Markɩ Sɛbɛ 6 - A NAAŊMƖN PƲLƖ̃-TA-PAALAA

A NAJARƐTƖ-TẼ-DEME SU-KPƐ̃W A JEEJU ƖNƐ

¹ A *Jeeju yi na a jie ʋlɔ ɩ̃ na ʋ cen a tẽw ʋlɔ pʋɔ ʋ na nʋ̃ɔ, a ʋ *par-tuurbe bɩɛl ʋ cenʼɩ̃.

² A *bibi-ciiraa dayen ʋ kpɛ na a ba *puorfʋ yir ɩ̃ nyɔw ɩ̃ jaana a nɩbɛ a Naaŋmɩn ƴɛrɩ̃. A nɩ-yaw bala na wõ a ʋ jaanfʋ ha na nɔɛ ɩ̃ yele: “Nyɩnɛ tɔr ʋ yi nɩ a tɩɛrɩ̃sɩ na? Yɛ̃ buor bʋrɔ nɩ a naa ʋ na tɛrɛ? Ɩ̃ mɩnɛ ʋ ɩ ɩ̃ tʋɔ a nɔ-kofʋ tʋmɔ a lɛ?

³ Má a dafɔɔrɔ ʋ! Ɩ̃ aa ɩ a Maarɩɩ bi-daba ʋ wa? Má a Jakɩ nɩ a Jojɛsɩ nɩ a Judi nɩ a Sɩmɔ̃ yɛ-kpɛ̃ɛ ʋ. Ɩ̃ a ʋ yɛ-pɔɔbɔ, má a ka sɩ lãa be taa!” Ɩ̃ a ʋ maal-bie cɛ ba na a ba jɛ ʋ bar.

⁴ Ɩ̃ a Jeeju yel ba: “A jiir a jaa ba ma ƴɔnɔ na a Naaŋmɩn ƴɛr-hiere, ɩ̃-cɛ a ʋ mɩ̃ɛ tẽw, nɩ a ʋ nɩbɛ nɩ a ʋ yir deme sɔ̃w tɛw ba maa ƴɔ̃w ʋ wa.”

⁵ ꞌWaa tʋɔ maal nɔ-kofʋ tʋn a be, ɩ̃ a ala ma ɩ a baalsɩ ŋmɛɛ tɛw ʋ na dɔɔl a nuu a ba kpɛmɛ ʋ wa.

⁶ Ɩ̃ a nʋɔr ko ʋ a ba su-kpɛn ɩnɛ. A ala ɩ̃ baar, a *Jeeju yɔ na cʋb a ten ala na viirĩ kolĩ, na ʋ jaana a nɩbɛ,

A JEEJU NA TƲ̃ A Ʋ PAR-TUURBE AYI-YI

⁷ ɩ̃ na ʋ bʋɔl a ʋ *par-tuurbe pie-nʼayi tʋnɔ ba ayi-yi ɩ̃ kʋ ba a tʋɔfʋ a ba na diw nɩ a kɔ̃tɔnsɩ.

⁸ Ɩ̃ ʋ man ba na a ba taa tɛrɛɛ bom diere nɩ a sɔr wa, a ala ɩ̃ ɩ a dɩb ʋ, mɩɩ a wʋɔ mɩ, a ba taa mɩ tɛrɛɛ libie a ba ɩ̃ganɩ̃ wa, ɩ̃ ba tɛrɛ daa tɛw,

⁹ ɩ̃ lɛ yel ba: “Nyɩ́ su nafaba, ɩ̃ nyɩ taa su fu-bɛrɛ ayi wa.”

¹⁰ Ʋ lɛ yel ba na: “A yir lɛ pʋɔ nyɩ nɔɔ kpɛ, nyɩ́ jɛ a be wa ta nɩ a mɩnɛ nyɩ na yire a tẽw ʋlɔ pʋɔ.

¹¹ Ɩ̃-cɛ a jie lɛ a nɩbɛ na ma sɔw de nyɩ ɩ̃ cɛl a nyɩ ƴɛrɩ̃ wa, nyɩ́ yi a be ɩ̃ tɛb a nyɩ gbɛɛ tãbuulĩ bar, a ɩ bõ-miilaa a ba jie.”

¹² Ba cenʼã na hiere yele a nɩbɛ a ba lɩɛb a ba yɛ̃.

¹³ Ba diw na kɔ̃tɔn yaw bar, ɩ̃ na ba bol a kãa a baalsɩ yaw a ba kpɛmɛ.

A JÃ-BATII KŨU

¹⁴ A jamana *Ɛrɔdɩ dãa na wõ a ba ƴɛr a *Jeeju ƴɛrɩ̃ a-na-ɩ a ʋ yuor yire na a jiir a jaa, ɩ̃ na ʋ yel: “A Jã-Batii irʼã a kũu pʋɔ. Ala ɩnɛ ʋ tɛrɛ a tʋɔfʋ maala nɩ a nɔ-kofʋ tʋmɔ.”

¹⁵ Ɩ̃ a nɩŋmɛɛ yele na: “A Eli ʋ,” ɩ̃ a ŋmɛɛ go á ƴɛr-hiere kãw ʋ, na wɔ̃ a korĩ-cɛ ƴɛr-hierbe kaarɩ̃.

¹⁶ Ɩ̃-cɛ, a mɩnɛ a Ɛrɔdɩ na wõ a lɛ, ʋ yelʼã: “A Jã ʋlɔ ɩ̃ na ɩ a ba ŋmaa a juu, ʋlɔ ɩ̃ ir a kũu pʋɔ.”

^17-18 A-na-ɩ a Ɛrɔdɩ dãa na de a ʋ yɛbɛ Fɩlɩpɩ pɔw Ɛrɔdɩya kul, a Jã ma yele ʋ á ꞌwaa tɛrɛ sɔr na de a ʋ yɛbɛ pɔw wa. Ala-ɩ̃-sɔ a Ɛrɔdɩ dãa ɩ a ba nyɔw a Jã lũ ƴɔ̃w a kasu pʋɔ.

¹⁹ A Ɛrɔdɩya dãa na tɛrɛ nɩ a Jã suur, ɩ̃ bʋɔrɔ ʋ kú ʋ ɩ̃ ma nyɛ sɔr wa,

²⁰ a-na-ɩ a Ɛrɔdɩ jɔrɔ na a Jã, ʋ na bɔ̃w ʋ ɩ nɩ-dẽdẽ nɩ nɩ-son. Ʋ maa sɔw a Jã ɩnɛ wa, ɩ̃ a ʋlɔ wa cɛl a Jã ƴɛrɩ̃, a ma dɩrɛ ʋ na a suur, ɩ̃ a ma cãa na nʋmɔ ʋ a ʋ cɛlfʋ.

²¹ Bibir vɩlaa kãw wa yi na a Ɛrɔdɩya. A Ɛrɔdɩ dɔwfʋ yuon ta na, ʋ maal fɛtɩ kpɛ̃ɛ ɩ̃ bʋɔl a ʋ tʋ̃tʋ̃-nɩ-bɛrɛ nɩ a ʋ sɔdaal-bɛrɛ nɩ a Galile-tẽw nɩ-bɛrɛ.

²² A Ɛrɔdɩya bi-pɔw kpɛ na a fɛtɩ jie ɩ̃ sɛ a bɩnɛ, a nʋ̃ɔ nyɔw a Ɛrɔdɩ nɩ a ʋ lãa-dɩrbɛ, ʋ yel a poole: “Sʋɔr ma a bom lɛ fʋ na bʋɔrɔ, ɩ̃ ɩ̃ na kʋ fʋ na,”

²³ ɩ̃ lɛ pɔ yelʼɩ̃: “A bom lɛ fʋ na sʋɔrɔ ma, ɩ̃ na kʋ fʋ na, a ala saarɩ̃ ɩ a ɩ̃ tẽw lõboor gãw ʋ.”

²⁴ A poole yi soor a ʋ mã: “Bõ ɩ̃ na sʋɔr?” A ʋ mã yel ʋ: “Sʋɔr a Jã-Batii juu!”

²⁵ Ʋ pɔw na fɔfɔw cen a jamana jie na yel ʋ: “Ɩ̃ bʋɔrɔ na fʋ ŋmaa a Jã-Batii juu a jie naan dɔɔl lagbaal juu kʋ ma”,

²⁶ a ni-sɔbaa kpɛ a jamana, ɩ̃-cɛ a-na-ɩ ʋ faa na pɔ a ʋ lãa-dɩrbɛ nii-sɔw, ꞌwaa tʋɔrɔ jaara wa.

²⁷ Ʋ tʋ̃ na a ʋ sɔdaalaa kãw a jie naan, ɩ̃ yel ʋ á ʋ wa nɩ a Jã-Batii juu, a sɔdaalaa cen na ŋmaa a Jã juu a kasu pʋɔ

²⁸ dɔɔl a lagbaal juu wa nɩ kʋ a poole, a poole ɩraa ɩ̃ de kʋ a ʋ mã.

²⁹ A Jã *par-tuurbe wõ na a lɛ, ɩ̃ cen na de a kũu ũu.

A DABSƖ TURE ANUU NA ꞌWƆB A BURU ANUU

³⁰ A *nɩ-tʋnɩsɩ lɛ lɩɛbʼã wa tiw taa a *Jeeju sɛ̃ na man ʋ a ala a jaa ba na maal, nɩ a ala a jaa ba na jaan a nɩbɛ.

³¹ A sɔ-tɔlbɔ waa na vara vara taa a jie ba na be a baa dãa mɩ nyɛ nĩe na dɩ bõ-dɩraa wa. A Jeeju yel ba: “Nyɩ́ wa a sɩ yi cɛ̃cɛ̃w a wɛkar pʋɔ sɩ tɛw a nyɩ pɩɛn fɩ̃ɩ.”

³² A lɛ, ba kpɛ na a gbor pʋɔ, bala ba tɛw, yire a cɛ̃cɛ̃w a wɛkar pʋɔ.

³³ A mɩnɛ ba na cere, nɩ-yaw nyɛ ba na bɔ̃w ba, ɩ̃ na ba yi a ten a jaa pʋɔ ɩ̃ jɔ nɩ gbɛɛ de ba nĩe cen na gure ba a jie ʋlɔ ba na cere.

³⁴ A mɩnɛ a Jeeju na yi a gbor pʋɔ, nyɛ a nɩ-yaw a lɛ, nãw nyɔw ʋ na a ba ɩnɛ a-na-ɩ ba wɔ̃ na taa nɩ piir na ma tɛrɛ dɔ-cɩɩnaa wa, ʋ nyɔw ɩ̃ jaana ba yel-yayaw.

³⁵ A mɩnɛ a mɔ̃tɔ̃w na mʋrɔ, a Jeeju *par-tuurbe taw na ta ʋ ɩ̃ yel ʋ: “A jie na ɩ na wɛkar ɩ̃ a mɔtɔ̃w mʋrɔ.

³⁶ Wɛl a nɩbɛ bar a ba cen a ten ala pʋɔ na pɩɛlʼɩ̃ a ka da a bõ-dɩraa.”

³⁷ A Jeeju yel ba: “A nyɩmɩ mɩ̃ɛ, nyɩ́ kʋ ba a dɩb a ba dɩ.” Ɩ̃ a ba yel ʋ: “Mɩnɛ! A dɩb dafʋ na ta na ture lɩjaayi. Fʋ bʋɔrɔ na sɩ de a libi-kpɛ̃ɛ a lɛ cen na da nɩ a buru wa nɩ kʋ ba mɩɩ?”

³⁸ A lɛ, a Jeeju yel ba: “Nyɩ́ cen na ꞌwuor je kãa: bur-bie amɩnɛ nyɩ tɛrɛ?” A ba cen na ꞌwuor ɩ̃ yel ʋ: “Bur-bie anuu sɩ tɛrɛ, nɩ jɩm-bie ayi.”

³⁹ A Jeeju ƴɔ̃w na a ʋ par-tuurbe a ba maal a nɩbɛ ba jaa a ba jɛ ji-gbulĩsɩ ji-gbulĩsɩ a mɔ-ɓaar juu,

⁴⁰ a ba jɛ cʋr taa ŋmɛɛ ji-gbulĩsɩ kɔɔr-kɔɔr, ŋmɛɛ ji-gbulĩsɩ lɩjaayi nɩ piir-piir.

⁴¹ A ala ɩ̃ baar, a Jeeju de na a bur-bie anuu nɩ a jɩm-bie ayi ɩ̃ dʋɔ ꞌwuor a saꞌlon puor a Naaŋmɩn, ɩ̃ nyɔw a buru ŋma ŋma kʋ a ʋ par-tuurbe a ba de po a nɩbɛ. A lɛ ʋ mɩ ɩ a ba de a jɩm-bie ayi po a nɩbɛ ba jaa.

⁴² Ɩ̃ ba ꞌwɔbʼã sɛw ba jaa

⁴³ ɩ̃ a ʋ par-tuurbe wob a bur-ŋmara nɩ a jɩm-ŋmara ala na cɛ sɛw pɩɩr pie-nʼayi.

⁴⁴ A bala na dãa ꞌwɔb a buru ɩ na dabsɩ ture anuu.

A JEEJU CERE NA A KƲ̃Ɔ JUU

⁴⁵ A mɩnɛ a ala na yi tɔ, a *Jeeju ɩ na a ʋ *par-tuurbe a ba kpɛ a gbor pʋɔ a jie naan, na ba de ʋ nĩe gãwna a man gbẽgbere nʋɔr ʋlɔ na be a Bɛsada loor, ɩ̃ a ʋlɔ mɩ̃ɛ ɩraa wɛlɛ a nɩbɛ bara.

⁴⁶ A lɛ ʋ na wɛl ba bar baar, ʋ do na a tãw juu a Naaŋmɩn sʋɔrfʋ.

⁴⁷ A mɩnɛ a wɩɛr na liwre, a gbor dãa na be a man sɔɔlɩ̃sɔw, ɩ̃ cɛ a Jeeju bar a ʋ yẽ be a tene.

⁴⁸ Ʋ nyɛ na a ʋ par-tuurbe a ba mɔnɔ a gbor hana nɩ, a-na-ɩ a sɛsɛb dãa na gbãga tuoro ba. A nɔdɛɛ kuon daar, ʋ be na a kʋ̃ɔ juu cere a ba sɛ̃, nɩ a gbɛɛ, ɩ̃ dãa tɩɛr wɔ̃ ʋ vɩɛ ba bar.

⁴⁹ A mɩnɛ ba na nyɛ ʋ, ʋ cere a kʋ̃ɔ juu a lɛ, ba tɩɛrʼã beeka kpɩɩn ʋ, ɩ̃ wuure,

⁵⁰ a-na-ɩ ba jaa dãa na nyɛ ʋ, ɩ̃ a ɩ ba ni-sɔbaa. A jie naan, a Jeeju bʋ nɩ ba na yel ba: “Nyɩ́ bar tɩɛrʋ̃, maa ʋ. Nyɩ taa ɩ a dãbɩ̃ɛ nyɔw nyɩ wa!”

⁵¹ Ɩ̃ cen na kpɛ a ba sɛ̃ a gbor pʋɔ, a sɛsɛb ŋmaa. A nyãa nyɩl ba a ba ha nɔɛ,

⁵² a-na-ɩ baa dãa bɔ̃w a buru ala ƴɛrɩ̃ par wa, a yi a ba sube kpɛmɛfʋ jie.

A JENEJARƐ WƲLƖ̃SƖ DEME A JEEJU NA KPAAR

⁵³ A lɛ ba na gãw a man baar, ba cenʼã na ta ɩraa nɩ a gbor a Jenejarɛ wɩɛr,

⁵⁴ ɩ̃ a mɩnɛ ba na yi a gbor pʋɔ, a nɩbɛ nyɛ na a *Jeeju bɔ̃w ʋ a jie naan,

⁵⁵ ɩ̃ na ba jɔ cʋb a ʋna wɩɛrʼãa ʋ jaa, ɩ̃ nyɔw ɩ̃ tuoro a baalsɩ nɩ a gan cere nɩ a jiir a jaa ba na yel a be a Jeeju be.

⁵⁶ Ɩ̃ a jie lɛ ʋ na wa ta, mɩɩ a tẽ-bil pʋʋr, mɩɩ a tẽ-bɛrɛ pʋʋr, mɩɩ a va-pɔrsɩ pʋʋr, a nɩbɛ ma wɩ nɩ na a baalsɩ gaal a dar pʋʋr, ɩ̃ ma sʋɔr ʋ a ʋ kʋ ba sɔr a ba sɩɩr a ʋ cẽcen nʋɔr tɛw, ɩ̃ a bala ba jaa na sɩɩr ʋ, ba kpaarʼã.