Jã Sɛbɛ 6 - A NAAŊMƖN PƲLƖ̃-TA-PAALAA

A DABSƖ TURE ANUU NA ꞌWƆB A BURU-BIE ANUU

¹ A ala na tɔl baar, a *Jeeju gãw na a man gaan, na ɩ a man ʋlɔ ba na mɩ bʋɔlɔ a Tiberiyadi.

² Nɩ-yaw tuure ʋ na a-na-ɩ ba nyɛ na a nɔ-kofʋ tʋmɔ ʋ na maala kpɛmɛɛ nɩ a wʋlɩ̃sɩ deme.

³ A Jeeju do na a tãw juu na jɛ nɩ a ʋ *par-tuurbe a be.

⁴ A Jufisɩ fɛtɩ daar na ɩ a Pakɩ pɩɛlʼã.

⁵ A mɩnɛ a Jeeju na ꞌwuor nyɛ a nɩ-yaw a ba wɩɛrɛ a ʋ sɛ̃, ʋ soorʼã a Fɩlɩpɩ: “Nyɩnɛ sɩ na tʋɔ nyɛ bom da kʋ a nɩbɛ basɩmɛ a ba dɩ?”

⁶ A Jeeju yelʼã a lɛ bʋɔrɔ ʋ bɔ̃w a mɩnɛ a Fɩlɩpɩ na yele, a-na-ɩ ʋ de na nĩe bɔ̃w a ala a ʋlɔ mɩ̃ɛ na maala.

⁷ A Fɩlɩpɩ yel ʋ: “A ala ɩ̃ saarɩ̃ ɩ war ture lɩjaayi sɩ tɛrɛ, aa mɩ ɩ bom na tʋɔ da bõ-dɩraa a ba na pɔw fɩ̃ɩ-fɩɩn ba jaa wa.”

⁸ A Jeeju *par-tuure Ãdire na ɩ a Sɩmɔ̃ Pɩɛr yɛbɛ yel ʋ na:

⁹ “Dabile be na ka tɛrɛ buru anuu ba na maalʼɩ̃ a ooji-bie nɩ jɩm-bie ayi. Ɩ̃-cɛ bõ a ala na tʋɔ maal a nɩ-yaw na?”

¹⁰ A Jeeju yel: “Nyɩ́ ɩ a nɩbɛ a ba jɛ.” A mʋ̃ɔ waa na a be a ʋna jie a ba jɛ. A nɩbɛ bala tara na dabsɩ ture anuu.

¹¹ A lɛ, a Jeeju de na a buru, ɩ̃ a mɩnɛ ʋ na puor a Naaŋmɩn baar, ʋ po na a nɩbɛ bala na jɛ a be. Ʋ mɩ po ba na a jɩmɛ a mɩnɛ ba na buɔrɔ.

¹² A lɛ a ba jaa na ꞌwɔb pi baar, a Jeeju yelʼã a ʋ par-tuurbe: “Nyɩ́ woor a bõ-ŋmara na cɛ, a mɩnɛ a bom kɔ̃ wa bɔr wa”,

¹³ a ba woor a bõ-ŋmara ala ba na ꞌwɔb a buru anuu ɩ̃ cɛ, sɛw pɩɩr pie-nʼayi.

¹⁴ A lɛ a nɩbɛ na nyɛ a nɔ-kofʋ tʋn ʋlɔ a Jeeju na maal, ba yelʼã: “A daba na sɩrɩ̃ na ɩ a Naaŋmɩn ƴɛr-hiere ʋlɔ na sɛw ʋ wa ka a tẽw pʋɔ!”

¹⁵ A mɩnɛ a Jeeju na bɔ̃w ka ba na wa na nyɔw ʋ ʋ ɩ a ba jamana, ʋ yi na a ba pʋɔ lɛ cen a tãw juu, ʋlɔ ʋ yẽ.

A JEEJU NA CERE A KƲ̃Ɔ JUU

¹⁶ A mɩnɛ a jaanʋɔr na ta, a *Jeeju *par-tuurbe suu na a manɩ̃

¹⁷ na kpɛ a gbor pʋɔ gãwna a Kapɛɛnam-tẽw. A wɩɛr liw na baar ɩ̃ a Jeeju ma dãa pɔw ba sɛr wa,

¹⁸ ɩ̃ a sɛsɛb kpɛ̃ɛ fure, a kʋ̃ɔ dama.

¹⁹ A mɩnɛ ba na duurʼɩ̃ a gbor a jãa ta kilo anuu mɩɩ kilo ayuɔb, ba nyɛ na a Jeeju ʋ cere nɩ a gbɛɛ a kʋ̃ɔ juu tara a gbor par, a dãbɩ̃ɛ nyɔw ba.

²⁰ Ɩ̃-cɛ a Jeeju yel ba na: “Nyɩ taa ɩ a dãbɩ̃ɛ nyɔw nyɩ wa. Maa ʋ.”

²¹ A be jie, ba buɔrɔ na ba de ʋ ƴɔ̃w a gbor pʋɔ, ɩ̃ a jie naan, a gbor ta na a jie ʋlɔ ba na cere.

A NƖBƐ NA BƲƆRƆ A JEEJU

²² A lɛ a bio na vɩɛ, a nɩ-yaw bala na dãa cãa ɩraa a ʋna gaan naa pʋɔ nyɛ na bɔ̃w ka gbor bõ-ƴen tɛw ɩ̃ dãa be be, ɩ̃ a *Jeeju ma dãa kpɛ a gbor ʋlɔ pʋɔ wa, ɩ̃-cɛ a ʋ *par-tuurbe tɛw ɩ̃ kpɛ cen.

²³ Ɩ̃-cɛ gboro ŋmɛɛ yi na a Tiberiyadi-tẽw ɩ̃ ta pɩɛl a jie ʋlɔ a Nɩ-kpɛ̃ɛ na dãa puor a Naaŋmɩn ɩ̃ a ba ꞌwɔb a buru.

²⁴ Ɩ̃ a mɩnɛ a nɩ-yaw bala na ma nyɛ a Jeeju nɩ a ʋ par-tuurbe a be wa, ba kpɛ na a ana gboro cen a Kapɛɛnam a Jeeju bɔfʋ jie.

A JEEJU NA Ɩ A BAAFƲ DƖB

²⁵ Ba nyɛ na a *Jeeju a man gaan ɩ̃ soor ʋ: “Jãjaana, dabor daar fʋ ta a ka?”

²⁶ A Jeeju yel ba: “Yel-mɩ̃ɛ ɩ̃ yele nyɩ, nyaa buɔrɔ ma a nɔ-kofʋ tʋmɔ ɩnɛ nyɩ na nyɛ wa, ɩ̃-cɛ nyɩ buɔrɔ ma na a-na-ɩ nyɩ ꞌwɔbʼã a buru pi.

²⁷ Nyɩ taa tʋnɔ a tʋn a dɩb ala na sãwna ɩnɛ wa, ɩ̃-cɛ nyɩ́ tʋnɔ a dɩb ala na kamɛɛ ɩnɛ, na kʋrɔ nyɩ a baa-kɔ̃-tɛw. A ɩ na a dɩb ala a *Nɩbɛ Bie na kʋrɔ nyɩ, a-na-ɩ a ʋlɔ a Sãa Naaŋmɩn kʋ a ʋ tʋɔfʋ a nyɩ na tʋɔ bɔ̃w ʋ.”

²⁸ A ba soor ʋ: “Bõ sɩ sɛw na maal ɩ̃ a ɩ sɩ tʋ̃ na a tʋmɔ ala a Naaŋmɩn na bʋɔrɔ?”

²⁹ A Jeeju yel ba: “A tʋn ʋlɔ a Naaŋmɩn na bʋɔrɔ a nyɩ jie ɩ na nyɩ sɔw de a ʋlɔ ʋ na tʋ̃.”

³⁰ A ba soor ʋ: “Nɔ-kofʋ tʋ̃-buor fʋ na maal a sɩ nyɛ ɩ̃ sɔw de fʋ? Bõ fʋ na maal?

³¹ A sɩ sãa-kʋnbɔ dɩ na a dɩb ala ba na bʋɔlɔ a *maan a wɛkar pʋɔ, a mɩnɛ a na yel a Naaŋmɩn Sɛbɛ pʋɔ: ‘Ʋ kʋ ba na a dɩb ala na yi a saꞌlon a ba dɩ.’ ”

³² A Jeeju yel ba: “Yel-mɩ̃ɛ ɩ̃ yele nyɩ, aa ɩ a Mowisi ɩ̃ dãa kʋ nyɩ a bõ-dɩraa ala na yi a saꞌlon wa. Ɩ̃-cɛ a ɩ̃ Sãa, ʋlɔ ɩ̃ ma kʋ nyɩ a bõ-dɩ-son ala na yi a saꞌlon.

³³ A-na-ɩ a Naaŋmɩn bõ-dɩraa ʋlɔ ɩ na a ʋlɔ na yi a saꞌlon ɩ̃ suu wa kʋrɔ a nɩbɛ a baafʋ.”

³⁴ A ba yel ʋ: “Nɩ-kpɛ̃ɛ, kʋrɔ sɩ a ʋna bõ-dɩraa a daar a jaa.”

³⁵ A Jeeju yel ba: “Maa ɩ̃ ɩ a baafʋ dɩb. A ʋlɔ na wa a ɩ̃ sɛ̃, kɔ mɔɔ lɔɔ nyɔwrɔ ʋ go wa, ɩ̃ a ʋlɔ na sɔw de ma, kʋ̃ɔ-nyuur mɔɔ lɔɔ nyɔwrɔ ʋ go wa.

³⁶ Ɩ̃-cɛ ɩ̃ dãa na yel nyɩ, a nyɩmɩ nyɛ ma, ɩ̃-cɛ nyaa sɔw de ma wa.

³⁷ A bala ba jaa a ɩ̃ Sãa na kʋrɔ ma na wa na a ɩ̃ sɛ̃, ɩ̃ a ʋlɔ na wa a ɩ̃ sɛ̃, ɩ̃ kɔ̃ be na jaar ʋ bar wa,

³⁸ a-na-ɩ ɩ̃ yi na a saꞌlon ɩ̃ suu wa a ʋlɔ na tʋ̃ ma pʋ-tɩɛrʋ̃ maalfʋ ɩnɛ. Maa wa a ɩ̃ mɩ̃ɛ pʋ-tɩɛrʋ̃ maalfʋ wa.

³⁹ A ʋlɔ na tʋ̃ ma pʋ-tɩɛrʋ̃ par ɩ na áa bala ʋ na kʋ ma, a ɩ̃ taa bar a bõ-ƴen ʋ wa bɔrɔ wa, ɩ̃-cɛ a ɩ̃ maal ba a ba ir a kũu pʋɔ a bibi-baaraa dayen.

⁴⁰ A-na-ɩ a ɩ̃ Sãa pʋ-tɩɛrʋ̃ par ɩ na áa nɩrɛ lɛ na nyɛ a Bie ɩ̃ sɔw de ʋ, á ʋ na tɛrɛ na a baa-kɔ̃-tɛw, ɩ̃ a maa, ɩ̃ nɔɔ maal ʋ na ʋ ir a kũu pʋɔ a bibi-baaraa dayen.”

⁴¹ Ala-ɩ̃-sɔ a Jufisɩ hũhune a Jeeju, a-na-ɩ ʋ yelʼã a ʋlɔ ɩ̃ ɩ a dɩb na yi a saꞌlon ɩ̃ suu.

⁴² Ba yele na: “Aa ɩ ʋlɔ ɩ̃ ɩ a Jeeju na ɩ a Jojɛfʋ bie wa? Sɩ bɔ̃w na a ʋ sãa nɩ a ʋ mã. Mɩnɛ ʋ ɩ ɩ̃ yel a ƴɛ̃ƴɛrɩ̃ á ʋ yi na a saꞌlon ɩ̃ suu?”

⁴³ A Jeeju yel ba: “Nyɩ́ bar a nyɩ hũhunfʋ.

⁴⁴ Nɩrɛ ma tʋɔrɔ waara a ɩ̃ sɛ̃ ɩ̃ a ala ma ɩ a Sãa na tʋ ma, ʋlɔ ɩ̃ taw ʋ wa nɩ wa. Ɩ̃ a maa, ɩ̃ nɔɔ maal ʋ na ʋ ir a kũu pʋɔ a bibi-baaraa dayen.

⁴⁵ A yelʼã a ƴɛr-hierbe sɛbɛ pʋɔ áa Naaŋmɩn na jaan ba na ba jaa. A bala ba jaa na cɛlɛ a ɩ̃ Sãa ƴɛrɩ̃ pɔw nɩ a ʋ jaanfʋ na wa na a ɩ̃ sɛ̃.

⁴⁶ A lɛ ma yel a nɩrɛ nyɛ na a Sãa wa, ɩ̃ a ʋlɔ na yi a Naaŋmɩn jie, ʋlɔ tɛw ɩ̃ nyɛ a Sãa.

⁴⁷ Yel-mɩ̃ɛ ɩ̃ yele nyɩ, a ʋlɔ na sɔw de ma, ʋ tɛrɛ na a baa-kɔ̃-tɛw.

⁴⁸ Maa ɩ̃ ɩ a baafʋ dɩb.

⁴⁹ A nyɩ sãa-kʋnbɔ dãa na dɩ a dɩb ala a Naaŋmɩn na kʋ ba a wɛkar pʋɔ, ɩ̃ ba cãa na kpi,

⁵⁰ ɩ̃-cɛ a ala ɩ̃ ɩ a nɩrɛ dɩ na a dɩb ʋlɔ na yi a saꞌlon ɩ̃ suu, ꞌwaa kpiire wa.

⁵¹ Maa ɩ̃ ɩ a baafʋ dɩb na yi a saꞌlon ɩ̃ suu. A nɩrɛ ɩ̃ dɩ a ʋna dɩb, ʋ na tɛrɛ na a baafʋ daadaa kpoolaa. A dɩb ʋlɔ ɩ̃ nɔɔ kʋrɔ a nɩbɛ ɩ na a ɩ̃ ɩ̃gan. Ɩ̃ kʋrɔ ba na a lɛ a ba na tʋɔ tɛrɛ a baafʋ.”

⁵² A lɛ, a Jufisɩ faara na taa yele: “Mɩnɛ a daba na na tʋɔ kʋ sɩ a ʋ ɩ̃gan a sɩ ꞌwɔb?”

⁵³ A Jeeju yel ba: “Yel-mɩ̃ɛ ɩ̃ yele nyɩ, a nyɩmɩ ma ꞌwɔb a Nɩbɛ Bie ɩ̃gan, ɩ̃ mɩ nyu a ʋ jɩ̃ɩ wa, nyɩ kɔ tɛrɛ baafʋ wa.

⁵⁴ A ʋlɔ na ꞌwɔb a ɩ̃ ɩ̃gan ɩ̃ mɩ nyu a ɩ̃ jɩ̃ɩ, ʋ tɛrɛ na a baa-kɔ̃-tɛw, ɩ̃ a maa, ɩ̃ na maal ʋ na ʋ ir a kũu pʋɔ a bibi-baaraa dayen.

⁵⁵ A-na-ɩ a ɩ̃ ɩ̃gan sɩrɩ̃ na ɩ a dɩb, ɩ̃ a ɩ̃ jɩ̃ɩ mɩ sɩrɩ̃ ɩ a bõ-nyuuraa.

⁵⁶ A ʋlɔ na ꞌwɔb a ɩ̃ ɩ̃gan ɩ̃ mɩ nyu a ɩ̃ jɩ̃ɩ, ʋ be na a ɩ̃ pʋ̃ɔ, ɩ̃ mɩ be a ʋ pʋɔ.

⁵⁷ A ɩ̃ Sãa tɛrɛ na a baafʋ ɩ̃ tʋ̃ ma. Ɩ̃ a mɩnɛ ɩ̃ na tɛrɛ a baafʋ a yi a ʋ jie, a lɛ ʋ mɩ, a ʋlɔ na ꞌwɔb ma na tɛrɛ na a baafʋ a yi a ɩ̃ jie.

⁵⁸ A naa ɩ̃ ɩ a dɩb ʋlɔ na yi a saꞌlon ɩ̃ suu, ɩ̃ aa wɔ̃ taa nɩ a dɩb ʋlɔ a nyɩ sãa-kʋnbɔ na kpi, na dãa dɩ wa. A ʋlɔ na dɩrɛ a dɩbʼã, ʋ na tɛrɛ na a baafʋ daadaa kpoolaa.”

⁵⁹ A Jeeju ƴɛrʼã a ƴɛrɩ̃sɩ asɩmɛ a lɛ ʋ na dãa jaana a nɩbɛ a *puorfʋ yir a Kapɛɛnam.

A BAA-KƆ̃-TƐW ƳƐRƖ̃SƖ

⁶⁰ A lɛ a *Jeeju *par-tuurbe na wõ a ana ƴɛrɩ̃sɩ baar, a yaw jie a ba pʋɔ yele na: “A ƴɛrɩ̃ na kpɛmɛ na kpɛ! Ala ɩ̃ na tʋɔ sɔw?”

⁶¹ A Jeeju bɔw nɩ na a ʋ par-tuurbe na hũhune a ala ɩnɛ ɩ̃ yel ba: “A cɛ nyɩ na mɩɩ?

⁶² Ɩ̃ mɩnɛ a na pãa wɔ̃ nyɩ, a nyɩmɩ wa nyɛ a *Nɩbɛ Bie ʋ lɛ duoro a jie ʋlɔ ʋ na dãa be?

⁶³ A ʋlɔ na kʋrɔ a nɩrɛ a baafʋ ɩ na a Naaŋmɩn Sɩɛ. A nɩrɛ mɩ̃ɛ fãgã ma tʋɔrɔ maala bom wa. A ƴɛrɩ̃sɩ ala ɩ̃ na ƴɛr nyɩ ɩ na a Naaŋmɩn Sɩɛ ƴɛrɩ̃ nɩ a baafʋ ƴɛrɩ̃.

⁶⁴ Ɩ̃-cɛ ŋmɛɛ be na a nyɩ pʋɔ na ma sɔw wa.” A-na-ɩ a Jeeju dãa na bɔw a ʋlɔ nɔɔ diere ʋ a juu.

⁶⁵ Ʋ lɛ yelʼã: “Ala-ɩ̃-sɔ ɩ̃ yel nyɩ, a nɩrɛ ma tʋɔrɔ waara a ɩ̃ sɛ̃ ɩ̃ a ala ma ɩ a ɩ̃ Sãa ɩ̃ kʋ ʋ a sɔr wa.”

⁶⁶ Wa nyɔw nɩ a ʋna daarʼãa, a ʋ par-tuurbe yaw jie ŋma na yi maa lɛ cãa tu ʋ wa.

⁶⁷ A be jie, a Jeeju soorʼã a ʋ par-tuurbe pie-nʼayi: “A nyɩmɩ mɩ, nyɩ mɩ bʋɔrɔ na nyɩ ŋma yi mɩɩ?”

⁶⁸ A Sɩmɔ̃ Pɩɛr yel ʋ: “Nɩ-kpɛ̃ɛ, ala jie sɩ na cen? A-na-ɩ fʋ̃ʋ ɩ̃ tɛrɛ a baa-kɔ̃-tɛw ƴɛrɩ̃sɩ.

⁶⁹ Ɩ̃ a ƴɛ̃ƴɛrɩ̃, sɩ sɔw na ɩ̃ bɔ̃w ka fʋ̃ʋ ɩ̃ ɩ a Naaŋmɩn Nɩ-son ʋ na tʋ̃.”

⁷⁰ A Jeeju yel ba: “Aa ɩ maa ɩ̃ dãa vɛl ir a nyɩmɩ pie-nʼayi wa mɩɩ? Ɩ̃-cɛ bõ-ƴen a nyɩ pʋɔ ɩ na a Satã ben.”

⁷¹ A Sɩmɔ̃ Isikaryɔtɩ bie Judasɩ ʋ yele a lɛ, a-na-ɩ a mɩnɛ ʋ na saarɩ̃ ɩ a par-tuurbe pie-nʼayi ƴen sʋbɔ, ɩ̃ ʋlɔ nɔɔ de a Jeeju a juu.