Matie Sɛbɛ 10 - A NAAŊMƖN PƲLƖ̃-TA-PAALAA

A JEEJU PAR-TUURBE PIE-NʼAYI YOE

¹ A *Jeeju bʋɔlʼã a ʋ *par-tuurbe pie-nʼayi a ba wɩ, ʋ kʋ ba a tʋɔfʋ a ba n a diwre nɩ a kɔ̃tɔn-bebe ɩ̃ mɩ kpaara nɩ a wʋlɩ̃-bʋrɔ bʋrɔ deme.

² Nyɛ a *nɩ-tʋnɩsɩ pie-nʼayi yoe: a dãdãw sʋbɔ ɩ na a Sɩmɔ̃ ba ma bʋɔlɔ a Pɩɛr, a ʋ yɛbɛ Ãdire, a Jebede bie Jakɩ, nɩ a ʋ yɛbɛ Jã,

³ a Fɩlɩpɩ nɩ a Batelemi, a Tomasɩ, nɩ a Matie na dãa ɩ a lãpo-diere, a Alfe bie Jakɩ, nɩ a Tade,

⁴ a Sɩmɔ̃ na ma jɛrɛ, nɩ a Judasɩ Isikaryɔtɩ na cilĩ a Jeeju.

A JEEJU NA TƲ̃ A Ʋ PAR-TUURBE

⁵ A *Jeeju tʋ̃ na a bana nɩbɛ pie-nʼayi, ɩ̃ kpãkpan ba a nɔhɔ̃: “Nyɩ taa wa cere a nɩ-bʋlsɩ sɛ̃ wa, ɩ̃ nyɩ taa mɩ kpɛɛrɛ a *Samari-tẽw wa,

⁶ Ɩ̃-cɛ nyɩ́ cen a *Ɩsɩrayɛl nɩbɛ jie na bɔr a piir kaarɩ̃.

⁷ A lɛ nyɩ na cere, nyɩ́ hiere yele nɩ: ‘A saa juu fãw pɩɛlʼã.’

⁸ Nyɩ́ kpaara a wʋlɩ̃sɩ deme, mɩ jawra nɩ a kũusɩ, pɔlɔ nɩ a kɔn, ɩ̃ mɩ diwre a kɔ̃tɔnsɩ bara. Pɔrɔ nyɩ pɔw, nyɩ́ mɩ tɩɩr a pɔrɔ.

⁹ Nyɩ taa wa bʋɔrɔ nyɩ tɛrɛɛ a sɛlmɛ, mɩɩ a libie a nyɩ wʋʋr pʋʋr wa.

¹⁰ Nyɩ taa wa mɩ bʋɔrɔ nyɩ tɛrɛɛ a wʋɔ, nɩ kparsɩ ayi, nɩ a nafaba, nɩ a dãɓɩlaa wa, a-na-ɩ a tʋ̃tʋnɔ sɛw nɩ na a ʋ dɩb.

¹¹ A nyɩmɩ wa ta a tẽw-oo-tẽw pʋɔ, nyɩ́ soor nɩrɛ ʋlɔ ba na ƴɔnɔ yir, cen na jɛ a be wa ta nɩ a nyɩ be yifʋ daar.

¹² A nyɩmɩ wa ta a yir, nyɩ́ puor ba.

¹³ A bala wa ɩ nɩ-sono, nyɩ́ sʋɔr a Naaŋmɩn á ʋ be nɩ ba. Ɩ̃-cɛ a bala mɔɔ ɩ nɩ-sono wa, nyɩ́ mɔ̃w a nyɩ puorfʋ cere nɩ.

¹⁴ A ala ɩ nyɩ wa ta na a yir kãw pʋɔ mɩɩ tẽw kãw pʋɔ, a ba wa jaar nyɩ nɩ a nyɩ ƴɛrɩ̃ bar, nyɩ́ yi ɩ̃ tɛ-tɛb a nyɩ gbɛɛ tãbuulĩ ƴɔ̃w ba.

¹⁵ Yel-mɩ̃ɛ ɩ̃ yele nyɩ, a ƴɛrɩ̃ guorfʋ dayen, a *Sɔdɔm nɩ a *Gɔmɔɔr ten hʋʋr nyɛfʋ na sa na a ʋna tẽw naa.

A NƖ-TƲNƖSƖ HƲƆLFƲ NƆƆ TARA

¹⁶ “Nyɩ́ nyɛ, ɩ̃ tʋnɔ nyɩ na wɔ̃ taa nɩ piir a wɛ-baar sɔ̃w. Ala-ɩ̃-sɔ, nyɩ́ ɩ nɩ-kpaarsɩ a wɩ́ɩr kaarɩ̃, ɩ̃ mɩ wɔ̃ taa nɩ a ŋmama na ma bɔ̃w a bier maalfʋ wa.

¹⁷ Nyɩ́ tɛrɛ nyɩ mɩ̃ɛ a nɩbɛ ɩnɛ, a-na-ɩ ba nɔɔ bʋɔl nyɩ na a nɩ-bɛrɛ ƴɛrɩ̃ guorfʋ jiir, ɩ̃ mɩ fɔb nyɩ nɩ kpaarsɩ a Jufisɩ *puorfʋ yie pʋʋr.

¹⁸ Ba na taw nyɩ na cenʼɩ̃ a ni-dierbe nii-sɔw nɩ a jamansɩ nii-sɔw a ɩ̃ ɩnɛ, a mɩnɛ a nyɩ na tʋɔ man a yel-mɩ̃ɛ kʋ ba, nɩ a bala na ɩ a nɩ-bʋlsɩ mɩ.

¹⁹ Ɩ̃-cɛ a lɛ ba na taw nyɩ cere nɩ, nyɩ taa ɩ a dama nyɩ a bõ nyɩ na ƴɛrɛ, mɩɩ a mɩnɛ nyɩ nɔɔ ƴɛrɛ wa. A daar ʋlɔ wa ta, nyɩ na bɔ̃w na a ala nyɩ na ƴɛrɛ.

²⁰ A-na-ɩ aa ɩ a nyɩ jie a ƴɛrɩ̃ ala na yi wa, ɩ̃-cɛ a nyɩ Sãa Naaŋmɩn Sɩɛ jie a na yi.

²¹ A nɩrɛ nɔɔ cilĩ na a ʋ yɛbɛ ƴɔ̃w a kũu pʋɔ; a sãa nɔɔ mɩ maalʼã a lɛ a ʋ bie jie; a bibiir nɔɔ mɩ kpɛmɛ na a ba dɔɔrbɔ jiir, ƴɔnɔ nɩ ba a ƴɛrɩ̃ a ba kú ba.

²² A nɩbɛ ba jaa nɔɔ ꞌlaara nyɩ na a ɩ̃ ɩnɛ, ɩ̃-cɛ a ʋlɔ nɔɔ tʋɔ ɩraa cĩcĩ wa ta nɩ a baarfʋ daar, na pɔw na a faafʋ.

²³ A bala wa hʋɔlɔ nyɩ a tẽw kãw pʋɔ, nyɩ́ jɔ cen tẽ-kpee. Yel-mɩ̃ɛ ɩ̃ yele nyɩ, nyaa tʋɔrɔ baara a *Ɩsɩrayɛl ten a jaa, ɩ̃-cɛ a *Nɩbɛ Bie waara wa.

²⁴ A *par-tuure maa gãw a ʋ jãjaana wa; a gbãgbaar ma mɩ gãw a ʋ sɔsʋɔrɔ wa.

²⁵ A na sɛw na a ala ɩ a par-tuure jɛ̃ na taa nɩ a ʋ jãjaana, ɩ̃ a gbãgbaar mɩ jɛ̃ taa nɩ a ʋ sɔsʋɔrɔ. A ala ɩ ba bʋɔlʼã a yir sʋbɔ a *Bɛɛjɛbul, mɩnɛ ba nɔɔ bʋɔl a ʋ yir deme?

A ƲLƆ NA SƐW NƖ NYƖ A JƆFƲ

²⁶ “Ala-ɩ̃-sɔ, nyɩ taa jɔrɔ a nɩbɛ dãbɩ̃ɛ wa. A-na-ɩ bom ma be be na sɔɔlɩ̃ ɩ̃ mɔɔ yire cãa pʋɔ wa.

²⁷ A ala ɩ̃ na yele nyɩ a libe pʋɔ, nyɩ́ yel ba a cãa pʋɔ. A ala ɩ̃ na mɩ bʋrɔ kʋrɔ nyɩ, nyɩ́ hier ba a gara jur.

²⁸ Nyɩ taa jɔrɔ a bala na kúrɔ a ĩgan ɩ̃ ma tʋɔrɔ kúrɔ a sɩɛ wa. Ɩ̃ nyɩ́ ɛ̃ɛ jɔrɔ a ʋlɔ na tʋɔrɔ maala a ɩ̃gan nɩ a sɩɛ a wɛrɛ a wɛfʋ vũu pʋɔ.

²⁹ A tɩ̃ɩtɩ̃ɩ, lɩba-anuu tɛw ba ma da nɩ ayi, ɩ̃-cɛ ʋ bõ-yen tẽtẽ ma bɔrɔ ɩ̃ a nyɩ Sãa ma bɔ̃w wa.

³⁰ A ala ɩ a nyɩmɩ ʋ, a Naaŋmɩn bɔ̃w na a nyɩ ju-kɔbɔ nʋɔr.

³¹ Ala-ɩ̃-sɔ, nyɩ taa jɔrɔ dãbɩ̃ɛ wa. Nyɩ sa na a tɩ̃ɩtɩ̃ɩsɩ yayaw.

A JEEJU SƆWFƲ MƖƖ A Ʋ JAARFƲ

³² “A nɩrɛ lɛ na cã yel a nɩbɛ nii-sɔw, á ɩ̃ ben ʋ ɩ, ɩ̃ nɔɔ mɩ yelʼã a ɩ̃ saa juu Sãa nii-sɔw, á ɩ̃ ben a sʋbɔ ʋlɔ ɩ.

³³ Ɩ̃ a nɩrɛ lɛ na jaar ma a nɩbɛ nii-sɔw, ɩ̃ nɔɔ mɩ jaar ʋ na a ɩ̃ saa juu Sãa nii-sɔw.

A JEEJU ƳƐRƖ̃ NA ŊMARA A NƖBƐ

³⁴ “Nyɩ taa tɩɛr beeka pɩɛnfʋ ɩ̃ wa nɩ a tẽw pʋɔ wa. Maa wa nɩ pɩɛnfʋ wa, ɩ̃-cɛ sɔgbalʋ ɩ̃ wa nɩ.

³⁵ Ɩ̃ wa na na ŋma a bie nɩ a ʋ sãa kpee, a mã nɩ a ʋ bi-pɔw mɩ kpee, a poole nɩ a ʋ dɩ̃ɛ-mã mɩ kpee.

³⁶ A nɩrɛ yi-deme na ɩ na a ʋ sama-deme.

³⁷ A ʋlɔ na nʋnɔ a ʋ sãa mɩɩ a ʋ mã gãw ma, ma sɛw nɩ ma wa. A ʋlɔ na mɩ nʋnɔ a ʋ bi-daba mɩɩ a ʋ bi-pɔw gãw ma, ma mɩ sɛw nɩ ma wa.

³⁸ Ɩ̃ a ʋlɔ na ma sɔw tuo a ʋ nɩ-kʋ-daa tuure nɩ ma wa, ma mɩ sɛw nɩ ma wa.

³⁹ A nɩrɛ ʋlɔ na pɔw a ʋ baafʋ, a ʋ baafʋ ʋlɔ nɔɔ bɔrʼã, ɩ̃ a ʋlɔ baafʋ na bɔr a ɩ̃ ɩnɛ, ʋ nɔɔ pɔw ʋ na.

A YAR NA YIRE A NAAŊMƖN JIE

⁴⁰ “A ʋlɔ na sɔwrɔ diere nyɩ, mɩ sɔw na de ma. Ɩ̃ a ʋlɔ na sɔw de ma, mɩ sɔw na de a ʋlɔ na tʋ̃ ma.

⁴¹ A ʋlɔ na sɔwrɔ diere a Naaŋmɩn ƴɛr-hiere a-na-ɩ ƴɛr-hiere ʋ ɩ, ʋ na pɔw na a ƴɛr-hiere yar mɩ. Ɩ̃ a ʋlɔ na sɔwrɔ diere a nɩ-toraa a-na-ɩ nɩ-toraa ʋ ɩ, ʋ na mɩ pɔw na a nɩ-toraa yar.

⁴² Yel-mɩ̃ɛ ɩ̃ yele nyɩ, a ʋlɔ na ꞌwɔ̃wnɔ a kʋ̃ɔ baar kʋrɔ a nɩ-pabɩ sɩ basɩmɛ kãw, a-na-ɩ ɩ̃ *par-tuure ʋ ɩ, kɔ̃ wa faa a ʋ yar fɩ̃ɩ wa.”