Luki Sɛbɛ 8 - A NAAŊMƖN PƲLƖ̃-TA-PAALAA

A PƆƆBƆ BALA NA DÃA SŨONO A JEEJU

¹ A ala na yi tɔ, a *Jeeju yʋɔrɔ na a tẽ-bɛrɛ nɩ a tẽ-bil pʋɔ, hiere a Naaŋmɩn fãw ƴɛr-son kʋrɔ a nɩbɛ, ɩ̃ a ʋ *par-tuurbe pie-nʼayi dãa na lãa be nɩ ʋ.

² A pɔɔbɔ bala ʋ na dãa diw a kɔ̃tɔn-bebe a ba pʋɔ bar, kpaarɩ̃ ba a wʋlɩ̃sɩ, mɩ lãa na be nɩ ʋ: a Maarɩɩ ʋlɔ na yi a Madala, a kɔ̃tɔnsɩ anuu-nʼayi na dãa yi a ʋ pʋɔ;

³ nɩ a Kuja pɔw Jaan, a Kuja ʋlɔ na ɩ a jamana *Ɛrɔdɩ tʋ̃tʋnbɔ nɩ-kpɛ̃ɛ, nɩ a Sujan, nɩ a pɔɔ-yaw ŋmɛɛ go. A bala ɩ̃ ma dãa de a ba yele sũono nɩ a Jeeju nɩ a ʋ par-tuurbe.

A CI YAARƖ̃FƲ SƲKPA

⁴ A nɩbɛ yi na a ten a jaa ɩ̃ wa a *Jeeju sɛ̃. A lɛ a nɩ-yaw bala na taw tiw taa, ʋ lɔbʼã a sʋkpa na:

⁵ “Daba kãw yi na a ʋ ci yaarɩ̃fʋ jie ɩ̃ a lɛ ʋ na yaara a ci, a ŋmɛɛ lo na a sɔr juu, a ba nɛbʼɩ̃ gbɛɛ ɩ̃ a wɛ-lili nɩɩr dɩ.

⁶ A ŋmɛɛ lo a kubir-pan juu ɩ̃ a lɛ a na bul baar, a ko na, a-na-ɩ aa pɔw a Baar wa.

⁷ A ŋmɛɛ go lo a gʋʋr sɔ̃w, a gʋʋr lãa irʼɩ̃ ba piw ba tɛrɛ.

⁸ A ŋmɛɛ lo na a tẽ-vɩlaa pʋɔ naa bul bɩ bie kʋbaa lɛ bɔ̃w dɔɔl.” A lɛ a Jeeju na ƴɛr a lɛ baar, ʋ yelʼɩ̃ na kpɛ̃w: “A ʋlɔ na tɛrɛ a tobo wono nɩ, ú bɔ̃w cɛlɛ!”

A JEEJU SƲKPAR LƆBFƲ PAR

⁹ A *Jeeju *par-tuurbe soor ʋ na a sʋkpa ʋlɔ par,

¹⁰ ʋ yel ba: “A ala ɩ a nyɩmɩ ʋ, a Naaŋmɩn fãw ƴɛr-bɔ̃w-faarsɩ par nyɩrʼã a nyɩ jie. Ɩ̃-cɛ a nɩbɛ ŋmɛɛ, a sʋkpar tɛw ba na wono, a mɩnɛ ‘a ba na ꞌwuoro ɩ̃ ma nyɛrɛ wa, ɩ̃ mɩ cɛlɛ wono ɩ̃ ma bɔ̃wnɔ a par wa.’

A CI YAARƖ̃FƲ SƲKPA PAR

¹¹ “Nyɩ́ cɛlɛ a sʋkpa par: a ci ɩ na a Naaŋmɩn ƴɛrɩ̃.

¹² A nɩbɛ ŋmɛɛ wɔ̃ na taa nɩ a ci ala na lo a sɔr juu. A lɛ ba na wõ a Naaŋmɩn ƴɛrɩ̃, a Satã wa na na ir ʋ a ba sube pʋɔ, a mɩnɛ a ba kɔ̃ sɔw ɩ̃ pɔw a faafʋ wa.

¹³ A nɩbɛ ŋmɛɛ wɔ̃ na taa nɩ a ci ala na lo a kubie wɩɛr. A lɛ ba na wõ a ƴɛrɩ̃ ba ma sɔw na de nɩ nʋ̃ɔ ɩ̃-cɛ aa kpɛ a ba pʋ̃ɔ a tɩɛ nyɩbɛ kaarɩ̃ wa. A ba ƴɔ̃w-nyãa maa kam wa. A bɩɩrfʋ ɩ̃ wa ta ba, ba ma ŋmaa na yi.

¹⁴ A ci ala na lo a gʋʋr pʋɔ wɔ̃ na taa nɩ a bala na wõ a ƴɛrɩ̃, ɩ̃-cɛ ba barʼã a tẽw naa baafʋ dɛn nɩ a naalʋ̃ʋ bɔfʋ, nɩ a yele vɩláa a kpɛ pɔw ba piw ba tɛɛlɛ; a ba wɔmɔ maa karɩ̃ wa.

¹⁵ A ci ala na lo a tẽ-son pʋɔ wɔ̃ na taa nɩ a bala na wõ a ƴɛrɩ̃ ɩ̃ de ʋ tɛrɛ nɩ su-son nɩ su-pɩlaa; a ba cĩcĩ ɩraafʋ pʋɔ ba ma wɔ̃ na a wɔmɔ.

A LÃPA SƲKPA

¹⁶ “Nɩrɛ maa ƴɔ̃w lãpa de pɔw dʋʋ pʋɔ, mɩɩ de su gaajie pulẽe wa. Ʋ ma ɛ̃ɛ na bin ʋ a jie ʋlɔ ʋ na tʋɔrɔ caara, a mɩnɛ a nɩbɛ bala na kpɛɛrɛ na tʋɔ nyɛ a ʋ cãa.

¹⁷ A bom jaa lɛ na sɔɔlɩ̃, a na yi na cãa pʋɔ, ɩ̃ a bom lɛ na ɩ bõ-gbul, a na yi na yẽw a nɩbɛ bɔ̃wnaa.

¹⁸ “Ala-ɩ̃-sɔ, nyɩ́ tɛrɛ nyɩ mɩ̃ɛ a mɩnɛ nyɩ na cɛlɛ, a-na-ɩ a ʋlɔ na tɛraa, ba na lɛ kʋ ʋ na dɔɔl, ɩ̃-cɛ a ʋlɔ na ma tɛraa wa, ba na de na a ala ʋ na tɩɛr beeka ʋlɔ ɩ̃ sɔ.”

A JEEJU MÃ NƖ A Ʋ YƐƐR

¹⁹ A *Jeeju mã, nɩ a ʋ yɛɛr wa na pɔw ʋ, ɩ̃ baa dãa tʋɔ ta ʋ wa, a-na-ɩ a nɩbɛ waa na,

²⁰ a ba yel ʋ: “A fʋ mã nɩ a fʋ yɛɛr be na a yẽw ɩ̃ bʋɔrɔ ba nyɛ fʋ.”

²¹ A Jeeju yel ba: “A bala na cɛlɛ a Naaŋmɩn ƴɛrɩ̃ ɩ̃ sɔw maala, bala ɩ̃ ɩ a ɩ̃ mã nɩ a ɩ̃ yɛɛr.”

A JEEJU NA TAN A SƐSƐB NƖ A KƲ̃Ɔ

²² A bibir kãw, a *Jeeju nɩ a ʋ *par-tuurbe kpɛ na a gbor pʋɔ ʋ yel ba á bá gãw a man gaan, a ba cen.

²³ A mɩnɛ ba na gãwna, a Jeeju gã na gure. A sɛsɛb kpɛ̃ɛ puurĩ ba na a man pʋɔ, a kʋ̃ɔ kpɛ paala a gbor, a ba vɩrɛ na mʋr,

²⁴ a ba taw ta a Jeeju sɩ̃wnɛ ʋ yele nɩ: “Jãjaana! Jãjaana! Sɩ wɛrɛ na!” A Jeeju ir, na ʋ tan a sɛsɛb nɩ a kʋ̃ɔ na dama nɩ a kpɛ̃w, a sɛsɛb ŋmaa a fufu ɩ̃ a kʋ̃ɔ lɛ lo a lɛ a jom.

²⁵ A lɛ a na baar, a Jeeju soorʼã a ʋ par-tuurbe: “Nyɩnɛ a nyɩ ƴɔ̃w-nyãa be?” A dãbɩ̃ɛ nyɔw ba lãa ko nɩ ba nʋɔr a ba sooro taa: “Ala nɩ a naa tɔr, a kʋ̃ɔ tɔr jaa nɩ a sɛsɛb na jɔrɔ a ʋ ƴɛrɩ̃ a lɛ?”

A KƆ̃TƆN-IRE A JEEJU NA KPƐMƐ

²⁶ Ba cenʼã na ta a tẽw ʋlɔ na ɩ a Jerasɛn nɩbɛ tẽw, na tor taa nɩ a Galile.

²⁷ A lɛ a *Jeeju na yi a gbor pʋɔ, a ʋna tẽw nɩrɛ ƴen sʋbɔ tuor ʋ na. A kɔ̃tɔnsɩ ma ire ʋ na, ɩ̃ a korĩ-cɛ jaa ʋ maa suu bom wa. Ʋ maa mɩ gã yir wa, a yar pʋɔ ʋ ma gana.

²⁸ A lɛ ʋ na nyɛ a Jeeju, ʋ wuurʼã ɩ̃ lo a ʋ nii-sɔw ɩ̃ ƴɛrʼɩ̃ kpɛ̃w yel: “Saa juu Naaŋmɩn Bie Jeeju wee! Bõ fʋ nyɛ nɩ ma? Ɩ̃ sʋɔr fʋ na, taa hʋɔl ma wa!”

²⁹ Ʋ yelʼã a lɛ a-na-ɩ a Jeeju yele na a kɔ̃tɔn bier a ʋ yi a daba jie. A gbɛɛ yayaw jaa, a ir ʋ na, a ba lũ ʋ a nur nɩ a bɔ̃jɔrɩ̃sɩ, ɩ̃ mɩ kpal ʋ a gbɛɛ nɩ a kure, ɩ̃-cɛ ʋ ma ŋma bar, ɩ̃ a kɔ̃tɔn ir ʋ kpɛ nɩ a wɛkar pʋɔ.

³⁰ A Jeeju soor ʋ: “Mɩnɛ a fʋ yuor dɩ?” Ʋ yel ʋ: “Kɔ̃-bɔ̃w-nʋɔr ɩ̃ dɩ,” a-na-ɩ kɔ̃tɔn-yaw ɩ̃ dãa ire ʋ.

³¹ A kɔ̃tɔnsɩ bala sʋɔrɔ na a Jeeju tɔ̃-tɔ̃-tɔ̃ a ʋ taa ir ba bar a ba suu a ba kpãafʋ jie wa.

³² A dor yayaw dãa na be be a tãw lõboorɩ̃ ꞌwɔbɔ a yele yʋɔrɔ nɩ, a kɔ̃tɔnsɩ sʋɔr a Jeeju á ʋ kʋ ba sɔr a ba yi kpɛ ba, ʋ kʋ ba a sɔr.

³³ A kɔ̃tɔnsɩ yi a daba jie kpɛ a dor, a ba dar taa ba jaa suu a tãw fʋɔlaa, lo a man kʋ̃ɔ pʋɔ lim.

³⁴ A nɩbɛ bala na cɩɩnɛ a dor nyɛ na a ala na ta ɩ̃ jɔ kul hier kʋ a nɩbɛ a tẽ-kpɛ̃ɛ nɩ a tẽ-bil pʋʋr.

³⁵ A nɩbɛ yi na cen áa ba ꞌwuor je kãa a ala na maal. Ba ta na a Jeeju sɛ̃, nyɛ a daba ʋlɔ a kɔ̃tɔnsɩ na yi a ʋ jie, ʋ ɩ nɩ-son, su a cẽcene jɛ nɩ a Jeeju pulẽe, a dãbɩ̃ɛ nyɔw ba.

³⁶ A bala na dãa nyɛ a ala na maal mɩɩnɛ na kʋrɔ a nɩbɛ a mɩnɛ a kɔ̃tɔn-ire na kpɛmɛ.

³⁷ A be jie, a Jerasɛn ten deme ba jaa sʋɔrɔ a Jeeju a ʋ yi ɩ̃ bar ba, a-na-ɩ dãbɩ̃ɛ nyɩrɩ̃ na nyɔw ba. A Jeeju lɛ kpɛ a gbor pʋɔ lɩɛb cen.

³⁸ Ɩ̃ a daba ʋlɔ jie a kɔ̃tɔnsɩ na dãa yi sʋɔrɔ na a Jeeju a ʋ ɩ a ba lãa cen. Ɩ̃-cɛ a Jeeju lɩɛb ʋ bar ɩ̃ yel ʋ:

³⁹ “Lɩɛb kul a fʋ yir na mɩɩn a ala a jaa a Naaŋmɩn na maal fʋ,” ʋ cen na hier yɔ nɩ a tẽw pʋɔ ʋ jaa kʋ a nɩbɛ a ala a Jeeju na maal ʋ.

A JAARISI BI-PƆW A JEEJU NA JAW NƖ A PƆW ƲLƆ NA SƖƖR A JEEJU KPARƲ

⁴⁰ A lɛ a *Jeeju na lɛ lɩɛb cen, a nɩbɛ tuor ʋ na, a-na-ɩ ba jaa dãa na gure ʋ.

⁴¹ A daba kãw ba na bʋɔlɔ a Jaarisi na ɩ a *puorfʋ yir nɩ-kpɛ̃ɛ ta na a be, lo gburĩ a dume a Jeeju nii-sɔw ɩ̃ sʋɔrɔ ʋ, lɔbɔ nɩ ʋ a nur, a ʋ wa a ʋ yir,

⁴² a-na-ɩ ʋ tɛrɛ na bi-pɔw bõ-ƴen tẽ-tẽ-tẽ na tɔɔ yomo pie-nʼayi na be be kpiire. A lɛ a Jeeju na cere a be, a nɩbɛ fʋr ʋ na a lõbobo a jaa.

⁴³ Ɩ̃ pɔw be na be na tɛrɛ sɩɛ maalʼɩ̃ yomo pie-nʼayi ɩ̃ aa baara wa. Ʋ sãw na a ʋ yele a jaa a dɔɔtɔrsɩ jie ɩ̃ bõ-ƴen kãw ma dãa tʋɔ kpaar ʋ wa.

⁴⁴ Ʋ taw na ta a Jeeju puo-sɔw, ɩ̃ sɩɩr a ʋ kparʋ nʋɔr. A jie naan, a ɩ a ʋ jɩ̃ɩ barfʋ ŋmaa na.

⁴⁵ Ɩ̃ a Jeeju yel: “Ala ɩ̃ sɩɩr ma?” A ba jaa yele á baa sɩɩr ʋ wa. A Pɩɛr yel: “Jãjaana, a ɩ na a nɩ-yaw na fʋr fʋ ɩ̃ gbʋr fʋ a nɔhɔ̃!”

⁴⁶ Ɩ̃-cɛ a Jeeju lɛ yel: “Nɩrɛ sɩɩr ma na, a-na-ɩ fãw yi ma na ɩ̃ bɔ̃wnaa.”

⁴⁷ A pɔw nyɛ bɔ̃w ka a ꞌwaa tʋɔrɔ sɔɔlɔ wa, ɩ̃ mine wa lo gburĩ a dume a Jeeju pulẽe, ɩ̃ yel a nɩbɛ ba jaa nii-sɔw a ala ɩnɛ ʋ na sɩɩr ʋ, nɩ a mɩnɛ ʋ na kpɛmɛ a jie naan.

⁴⁸ A Jeeju yel ʋ: “Ɩ̃ bi-pɔw, a fʋ ƴɔ̃w-nyãa faa fʋ na. Cere nɩ su-ɓaar.”

⁴⁹ A lɛ a Jeeju na cãa ƴɛrɛ, nɩrɛ yi na a nɩ-kpɛ̃ɛ Jaarisi yir ɩ̃ wa ta yel: “A fʋ bi-pɔw kpi na. Taa lɛ vɔwrɔ a jãjaana wa.”

⁵⁰ Ɩ̃-cɛ a mɩnɛ a Jeeju na wõ a lɛ, ʋ yelʼã a Jaarisi: “Taa jɔrɔ dãbɩ̃ɛ wa. Tɛrɛ a ƴɔ̃w-nyãa tɛw ɩ̃ ʋ na kpɛmɛ na.”

⁵¹ A lɛ ʋ na ta a yir, ꞌwaa sɔw nɩrɛ ʋ pɔw ba kpɛ nɩ, ɩ̃ a ala ma ɩ a Pɩɛr, nɩ a Jakɩ, nɩ a Jã lãa nɩ a bile sãa nɩ a ʋ mã wa.

⁵² A nɩbɛ ba jaa dãa na kono yãyara nɩ a bile ʋlɔ ɩnɛ, a Jeeju yel ba: “Nyɩ taa kono wa; ꞌwaa kpi wa, ʋ gurʼã.”

⁵³ Ɩ̃ baa cɛl ʋ be wa, a-na-ɩ ba bɔ̃w ka a bile kpi na.

⁵⁴ Ɩ̃-cɛ a Jeeju nyɔw ʋ a nuu ɩ̃ yel: “Bile wee, ir!”

⁵⁵ A ʋ sɩɛ lɛ lɩɛb wa a ʋ pʋɔ, ʋ pal ir a jie naan, ɩ̃ a Jeeju yel a ba kʋ a bile bõ-dɩraa.

⁵⁶ A pɔsabile dɔɔrbɔ ha nɔɛ ɩ̃ a Jeeju yel ba a ba taa yele bom kʋrɔ nɩrɛ a ala na ta wa.