Luki Sɛbɛ 18 - A NAAŊMƖN PƲLƖ̃-TA-PAALAA

A ƳƐR-GUORO NƖ A PƆW SƲKPA

¹ A *Jeeju lɛ bɔ̃w na lɔb a sʋkpa na kʋ ba bʋɔrɔ ʋ miil ba a ba sɛw na na sʋɔrɔ a Naaŋmɩn a daar a jaa kɔ̃ bala wa.

² Ʋ yelʼã: “Ƴɛr-guoro dãa na be tẽw kãw pʋɔ. ꞌWaa jɔrɔ Naaŋmɩn wa, ꞌwaa mɩ ƴɔnɔ nɩrɛ wa.

³ Kpɩ̃ɩ-pɔw kãw mɩ dãa na be a ʋna tẽw naa pʋɔ, ma cere a ʋ jie tɔ̃-tɔ̃-tɔ̃ yele ʋ: ‘Guor a ɩ̃ ƴɛrɩ̃ a ɩ̃ san-sʋbɔ ɩnɛ.’

⁴ A ƴɛr-guoro jaarʼã gbɛɛ amɩnɛ jaa, ɩ̃ a ala ɩ̃ baar, ʋ yelʼã a ʋ mɩ̃ɛ: ‘Yel-mɩ̃ɛ ʋ, maa jɔrɔ Naaŋmɩn wa, maa mɩ ƴɔnɔ nɩrɛ wa,

⁵ ɩ̃-cɛ a-na-ɩ a kpɩ̃ɩ-pɔw na vɔwrɔ ma na a lɛ, ɩ̃ na guorʼã a ʋ ƴɛrɩ̃. A ala ma ɩ lɛ ʋ wa, ʋ na ma wa na wɛlɛ ma a juu a daar a jaa.’ ”

⁶ A Nɩ-kpɛ̃ɛ Jeeju yelʼã: “Nyɩ́ wõ a ala a ƴɛr-guor-gõgolaa sʋbɔ ʋlɔ na yel.

⁷ Ɩ̃ a nɩbɛ bala a Naaŋmɩn na vɛl ir na ma wuure bʋɔlɔ nɩ ʋ a mɔtɔ̃w nɩ a tɩsɔw, a Naaŋmɩn kɔ̃ guor a ba ƴɛrɩ̃ miilʼɩ̃ a ba yel-mɩ̃ɛ wa mɩɩ? Ʋ na kama na a ba sũofʋ?

⁸ Ɩ̃ yele nyɩ na, ʋ na guorʼã a ba ƴɛrɩ̃ fɔfɔw. Ɩ̃-cɛ a *Nɩbɛ Bie, ʋ na nyɛ na a ƴɔ̃w-nyãa a nɩbɛ jie a ka a tẽw juu a lɛ ʋ nɔɔ lɩɛbɛ waara mɩɩ?”

A FARƖSƖ NƖRƐ NƖ A LÃPO-DIERE SƲKPA

⁹ A *Jeeju lɛ bɔ̃w na lɔb a sʋkpa na a bala ɩnɛ na ma tɩɛrɛ a ba ɩ na a nɩ-torisɩ a Naaŋmɩn nii-sɔw ɩ̃ ma kpɛrɛ a nɩbɛ.

¹⁰ Ʋ yelʼã: “Nɩbɛ ayi dãa na cen a Naaŋmɩn puor-yir kpɛ̃ɛ pʋɔ Naaŋmɩn sʋɔrfʋ jie. Bõ-ƴen ɩ na Farɩsɩ nɩrɛ, ɩ̃ a bõ-ƴen ɩ lãpo-diere.

¹¹ A Farɩsɩ nɩrɛ ɩraa na iin ɩ̃ sʋɔrɔ a Naaŋmɩn yele nɩ a ʋ mɩ̃ɛ: ‘Naaŋmɩn, ɩ̃ puoro fʋ na a-na-ɩ maa wɔ̃ a nɩbɛ ŋmɛɛ kaarɩ̃ na ɩ a nyanyube, nɩ a nɩ-gõgolĩsɩ, nɩ a pepebsɩ, mɩɩ a lãpo-diere na kaarɩ̃ wa.

¹² Ɩ̃ ma lũ na nʋɔr gbɛɛ ayi a bibie anuu-nʼayi pʋɔ, ɩ̃ ma mɩ ir a bõ-ƴen pie pʋɔ a yele a jaa pʋɔ ɩ̃ na ma pɔw.’

¹³ Ɩ̃-cɛ a lãpo-diere ɩraa jãa fɩ̃ɩ ma ꞌlara dʋɔrɔ ꞌwuoro a saꞌlon wa, ɩ̃ lɔbɔ a nur yele: ‘Naaŋmɩn, bɔ̃w ma nãw bɩlɛ, a maa na ɩ a maal-fãa sʋbɔ.’

¹⁴ “Ɩ̃ yele nyɩ na, a daba ʋlɔ lɩɛbʼã kulʼɩ̃ a Naaŋmɩn torfʋ, ɩ̃ ɛ̃ɛ cɛ a Farɩsɩ nɩrɛ ʋlɔ bar, a-na-ɩ a nɩrɛ lɛ na bʋɔrɔ ʋ bɛrmɛ a juu, a Naaŋmɩn na wur ʋ na suu nɩ, ɩ̃ a nɩrɛ lɛ na sɔw wur a ʋ mɩ̃ɛ, a Naaŋmɩn na jɛw ʋ na irʼɩ̃.”

A JEEJU NƖ A BIBI-BIL

¹⁵ A nɩbɛ wa nɩ na bibi-bil a *Jeeju sɛ̃ a ʋ sɩɩr ba, a *par-tuurbe nyɛ a lɛ ɩ̃ gala ba.

¹⁶ Ɩ̃-cɛ a Jeeju ɩ na a ba taw ta nɩ ʋ a bibiir bala, ɩ̃ ʋ yel: “Nyɩ́ bar a bibiir a ba wa a ɩ̃ sɛ̃, nyɩ taa pɩɛrɛ ba bara wa a-na-ɩ a bala na wɔ̃ a ba kaarɩ̃, bala ɩ̃ sɔ a Naaŋmɩn fãw.

¹⁷ Yel-mɩ̃ɛ ɩ̃ yele nyɩ, a ʋlɔ na ma sɔw a Naaŋmɩn v tɛrɛ v a bibile kaarɩ̃ wa, ꞌwaa be na tʋɔ kpɛ a Naaŋmɩn fãw pʋɔ wa.”

A DAB-NAABA ƳƐRƖ̃

¹⁸ A Jufisɩ nɩ-kpɛ̃ɛ kãw soorʼã a *Jeeju: “Jãjaan-son, bõ ɩ̃ sɛw ɩ̃ na maal ɩ̃ pãa pɔw a baa-kɔ̃-tɛw?”

¹⁹ A Jeeju yel v: “Bõ ɩ̃ ɩ a fʋ bʋɔl ma a nɩ-son? Nɩ-son ma be, ɩ̃ a ala ma ɩ a Naaŋmɩn tɛw ʋ wa.

²⁰ Fʋ bɔ̃w na a *Naaŋmɩn ƴɛr-kpɛn: taa wa gana nɩ pɔw kpee wa, taa wa kúrɔ nɩrɛ wa, taa wa jure wa, taa wa ŋmara jir-kara ƴɔnɔ nɩrɛ wa; jɔrɔ a fʋ sãa nɩ a fʋ mã.”

²¹ A daba yel: “Ɩ̃ maalʼã a ana yele a jaa a ɩ̃ bibile daar wa ta nɩ a dɩnaa.”

²² A mɩnɛ a Jeeju na wõ a lɛ, ʋ yelʼã a daba: “Bom bõ-ƴen cãa na cɛ fʋ. Da a fʋ yele a jaa fʋ na tɛrɛ, de a libie po a nãw deme, ɩ̃ fʋ na pɔw na a na-yele a Naaŋmɩn tẽw. A ala ɩ̃ baar, fú wa tuure ma.”

²³ Ɩ̃-cɛ a mɩnɛ a daba na wõ a ala, nyãa nyɩl ʋ na, a-na-ɩ ʋ sɩrɩ̃ na le.

²⁴ A Jeeju nyɛ na a mɩnɛ a nyãa na nyɩl a daba, ɩ̃ yel áa kpɛmɛ na a mɩnɛ a naabsɩ na kpɛɛrɛ a Naaŋmɩn fãw pʋɔ.

²⁵ Ʋ lɛ yelʼã: “A na yɔw na a nyʋɔmɩ na kpɛɛrɛ a mɩsɩn-bɔw pʋɔ gãw a naaba na kpɛɛrɛ a Naaŋmɩn fãw pʋɔ.”

²⁶ A nɩbɛ bala na wõ a ala, ba yelʼã: “A ala ɩ a lɛ ʋ, ala na pɔw a faafʋ?”

²⁷ A Jeeju yel: “A ala a nɩrɛ na ma tʋɔrɔ maala wa, a Naaŋmɩn ma tʋɔ na maal.”

²⁸ A be jie a Pɩɛr yel: “Nyɛ a sɩmɩ, sɩ barʼã a yele ala sɩ na dãa tɛrɛ, ɩ̃ tuure fʋ.”

²⁹ A Jeeju yel ba: “Yel-mɩ̃ɛ ɩ̃ yele nyɩ, a nɩrɛ lɛ na bar a ʋ yir, mɩɩ a ʋ pɔw, mɩɩ a ʋ yɛɛr, mɩɩ a ʋ dɔɔrbɔ, mɩɩ a ʋ bibiir a Naaŋmɩn fãw ɩnɛ,

³⁰ ʋ na pɔw na a gãw a lɛ a daarʼã pʋɔ sɩ na be a ƴɛ̃ƴɛrɩ̃, ɩ̃ ʋ na mɩ pɔw na a baa-kɔ̃-tɛw a daar ʋlɔ pʋɔ na be a puo-sɔw waara.”

A JEEJU LƐ BƆ̃W NA MANA A Ʋ KŨU ƳƐRƖ̃

³¹ A *Jeeju taw na a ʋ *par-tuurbe pie-nʼayi kpaarɩ̃ a ʋ pulẽe, ɩ̃ yel ba: “Nyɩ́ nyɛ, sɩ cere na a Jerujalɛm, ɩ̃ a be, a ala a jaa a Naaŋmɩn ƴɛr-hierbe na sɛb a *Nɩbɛ Bie ɩnɛ, a na maalʼã baar.

³² A-na-ɩ ba na nyɔw ʋ na kʋ a nɩ-bʋlsɩ a ba la ʋ, ɩ̃ na ba tʋ ʋ, ɩ̃ puur a natɛɛr ƴɔ̃w ʋ,

³³ ɩ̃ fɔbʼɩ̃ ʋ a kpaara ɩ̃ cɛ ʋ kú. Ɩ̃ a bibie ata dayen, ʋ na irʼã a kũu pʋɔ.”

³⁴ Ɩ̃-cɛ a ʋ par-tuurbe ma dãa bɔ̃w a ala ʋ na yele par fɩ̃ɩ wa. A ƴɛrɩ̃ ʋlɔ dãa na liw ba a baa dãa tʋɔ bɔ̃w a par wa.

A JEEJU NA YUO A JƆ̃W MIMIE

³⁵ A mɩnɛ a *Jeeju na pɩɛlɛ a Jeriko-tẽw, jɔ̃w kãw dãa na jɛ a sɔr nʋɔr sʋɔrɔ a yele.

³⁶ Ʋ wõ na a nɩbɛ na tɔlɔ ɩ̃ soor a ala na be be,

³⁷ a ba yel ʋ áa Najarɛtɩ Jeeju ɩ̃ tɔlɔ

³⁸ ʋ wuur yel: “*Davɩtɩ Bie Jeeju yaa, bɔ̃w ma nãw bɩlɛ!”

³⁹ A bala na de a nĩe, gala ʋ na, a ʋ pɔw a nʋɔr, ɩ̃-cɛ ʋ jaarʼã ɩ̃ ɛ̃ɛ wuurʼɩ̃ kpɛ̃w yele: “Davɩtɩ Bie, bɔ̃w ma nãw!”

⁴⁰ A Jeeju ɩraa ɩ̃ ƴɔ̃w a ba taw ʋ wa nɩ a ʋ sɛ̃. A lɛ a jɔ̃w na ta pɩɛl ʋ baar, a Jeeju soor ʋ na:

⁴¹ “Bõ fʋ bʋɔrɔ ɩ̃ maal fʋ?” A jɔ̃w yel: “Nɩ-kpɛ̃ɛ, maal ɩ̃ lɛ nyɛrɛ.”

⁴² A Jeeju yel ʋ: “Lɛ bɔ̃w nyɛrɛ! A fʋ ƴɔ̃w-nyãa faa fʋ na.”

⁴³ A jie naan, ʋ lɛ bɔ̃w na nyɛrɛ, ɩ̃ pɛwrɛ a Naaŋmɩn tuure nɩ a Jeeju, a nɩbɛ ba jaa nyɛ a lɛ ɩ̃ mɩ pɛw a Naaŋmɩn.