɔ lo na gburĩ a dume a ʋ nɩ-kpɛ̃ɛ nii-sɔw ɩ̃ yel ʋ: ‘Taa nyɛ suur wa. Bar a ɩ fɩ̃ɩ, ɩ̃ ɩ̃ na ya fʋ na,’

²⁷ a nãw nyɔw a ʋ nɩ-kpɛ̃ɛ ʋ de ʋ bar, ʋ cere nɩ a ʋ san.

²⁸ “A daba ʋlɔ yi na tuorʼɩ̃ a ʋ lãa-tʋnɔ ƴen sʋbɔ na tɛrɛ ʋ a san bile. Ʋ nyɔw ʋ na, ɩ̃ cɩm ʋ a kɔkɩ-jile ɩ̃ yel: ‘Ya ma a ɩ̃ libie.’

²⁹ A ʋ lãa-tʋnɔ lo na gburĩ a dume ɩ̃ yel ʋ: ‘Taa nyɛ suur wa. Bar a ɩ fɩ̃ɩ, ɩ̃ ɩ̃ na ya fʋ na.’

³⁰ Ɩ̃-cɛ ꞌwaa sɔw wa, ɩ̃ nyɔw ʋ cenʼɩ̃ pɔw a kasu pʋɔ, ʋ be a be lɛɛ wa ta nɩ a lɛdaar ʋ na ya a ʋ san a jaa.

³¹ A lɛ a ʋ lãa-tʋnbɔ ŋmɛɛ na nyɛ a ala na maal, a ba sube nyɩrɩ̃ na sãw ba, a ba cen na man a ba nɩ-kpɛ̃ɛ a ala a jaa na maal,

³² a nɩ-kpɛ̃ɛ bʋɔl a tʋ̃tʋnɔ ʋlɔ ɩ̃ yel ʋ: ‘Fʋna nɩsaa fãa naa! Ɩ̃ dãa na bar fʋ a fʋ san a jaa, a-na-ɩ fʋ sʋɔr ma na.

³³ A sɛw na a fʋ naa mɩ dãa bɔ̃w a fʋ lãa-tʋnɔ nãw ɩ̃ bar ʋ, a mɩnɛ ɩ̃ na dãa bɔ̃w fʋ a nãw ɩ̃ bar fʋ.’

³⁴ Ɩ̃ a ʋ nɩ-kpɛ̃ɛ nyɛ na a suur ɩ̃ ɩ a ba mɩ nyɔw ʋ pɔw a kasu pʋɔ, a ba kpãa ʋ lɛɛ wa ta nɩ a lɛdaar ʋ na ya a ʋ san a jaa.”

³⁵ Ɩ̃ a Jeeju yel ba: “A lɛ a ɩ̃ Sãa na be a saa juu nɔɔ mɩ maal a nyɩ jie, a ala ma ɩ a nyɩmɩ nyɩ jaa fɛw de na a nyɩ yɛɛr maal-faar bar kʋ ba a nyɩ sube pʋʋr wa.”