Matie Sɛbɛ 17 - A NAAŊMƖN PƲLƖ̃-TA-PAALAA

A JEEJU NALƖ̃FƲ

¹ A lɛ a bibie ayʋɔb na tɔl baar, a *Jeeju taw na a Pɩɛr, a Jakɩ nɩ a ʋ yɛbɛ Jã do nɩ a tã-kpɛ̃ɛ juu,

² ɩ̃ ʋ nalɩ̃ na a ba nii-sɔw. A ʋ nii-sɔw lɩɛbʼã wɔ̃ taa nɩ a mɔtɔ̃w, ɩ̃ a ʋ cẽcene pɛlɩ̃ wɔ̃ taa nɩ a cãa.

³ Ɩ̃ a ʋ *par-tuurbe ata bala nyɛ na a Mowisi nɩ a Eli a ba ƴɛrɛ nɩ a Jeeju.

⁴ A Pɩɛr de na a ƴɛrɩ̃ ɩ̃ yel a Jeeju: “Nɩ-kpɛ̃ɛ! A vɩɛlɛ na a sɩ na be a ka. A fʋ̃ʋ bʋɔrɔ, ɩ̃ na ƴɔ̃w na sɛɛr ata, bõ-ƴen na ɩ na a fʋ ben, a bõ-ƴen ɩ a Mowisi ben, ɩ̃ a bõ-ƴen mɩ ɩ a Eli ben.”

⁵ A lɛ a Pɩɛr na cãa ƴɛrɛ, a dɔ̃dɔrɩ̃ma na nyɩlɛ wa na pɔw ba, ɩ̃ ba wõ na a kɔkɩr a dɔ̃dɔrɩ̃ma pʋɔ na yel: “A ʋlɔ ɩ na a ɩ̃ Bi-nʋnaa na kpɛ ma a nyãa. Nyɩ́ cɛlɛ ʋ.”

⁶ A mɩnɛ a ʋ par-tuurbe na wõ a ʋna kɔkɩr, dãbɩ̃ɛ nyɩrɩ̃ na nyɔw ba, a ba lo pɔw a ba nii-sɔw a tene.

⁷ A Jeeju ta na sɩɩr ba ɩ̃ yel: “Nyɩ́ ir! Nyɩ taa jɔrɔ dãbɩ̃ɛ wa.”

⁸ Ɩ̃ ba jɛɛrʼã ꞌwuor, ma lɛ nyɛ nɩrɛ wa, ɩ̃ a ala ma ɩ a Jeeju tɛw ʋ wa.

⁹ A lɛ ba na yi a tãw juu ɩ̃ suure, a Jeeju kpãa ba na a ba taa wa ƴɛrɛ a ala ba na nyɛ kʋrɔ nɩrɛ wa, wa tara nɩ a lɛdaar a *Nɩbɛ Bie na ire a kũu pʋɔ.

¹⁰ A ʋ par-tuurbe soor ʋ na: “Bõ ɩnɛ a *ƴɛr-kpɛn-bɔɔnbɔ yel a Eli sɛw na na de nĩe wa?”

¹¹ A Jeeju yel ba: “A Eli na sɩrɩ̃ na wa, na cɔɔrɩ̃ a yele a jaa.

¹² Ɩ̃-cɛ ɩ̃ yele nyɩ na, a Eli gɔrʼã wa, ɩ̃ baa dãa bɔ̃w ʋ wa, ɩ̃ maal ʋ a mɩnɛ a na nʋmɔ ba. A lɛ a Nɩbɛ Bie nɔɔ mɩ dɩ a tuo a ba jie.”

¹³ A ʋ par-tuurbe pãa na bɔ̃w ka a Jã-Batii ƴɛrɩ̃ ʋ miile ba.

A JEEJU NA KPAAR A ŊME-KPAR SƲBƆ

¹⁴ A mɩnɛ ba na lɩɛb wa pɔw a nɩ-yaw, daba kãw wɩ na a *Jeeju sɛ̃ na ʋ lo gburĩ a dume

¹⁵ ɩ̃ yel ʋ: “Nɩ-kpɛ̃ɛ, bɔ̃w a ɩ̃ bi-daba nãw. Ŋme-kpar ɩ̃ nyɔw ʋ, a bɛlɩ̃ ʋ. A daar a jaa ʋ ma lo a vũu pʋɔ, mɩɩ a kʋ̃ɔmɩ.

¹⁶ Ɩ̃ taw ʋ wɩ nɩ a fʋ *par-tuurbe jie, ɩ̃-cɛ a baa tʋɔ kpaar ʋ wa.”

¹⁷ A Jeeju yel: “A nyɩmɩ ƴɛ̃ƴɛrɩ̃ su-kpɛn deme, na ma tɛrɛ ƴɔ̃w-nyãa wa, ɩ̃ be nɩ nyɩ wa ta nɩ dabor? Ɩ̃ dɩ nɩ nyɩ tuo wa ta nɩ dabor? Nyɩ́ wa nɩ a bile kʋ ma ka.”

¹⁸ A Jeeju ful ƴɔ̃w a kɔ̃tɔn ʋ yi ɩ̃ cɛ a bile bar, ʋ kpaar a daar ʋlɔ pʋɔ.

¹⁹ A ʋ par-tuurbe taw na ta a Jeeju ba yẽ, ɩ̃ soor ʋ: “Bõ ɩ a saa tʋɔ diw ʋ bar wa?”

²⁰ Ʋ yel ba: “A-na-ɩ a nyɩ ƴɔ̃w-nyãa nyɩrɩ̃ na pab. Yel-mɩ̃ɛ ɩ̃ yele nyɩ, a ala ɩ a nyɩ ƴɔ̃w-nyãa jɛ̃ na taa nɩ a *muta-tɩɛ bir na nyɩrɩ̃ pab, nyɩ na ma yelʼã a tãw naa, ú ir cen be ka, ɩ̃ ʋ na ma cenʼã. Bom kãw kɔ̃ ma kpɛmɛ nyɩ wa. [

²¹ Ɩ̃-cɛ a Naaŋmɩn sʋɔrfʋ nɩ a *nʋɔr lũfʋ tɛw ba na tʋɔ diw nɩ a kɔ̃tɔn nɔhɔ̃ bar.”]

A JEEJU GBƐƐ AYI ƳƐRƖ̃ A Ʋ KŨU ƖNƐ

²² A mɩnɛ ba na duo taa a Galile wɩɛr, a *Jeeju yel ba na: “Ba na nyɔw na a *Nɩbɛ Bie ƴɔ̃w a nɩbɛ nur pʋʋr,

²³ a ba kú ʋ, ɩ̃-cɛ a bibie ata pʋɔ ʋ na lɛ irʼã a kũu pʋɔ.” A ʋ *par-tuurbe sube nyɩrɩ̃ na sãw ba.

A NAAŊMƖN PUOR-YIR LÃPO YAFƲ

²⁴ A lɛ a *Jeeju nɩ a ʋ *par-tuurbe na lɩɛb cen a Kapɛɛnam-tẽw, a Naaŋmɩn puor-yir kpɛ̃ɛ lãpo-dierbe taw na ta a Pɩɛr ɩ̃ soor ʋ: “A nyɩ jãjaana, ʋ maa ya a Naaŋmɩn puor-yir kpɛ̃ɛ lãpo wa?”

²⁵ A Pɩɛr yelʼã á ɔɔ, ʋ ma ya na. Ɩ̃ a lɛ ʋ na kpɛ a yir pʋɔ, a Jeeju de na nĩe soor ʋ: “Sɩmɔ̃, mɩnɛ fʋ tɩɛr? A tẽw pʋɔ jamansɩ, babõ jie ba ma de a ba lãpo? A ba bibiir jie, mɩɩ a sáanba jie ʋ?”

²⁶ A Pɩɛr yel: “A sáanba jie ʋ.” Ʋ lɛ yel: “A ala ɩ lɛ ʋ, a bibiir ma be tɔ wa.

²⁷ Ɩ̃-cɛ a mɩnɛ a sɩ maalfʋ kɔ̃ wa cɛ ba wa, cen a manɩ̃ na ƴɔ̃w a fʋ jɩ̃-pĩi a kʋ̃ɔ pʋɔ, ɩ̃ a dãdãw jɩm na nyɔwrɔ, taw ʋ yi nɩ, haa a nʋɔr, ɩ̃ fʋ na nyɛ na libir a be. Ir cenʼɩ̃ na tɩɩr, ʋ ɩ a maa nɩ a fʋ̃ʋ ben.”