Matie Sɛbɛ 13 - A NAAŊMƖN PƲLƖ̃-TA-PAALAA

A CI YAARƖ̃FƲ SƲKPA

¹ A ʋna daarʼãa pʋɔ, a *Jeeju yi na a yir ɩ̃ cen na jɛ a man gbẽgbere nʋɔr,

² ɩ̃ a nɩ-yaw wɩ na a ʋ sɛ, ʋ ir kpɛ jɛ a gbor pʋɔ, ɩ̃ a nɩbɛ ba jaa ɩraa a gbẽgbere nʋɔr,

³ ʋ nyɔw ɩ̃ ƴɛrɛ lɔbɔ nɩ a sʋkpar miile nɩ ba a yele yayaw. Ʋ yelʼã: “Daba kãw wa dãa na cen a ci yaarɩ̃fʋ jie.

⁴ Ɩ̃ a mɩnɛ ʋ na yaara a ci, a ŋmɛɛ lo na a sɔr nʋɔr a wɛ-lili wa nɩɩr dɩ.

⁵ A ŋmɛɛ lɛ lo na a kʋsɩpan juu, a jie a tene na ma kpɛ wa, ɩ̃ a jie naan a bulʼã, a-na-ɩ a kɔ-tan ma bɔ̃w be a be wa.

⁶ A mɩnɛ a mɔtɔ̃w na do baar, a jʋɔlɩ̃ na ko, a-na-ɩ a nyɩbɛ ma kpɛ pʋɔ wa.

⁷ A ci ŋmɛɛ go lɛ lo na a gʋʋr pʋɔ, a gʋʋr karɩ̃ piw ba tɛɛlɛ.

⁸ Ɩ̃-cɛ a ci ŋmɛɛ lo na a tẽ-vɩlaa pʋɔ, ɩ̃ dɔw. A ci tɩ-bõ-ƴen tɛrɛ na ci-bie kʋbaa, a kãw tɛrɛ lɩjaata, ɩ̃ a kãw mɩ tɛrɛ lɩjɛrʼɩ̃-pie.”

⁹ Ɩ̃ a Jeeju pãa yel: “A ʋlɔ na tɛrɛ a tobo wono nɩ, ú bɔ̃w cɛlɛ!”

A JEEJU SƲKPAR LƆBFƲ PAR

¹⁰ A ʋ *par-tuurbe taw na ta ʋ ɩ̃ soor ʋ: “Bõ ɩnɛ fʋ ƴɛrɛ lɔbɔ nɩ ba a sʋkpar a lɛ?”

¹¹ Ʋ yel ba: “A nyɩmɩ, ba miil nyɩ na a nyɩ bɔ̃w a saa juu fãw ƴɛr-sɔɔlsɩ, ɩ̃-cɛ a nɩbɛ basɩmɛ baa pɔw wa.

¹² A-na-ɩ a ʋlɔ na tɛrɛ, ba na dɔɔl ʋ na ʋ tɛrɛ a yaw, ɩ̃-cɛ a ʋlɔ na ma pɔw wa, ba na fãa na a fɩ̃ɩ ala ʋ na tɛrɛ.

¹³ Ala-ɩ̃-sɔ ɩ̃ ƴɛrɛ lɔbɔ nɩ ba a sʋkpar a lɛ, a-na-ɩ ba ꞌwuoro na ɩ̃ maa nyɛ wa; ba cɛlɛ na ɩ̃ maa wõ bɔ̃w a par wa.

¹⁴ A lɛ a ta a ba jie a na ɩ a mɩnɛ a ƴɛr-hiere Ejayi ƴɛrɩ̃ na dãa yel: ‘Nyɩ nɔɔ wonaa na, ɩ̃ kɔ̃ wa bɔ̃w a par wa; nyɩ nɔɔ bɔ̃w na ꞌwuor, ɩ̃ kɔ̃ wa nyɛ fɩ̃ɩ wa.

¹⁵ A-na-ɩ a nɩbɛ bala sube lɩɛbʼã kpɛmɛ, a ba tobo wõw na, a ba mimie mɩ jɔ̃w, a mɩnɛ a ba kɔ̃ wa nyɛ nɩ a ba mimie wa, ɩ̃ mɩ wõ nɩ a ba tobo, a ba sube kɔ̃ mɩ bɔ̃w a par wa, a mɩnɛ a ba yɛ̃ kɔ̃ wa lɩɛb, ɩ̃ naa kpaar ba wa.’

¹⁶ Ɩ̃-cɛ a nyɩmɩ, nyɩ pɔw na nʋ̃ɔ, a-na-ɩ a nyɩ mimie nyɛrɛ na, a nyɩ tobo mɩ wono.

¹⁷ Yel-mɩ̃ɛ ɩ̃ yele nyɩ, a Naaŋmɩn ƴɛr-hierbe nɩ a nɩ-torisɩ yaw dãa na bʋɔrɔ ba nyɛ a ala nyɩ na nyɛrɛ, ɩ̃ ma nyɛ wa. Ba mɩ dãa na bʋɔrɔ ba wõ a ala nyɩ na wono, ɩ̃ ma wõ wa.

A CI YAARƖ̃FƲ SƲKPA PAR

¹⁸ “Nyɩ́ cɛlɛ a ci yaarɩ̃fʋ sʋkpa par.

¹⁹ A ci ala na lo a sɔr nʋɔr ɩ na a nɩrɛ ʋlɔ na wõ a Naaŋmɩn fãw ƴɛrɩ̃, ɩ̃ ma bɔ̃w a par wa, a Fãa Sʋbɔ wɩ ir a ala na be a ʋ suur pʋɔ, ɩ̃ cɛ ʋ bar.

²⁰ A ci ala na lo a kʋsɩpan juu ɩ na a ʋlɔ na wõ a ƴɛrɩ̃ ɩ̃ sɔw a jie naan a vɩlaa,

²¹ ɩ̃-cɛ ʋ maa kam wa, a-na-ɩ ꞌwaa bá a nyɩbɛ wa. A lɛdaar a won mɩɩ a hʋɔlfʋ na ta ʋ a ƴɛrɩ̃ ala ɩnɛ, a ma tɔ ʋ na ʋ de bar.

²² A ci ala na lo a gʋʋr pʋɔ ɩ na a ʋlɔ na wõ a ƴɛrɩ̃, ɩ̃-cɛ a daarʼãa pʋɔ na-tɩɛrɩ̃sɩ, nɩ a tẽw pʋɔ yel-bɛlɩsɩ ma piw na a ƴɛrɩ̃ ʋlɔ tɛɛlɛ, a ꞌwaa lɛ wɔnɔ wa.

²³ Ɩ̃-cɛ a ci ala na lo a tẽ-vɩlaa pʋɔ ɩ na a ʋlɔ na wõ a ƴɛrɩ̃, ɩ̃ mɩ bɔ̃w a par. Ʋ ma wɔ̃ na a wɔmɔ, a tɩ-bõ-ƴen kʋbaa, a kãw lɩjaata, a kãw mɩ lɩjɛrʼɩ̃-pie.”

A CI NƖ A YAYA SƲKPA

²⁴ A *Jeeju lɛ lɔbʼã a sʋkpa ƴen sʋbɔ miilʼɩ̃ ba. Ʋ yelʼã: “A saa juu fãw wɔ̃ na taa nɩ a daba na dãa yaarɩ̃ a ci a ʋ puo pʋɔ.

²⁵ Ɩ̃-cɛ a tɩsɔw, a mɩnɛ a nɩbɛ na gur, a ʋ san-sʋbɔ wɩ na yaarɩ̃ a yaya ƴɔ̃w a ci pʋɔ ɩ̃ lɩɛb kul.

²⁶ A mɩnɛ a ci na bul karɩ̃ dɔwrɔ, a mʋ̃ɔ mɩ pɔwrɔ na,

²⁷ a tʋ̃tʋnbɔ taw ta a pʋɔ sʋbɔ ɩ̃ soor ʋ: ‘Aa ɩ ci nɩ̃ɛ fʋ dãa bʋrɔ a fʋ puo pʋɔ wa? Ɩ nyɩnɛ a yaya lɔɔ yi be?’

²⁸ Ʋ yel ba: ‘A san-sʋbɔ ɩ̃ maal.’ A ba lɛ soor ʋ: ‘Fʋ bʋɔrɔ na sɩ cen na vɔ̃ bar mɩɩ?’

²⁹ Ʋ yel ba: ‘Nyɩ taa maal a lɛ wa. A-na-ɩ a nyɩmɩ vɔnɔ a yaya nyɩ nɔɔ lãa na vʋ̃ɔ nɩ a ci ŋmɛɛ.

³⁰ Nyɩ́ bar ba a ba ɓã taa karɩ̃ wa ta nɩ a ci ŋmafʋ daar. A ci ŋmafʋ wa ta ɩ̃ na yelʼã a tʋ̃tʋnbɔ a ba de nĩe vɔ̃ a yaya lũ ƴɔ̃w a vũu pʋɔ, ɩ̃ pãa ŋma a ci woor ƴɔ̃w a boorɩ̃.’ ”

A MUTA-TƖƐ BIR SƲKPA

³¹ A *Jeeju lɛ lɔbʼã a sʋkpa kãw miilʼɩ̃ ba. Ʋ yelʼã: “A saa juu fãw wɔ̃ na taa nɩ a *muta-tɩɛ bir a daba na de bʋr a ʋ puo pʋɔ.

³² A ʋlɔ ɩ̃ ɩ a bir na nyɩrɩ̃ pab gãw a bie a jaa, ɩ̃-cɛ a ʋlɔ wa bul karɩ̃, ʋ ma gãw na a yel-kʋɔrsɩ nɩ a yel-sɛlsɩ a jaa, ɩ̃ ma ɩ a tɩɛ a wɛ-lili ma wɩ gana a ʋ wulbie jur.”

A TABƖR SƲKPA

³³ Ʋ lɛ lɔbʼã a sʋkpa kãw go yelʼɩ̃: “A saa juu fãw lɛ wɔ̃ na taa nɩ a tabɩr a pɔw na de ƴɔ̃w a man-bil lɩjaanaan jɔ̃ pʋɔ pɔw bar, a tabɩr wa maal a jɔ̃ a jaa a vʋ̃.”

A BÕ NA SƆ A JEEJU LƆBƆ A SƲKPA

³⁴ A sʋkpar a *Jeeju lɔbɔ nɩ a ana ƴɛrɩ̃sɩ a jaa kʋrɔ a nɩbɛ. ꞌWaa ƴɛrʼɩ̃ ba ƴɛrɩ̃ kãw ɩ̃ ma lɔbʼɩ̃ a sʋkpa wa,

³⁵ a na ɩ a ala a Naaŋmɩn ƴɛr-hiere na dãa yel: “Ɩ̃ na haa na a ɩ̃ nʋɔr lɔbʼɩ̃ a sʋkpar miilʼɩ̃ ba. Ɩ̃ na mɩ hierʼã a yele ala na dãa sɔɔlɩ̃ a tẽw maalfʋ daar jaa, kʋ ba.”

A CI NƖ A YAYA SƲKPA PAR

³⁶ A *Jeeju barʼã a nɩbɛ ɩ̃ kul a yir, a ʋ *par-tuurbe taw ta ʋ, ɩ̃ yel: “Ir a yaya na be a puo pʋɔ sʋkpa par kʋ sɩ.”

³⁷ Ʋ yel ba a nɔhɔ̃: “A ʋlɔ na yaarɩ̃ a ci ɩ na a *Nɩbɛ Bie.

³⁸ A puo miile na a tẽw, a ci mɩ miile a Naaŋmɩn fãw nɩbɛ, ɩ̃ a yaya mɩ miile a Fãa Sʋbɔ nɩbɛ.

³⁹ A ʋlɔ na yaarɩ̃ a yaya ɩ na a Satã, ɩ̃ a ci ŋmafʋ daar miile na a tẽw baarfʋ daar, a ci ŋmarba ɩ̃ mɩ ɩ a sɩ-tʋnɩsɩ.

⁴⁰ A mɩnɛ ba na wobo a yaya ƴɔnɔ a vũu pʋɔ a dɩrɛ, a lɛ a na mɩ be a tẽw baarfʋ daar.

⁴¹ A Nɩbɛ Bie nɔɔ tʋ̃ na a ʋ sɩ-tʋnɩsɩ a ba cen na tuur a ʋ fãw nɩbɛ pʋɔ a bala na saa a nɩbɛ loro a maal-fãa pʋɔ, nɩ a maal-bebe deme ba jaa,

⁴² ɩ̃ lɔb ba ƴɔ̃w a vũu kpõ-kpõ pʋɔ. Ɩ̃ a be, ba na kono na nyɩrɛ nɩ a nyɩmɛ.

⁴³ Ɩ̃-Cɛ a bala na tor nɔɔ nyɩlɛ na wɔ̃ taa nɩ a mɔtɔ̃w, a ba Sãa Naaŋmɩn fãw pʋɔ. A ʋlɔ na tɛrɛ a tobo wono nɩ, ú bɔ̃w cɛlɛ!

A NA-YELE NA SƆƆLƖ̃ A PUO PƲƆ SƲKPA

⁴⁴ “A saa juu fãw wɔ̃ na taa nɩ a na-yele ba na ũu sɔɔlɩ̃ bar a puo pʋɔ, a daba wa cen na nyɛ, ɩ̃ lɛ cɔɔrɩ̃ sɔɔlɩ̃ bar, a nʋ̃ɔ nyɩrɩ̃ nyɔw ʋ, ʋ cen na de a ʋ yele a jaa da, lɩɛb cenʼɩ̃ da nɩ a ʋna puo.

A LƐR-BIR SƲKPA

⁴⁵ “A saa juu fãw mɩ wɔ̃ na taa nɩ a ƴaƴaba na bʋɔrɔ a lɛr-vɛlɛ,

⁴⁶ ɩ̃ a mɩnɛ ʋ na nyɛ a kãw na nyɩrɩ̃ vɩɛlɛ ɩ̃ mɩ kpɛmɛ a dafʋ, ʋ kulʼã wob a ʋ yele a jaa da, cenʼɩ̃ na da nɩ a ʋna lɛr-birʼãa.

A JƲƆ SƲKPA

⁴⁷ “A saa juu fãw mɩ lɛ wɔ̃ na taa nɩ a jʋɔ ba na lɔb ƴɔ̃w a kʋ̃ɔ pʋɔ, ʋ nyɔɔr a yel-bʋrɔ bʋrɔ a jaa.

⁴⁸ A mɩnɛ a jʋɔ na sɛw, a jɩ̃-bɛrbɛ taw na yi nɩ a kʋlaa gbẽgbere nʋɔr, ɩ̃ jɛ tuur a jɩmɛ ƴɔ̃w a pɩɩr pʋʋr, ɩ̃ lɔb a yel-kpansɩ bar.

⁴⁹ A lɛ a na mɩ be a tẽw baarfʋ daar. A sɩ-tʋnɩsɩ na wa na ow a nɩ-faar a nɩ-torisɩ sɔ̃w,

⁵⁰ ɩ̃ lɔb ba ƴɔ̃w a vũu kpõ-kpõ pʋɔ. Ɩ̃ a be, ba na kono na nyɩrɛ nɩ a nyɩmɛ.”

A ƲLƆ A SAA JUU FÃW PAR-TUURE NA Ɩ

⁵¹ A *Jeeju soor ba: “Nyɩ wonaa na a ƴɛrɩ̃sɩ asɩmɛ a jaa mɩɩ?” A ba yel ʋ, á ɔɔ.

⁵² Ʋ yel ba: “Ala-ɩ̃-sɔ, a *ƴɛr-kpɛn-bɔɔnbɔ nɩrɛ jaa wa lɩɛb ɩ a saa juu fãw *par-tuure, ʋ na wɔ̃ na taa nɩ a naaba na ire a ʋ na-yele pʋɔ a yel-paala nɩ a yel-koro poro a nɩbɛ.”

A NAJARƐTƖ DEME NA MA ƳƆNƆ A JEEJU WA

⁵³ A mɩnɛ a *Jeeju na lɔb a sʋkpar ala baar, v yi na a be

⁵⁴ ɩ̃ kul a v tẽw, a Najarɛtɩ, ɩ̃ kpɛ a ba *puorfʋ *yir pʋɔ jaana ba, a nʋɔr ko ba a ba yele taa: “Nyɩnɛ a daba na yɛ̃ yi, nɩ a ʋ nɔ-kofʋ tʋmɔ ala ʋ na maal?

⁵⁵ Aa ɩ a ʋlɔ ɩ̃ ɩ a dafɔɔrɔ bi-daba wa? Aa ɩ a ʋ mã ɩ̃ dɩ a Maarɩɩ wa? Aa mɩ ɩ a Jakɩ, a Jojɛfʋ, a Sɩmɔ̃, nɩ a Judi ɩ̃ ɩ a ʋ yɛɛr wa?

⁵⁶ Ɩ̃ saa lãa be nɩ a ʋ yɛ-pɔɔbɔ ba jaa a ka wa? Ɩ̃ nyɩnɛ a daba na pɔw a ana yele a lɛ?”

⁵⁷ Ɩ̃ a ʋ maal-bie cɛ ba na. Ɩ̃-cɛ a Jeeju yel ba: “Ba ma ƴɔnɔ na a Naaŋmɩn ƴɛr-hiere a jiir a jaa, ɩ̃-cɛ a ala ma ɩ a ʋ mɩ̃ɛ tẽw, nɩ a ʋ yir wa.”

⁵⁸ Ɩ̃ a mɩnɛ ba na ma tɛrɛ nɩ ʋ a ƴɔ̃w-nyãa wa, a Jeeju ma tʋ̃ a nɔ-kofʋ tʋmɔ a be yaw wa.