Markɩ Sɛbɛ 13 - A NAAŊMƖN PƲLƖ̃-TA-PAALAA

A NAAŊMƖN PUOR-YIR KPƐ̃Ɛ WƐLFƲ ƳƐRƖ̃

¹ A mɩnɛ a *Jeeju na yi a Naaŋmɩn puor-yir kpɛ̃ɛ pʋɔ cere, a ʋ *par-tuure kãw yel ʋ na: “Jãjaana, ꞌwuor nyɛ kʋsɩ-vɛlɛ ka tɔr! Fʋ nyɛ ma na yi-vɛlɛ ka tɔr!”

² A Jeeju yel ʋ: “Má fʋ nyɛ na a yi-bɛrɛ asɩmɛ! Kʋsɩr kãw kɔ̃ lɔɔ tʋɔ dɔɔl ɩraa a ʋ tɔ sʋbɔ juu wa. A na wɛlʼã a jaa.”

A WON ALA NƆƆ TARA

³ A *Jeeju do na jɛ a *Olivi-tɩɩr tãw juu na tor a Naaŋmɩn puor-yir kpɛ̃ɛ, a Pɩɛr nɩ a Jakɩ, nɩ a Jã, nɩ a Ãdire wɩ a bala ba tɛw na sooro ʋ:

⁴ “Yel sɩ a dabor a yele ala nɔɔ tara, nɩ a bom ʋlɔ na miile áa yele ala a jaa maala na baara.”

⁵ A Jeeju nyɔw na ɩ̃ yele ba: “Nyɩ́ gu nyɩ mɩ̃ɛ a nɩrɛ kɔ̃ wa bɛlɩ̃ nyɩ wa.

⁶ Nɩbɛ yaw jie na de na a ɩ̃ yuor wa nɩ na ba yele a bala ɩ̃ ɩ a *Kirisi, ɩ̃ ba na bɛlɩ̃ na a nɩbɛ yaw pɔw.

⁷ A daar ʋlɔ nyɩ nɔɔ wono a jɛb ƴɛrɩ̃sɩ nɩ a tẽ-nɩdar damfʋ, nyɩ taa wa ɩrɛɛ a dãbɩ̃ɛ nyɔwrɔ nyɩ wa. A sɛw na a na be a lɛ, ɩ̃-cɛ a kɔ̃ ɩ a tẽw baarfʋ daar sɛr wa.

⁸ A-na-ɩ tẽw na nɩbɛ na irʼã jɛbɛ nɩ tẽ-kpee nɩbɛ, ɩ̃ a jamana kãw na irʼã jɛbɛ nɩ jaman-kpee. A tẽw nɔɔ ɓĩine na a ji-bʋrɔ bʋrɔ ɩ̃ a kɔ̃ kpɛ̃ɛ na lo na. Ɩ̃-cɛ a ana yele a jaa na wɔ̃ na taa nɩ a walfʋ na nyɔw a pɔw.

⁹ “Ɩ̃ a nyɩmɩ, nyɩ́ gu nyɩ mɩ̃ɛ. Ba na wa nyɔɔr nyɩ na ƴɔ̃w a ƴɛr-guorbo nuu pʋɔ; ba na fɔbʼɩ̃ nyɩ na nɩ kpaarsɩ a *puorfʋ yie pʋɔ, ɩ̃ na ba bʋɔl nyɩ cenʼɩ̃ a fãgã deme nɩ a jamansɩ jie a maa ɩnɛ, a nyɩ na man ba a nyɩ yel-mɩ̃ɛ ƴɛrɩ̃.

¹⁰ Ɩ̃ a sɛw na a ƴɛr-son na de nĩe ta a bal bʋrɔ bʋrɔ ba jaa baar.

¹¹ A daar ʋlɔ ba na wa nyɔwrɔ nyɩ cere nɩ a ƴɛr-guorbo jie, nyɩ́ taa gɔr waala a ala nyɩ na wa yele wa, ɩ̃-cɛ nyɩ yel a ala a Naaŋmɩn na kʋrɔ nyɩ a be naan, a-na-ɩ aa ɩ a nyɩmɩ mɩ̃ɛ na ƴɛrɛ wa, a Naaŋmɩn Sɩɛ ʋ.

¹² A yɛbɛ na ma ƴɔ̃w na a ba kú a ʋ yɛbɛ, ɩ̃ a sãa yɔ̃w a ba kú a ʋ bie. A bibiir na irʼã ꞌlaar a ba dɔɔrbɔ ɩ̃ ƴɔ̃w a ba kú ba.

¹³ A nɩbɛ ba jaa na ꞌlaar nyɩ na a maa ɩnɛ, ɩ̃-cɛ a ʋlɔ na tɛrɛ a su-varkpara ɩraa nɩ wa ta nɩ a baarfʋ daar na pɔw na a faafʋ.

A WON KPƐ̃Ɛ DAAR

¹⁴ “A lɛdaar ʋlɔ nyɩ na nyɛrɛ a bõ-ciiraa ʋlɔ na sãwna a bom ʋ ɩraa be a jie ʋlɔ ʋ na ma sɛw ʋ be wa, (a ʋlɔ na ꞌwuoro a sɛbɛ na ú bɔ̃w bɔ̃w a par), a bala na be a Jude, bá jɔrɔ duoro a tan jur,

¹⁵ a ʋlɔ na be a garɩ̃, ʋ taa suure die pʋɔ yele defʋ wa,

¹⁶ ɩ̃ a ʋlɔ na be a puo pʋɔ, ʋ taa lɩɛbɛ kule kparʋ defʋ wa.

¹⁷ Won na nyɩrɩ̃ na ta a pɔɔ-pʋʋr deme, nɩ a bala na tɛrɛ a bi-pɩɩlsɩ a lɛdaar.

¹⁸ Nyɩ́ sʋɔrɔ a Naaŋmɩn a yele ala naa kɔ̃ wa ta a sɩ̃ɛw wa.

¹⁹ A-na-ɩ a bibie ala na ɩ na a won kpɛ̃ɛ daar. A won bʋrɔ ʋlɔ ma dãa ta sɛr, wa nyɔw nɩ a mɩnɛ a Naaŋmɩn na maal a tẽw, wa ta nɩ a ƴɛ̃ƴɛrɩ̃ wa, ɩ̃ a kɔ̃ɔ lɔɔ ta a lɛ wa.

²⁰ A ala ɩ a Nɩ-kpɛ̃ɛ ma dãa ŋmaa a bibie bar wa, nɩrɛ kɔ̃ɔ tʋɔ cɩ̃ɛ wa, ɩ̃-cɛ a bala ʋ na vɛl ir na ʋ sɔ ɩnɛ, ʋ ŋmaa na a bibie ala bar.

²¹ Ala-ɩ̃-sɔ, a ala ɩ̃ ɩ a nɩrɛ wa yel nyɩ na: ‘Nyɩ́ nyɛ! Ka a *Kirisi be!’ mɩɩ ‘Beka ʋ be!’ nyɩ taa wa sɔwrɔ wa.

²² A jir-ŋma-Kirisisɩ nɩ a jir-ŋma-ƴɛr-hierbe na irʼã tʋnɔ a nɔ-kofʋ tʋmɔ miile nɩ a ba kpɛ̃w, bʋɔrɔ a ala ɩ̃ ɩ ba tʋɔ na, ba bɛlɩ̃ nɩ a bala a Naaŋmɩn na vɛl ir.

²³ A ala ɩ̃ ɩ a nyɩmɩ ʋ, nyɩ́ gu nyɩ mɩ̃ɛ; ɩ̃ gɔrʼã man nyɩ a yele ala a jaa nɔɔ tara.

A NƖBƐ BIE WAA

²⁴ “Ɩ̃-cɛ, a daar ʋlɔ pʋɔ, a lɛ a won kpɛ̃ɛ ʋlɔ na tɔl baar, a mɔtɔ̃w na liw na pɔw, a cuu kɔ̃ lɛ caara wa,

²⁵ a ŋmarbie na yi na a saꞌlon ɩ̃ pɔrɔ loro a tene, ɩ̃ a fãw ala na be a saa juu na dama na.

²⁶ A lɛdaar, ba na nyɛ na a *Nɩbɛ Bie, ʋ be a dɔ̃dɔrɩ̃sɩ pʋɔ, nyɩnyɩlɛ waara nɩ fãgã kpɛ̃w.

²⁷ Ɩ̃ ʋ na tʋ na a ʋ sɩ-tʋnɩsɩ a ba kpaarɩ̃ a bala ʋ na vɛl ir a tẽw lõbobo pʋʋr a jaa, nyɔw nɩ a tẽw parɩ̃ wa cen na ta nɩ a tẽw iin.

A FƖGƖ TƖƐ JAANFƲ

²⁸ “Nyɩ́ bɔ̃w a fɩgɩ tɩɛ jaanfʋ par. A lɛ nyɩ na nyɛ ʋ ʋ tɔbɔ a vaꞌwɔlɔ nyɩ ma bɔ̃w ka a susuur daar tara na.

²⁹ A lɛ ʋ mɩ, a nyɩmɩ wa nyɛ a yele ala á maala, nyɩ́ bɔ̃w ka a *Nɩbɛ Bie waa daar tara na.

³⁰ Yel-mɩ̃ɛ ɩ̃ yele nyɩ, a ƴɛ̃ƴɛrɩ̃ nɩbɛ pʋɔ, ŋmɛɛ kɔ̃ wa kpi wa, wa ta nɩ a ana yele a jaa nɔɔ maala.

³¹ A saꞌlon nɩ a tene na tɔlʼã, ɩ̃-cɛ a ɩ̃ ƴɛrɩ̃ ma be tɔlfʋ jie fɩ̃ɩ wa.

NYƖ GU NYƖ MƖ̃Ɛ, JƲƲRƆ NƖ

³² “Nɩrɛ ma bɔ̃w a ʋna bibir nɩ a daar ʋlɔ wa. A saa juu sɩ-tʋnɩsɩ nɩ a *Nɩbɛ Bie ma mɩ bɔ̃w wa, a Sãa tɛw ɩ̃ bɔ̃w.

³³ Nyɩ́ gu nyɩ mɩ̃ɛ, nyɩ taa wa gure wa! A-na-ɩ nyaa bɔ̃w a dabor a daar ʋlɔ nɔɔ tara wa.

³⁴ A na wɔ̃ na taa nɩ daba kãw na bʋɔrɔ ʋ yɔ cen tẽw kãw. Ʋ barʼã a ʋ yele a jaa ƴɔ̃w a ʋ tʋ̃tʋnbɔ nuu pʋɔ, miilʼɩ̃ ba bõ-ƴene-ƴene a ba tʋmɔ, ɩ̃ ƴɔ̃w a dɔ̃dɔr-gure ʋ bɔ̃w jʋʋrɔ, ɩ̃ pãa yi cen.

³⁵ Ala-ɩ̃-sɔ nyɩ́ jʋʋrɔ, a-na-ɩ nyaa bɔ̃w a daar ʋlɔ a yir sʋbɔ na waara wa. A ala saarɩ̃ ɩ a jaanʋɔr ʋ, mɩɩ a tẽ-porɩ̃ ʋ, mɩɩ a nɔdɛɛ kuon daar ʋ, mɩɩ a dʋ̃ꞌwʋlɩ̃ ɓaaraa ʋ,

³⁶ ʋ taa wa puurĩ nyɩ a gʋ̃ɔ pʋɔ wa.

³⁷ A ala ɩ̃ na yele nyɩ, a nɩbɛ ba jaa ɩ̃ yele kʋrɔ, nyɩ́ jʋʋrɔ!”