Luki Sɛbɛ 3 - A NAAŊMƖN PƲLƖ̃-TA-PAALAA

A JÃ-BATII NAAŊMƖN ƳƐRƖ̃ HIERFƲ

¹ A daar ʋlɔ a Naaŋmɩn ƴɛrɩ̃ na ta a Jã, a ɩ na a jaman-kpɛ̃ɛ Tɩbɛɛr yomo pie-nʼanuu pʋɔ. A lɛdaar a Pɔ̃sɩ *Pɩlatɩ mɩ ɩ a Jude-tẽw jamana, a *Ɛrɔdɩ mɩ ɩ a Galile jamana, ɩ̃ a ʋ yɛbɛ Fɩlɩpɩ ɩ a Iture nɩ a Tirakoni jamana, ɩ̃ a Lɩsanɩya ɩ a Abɩlɛn-tẽw jamana.

² A ʋna daar, a An nɩ a Kayifi ɩ̃ mɩ dãa ɩ a Naaŋmɩn *baar-lo-nɩ-bɛrɛ. A Naaŋmɩn de na a ʋ ƴɛrɩ̃ kʋ a Jã na ɩ a Jakarɩ bi-daba a be a wɛkar pʋɔ,

³ ʋ yɔ a ten ala a jaa pʋɔ na pɩɛlʼɩ̃ a Jʋrdɛ̃ man, hiere yele a nɩbɛ a ba lɩɛb a ba yɛ̃ ɩ̃ wa ʋ mʋr ba a kʋ̃ɔ, a Naaŋmɩn de a ba maal-faar bar kʋ ba.

⁴ A yele ala ta na a mɩnɛ a Naaŋmɩn ƴɛr-hiere Ejayi na dãa sɛb ƴɔ̃w a ʋ sɛbɛ pʋɔ yele: “Ʋ ɩ na a nɩrɛ na wuure a wɛkar pʋɔ yele: Nyɩ́ gbɛɛrɩ̃ a Nɩ-kpɛ̃ɛ sɔr, nyɩ́ cɔɔrɩ̃ a ʋ sɔr-bil a tor.

⁵ A kokorsɩ a jaa na ɓʋrʼã, a tã-bɛrɛ nɩ a tã-bil a jaa na wɛlʼã gaal tene, a jiir ala na gɔ̃w na torʼã, a sɔr nyara-nyarasɩ na ɩ na pɔlɔ-pɔlɔ,

⁶ ɩ̃ a bal bʋrɔ bʋrɔ ba jaa na nyɛ na a Naaŋmɩn faafʋ.”

⁷ A Jã ma dãa na yele a nɩ-yaw bala na waara a ʋ jie a ʋ mʋr ba a kʋ̃ɔ: “Nyɩna waab bibiirʼãa! Ala ɩ̃ man nyɩ a nyɩ na tʋɔ na jɔ cɩ̃ɛ a Naaŋmɩn su-tuo ɩnɛ na waara?

⁸ Nyɩ́ ɩ a nyɩ maal-bie a miile áa nyɩ yɛ̃ lɩɛbʼã, ɩ̃ nyɩ taa cãa yele a nyɩ mɩ̃ɛ á nyɩ ɩ na a Abʋraham bibiir wa. Ɩ̃ yele nyɩ na: a Naaŋmɩn na tʋɔ na maal a kʋsɩɛ asɩmɛ a lɩɛb ɩ a Abʋraham bibiir.

⁹ Wa nyɔw nɩ a ƴɛ̃ƴɛrɩ̃ ba gɔrʼã jɛw a kpãakpo bʋɔrɔ nɩ a tɩɛ nyɩbɛ ŋmaafʋ. Ala-ɩ̃-sɔ, a tɩɛ lɛ na ma wɔnɔ a wɔ̃-sono wa, ba na ŋmaa ʋ na lɔb ƴɔ̃w a vũu pʋɔ.”

¹⁰ A mɩnɛ a nɩbɛ na wõ a lɛ, ba soorʼã a Jã-Batii a bõ ba sɛw ba maal,

¹¹ ʋ yel ba: “A nɩrɛ ʋlɔ na tɛrɛ a kparsɩ ayi ú ir bõ-ƴen kʋ a ʋlɔ na ma tɛrɛ wa, ɩ̃ a nɩrɛ ʋlɔ na tɛrɛ a bõ-dɩraa, ú mɩ maal a lɛ.”

¹² A lãpo-dierbe mɩ wa na, bʋɔrɔ a Jã ʋ mʋr ba a kʋ̃ɔ, ɩ̃ na ba soor ʋ: “Jãjaana, bõ sɩ sɛw sɩ maal?”

¹³ Ʋ yel ba: “Nyɩ taa diere bom dɔɔlɔ a ala juu ba na ƴɔ̃w á nyɩ ma de wa.”

¹⁴ A sɔdaalsɩ mɩ soor ʋ: “Ɩ̃ a sɩmɩ, bõ sɩ sɛw sɩ maal?” Ʋ yel ba: “Nyɩ taa diere nɩrɛ bom nɩ fãgã wa, nyɩ taa ŋmaara jir-kar ƴɔnɔ nɩrɛ wa. Nyɩ́ ɩ a nyɩ yar a sɛw nɩ nyɩ.”

¹⁵ A nɩbɛ dãa na jɛ ƴɔ̃w a toor cɛlɛ ɩ̃ pɛrɛ a ba sube pʋɔ a ala ɩ a Jã ɩ̃ ɩ a *Kirisi,

¹⁶ a Jã yel a ba jaa: “A maa, ɩ̃ mʋrɔ nɩ nyɩ na a kʋ̃ɔ, ɩ̃-cɛ a ʋlɔ na tɛrɛ a fãw gãw ma be na be waara, ɩ̃ maa sɛw nɩ a ʋ nafaba sɩɩrfʋ wa. A ʋlɔ, a Naaŋmɩn Sɩɛ nɩ a vũu pʋɔ ʋ na mʋr nyɩ.

¹⁷ Ʋ tɛrɛ na a ʋ ci-ŋme-daa a ʋ nuu pʋɔ, ʋ na ŋmeere nɩ a ci ɩ̃ yɛlɛ, suure a ci-bie a ʋ boor pʋɔ, ɩ̃ ƴɔnɔ a ure a vũu pʋɔ na ma be kpiinfʋ wa.”

¹⁸ A Jã lɛ jaan ba na yele yaw, ƴɛrɛ nɩ ba a Naaŋmɩn ƴɛr-son.

¹⁹ Ɩ̃ ʋ mɩ de na a jamana Ɛrɔdɩ fãa miilʼɩ̃ ʋ a ʋ yɛbɛ pɔw Ɛrɔdɩya ɩnɛ ʋ na de, ɩ̃ mɩ miilʼɩ̃ ʋ a ʋ tʋ̃-faar a jaa ʋ na tʋ̃,

²⁰ a Ɛrɔdɩ lɛ dɔɔl a asɩmɛ a ʋ maal-faar a jaa juu: ʋ ɩ na a ba nyɔw a Jã ƴɔ̃w a kasu pʋɔ.

A JEEJU KƲ̃Ɔ MƲRFƲ

²¹ A mɩnɛ a Jã na dãa mʋr a nɩbɛ ba jaa a kʋ̃ɔ baar, lãa nɩ a *Jeeju, a Jeeju sʋɔrɔ na a Naaŋmɩn ɩ̃ a saꞌlon yuo,

²² ɩ̃ a Naaŋmɩn Sɩɛ de a naŋmam ɩ̃gan suu wa jɛ a ʋ juu, ɩ̃ a ba wõ ƴɛrɩ̃sɩ a yi be a saꞌlon yele: “Fʋ̃ʋ ɩ a ɩ̃ Bi-nʋnaa, na kpɛ a ɩ̃ suur pʋɔ.”

A JEEJU SÃA-KƲNBƆ

²³ A *Jeeju yomo dãa na tara lɩjɛrʼɩ̃-pie a mɩnɛ ʋ na nyɔw a ʋ tʋn. A nɩbɛ dãa na tɩɛrɛ á ʋ ɩ na a Jojɛfʋ bie, na ɩ a Eli bi-daba.

^24-38 Nyɛ a mɩnɛ a Jeeju bal-par na be: A Naaŋmɩn mɛ na a *Adã, a Adã dɔw a Sɛtɩ, a Sɛtɩ ɩraa ɩ̃ dɔw a Enɔsɩ, a Enɔsɩ ɩraa ɩ̃ dɔw a Kayɩna, a Kayɩna dɔw a Malele, a Malele dɔw a Jarɛdɩ, a Jarɛdɩ dɔw a Ɛnɔkɩ, a Ɛnɔkɩ dɔw a Matusala, a Matusala dɔw a Lamɛkɩ, a Lamɛkɩ dɔw a Nowe, a Nowe dɔw a Sɛm, a Sɛm dɔw a Afasadɩ, a Afasadɩ dɔw a Kayɩna, a Kayɩna dɔw a Sala, a Sala dɔw a Ebɛɛr, a Ebɛɛr dɔw a Falɛkɩ, a Falɛkɩ dɔw a Aragayi, a Aragayi dɔw a Seriki, a Seriki dɔw a Nakɔɔr, a Nakɔɔr dɔw a Tara, a Tara dɔw a Abʋraham, a Abʋraham dɔw a Ɩjakɩ, a Ɩjakɩ dɔw a Jakɔb, a Jakɔb dɔw a Juda, a Juda dɔw a Farɛsɩ, a Farɛsɩ dɔw a Ɛsɩrɔ̃, a Ɛsɩrɔ̃ dɔw a Arɩnɩ, a Arɩnɩ dɔw a Adɩmɩ, a Adɩmɩ dɔw a Aminadab, a Aminadab dɔw a Naasõ, a Naasõ dɔw a Sala, a Sala dɔw a Booji, a Booji dɔw a Obɛdɩ, a Obɛdɩ dɔw a Jɛsɩ, a Jɛsɩ dɔw a Davɩtɩ, a Davɩtɩ dɔw a Natã, a Natã dɔw a Matata, a Matata dɔw a Mɛna, a Mɛna dɔw a Meleya, a Meleya dɔw a Elaakɩm, a Elaakɩm dɔw a Jonam, a Jonam dɔw a Jojɛfʋ, a Jojɛfʋ dɔw a Juda, a Juda dɔw a Sɩmẽw, a Sɩmẽw dɔw a Levi, a Levi dɔw a Mata, a Mata dɔw a Jorim, a Jorim dɔw a Elajɛɛr, a Elajɛɛr dɔw a Jeeju, a Jeeju dɔw a Ɛɛr, a Ɛɛr dɔw a Ɛmadã, a Ɛmadã dɔw a Kosam, a Kosam dɔw a Adɩ, a Adɩ dɔw a Mɛlɩkɩ, a Mɛlɩkɩ dɔw a Neri, a Neri dɔw a Salatɩɛl, a Salatɩɛl dɔw a Jorobabɛl, a Jorobabɛl dɔw a Eresa, a Eresa dɔw a Jowana, a Jowana dɔw a Joda, a Joda dɔw a Jojɛkɩ, a Jojɛkɩ dɔw a Semeyi, a Semeyi dɔw a Matatɩya, a Matatɩya dɔw a Maatɩ, a Maatɩ dɔw a Nagayi, a Nagayi dɔw a Ɛsɩlɩ, a Ɛsɩlɩ dɔw a Nahom, a Nahom dɔw a Amɔsɩ, a Amɔsɩ dɔw a Matatɩya, a Matatɩya dɔw a Jojɛfʋ, a Jojɛfʋ dɔw a Janayi, a Janayi dɔw a Mɛlɩkɩ, a Mɛlɩkɩ dɔw a Levi, a Levi dɔw a Mata, a Mata dɔw a Eli, a Eli dɔw a Jojɛfʋ, ʋlɔ a nɩbɛ na dãa tɩɛrɛ ʋ ɩ a Jeeju sãa.