Luki Sɛbɛ 4 - A NAAŊMƖN PƲLƖ̃-TA-PAALAA

A JEEJU A SATÃ NA BƖƖR

¹ A *Jeeju paalʼɩ̃ na a Naaŋmɩn Sɩɛ na ʋ yi a Jʋrdɛ̃ man wɩɛr ɩ̃ lɩɛb wa, a Sɩɛ tɔw ʋ cenʼɩ̃ a wɛkar pʋɔ,

² a Satã bɩɩr ʋ maalʼɩ̃ bibie lɩjaayi. ꞌWaa dãa dɩ bom a bibie ala pʋɔ wa, ɩ̃ a mɩnɛ a daar ʋlɔ na tɔl, kɔ̃ nyɔw ʋ na.

³ A Satã yel ʋ: “A ala ɩ fʋ ɩ na a Naaŋmɩn Bie, yel a kʋsɩrʼã ʋ lɩɛb ɩ bõ-dɩraa.”

⁴ A Jeeju yel ʋ: “A sɛbʼã a Naaŋmɩn Sɛbɛ pʋɔ: ‘Aa ɩ a bõ-dɩraa tɛw ɩ̃ na tʋɔ kʋ a nɩrɛ a baafʋ wa.’ ”

⁵ A Satã do nɩ ʋ tãw ju-sɔ̃w ɩ̃ miil ʋ a ten a jaa na be a ka a tẽ-daa ʋ jaa juu, ʋ nyɛ ba lɛ dilo,

⁶ ɩ̃ yel ʋ: “Ɩ̃ na kʋ fʋ na a fãw a ten ala pʋɔ a jaa, nɩ a ba na-yele, a-na-ɩ maa ba kʋ, ɩ̃ mɩ tɛrɛ na sɔr na kʋ a nɩrɛ ʋlɔ ɩ̃ na bʋɔrɔ.

⁷ Fʋ̃ʋ ɩ̃ na sɔ a ala a jaa, a ala ɩ fʋ gburĩ na a dume ɩ̃ puor ma.”

⁸ A Jeeju yel ʋ: “A sɛbʼã a Naaŋmɩn Sɛbɛ pʋɔ: ‘A Nɩ-kpɛ̃ɛ na ɩ a fʋ Naaŋmɩn fʋ sɛw fʋ puor, ɩ̃ a ʋlɔ tɛw ɩ̃ sɛw fʋ tʋnɔ kʋrɔ.’ ”

⁹ A Satã lɛ cenʼɩ̃ ʋ na a Jerujalɛm na ʋ dɔɔl ʋ a Naaŋmɩn puor-yir kpɛ̃ɛ ju-sɔ̃w ɩ̃ yel ʋ: “A ala ɩ fʋ ɩ na a Naaŋmɩn Bie, aw lo a tene, a-na-ɩ a sɛbʼã a Naaŋmɩn Sɛbɛ pʋɔ:

¹⁰ ‘A Naaŋmɩn na ƴɔ̃w na a ʋ sɩ-tʋnɩsɩ a ba gu fʋ tɛɛlɛ,’

¹¹ ɩ̃ a lɛ sɛbʼã go: ‘Ba na cɔw fʋ na nɩ a ba nur, a mɩnɛ fʋ kɔ̃ wa ŋme gbɛr wa.’ ”

¹² A Jeeju yel ʋ: “A yelʼã a Naaŋmɩn Sɛbɛ pʋɔ: ‘Taa bɩɩrɛ a Nɩ-kpɛ̃ɛ na ɩ a fʋ Naaŋmɩn wa.’ ”

¹³ A mɩnɛ a Satã na bɩɩr a Jeeju a lõbobo a jaa baar, ʋ cenʼã ɩ̃ cɛ ʋ, ɩ̃ gu a daar ʋlɔ na sɛw ʋ lɛ wa.

A JEEJU TƲN NYƆWFƲ A GALILE

¹⁴ A *Jeeju lɩɛbʼã kul a Galile nɩ a Naaŋmɩn Sɩɛ fãw, a ba ƴɛrɛ a ʋ ƴɛrɩ̃ a Galile wɩɛr ʋ jaa pʋɔ.

¹⁵ Ʋ dãa na jaana a nɩbɛ a Naaŋmɩn sɔr a ba *puorfʋ yie pʋɔ, ɩ̃ a ba jaa kpiire ʋ.

A NAJARƐTƖ NƖBƐ NA JAAR A JEEJU

¹⁶ A *Jeeju cenʼã a Najarɛtɩ na ɩ a tẽw ʋlɔ ʋ na dãa nʋ̃ɔ, na ʋ kpɛ a *puorfʋ yir pʋɔ a *bibi-ciiraa dayen, a mɩnɛ ʋ na ma maala, ɩ̃ ʋ irʼã bʋɔrɔ ʋ ꞌwuor a Naaŋmɩn Sɛbɛ kʋ a nɩbɛ.

¹⁷ A ba de a ƴɛr-hiere Esayi sɛbɛ kʋ ʋ, ʋ yuo nyɛ a jie ʋlɔ a na sɛb yel:

¹⁸ “A Nɩ-kpɛ̃ɛ vɛl ma na ir ɩ̃ bar a ʋ Sɩɛ ʋ be nɩ ma, ɩ̃ na hier a ƴɛr-son kʋ a nãw deme. Ʋ tʋ̃ ma na ɩ̃ na hier yel a gbãgbaar a ba na sɔ ba mɩ̃ɛ, ɩ̃ mɩ hier yel a jɔn a ba lɛ nyɛrɛ. Ʋ tʋ ma na ɩ̃ na faa a bala ba na kpowro,

¹⁹ ɩ̃ mɩ hier a Nɩ-kpɛ̃ɛ maal-vɩlaa yuon kʋ a nɩbɛ,”

²⁰ ɩ̃ na ʋ pɔw a sɛbɛ lɛ kʋ a tʋ̃tʋnɔ, ɩ̃ jɩnaa. A nɩbɛ bala ba jaa na dãa be be a puorfʋ yir pʋɔ vɔ̃ na a mimir cɔw ʋ,

²¹ ʋ nyɔw ɩ̃ yele ba: “A Naaŋmɩn Sɛbɛ ƴɛrɩ̃ na nyɩ na wõ a ƴɛ̃ƴɛrɩ̃ maalʼã baar a dɩnaa.”

²² A nɩbɛ ba jaa ƴɛrɛ a ʋ son, ɩ̃ a nɔɛ ko ba a mɩnɛ ba na wõ a ƴɛr-vɛlɛ na yire a ʋ nʋɔrɩ̃, a ba yele: “Aa ɩ a Jojɛfʋ bi-daba nɩ a naa wa?”

²³ A Jeeju yel ba: “Ɩ̃ bɔ̃w ka nyɩ na lɔb ma na a sʋkpa na na yel: ‘Dɔɔtʋrɔ, kpaar a fʋ mɩ̃ɛ wʋlɩ̃, ɩ̃ maal a ka a fʋ mɩ̃ɛ tẽw pʋɔ a ala a jaa sɩ na wõ a fʋ maalʼã a Kapɛɛnam-tẽw pʋɔ.’ ”

²⁴ Ʋ lɛ yel ba na: “Yel-mɩ̃ɛ ɩ̃ yele nyɩ, Naaŋmɩn ƴɛr-hiere ma be be a ʋ nɩbɛ bɔ̃w sɔw de ʋ a ʋ mɩ̃ɛ tẽw pʋɔ wa.

²⁵ Sɩrɛ jaa ɩ̃ yel nyɩ, a ƴɛr-hiere Eli daar, a lɛ a saa na dãa ŋmaa a yomo ata nɩ a cur ayʋɔb, a kɔ̃ kpɛ̃ɛ lo a tẽw ʋ jaa juu, kpɩ̃ɩ-pɔɔbɔ yayaw dãa na be be a *Ɩsɩrayɛl-tẽw pʋɔ,

²⁶ ɩ̃-cɛ a Naaŋmɩn ma dãa tʋ̃ a Eli bõ-ƴen kãw jie ɩ̃ a ala ma ɩ a Sarɛpɩta-tẽw pɔw kãw jie na be a Sɩdɔ̃ wɩɛr ʋ wa.

²⁷ A kɔn yayaw mɩ dãa na be a Ɩsɩrayɛl-tẽw pʋɔ a ƴɛr-hiere Elije daar, ɩ̃-cɛ bõ-ƴen kãw a ba sɔ̃w ma dãa pɔlɩ̃ ɩ̃ a ala ma ɩ a Sɩrɩ-tẽw daba Naamã ʋ wa.”

²⁸ A mɩnɛ a nɩbɛ bala na be a puorfʋ yir na wõ a ala, suur nyɔw ba na po nɩ,

²⁹ a ba ir dar ʋ a tẽw pʋɔ yi nɩ cɛ̃cɛ̃w, na ba cenʼɩ̃ ʋ a tãw ʋlɔ juu a ba tẽw na be, ɩ̃ bʋɔrɔ ba daa ʋ kpar a tãw bɔw gbolĩkoor pʋɔ.

³⁰ Ɩ̃-cɛ ʋ tɔl yi a ba sɔɔlɩ̃sɔw ɩ̃ cere.

A KƆ̃TƆN-IRE NA BE A PUORFƲ YIR PƲƆ

³¹ A *Jeeju cenʼã a Kapɛɛnam-tẽw na be a Galile wɩɛr, jaana a nɩbɛ a *puorfʋ yir pʋɔ a *bibi-ciiraa dayen.

³² A nɔɛ ko ba a yele ala ʋ na jaana ba ɩnɛ, a-na-ɩ ʋ tɛrɛ na tʋɔfʋ a ʋ ƴɛrɩ̃sɩ pʋɔ.

³³ A puorfʋ yir pʋɔ, daba kãw dãa na be be kɔ̃tɔn bier na tɛrɛ, ʋ wuurʼɩ̃ kpɛ̃w na ʋ yel:

³⁴ “Waai! Najarɛtɩ Jeeju! Bõ ɩnɛ fʋ wa a ka? Má a sɩ sãwfʋ ɩnɛ fʋ wa. Ɩ̃ bɔ̃w na a ʋlɔ fʋ na ɩ, fʋ ɩ na a Naaŋmɩn nɩ-cɛcɛ.”

³⁵ A Jeeju ful ƴɔ̃w ʋ ɩ̃ yel: “Pɔw a nʋɔr! Yi cen ɩ̃ cɛ a daba,” a kɔ̃tɔn lɔb a daba a tene a nɩbɛ sɔ̃w ɩ̃ yi ɩ̃ cɛ ʋ, ɩ̃ ma ƴɔ̃w ʋ wʋlɩ̃ fɩ̃ɩ wa,

³⁶ a ɩ ba jaa nɔ-kpaar a ba ƴɛrɛ kʋrɔ taa: “Ƴɛr-bõ nɩ a naa? A daba na tɛrɛ na tʋɔfʋ nɩ fãgã ma yel a sɩ-bebe a ba cen yi, a ba ma sɩrɩ̃ yi.”

³⁷ Ɩ̃ a ʋ ƴɛrɩ̃ ta na a ten ala a jaa na be a wɩɛr ʋlɔ pʋɔ.

A WƲLƖ̃-BƲRƆ BƲRƆ DEME A JEEJU NA KPAAR

³⁸ A *Jeeju yi na a *puorfʋ yir pʋɔ ɩ̃ cen a Sɩmɔ̃ yir. A Sɩmɔ̃ dɩ̃ɛ-mã dãa na be be a ɩ̃gan kpor ʋ kpõ-kpõ, a ba sʋɔr a Jeeju a ʋ sũo ʋ,

³⁹ ʋ gũu cɔw a pɔw ɩ̃ mʋ̃ɔ mimir ƴɔ̃w a ɩ̃gan kporfʋ, ʋ yi ɩ̃ cɛ ʋ, ʋ ir a jie naan ir ba a saan.

⁴⁰ A mɩnɛ a wɩɛr na liwre, a nɩbɛ bala ba jaa na tɛrɛ a baalsɩ a wʋlɩ̃-bʋrɔ bʋrɔ na nyɔw, ba de ba na wa nɩ a Jeeju sɛ̃, ʋ dɔɔl ba a ʋ nur bõ-ƴene-ƴene ɩ̃ kpɛmɛ ba.

⁴¹ A kɔ̃tɔnsɩ mɩ yi na a nɩ-yaw ĩgana pʋɔ wuure yele nɩ: “Fʋ ɩ na a Naaŋmɩn Bie!” Ɩ̃-cɛ a Jeeju ful ba ɩ̃ ma bara ba a ba na ƴɛr ƴɛrɩ̃ wa, a-na-ɩ ba bɔ̃w ka ʋlɔ ɩ̃ ɩ a *Kirisi.

A JEEJU YƆFƲ A JUDE WƖƐR

⁴² A lɛ a bio na vɩɛ, ʋ yi na cen wɛ-cɛ̃cɛ̃w. A nɩbɛ nyɔw ʋ a bɔfʋ wa cenʼɩ̃ ta pɔw ʋ, ɩ̃ bʋɔrɔ ba gɔw ʋ bin ʋ kɔ̃ cen wɩɛr ɩ̃ cɛ ba wa.

⁴³ Ɩ̃-cɛ a *Jeeju yel ba: “A sɛw na ɩ̃ na mɩ hier a Naaŋmɩn fãw ƴɛr-son a ten nɩŋmɛɛ pʋɔ kʋ a nɩbɛ, a-na-ɩ a ala ɩnɛ a Naaŋmɩn tʋ ma ɩ̃ wa.”

⁴⁴ Ɩ̃ na ʋ nyɔw a Naaŋmɩn ƴɛrɩ̃ hiere yʋɔrɔ nɩ a Jude *puorfʋ yie pʋɔ.