Matie Sɛbɛ 16 - A NAAŊMƖN PƲLƖ̃-TA-PAALAA

A NƖBƐ NA BƲƆRƆ BA NYƐ A NƆ-KOFƲ TƲMƆ

¹ A Farɩsɩ nɩ a *Saduse nɩbɛ taw na ta a *Jeeju, sʋɔrɔ bɩɩrɛ nɩ ʋ, á ʋ miil ba a nɔ-kofʋ tʋn na yi a saa juu, ʋ ɩ ba a jɩbaa.

² Ʋ yel ba: “A mɩnɛ a jaanʋɔr na ma ta nyɩ ma yelʼã áa wɩɛr na kpaarʼã, a-na-ɩ a saꞌlon lo na a gbar,

³ ɩ̃ a dʋ̃ꞌwʋlɩ̃ ɓaaraa nyɩ ma yelʼã áa saa na wa na, a-na-ɩ a saꞌlon lo na a dɔ̃dɔrɩ̃-salba. Nyɩ bɔ̃w na a saꞌlon jɩbsɩ par irfʋ, ɩ̃ mɩnɛ nyaa tʋɔ bɔ̃w a yele ala na tara a ƴɛ̃ƴɛrɩ̃ par irfʋ wa?

⁴ A ƴɛ̃ƴɛrɩ̃ nɩbɛ na ɩ a nɩ-faar nɩ a nɩ-burbur, ba bʋɔrɔ na ba nyɛ a nɔ-kofʋ tʋn ʋ ɩ ba a jɩbaa. Ɩ̃-cɛ ba kɔ̃ nyɛ bom kpee ɩ̃ a ala ma ɩ a Jonasɩ ƴɛrɩ̃ wa.” Ɩ̃ ʋ bar ba na ɩ̃ cere.

A FARƖSƖ NƖ A SADUSE NƖBƐ TABƖR ƳƐRƖ̃

⁵ A mɩnɛ a ʋ *par-tuurbe na gãw a man gaan ba hiinʼã a buru tɛrɛfʋ bar.

⁶ A *Jeeju yel ba: “Nyɩ́ tɛrɛ nyɩ mɩ̃ɛ, jʋʋrɔ nɩ a Farɩsɩ nɩ a Saduse nɩbɛ tabɩr ɩnɛ”,

⁷ a ba tɩɛrɛ sooro nɩ taa yele nɩ: “A-na-ɩ saa tɛrɛ a buru wa, ala-ɩ̃-sɔ a ʋ ƴɛrɛ a lɛ.”

⁸ A Jeeju bɔ̃w nɩ ba ɩ̃ yel ba: “Nyɩna ƴɔ̃w-nyãa pabaa deme naa, bõ ɩ a nyɩ tɩɛrɛ ƴɔnɔ taa a nyaa tɛrɛ buru wa?

⁹ Nyaa bɔ̃w a par sɛr wa mɩɩ? Nyaa cãa bɔ̃w nɩ a bur-bie anuu a nɩbɛ turʼanuu na ꞌwɔb wa? Nɩ a pɩɩr amɩnɛ nyɩ na wobʼɩ̃ a ŋmara wa…?

¹⁰ Nɩ a bur-bie anuu-nʼayi a nɩbɛ turʼanaan ɩnɛ wa? Nɩ a pɩɩr amɩnɛ nyɩ na wob wa?

¹¹ Mɩnɛ a ɩ a nyaa bɔ̃w ka a aa ɩ buru ƴɛrɩ̃ ɩ̃ ƴɛrɛ nɩ nyɩ wa? Ɩ̃-cɛ nyɩ́ bɔ̃w tɛrɛ nyɩ mɩ̃ɛ a Farɩsɩ nɩ a *Saduse nɩbɛ tabɩr ɩnɛ.”

¹² A ba pãa bɔ̃w ka a ꞌwaa yele ba a ba tɛrɛ ba mɩ̃ɛ a buru tabɩr ɩnɛ wa, ɩ̃-cɛ a Farɩsɩ nɩ a Saduse nɩbɛ jaanfʋ ɩnɛ ʋ.

A PƖƐR NA BƆ̃W A JEEJU Ʋ Ɩ A NAAŊMƖN BIE

¹³ A mɩnɛ a *Jeeju na ta a Fɩlɩpɩ Sejare-tẽw wɩɛr, ʋ soorʼã a ʋ *par-tuurbe: “Á *Nɩbɛ Bie, ala a nɩbɛ tɩɛrɛ ʋ ɩ?”

¹⁴ A par-tuurbe yel ʋ: “A ŋmɛɛ yelʼã a Jã-Batii fʋ ɩ. A ŋmɛɛ lɛ yel a Eli fʋ ɩ. A ŋmɛɛ lɛ yel go, a Jeremi, mɩɩ a ƴɛr-hiere kãw fʋ ɩ.”

¹⁵ A Jeeju soor ba: “Ɩ̃ a nyɩmɩ, nyɩ yelʼã a ala ʋlɔ ɩ̃ ɩ?”

¹⁶ A Sɩmɔ̃ Pɩɛr yel ʋ: “Fʋ ɩ na a *Kirisi, a Naaŋmɩn ʋlɔ na tɛrɛ a baafʋ Bie.”

¹⁷ A Jeeju yel ʋ: “Jonasɩ bie, Sɩmɔ̃! Nʋ̃ɔ be na a fʋ jie, a-na-ɩ aa ɩ nɩrɛ tɩɛrʋ̃ fʋ bɔ̃w nɩ a ala wa, ɩ̃-cɛ a ɩ̃ Sãa na be a saa juu ɩ̃ miil fʋ.

¹⁸ Pɩɛr, maa ɩ̃ yele fʋ: fʋ ɩ na kʋsɩr, ɩ̃ a ʋna kʋsɩrʼãa juu ɩ̃ na mɛ a ɩ̃ yir na ɩ a *duo-puorbo. Ɩ̃ a ala saarɩ̃ ɩ a kũu ʋ, ʋ kɔ̃ɔ tʋɔ ʋ fɩ̃ɩ wa.

¹⁹ Ɩ̃ na kʋ fʋ na a saa juu fãw nakilsɩ A ala fʋ na mɔ̃w bar a ka a tẽw pʋɔ na mɩ mɔ̃w na a saa juu. Ɩ̃ a ala fʋ na sɔw bar a sɔr a ka a tẽw pʋɔ, a sɔr mɩ be na be a saa juu.”

²⁰ Ɩ̃-cɛ a Jeeju kpãkpanʼã a ʋ par-tuurbe, a ba taa yele kʋrɔ nɩrɛ áa Kirisi ʋ ɩ wa.

A JEEJU DÃDÃW ƳƐRƖ̃ A Ʋ KŨU ƖNƐ

²¹ A daar ʋlɔ pʋɔ, a *Jeeju nyɔw na ɩ̃ mana a ʋ *par-tuurbe áa sɛw na ʋ na cen a Jerujalɛm, na dɩ a tuo yaw a ni-dierbe nɩ a Naaŋmɩn *baar-lo-nɩ-bɛrɛ nɩ a *ƴɛr-kpɛn-bɔɔnbɔ jie, á ba na kú ʋ, ɩ̃-cɛ a bibie ata pʋɔ, ʋ na lɛ irʼã a kũu pʋɔ.

²² A Pɩɛr taw ʋ na yi nɩ a cɛ̃cɛ̃w na kpãana ʋ yele nɩ: “Nɩ-kpɛ̃ɛ! Naaŋmɩn ma sɔwrɔ wa. A kɔ̃ maal a fʋ jie a lɛ wa.”

²³ A Jeeju lɩɛb yel ʋ: “Satã! Taw yi ka a ɩ̃ nii-sɔw. Fʋ ɩ na cakpow a ɩ̃ jie. A-na-ɩ faa tɩɛrɛ a Naaŋmɩn kaarɩ̃ wa, ɩ̃-cɛ nɩrɛ kaarɩ̃ fʋ tɩɛrɛ.”

²⁴ Ɩ̃ a Jeeju yelʼã a ʋ par-tuurbe: “A ala ɩ a nɩrɛ bʋɔrɔ na ʋ tuure ma, ú jɛ a ʋ mɩ̃ɛ bar, ɩ̃ naa ʋ tuo a ʋ nɩ-kʋ-daa tuure nɩ ma.

²⁵ A-na-ɩ a nɩrɛ lɛ na bʋɔrɔ ʋ faa a ʋ mɩ̃ɛ, a ʋ baafʋ na bɔrʼã. Ɩ̃-cɛ a nɩrɛ lɛ na bar a ʋ baafʋ ʋ bɔr a ɩ̃ ɩnɛ, ʋ na pɔw ʋ na.

²⁶ Bõ a na ɩ a nɩrɛ jie a ʋlɔ pɔw a tẽw pʋɔ yele a jaa, ɩ̃-cɛ a ʋ baafʋ bɔr? Bom be na be a nɩrɛ na tʋɔ de tɛw nɩ a ʋ baafʋ mɩɩ?

²⁷ A-na-ɩ a *Nɩbɛ Bie na sɩrɩ̃ na wa nɩ a ʋ Sãa yo-yifʋ yele, nɩ a ʋ sɩ-tʋnɩsɩ. Ɩ̃ a daar ʋlɔ, ʋ na ya na a nɩbɛ ba jaa tu nɩ a ba maal-bie.

²⁸ Yel-mɩ̃ɛ ɩ̃ yele nyɩ, a bala na be a ka, nɩŋmɛɛ be na be kɔ̃ kpi sɛr wa, ɩ̃-cɛ ba na nyɛ na a Nɩbɛ Bie ʋ waara nɩ a ʋ fãgã.”