Markɩ Sɛbɛ 9 - A NAAŊMƖN PƲLƖ̃-TA-PAALAA

¹ Ʋ lɛ yel ba na: “Yel-mɩ̃ɛ ɩ̃ yele nyɩ, a bala na be a ka, a ŋmɛɛ na nyɛ na a mɩnɛ a Naaŋmɩn na diere a tẽw nɩ a fãw, ɩ̃ wa pãa bɩɛr kpi.”

A JEEJU NALƖ̃FƲ

² A lɛ a bibie ayʋɔb na tɔl baar, a *Jeeju taw na a Pɩɛr nɩ a Jakɩ nɩ a Jã, bala ba tɛw, cenʼɩ̃ a tã-kpɛ̃ɛ kãw juu. A be, ʋ nalɩ̃ na a ba nii-sɔw,

³ a ʋ cẽcene lɩɛb nyɩlɛ ƴala-ƴala-ƴala ɩ̃ pɛlɩ̃ a pɛlɩ̃fʋ bar, a mɩnɛ a cẽcen-mʋɔlɔ ma be ka a tẽw na juu tʋɔrɔ mʋɔlɔ ʋ a pɛlɛɛ a lɛ wa.

⁴ A be a Eli nɩ a Mowisi nyɩr ba, na ba ɩraa bʋrɔ nɩ a Jeeju.

⁵ A be jie, a Pɩɛr yel a Jeeju: “Jãjaana, a vɩɛlɛ na sɩ na be a ka. Sɩ na ƴɔ̃w na sɛɛr ata; a bõ-ƴen na ɩ na a fʋ ben, a kãw ɩ a Mowisi ben, ɩ̃ a bõ-ƴen ɩ a Eli ben.”

⁶ A-na-ɩ a pʋlɩ̃nyɛ dãa na vʋ̃ɔ ba, ʋlɔ nɩ a ʋ tɔ deme, ꞌwaa bɔ̃w a ala na sɛw ʋ yel wa.

⁷ Dɔ̃dɔrɩ̃ma suu na pɔw ba, ɩ̃ a ƴɛrɩ̃sɩ yi na be a dɔ̃dɔrɩ̃ma pʋɔ yele: “A ɩ̃ Bi-nʋnaa nɩ a naa. Nyɩ́ cɛlɛ ʋ.”

⁸ A jie naan, a Jeeju *par-tuurbe ꞌwuorʼã kolĩ nɩ a lõbobo a jaa, ma lɛ nyɛ nɩrɛ wa, a ala ma ɩ a Jeeju tɛw na be nɩ ba ʋ wa.

⁹ A lɛ ba na yi a tãw juu suure, a Jeeju kpãkpan ba na, a ba taa wa de a ala ba na nyɛ ƴɛrɛ kʋrɔ nɩrɛ, wa tara nɩ a daar ʋlɔ a *Nɩbɛ Bie na ire a kũu pʋɔ wa.

¹⁰ Ba nyɔw na a ƴɛrɩ̃ ʋlɔ tɛrɛ a ba pʋ̃ɔ, ɩ̃ sooro taa: “A ʼir a kũu pʋɔꞌ, bõ a bʋɔrɔ a yel?”

¹¹ Ba lɛ soor ʋ na a soorfʋ na: “Bõ ɩnɛ a *ƴɛr-kpɛn-bɔɔnbɔ ma yel á Eli sɛw na ʋ de nĩe wa?”

¹² Ʋ yel ba: “Lɛ ʋ! A Eli sɩrɩ̃ na sɛw ʋ de nĩe wa, gbɛɛrɩ̃ a yele a jaa baar, ɩ̃ bõ ɩnɛ a mɩ sɛb a Naaŋmin Sɛbɛ pʋɔ áa Nɩbɛ Bie na nyɛ na won yaw a bɛlɩ̃ ʋ, ɩ̃ a ba na kpɛ ʋ na?

¹³ Ɩ̃-cɛ ɩ̃ yele nyɩ na, a Eli wa na, ɩ̃ ba maal ʋ na a mɩnɛ ba na bʋɔrɔ tu nɩ a mɩnɛ a na sɛb a Naaŋmin Sɛbɛ pʋɔ a ʋ ɩnɛ.”

A JEEJU NA KPAAR A BIE A KƆ̃TƆN NA VƆWRƆ

¹⁴ A lɛ ba na tara a *par-tuurbe bala na cɛ, ba nyɛ na a nɩ-yaw a ba jilĩ kolĩ ba, ɩ̃ a *ƴɛr-kpɛn-bɔɔnbɔ iraa a ba cɩɩrɛ taa.

¹⁵ A mɩnɛ a nɩbɛ na nyɛ a *Jeeju, a puurĩ ba na ba jaa, a ba jɔ cen a ʋ puorfʋ jie.

¹⁶ Ʋ soor ba: “Bõ ɩ̃ wa nɩ a cɩɩrɩ̃-taa a nyɩ sɔ̃w?”

¹⁷ A daba kãw iraa be a nɩbɛ sɔ̃w ɩ̃ ŋmaa yel ʋ: “Jãjaana, a ɩ̃ bi-daba kɔ̃tɔn nɔ-mu na tɛrɛ ɩ̃ wa nɩ a fʋ sɛ̃.

¹⁸ A jiir a jaa, a ala ɩ̃ wa ir ʋ, a ma ŋme ʋ na lɔb a tene, ʋ fure a natɛ-fube ꞌwɔbɔ nɩ a nyɩmɛ, ɩ̃ ma tãgarɩ̃ ʋ jaa. Ɩ̃ sʋɔr a fʋ par-tuurbe a ba diw a ʋna kɔ̃tɔn bar, ɩ̃ a baa tʋɔ wa.”

¹⁹ A Jeeju yel ba: “A nyɩna ƴɛ̃ƴɛrɩ̃ nɩbɛ na ma tɛrɛ ƴɔ̃w-nyãa wa, ɩ̃ be nɩ nyɩ wa ta nɩ dabor? Ɩ̃ dɩ nɩ nyɩ a tuo wa ta nɩ dabor? Nyɩ́ taw a bile wa nɩ ka”,

²⁰ a ba taw ʋ wa nɩ. A lɛ a kɔ̃tɔn na tɔ̃ɔ nyɛ a Jeeju, ʋ damʼã a bile nɩ kpɛ̃w lɔb a tene, a bile yʋɔrɔ fure nɩ a natɛ-fube.

²¹ A Jeeju soor a bile sãa: “Dabor a bom be ʋ a lɛ?” A sãa yel ʋ: “Wa nyɔw nɩ a ʋ bibile daar ʋ.

²² A kɔ̃tɔn lɔb ʋ na gbɛɛ amɩnɛ jaa a vũumɩ nɩ a kʋ̃ɔmɩ, bʋɔrɔ ʋ kú ʋ. Ɩ̃-cɛ a ala ɩ fʋ na tʋɔ na maal bom, bɔ̃w sɩ nãw ɩ̃ wa sũo sɩ bɩlɛ.”

²³ A Jeeju yel ʋ: “Bõ ɩnɛ fʋ yel, a ala ɩ fʋ na tʋɔ na? A-na-ɩ a ʋlɔ na tɛrɛ a ƴɔ̃w-nyãa tʋɔrɔ na maala a yele a jaa.”

²⁴ A be naan, a bile sãa wuurʼã yel: “Ɩ̃ tɛrɛ na ƴɔ̃w-nyãa. Wa sũo ma a jie a ɩ̃ ƴɔ̃w-nyãa na bɔr!”

²⁵ A lɛ a Jeeju na nyɛ a nɩbɛ a ba kaal taa waara, ʋ mʋ̃ɔ na mimir ƴɔ̃w a kɔ̃tɔn bier ɩ̃ yel: “A fʋna kɔ̃tɔn nɔ-mu nɩ kɔ̃tɔn wõw naa, maa ɩ̃ yele fʋ, yi ɩ̃ cɛ a bile na, ɩ̃ taa wa lɛ kpɛɛrɛ ʋ go wa!”

²⁶ A kɔ̃tɔn wuur ɩ̃ dam a bile nɩ kpɛ̃w ɩ̃ yi, a bile lɩɛb wɔ̃ taa nɩ kũu, a nɩbɛ bala na ɩraa a be, a ba yaw jie yele á ʋ kpi na.

²⁷ Ɩ̃ a Jeeju nyɔw ʋ a nuu ɩ̃ ɩ ʋ ir, ʋ na ʋ ir ɩraa.

²⁸ A lɛ a Jeeju na kul a yir, a ba be taa a bala tɛw nɩ a ʋ par-tuurbe, ba soor ʋ na: “Bõ ɩnɛ saa tʋɔ diw a kɔ̃tɔn ʋlɔ bar wa?”

²⁹ A Jeeju yel ba: “A ala ma ɩ a Naaŋmɩn sʋɔrfʋ pʋɔ tɛw ʋ wa, a kɔ̃tɔn par bʋrɔ Ra maa tʋɔ diw bar lɛ wa.”

A JEEJU LƐ BƆ̃W NA MANA A Ʋ KŨU ƳƐRƖ̃

³⁰ Ba yi na a jie ʋlɔ ba na dãa be, ɩ̃ na ba tɔl gãw a Galile wɩɛr, a ꞌwaa dãa bʋɔrɔ nɩrɛ ʋ bɔ̃w nɩ ba wa,

³¹ a-na-ɩ ʋ dãa na jaana a ʋ *par-tuurbe yele nɩ ba: “Ba na nyɔw na a *Nɩbɛ Bie ƴɔ̃w a nɩbɛ nuu pʋɔ, a ba kú ʋ, ɩ̃ ʋ na irʼã a kũu pʋɔ a bibie ata dayen.”

³² A ʋ parturbe ma dãa bɔ̃w a ƴɛrɩ̃ ʋlɔ par wa, ɩ̃ baa ꞌla soor ʋ ƴɛrɩ̃ wa.

ALA Ɩ̃ Ɩ A KPƐ̃Ɛ?

³³ Ba cenʼã na ta a Kapɛɛnam; a mɩnɛ a *Jeeju na kpɛ a die pʋɔ baar, ʋ soorʼã a ʋ *par-tuurbe: “Yɛr-bõ nyɩ dãa guoro taa be a sɔr juu?”

³⁴ A ba ŋma vʋʋrɩ̃sɩ, a-na-ɩ a be a sɔr juu, ba dãa na guoro taa, bʋɔrɔ ba bɔ̃w a ʋlɔ na ɩ a nɩ-kpɛ̃ɛ a ba sɔ̃w.

³⁵ A be jie, a Jeeju jɛ ɩ̃ bʋɔl a ʋ par-tuurbe pie-nʼayi, a ba wa ʋ yel ba: “A ala ɩ a nɩrɛ bʋɔrɔ na ʋ ɩ a ni-diere, ʋ sɛw na ʋ ɩ a nɩbɛ ba jaa par-pɔɔrɔ nɩ a ba tʋtʋnɔ.”

³⁶ Ɩ̃ ʋ taw na bibile wa nɩ ƴɔ̃w a ba sɔ̃w, ɩ̃ na ʋ worĩ ʋ ɩ̃ yel:

³⁷ “A nɩrɛ lɛ na sɔw de a bibi-bil basɩmɛ ƴen sʋbɔ a maa ɩnɛ, a maa mɩ̃ɛ ʋ sɔw de, ɩ̃ a ʋlɔ na sɔw de ma, aa ɩ a maa tɛw ʋ sɔw de wa, ɩ̃ ʋ mɩ sɔw na de a ʋlɔ na tʋ̃ ma.”

A ƲLƆ NA Ɩ A SƖ NƖRƐ

³⁸ A Jã yelʼã a *Jeeju: “Jãjaana, sɩ nyɛ na nɩrɛ kãw ʋ de a fʋ yuor diwre nɩ a kɔ̃tɔnsɩ, a sɩ dãa bʋɔrɔ sɩ pɩɛrɩ̃ ʋ bar, a-na-ɩ ꞌwaa be a sɩ pʋɔ wa.”

³⁹ A Jeeju yel: “Nyɩ taa pɩɛrɛ ʋ bara wa. A-na-ɩ nɩrɛ ma tʋɔrɔ diere a ɩ̃ yuor tʋnɔ nɩ nɔ-kofʋ tʋn, ɩ̃ lɛ lɩɛbɛ a be a jie naan bʋɔlɔ a ɩ̃ yo-fãa wa.

⁴⁰ A-na-ɩ a nɩrɛ ʋlɔ na maa jaar a sɩ ƴɛrɩ̃ wa, sɩ nɩrɛ ʋ ɩ.

⁴¹ Ɩ̃ a nɩrɛ lɛ na ꞌwɔ̃wnɔ kʋ̃ɔ kʋrɔ nyɩ a nyɩ nyuure, a-na-ɩ a *Kirisi ɩ̃ sɔ nyɩ, yel-mɩ̃ɛ ɩ̃ yele nyɩ, ʋ nɔɔ pɔw na a ʋ yar.

A TULE PƲƆ KPƐFƲ

⁴² “A nɛ-kpɛ̃ɛ ba na luure yara a nɩrɛ nyɩɩmɩ ɩ̃ lɔbɔ ʋ ƴɔnɔ a man kʋ̃ɔmɩ, a na sa ʋ na, ʋ na wa maala a bibi-bil basɩmɛ na sɔw de ma ƴen sʋbɔ, ʋ kpɛɛrɛ a tule pʋɔ.

⁴³ A ala ɩ̃ ɩ a fʋ nuu ɩ na bom na maala fʋ a fʋ kpɛɛrɛ a tule pʋɔ, fú ŋmaa ʋ bar. Fʋ̃ʋ kpɛ a baafʋ pʋɔ nɩ a nu-gãw, a sa na fʋ na tɛrɛɛ a nur a jaa ayi, ɩ̃ na fʋ cere a wɛfʋ vũu pʋɔ na ma be a kpiinfʋ wa, [

⁴⁴ a jie ʋlɔ a jãjule bala na vʋrɔ ba, na ma be kũu jie wa, ɩ̃ a vũu ma mɩ be kpiinfʋ wa.]

⁴⁵ Ɩ̃ a ala ɩ̃ ɩ a fʋ gbɛr ɩ̃ maala fʋ a fʋ kpɛɛrɛ a tule pʋɔ, fú ŋmaa ʋ bar. Fʋ̃ʋ kpɛ a baafʋ pʋɔ nɩ gbɛr gãw, a sa na fʋ na tɛrɛɛ a gbɛɛ a jaa ayi ɩ̃ na fʋ cere a wɛfʋ vũu pʋɔ, [

⁴⁶ a jie ʋlɔ a jãjule bala na vʋrɔ ba, na ma be kũu jie wa, ɩ̃ a vũu ma mɩ be kpiinfʋ wa.]

⁴⁷ Ɩ̃ a ala ɩ̃ ɩ a fʋ mimir ɩ̃ mɩ maala fʋ a fʋ kpɛɛrɛ a tule pʋɔ, fʋ ꞌlow ʋ bar. Fʋ̃ʋ kpɛ a Naaŋmɩn fãw tẽw pʋɔ nɩ mimir gãw, a sa na fʋ na tɛrɛɛ a mimie a jaa ayi ɩ̃ cere a wɛfʋ vũu pʋɔ,

⁴⁸ a jie ʋlɔ a jãjule bala na vʋrɔ ba, na ma be kũu jie wa, ɩ̃ a vũu ma mɩ be kpiinfʋ wa.

⁴⁹ A-na-ɩ a vũu na maalʼã a nɩbɛ ba jaa a ba tɛrɛ a nasõ nũɔ.

⁵⁰ “A nasõ ɩ na bõ-son. Ɩ̃ a ala ɩ a ʋ nũɔ yi na, mɩnɛ fʋ na maal ʋ, ʋ lɛ bɔ̃w nʋmɔ? Nyɩ́ tɛrɛ nasõ a nyɩ pʋ̃ɔ, nyɩ́ bɔ̃w nyɔw taa bõ-ƴene-ƴene.”