Jã Sɛbɛ 9 - A NAAŊMƖN PƲLƖ̃-TA-PAALAA

A JƆ̃W MIMIE A JEEJU NA YUO

¹ A lɛ a *Jeeju na tɔlɔ, ʋ nyɛ na jɔ̃w ba na dɔw nɩ a lɛ.

² A *par-tuurbe soor a Jeeju: “Jãjaana, ala ɩ̃ maal a fãa a ba dɔw a daba na ʋ ɩ a jɔ̃w? A ʋ dɔɔrbɔ ʋ, mɩɩ a ʋlɔ mɩ̃ɛ ʋ?”

³ A Jeeju yel ba: “Aa ɩ ʋlɔ ɩ̃ maal a fãa wa, aa mɩ yi a ʋ dɔɔrbɔ jie wa, ɩ̃-cɛ ʋ jɔ̃w na a lɛ a mɩnɛ a na saa a nɩbɛ na tʋɔ nyɛ a Naaŋmɩn tʋ̃-bie.

⁴ A lɛ a mɔtɔ̃w na cãa caara, a sɛw na a sɩ na tʋnɔ a ʋlɔ na tʋ̃ ma tʋmɔ. A tɩsɔw tara na a nɩrɛ ma tʋɔrɔ tʋnɔ tʋn wa.

⁵ A lɛ ɩ̃ na cãa a tẽw pʋɔ, maa ɩ̃ ɩ a tẽw pʋɔ cãa.”

⁶ A mɩnɛ ʋ na ƴɛr a lɛ baar, ʋ cɩrʼã natɛɛr ƴɔ̃w a tana pʋɔ, ɩ̃ nyaka a tana ala de bol a jɔ̃w mimie,

⁷ ɩ̃ yel ʋ: “Cen na pɛw a fʋ nii-sɔw a Silowe kʋ̃ɔ puulĩfʋ jie.” (A Silowe yuor par ɩ na “Tʋ̃fʋ.”) A daba cenʼĩ na pɛw a ʋ nii-sɔw nyɛrɛ lɩɛb waara nɩ.

⁸ A ʋ lãa-pɩɛlbɛ nɩ a bala na ma dãa nyɛ ʋ ʋ jɛ sʋɔrɔ a yele sooro na taa: “Aa ɩ a daba na ɩ̃ ma dãa jɛ sʋɔrɔ a yele wa?”

⁹ A nɩŋmɛɛ ma yelʼã á ʋlɔ ʋ, ɩ̃-cɛ a nɩŋmɛɛ ma yel á aa ɩ ʋlɔ ʋ wa, á nɩ-wɔ̃ tar ʋ. Ɩ̃ a jɔ̃w mɩ̃ɛ yele na: “Maa ʋ.”

¹⁰ A ba soor ʋ: “Mɩnɛ a fʋ mimie ɩ ɩ̃ yuo?”

¹¹ Ʋ yel ba: “A daba ʋlɔ ba na bʋɔlɔ a Jeeju, ʋlɔ ɩ̃ nyaka a tana bol ma a mimie, ɩ̃ yel ma á ɩ̃ cen a Silowe kʋ̃ɔ puulĩfʋ jie na pɛw a nii-sɔw, ɩ̃ cen na pɛw, a ɩ̃ mimie yuo.”

¹² A ba soor ʋ: “Nyɩnɛ a daba ʋlɔ be?” Ʋ yel ba: “Maa bɔ̃w wa.”

A DABA ƲLƆ MIMIE NA YUO NƖ A FARƖSƖ NƖBƐ

¹³ Ba taw na a daba ʋlɔ na dãa jɔ̃w cenʼɩ̃ a *Farɩsɩ nɩbɛ jie,

¹⁴ a-na-ɩ a bibir ʋlɔ a *Jeeju na nyaka a tana yuo nɩ ʋ a mimie ɩ na a *bibi-ciiraa dayen.

¹⁵ A Farɩsɩ nɩbɛ mɩ sooro na a jɔ̃w a mɩnɛ ʋ na ɩ ɩ̃ nyɛrɛ, ʋ yel ba: “Tana ʋ bol ma a mimie ɩ̃ pɛw bar ɩ̃ nyɛrɛ.”

¹⁶ A lɛ, a Farɩsɩ nɩbɛ ŋmɛɛ yelʼã: “A ʋna sʋbɔ na maal a lɛ, ꞌwaa yi a Naaŋmɩn jie wa, a-na-ɩ ꞌwaa sɔmɔ a bibi-ciiraa wa.” Ɩ̃ a nɩŋmɛɛ yele na: “Mɩnɛ a nɩ-fãa na tʋɔ maal a nɔ-kofʋ tʋmɔ a nɔhɔ̃?” Ɩ̃ a baa dãa ɩ nɔ-bõ-ƴen wa.

¹⁷ Ba lɛ bɔ̃w na soor a jɔ̃w: “A fʋ̃ʋ, ala fʋ tɩɛr a ʋ ɩ? A-na-ɩ a fʋ mimie ʋ yuo.” Ʋ yel ba: “Ʋ ɩ na a Naaŋmɩn ƴɛr-hiere.”

¹⁸ A Jufisɩ ma sɔw a jɔ̃w ʋ dãa ɩ ɩ̃ wa nyɛrɛ wa, ala-ɩ̃-sɔ a ba bʋɔl a ʋ dɔɔrbɔ soor:

¹⁹ “A nyɩ bie nɩ a naa mɩɩ? A jɔ̃w nyɩ sɩrɩ̃ dɔw ʋ mɩɩ? Ɩ̃ mɩnɛ ʋ ɩ ɩ̃ nyɛrɛ a ƴɛ̃ƴɛrɩ̃?”

²⁰ A ʋ dɔɔrbɔ yel: “Sɩ bɔ̃w ka ʋ ɩ na a sɩ bie sɩrɛ jaa, a sɩ mɩ dɔw ʋ ʋ ɩ a jɔ̃w,

²¹ ɩ̃-cɛ a mɩnɛ ʋ na ɩ ɩ̃ nyɛrɛ a ƴɛ̃ƴɛrɩ̃ na, saa bɔ̃w wa. Saa mɩ bɔ̃w a ʋlɔ na yuo ʋ a mimie wa. Nyɩ́ soor ʋ, ꞌwaa ɩ bibile wa, a ʋlɔ mɩ̃ɛ na man nyɩ na.”

²² A ʋ dɔɔrbɔ yelʼã a lɛ a-na-ɩ ba jɔrɔ na a Jufisɩ dãbɩ̃ɛ. A Jufisɩ dãa na man taa áa nɩrɛ ɩ̃ wa yel áa Jeeju ɩ na a *Kirisi, á ba na diw ʋ na bar a ba *puorfʋ yir.

²³ Ala-ɩ̃-sɔ a ʋ dɔɔrbɔ yel á ꞌwaa ɩ bibile wa, á ba soor a ʋlɔ mɩ̃ɛ.

²⁴ A lɛ a na be, a Farɩsɩ nɩbɛ lɛ bʋɔlʼã a daba na dãa ɩ a jɔ̃w gbɛɛ ayi pʋɔ ɩ̃ yel ʋ: “Yel yel-mɩ̃ɛ a Naaŋmɩn nii-sɔw, a-na-ɩ a sɩmɩ, sɩ bɔ̃w ka a ʋna daba ɩ na nɩ-fãa.”

²⁵ Ʋ yel ba: “A ala ɩ̃ ɩ nɩ-fãa ʋ ɩ, maa bɔ̃w wa. Bõ-bõ-ƴen tɛw ɩ̃ bɔ̃w: jɔ̃w ɩ̃ dãa ɩ, ɩ̃-cɛ ƴɛ̃ƴɛrɩ̃ na, ɩ̃ nyɛrɛ na.”

²⁶ A ba soor ʋ: “Bõ ʋ maal fʋ? Mɩnɛ ʋ ɩ ɩ̃ yuo fʋ a mimie?”

²⁷ Ʋ yel ba: “Ɩ̃ dãa na man kʋ nyɩ, ɩ̃ nyaa cɛl ma wa. Bõ nyɩ bʋɔrɔ nyɩ lɛ wõ ɩ nɩ? A nyɩmɩ mɩ, nyɩ mɩ bʋɔrɔ na nyɩ lɩɛb ɩ a ʋ *par-tuurbe mɩɩ?”

²⁸ A ba tʋrɔ ʋ ɩ̃ yele: “Fʋ̃ʋ ɩ a ʋna daba naa *par-tuure, ɩ̃-cɛ a sɩmɩ, Mowisi par-tuurbe sɩ ɩ.

²⁹ Sɩ bɔ̃w ka a Naaŋmɩn dãa na ƴɛrʼɩ̃ a Mowisi ɩ̃-cɛ a daba ʋlɔ, saa bɔ̃w a jie ʋ na yi wa.”

³⁰ A daba yel ba: “A ko ma na nʋɔr nyɩ na ma bɔ̃w a ʋ yifʋ jie wa, ɩ̃-cɛ ʋ yuo ma na a mimie.

³¹ Sɩ bɔ̃w ka a Naaŋmɩn maa cɛl a nɩ-faar wa, ɩ̃-cɛ a nɩrɛ lɛ na jɔrɔ ʋ ɩ̃ maala a ʋ pʋ-tɩɛrʋ̃, ʋlɔ ʋ ma cɛl.

³² Wa nyɔw nɩ a tẽkorĩ, nɩrɛ ma dãa wõ a ba yel a ba yuo na a nɩrɛ ba na dɔw ʋ ɩ a jɔ̃w mimie wa.

³³ A ala ɩ̃ ɩ a daba ʋlɔ ma dãa yi a Naaŋmɩn jie wa, ꞌwaa tʋɔrɔ maala bom kãw wa.”

³⁴ A Farɩsɩ nɩbɛ yel ʋ: “Wa nyɔw nɩ a fʋ dɔwfʋ daar, maal-fãa pʋɔ fʋ be. Mɩnɛ a ɩ a fʋ bʋɔrɔ fʋ jaan sɩ bom?” Ɩ̃ na ba diw ʋ bar a ba sɔ̃w.

A SƖƐ PƲƆ JƆ̃WFƲ

³⁵ A *Jeeju wõ na a ba diw ʋ na bar a ba sɔ̃w, ɩ̃ bɔ ʋ soor: “Fʋ tɛrɛ na ƴɔ̃w-nyãa a *Nɩbɛ Bie jie mɩɩ?”

³⁶ A daba yel a Jeeju: “Nɩ-kpɛ̃ɛ, yel ma a sʋbɔ ʋlɔ ʋ na ɩ, ɩ̃ na tʋɔ tɛrɛ nɩ ʋ a ƴɔ̃w-nyãa.”

³⁷ A Jeeju yel ʋ: “Fʋ nyɛ ʋ na; ʋlɔ ɩ̃ ƴɛrɛ nɩ fʋ a ƴɛ̃ƴɛrɩ̃ na.”

³⁸ A daba yel: “Nɩ-kpɛ̃ɛ, ɩ̃ sɔw na,” ɩ̃ gburĩ a dume puor ʋ.

³⁹ A Jeeju yel: “Ƴɛrɩ̃ guorfʋ ɩnɛ ɩ̃ wa a ka a tẽw pʋɔ, a mɩnɛ a bala na jɔ̃w na tʋɔ nyɛrɛ, ɩ̃-cɛ a bala na nyɛrɛ na lɩɛb ɩ a jɔn.”

⁴⁰ A *Farɩsɩ nɩbɛ ŋmɛɛ na dãa be nɩ ʋ wõ na a ala ʋ na ƴɛr ɩ̃ soor ʋ: “A sɩmɩ mɩ, jɔn sɩ mɩ ɩ mɩɩ?”

⁴¹ A Jeeju yel ba: “A ala ɩ̃ ɩ jɔn nyɩ dãa ɩ, nyɩ kɔ̃ɔ tɛrɛ cɛfʋ jie wa, ɩ̃-cɛ a mɩnɛ nyɩ na yel a nyɩ nyɛrɛ na, a nyɩ fãa cãa na be a nyɩ jie.”