Luki Sɛbɛ 7 - A NAAŊMƖN PƲLƖ̃-TA-PAALAA

A SƆDAAL-NƖ-KPƐ̃Ɛ TƲ̃TƲNƆ A JEEJU NA KPAAR

¹ A lɛ a *Jeeju na ƴɛr a ʋ ƴɛrɩ̃sɩ a jaa kʋ a nɩbɛ baar, ʋ cenʼã a Kapɛɛnam.

² Sɔdaal-nɩ-kpɛ̃ɛ be na be ɩ Orom nɩrɛ ɩ̃ tɛrɛ tʋ̃tʋnɔ ʋ na nyɩrɩ̃ nʋ. A tʋ̃tʋnɔ ʋlɔ, a dãa na ꞌwɔbɔ ʋ, ʋ pɩɛlʼɩ̃ a kũu.

³ A lɛ a sɔdaal-nɩ-kpɛ̃ɛ ʋlɔ na wõ a ba ƴɛr a Jeeju ƴɛrɩ̃ ʋ tʋ̃ na a Jufisɩ ni-dierbe ŋmɛɛ a ʋ sɛ̃ a ba sʋɔr ʋ ʋ wɩ faa a ʋ tʋ̃tʋnɔ.

⁴ Ba ta na a Jeeju sɛ̃ nyɔw ɩ̃ lɔbɔ ʋ a nur yele nɩ: “A daba na sɛw na a fʋ na sũo ʋ,

⁵ a-na-ɩ ʋ nʋ na a sɩmɩ Jufisɩ, ɩ̃ ʋlɔ ɩ̃ mɩ ƴɔ̃w a ba mɛ a sɩ *puorfʋ yir.”

⁶ A Jeeju pɔw ba cere nɩ. Ɩ̃ a lɛ ba na pɩɛlʼɩ̃ a yir, a sɔdaal-nɩ-kpɛ̃ɛ tʋ̃ na a ʋ badɛɛ a ba tuor yel ʋ: “Nɩ-kpɛ̃ɛ! Taa vɔw fʋ mɩ̃ɛ wa, a-na-ɩ maa sɛw a fʋ na kpɛ a ɩ̃ yir wa.

⁷ A ala ɩnɛ a maa mɩ̃ɛ ma nyɛ sɔr tʋɔ ta fʋ wa, ɩ̃-cɛ ƴɛr ƴɛrɩ̃ tɛw, ɩ̃ a ɩ̃ tʋ̃tʋ̃-bie na kpɛmɛ na.

⁸ A-na-ɩ a maa mɩ̃ɛ tɛrɛ na a ɩ̃ nɩ-bɛrɛ na ɩ̃ jɔrɔ ba, ɩ̃ mɩ tɛrɛ a ɩ̃ sɔdaalsɩ a ba jɔrɔ ma. Ɩ̃ ma yelʼã a bõ-ƴen: Cen ka! ʋ ma cen, ɩ̃ yel a ƴen sʋbɔ: Wa ka! ʋ ma wa; ɩ̃ ma yelʼã a ɩ̃ tʋ̃tʋnɔ: Maal asɩmɛ! ʋ ma maal.”

⁹ A lɛ a Jeeju na wõ a ƴɛrɩ̃ ʋlɔ, nʋɔr ko ʋ na ʋ kpiir a sɔdaal-nɩ-kpɛ̃ɛ ɩ̃ lɩɛb yel a nɩbɛ na tuure ʋ: “Ɩ̃ yele nyɩ na, a *Ɩsɩrayɛl nɩbɛ sɔ̃w, maa nyɛ nɩrɛ ʋ tɛrɛ ƴɔ̃w-nyãa ta a daba na wa.”

¹⁰ A nɩbɛ bala a sɔdaal-nɩ-kpɛ̃ɛ na tʋ̃ lɩɛbʼã kul ɩ̃ nyɛ a tʋ̃tʋnɔ ʋ kpɛmɛ.

A NAYƖ̃ KPƖ̃Ɩ-PƆW BI-DABA A JEEJU NA JAW

¹¹ A ala na yi tɔ, a *Jeeju cenʼã tẽw kãw ba na buɔlɔ Nayɩ̃, a ʋ *par-tuurbe nɩ a nɩ-yayaw dãa pɔw ʋ a ba lãa cere.

¹² A mɩnɛ ʋ na pɩɛlɛ nɩ a tẽw ʋlɔ dɔ̃dɔr nʋɔr, nɩbɛ mɩ yire nɩ na kũu a ũufʋ jie. Ʋ ɩ na a ʋ mã bi-daa ɩ̃ a ʋ mã ɩ kpɩ̃ɩ-pɔw. Nɩ-yaw yi na a tẽw ʋlɔ pʋɔ ɩ̃ pɔw ʋ cere nɩ a kũu ũufʋ jie.

¹³ A lɛ a Nɩ-kpɛ̃ɛ na nyɛ a pɔw, nãw nyɔw ʋ na, ʋ yel ʋ: “Taa kono wa.”

¹⁴ Ɩ̃ na ʋ taw ta sɩɩr a da-gbarɩ̃sɩ ʋlɔ a kũu na be, a bala na de a kũu ɩraa. A Jeeju yel: “Polbile! A fʋ̃ʋ ɩ̃ yele, ir!”

¹⁵ A kũu pal ir jɩnaa ɩ̃ nyɔw a ƴɛrɩ̃sɩ ɩ̃ ƴɛrɛ, ʋ de ʋ kʋ a ʋ mã.

¹⁶ A dãbɩ̃ɛ nyɔw a ba jaa a ba pɛwrɛ a Naaŋmɩn yele: “A Naaŋmɩn ƴɛr-hier-kpɛ̃ɛ ƴen sʋbɔ irʼã a sɩ sɔ̃w ɩ̃ a Naaŋmɩn mɩ wa na ꞌwuor a ʋ nɩbɛ.”

¹⁷ A nɩbɛ ƴɛrɛ na taa a ʋ ɩnɛ a Jude wɩɛr ʋ jaa pʋɔ de nɩ a tẽ-pɩɛlsɩ a jaa, a ala ʋ na maal.

A NƖBƐ A JÃ-BATII NA TƲ̃ A JEEJU SƐ̃

¹⁸ A Jã *par-tuurbe man ʋ na a yele ala a jaa, ʋ bʋɔl ayi a ba sɔ̃w

¹⁹ tʋ ba a Nɩ-kpɛ̃ɛ jie a ba cen na soor ʋ: “Fʋ̃ʋ ɩ a ʋlɔ na sɛw ʋ wa mu sɩ cãa gure nɩ-kpee?”

²⁰ A nɩbɛ bala ta na a *Jeeju sɛ̃ na ba yel ʋ: “A Jã-Batii ɩ̃ tʋ̃ sɩ a sɩ wa soor fʋ a fʋ̃ʋ ɩ̃ ɩ a ʋlɔ na sɛw ʋ wa mɩɩ, a sɩ cãa gure nɩ-kpee?”

²¹ A be a jie naan, ʋ kpɛmɛ na a wʋlɩ̃sɩ deme yayaw nɩ a nɩ-baalsɩ nɩ a kɔ̃tɔn-irbe ɩ̃ yuo a jɔn yayaw mimie.

²² Ɩ̃ na ʋ yel a bala a Jã na tʋ̃: “Nyɩ́ cen na man a Jã a ala nyɩ na nyɛ ɩ̃ mɩ wõ: a jɔn nyɛrɛ na, a gbɛɛ ir cere, a kɔn mɩ pɔlɔ, ɩ̃ a won wono, a kũusɩ jawra na ire, a Naaŋmɩn ƴɛr-son ta na a nãw deme jie.

²³ Á nʋmɔ a ʋlɔ a ɩ̃ maalfʋ na ma cɛ ʋ wa.”

²⁴ A lɛ a bala a Jã na tʋ̃ na lɩɛb kul baar, a Jeeju nyɔw na a Jã ƴɛrɩ̃ mana kʋrɔ a nɩbɛ yele: “Bõ nyɩ cen na ꞌwuor nyɛ a be a wɛkar pʋɔ? Kakɩr a sɛsɛb na dama?

²⁵ Bõ ʋlɔ nyɩ cen na ꞌwuor? A daba na yaarɩ̃ cẽcen-vɛlɛ? Ɩ̃-cɛ a bala na ma yaarɩ̃ a cẽcen-vɛlɛ dɩrɛ nɩ a dɩb vɛlɛ, a jamansɩ yie ba ma be.

²⁶ Bõ ʋlɔ tɔr nyɩ cen na ꞌwuor? A Naaŋmɩn ƴɛr-hiere? ɔɔ, ɩ̃ yele nyɩ na, nɩrɛ ʋ na gãw a Naaŋmɩn ƴɛr-hiere.

²⁷ A-na-ɩ a Jã ɩ̃ ɩ a ʋlɔ a Naaŋmɩn Sɛbɛ ƴɛrɩ̃ na yel: ‘A maa, Naaŋmɩn ɩ̃ tʋ̃ a ɩ̃ ƴɛƴɛrɛ ʋ de fʋ nĩe gbɛɛrɩ̃ a fʋ sɔr.’

²⁸ “Ɩ̃ yele nyɩ na, nɩrɛ kãw ma be be ba na dɔw ka a tẽw pʋɔ na gãw a Jã-Batii wa, ɩ̃-cɛ a ʋlɔ na nyɩrɩ̃ pab a Naaŋmɩn fãw pʋɔ gãw ʋ na.”

²⁹ A nɩbɛ ba jaa nɩ a lãpo-dierbe na wõ a Jã kɔkɩr, ba bɔ̃w na áa Naaŋmɩn torʼã ɩ̃ sɔw a Jã mʋr ba a kʋ̃ɔ.

³⁰ Ɩ̃-cɛ a *Farɩsɩ nɩbɛ nɩ a *ƴɛr-kpɛn-bɔɔnbɔ jaarʼã a ala a Naaŋmɩn na bʋɔrɔ a ba jie bar, a mɩnɛ ba na ma sɔw a Jã mʋr ba a kʋ̃ɔ wa.

³¹ “Babõ ɩ̃ na de a dɩnaa nɩbɛ manʼɩ̃, ɩ̃ babõ kaarɩ̃ ba wɔ̃?

³² Ba wɔ̃ na taa nɩ a bibiir na jɛ a daa pʋɔ ɓolo bʋɔlɔ nɩ taa yele: ‘Sɩ ŋme na a kʋɔr ƴɔ̃w nyɩ ɩ̃ nyaa sɛ wa, a sɩ mɩ ŋme a ko-bɩnɛ ƴɔ̃w nyɩ ɩ̃ nyaa mɩ kõ wa.’

³³ A-na-ɩ a Jã-Batii dãa na wa ma bʋn dɩrɛ lɛ wa, ma mɩ nyuure a dãa wa, a nyɩ yel a kɔ̃tɔn ɩ̃ tɛrɛ ʋ.

³⁴ A *Nɩbɛ Bie wa dɩrɛ ƴɔnɔ nyuure nɩ, a nyɩ lɛ yel go: ‘Nyɩ nyɛ dɩdɩrɛ nɩ dã-nyuure, na ɩ a lãpo-dierbe nɩ a nɩ-faar baraa.’

³⁵ Ɩ̃-cɛ a bala ba jaa na sɔw a Naaŋmɩn kpaarfʋ miile na a yel-mɩ̃ɛ be na a kpaarfʋ ʋlɔ jie.”

A PƆW NA KPAAR A KÃA ƳƆ̃W A JEEJU GBƐƐ PƲƆ

³⁶ A Farɩsɩ nɩrɛ kãw bʋɔlʼã a *Jeeju a ʋ wɩ a ba lãa dɩ a dɩb, a Jeeju kpɛ a Farɩsɩ nɩrɛ ʋlɔ yir jɛ a dɩb par.

³⁷ Ɩ̃ a be a ʋna tẽw pʋɔ, pɔw kãw dãa na be be na ɩ pɔw fãa. Ʋ bɔ̃w ka a Jeeju jɛ na a dɩb par be a Farɩsɩ nɩrɛ ʋlɔ yir, ɩ̃ de a kã-nyu-vɩlaa na sɛw a kubir yole wɩ kpɛ ɩraa nɩ a Jeeju gbɛɛ par,

³⁸ ɩ̃ kono. A ʋ mɔtɔ̃-kʋ̃ɔ ɓɩnɛ a Jeeju gbɛɛ, ʋ pãa lɩɛb a ʋ jukɔbɔ fɔfɔrɔ nɩ, ɩ̃ nyɔw a Jeeju gbɛɛ ɩ̃ de a kã-nyu-vɩlaa kpaar ƴɔ̃w.

³⁹ A lɛ a Farɩsɩ nɩrɛ ʋlɔ na bʋɔl a Jeeju na nyɛ a lɛ, ʋ yelʼã a ʋ pʋ̃ɔ: “A ala ɩ a daba na dãa na ɩ a Naaŋmɩn ƴɛr-hiere, ʋ naa bɔ̃w na a pɔw na na sɩɩrɛ ʋ, nɩ a mɩnɛ ʋ na wɔ̃. Ʋ na bɔ̃w ka pɔw fãa ʋ ɩ.”

⁴⁰ A Jeeju yel ʋ: “Sɩmɔ̃, ɩ̃ tɛrɛ na ƴɛrɩ̃ na ƴɛr fʋ.” A Sɩmɔ̃ yel: “Jãjaana, ƴɛr!”

⁴¹ A Jeeju yel ʋ: “Nɩbɛ ayi dãa na tɛrɛ san a ʋlɔ jie ba na ma pɛ̃wnɛ a libie. A bõ-ƴen tɛrɛ na warbie ture kʋbaa san, ɩ̃ a kãw tɛrɛ warbie ture pie san.

⁴² Ɩ̃ a mɩnɛ ba na ma tɛrɛ bom na tʋɔ ya a ba sama wa, a libie sʋbɔ de na bar kʋ ba a ba jaa ayi. A nɩbɛ bala ayi pʋɔ, buor ɩ̃ na nyɩrɩ̃ nʋnɔ a libie sʋbɔ?”

⁴³ A Sɩmɔ̃ yel ʋ: “Ɩ̃ tɩɛr ka a ʋlɔ na dãa tɛrɛ a san yaw ʋ.” A Jeeju yel ʋ: “Yel-mɩ̃ɛ fʋ yel.”

⁴⁴ Ɩ̃ lɩɛb miile a pɔw ɩ̃ yel a Sɩmɔ̃: “Fʋ nyɛ na a pɔw naa? A mɩnɛ ɩ̃ na kpɛ a ka a fʋ yir, faa kʋ ma kʋ̃ɔ ɩ̃ pɛw gbɛɛ wa, ɩ̃-cɛ a pɔw na, a ʋ mɔtɔ̃-kʋ̃ɔ ʋ ɓĩ nɩ a ɩ̃ gbɛɛ ɩ̃ fɔfɔ nɩ a ʋ jukɔbɔ bar.

⁴⁵ A fʋ̃ʋ, faa nyɔw ma nuu puor wa, ɩ̃-cɛ a pɔw na, wa nyɔw nɩ a lɛ ɩ̃ na kpɛ, ʋ nyɔw ma na a gbɛɛ puoro nɩ ma ma bara wa.

⁴⁶ Faa mɩ kpaar a kãa ƴɔ̃w ma a juu pʋɔ wa, ɩ̃-cɛ a pɔw na, ʋ kpaarʼã a kã-nyu-vɩlaa ƴɔ̃w ma a gbɛɛ pʋɔ.

⁴⁷ A ala ɩnɛ ɩ̃ yele fʋ na, a ʋ nʋfʋ ʋ na nyɩrɩ̃ nʋ ma, a miile na áa Naaŋmɩn de na a ʋ maal-faar na waa bar kʋ ʋ. Ɩ̃ a ʋlɔ ba na de a fɩ̃ɩ bar kʋ, ʋ ma mɩ miile na a nʋfʋ fɩ̃ɩ.”

⁴⁸ A ala ɩ̃ baar, a Jeeju yelʼã a pɔw: “A Naaŋmɩn de na a fʋ maal-faar bar kʋ fʋ.”

⁴⁹ A bala na dãa lãa jɛ nɩ ʋ ƴɛrɛ na a ba pʋ̃ɔ: “Ala nɩ a naa tɔr ɩ̃ ma mɩ de a nɩrɛ maal-fãa bar kʋ ʋ?”

⁵⁰ Ɩ̃-cɛ a Jeeju yelʼã a pɔw: “A fʋ ƴɔ̃w-nyãa faa fʋ na. Cenʼɩ̃ su-ɓaar.”