Jã Sɛbɛ 4 - A NAAŊMƖN PƲLƖ̃-TA-PAALAA

A JEEJU NƖ A SAMARI-TẼW PƆW

¹ A *Farɩsɩ nɩbɛ wõ na áa *Jeeju pɔwrɔ na a *par-tuurbe ɩ̃ mɩ mʋrɔ ba a kʋ̃ɔmɩ, gãw a Jã.

² Ɩ̃-cɛ aa ɩ a Jeeju mɩ̃ɛ ɩ̃ ma dãa mʋrɔ a nɩbɛ a kʋ̃ɔ wa, a ʋ par-tuurbe ʋ.

³ A mɩnɛ a Jeeju na wõ a lɛ, ʋ yi na a be a Jude ɩ̃ lɩɛb cere a Galile,

⁴ ɩ̃-cɛ a sɛw na ʋ na tɔl yi a Samari.

⁵ A lɛ, ʋ cenʼã na ta a Sɩkaar-tẽw na be a Samari wɩɛr pʋɔ, ɩ̃ mɩ pɩɛlʼɩ̃ a Jakɔb puo ʋ na dãa kʋ a ʋ bi-daba Jojɛfʋ.

⁶ A be, a Jakɔb bulee be na be. A ɩ na a mɔtɔ̃-tuo daar, a Jeeju yɔ bal ɩ̃ jɛ a ʋna bulee nʋɔr,

⁷ a Samari pɔw kãw wa kʋ̃ɔ ꞌwɔ̃wfʋ, a Jeeju yel ʋ: “Kʋ ma a kʋ̃ɔ ɩ̃ nyu.”

⁸ (A ʋ par-tuurbe ma dãa be be wa. Ba cenʼã tẽw pʋɔ a dɩb dafʋ.)

⁹ A Samari pɔw yel a Jeeju: “A fʋ̃ʋ na ɩ a Jufi nɩrɛ, mɩnɛ fʋ na tʋɔ sʋɔr kʋ̃ɔ a maa na ɩ a Samari nɩrɛ jie?” (Ʋ yelʼã a lɛ a-na-ɩ a Jufisɩ nɩ a Samari nɩbɛ maa mʋ̃ɔ taa vũu wa.)

¹⁰ A Jeeju yel ʋ: “A ala ɩ̃ ɩ fʋ dãa na bɔ̃w a ala a Naaŋmɩn na kʋrɔ a nɩbɛ, ɩ̃ mɩ bɔ̃w a ʋlɔ na sʋɔr fʋ a kʋ̃ɔ, fʋ̃ʋ naa ɛ̃ɛ dãa sʋɔr ʋ, ɩ̃ ʋ naa kʋ fʋ na a kʋ̃ɔ bunaa.”

¹¹ A pɔw yel ʋ: “Nɩ-kpɛ̃ɛ, faa tɛrɛ miir wa, ɩ̃ a bulee ma kpɛ ɩɛ wa. Mɩnɛ fʋ na ɩ ɩ̃ pɔw a kʋ̃ɔ bunaa?

¹² Fʋ̃ʋ bɛrmɛ gãw a sɩ sãa-kʋmɔ Jakɔb mɩɩ? Ʋlɔ ɩ̃ kʋ sɩ a bulee na ɩ̃ a ʋ mɩ̃ɛ mɩ nyu na a kʋ̃ɔ na nɩ a ʋ bibiir lãa nɩ a ʋ dʋn.”

¹³ A Jeeju yel ʋ: “A nɩrɛ lɛ na nyu a kʋ̃ɔ na, kʋ̃ɔ-nyuur na lɛ nyɔw ʋ na,

¹⁴ ɩ̃-cɛ a nɩrɛ lɛ nɔɔ nyuure a kʋ̃ɔ ʋlɔ ɩ̃ nɔɔ kʋrɔ ʋ, kʋ̃ɔ-nyuur ma lɔɔ nyɔwrɔ ʋ go wa, a-na-ɩ a kʋ̃ɔ ʋlɔ ɩ̃ na kʋrɔ ʋ na lɩɛbʼã ɩ kʋ̃ɔ bunaa a ʋ pʋ̃ɔ. A ʋna kʋ̃ɔ naa ɩ na a baa-kɔ̃-tɛw na bune yire a ʋ pʋ̃ɔ.”

¹⁵ A pɔw yel a Jeeju: “Nɩ-kpɛ̃ɛ, kʋ ma a ʋna kʋ̃ɔ a mɩnɛ a kʋ̃ɔ-nyuur kɔ̃ɔ lɔɔ nyɔw ma, ɩ̃ lɔɔ wa a ka a kʋ̃ɔ ꞌwɔ̃wfʋ wa.”

¹⁶ A Jeeju yel ʋ: “Cen na bʋɔl a fʋ sɩrɛ a nyɩ lãa wa.”

¹⁷ A pɔw yel ʋ: “Maa tɛrɛ sɩrɛ wa.” A Jeeju yel ʋ: “Yel-mɩ̃ɛ fʋ yel á faa tɛrɛ sɩrɛ wa,

¹⁸ a-na-ɩ fʋ dãa na kul dabsɩ anuu ɩ̃ a daba ʋlɔ fʋ na tɛrɛ a ƴɛ̃ƴɛrɩ̃ na ma ɩ a fʋ sɩrɛ wa. Yel-mɩ̃ɛ fʋ yel ma.”

¹⁹ A pɔw yel ʋ: “Nɩ-kpɛ̃ɛ, ɩ̃ bɔ̃w na Naaŋmɩn ƴɛr-hiere fʋ ɩ.

²⁰ A tãw na juu a sɩ sãa-kʋnbɔ ma dãa puoro a Naaŋmɩn, ɩ̃-cɛ a nyɩmɩ Jufisɩ yel áa Jerujalɛm ɩ̃ sɛw a nɩbɛ ba puoro.”

²¹ A Jeeju yel ʋ: “Pɔw wee, sɔw a ala ɩ̃ na yele fʋ. A daar tara na, a kɔ̃ ɩ a tãw na juu, mɩɩ a Jerujalɛm nyɩ na lɛ puor a Sãa Naaŋmɩn wa.

²² A nyɩmɩ Samari deme, nyɩ puoro na a ala nyɩ na ma bɔ̃w wa, ɩ̃ a sɩmɩ Jufisɩ, sɩ bɔ̃w na a ala sɩ na puoro, a-na-ɩ a Fafaara yi na a Jufisɩ jie.

²³ A daar tara na ɩ̃ ʋ gɔrʼã ta baar, a mɩnɛ a bala na puoro a Sãa Naaŋmɩn a sɩrɛ jaa, ba na puoro ʋ na a sɩɛ pʋɔ nɩ a yel-mɩ̃ɛ, a-na-ɩ a popuor-lɛ a Sãa bʋɔrɔ.

²⁴ Sɩɛ a Naaŋmɩn ɩ, ɩ̃ a bala na puoro ʋ sɛw na na puoro ʋ a sɩɛ pʋɔ nɩ a yel-mɩ̃ɛ pʋɔ.”

²⁵ A pɔw yel a Jeeju: “Ɩ̃ bɔ̃w ka a ʋlɔ a Naaŋmɩn na tʋ̃ na wa na, a ʋlɔ ba na bʋɔlɔ a *Kirisi. A ʋlɔ wa wa, ʋ na man sɩ na a yele a jaa.”

²⁶ A Jeeju yel ʋ: “A maa naa na ƴɛrɛ nɩ fʋ, a maa ʋ.”

²⁷ A jie naan, a Jeeju par-tuurbe lɩɛbʼã wa, a nɔɛ ko ba a mɩnɛ ba na nyɛ a Jeeju ʋ ƴɛrɛ nɩ a pɔw. Ɩ̃ kãw ma ꞌla soor á bõ fʋ bʋɔrɔ, mɩɩ á bõ ɩ̃ ɩ a fʋ ƴɛrɛ nɩ a pɔw na wa?

²⁸ A be jie, a pɔw barʼã a ʋ yuor ɩ̃ lɩɛb kpɛ a tẽw pʋɔ na yel a nɩbɛ:

²⁹ “Nyɩ́ wa nyɛ daba na yel ma a yele ala a jaa ɩ̃ na dãa maal. Á wa ɩ ʋlɔ ɩ̃ ɩ a Kirisi mɩɩ?”

³⁰ A nɩbɛ yi a tẽw ʋlɔ pʋɔ ɩ̃ wɩɛrɛ a Jeeju sɛ̃.

³¹ A daar ʋlɔ pʋɔ, a Jeeju par-tuurbe sʋɔrɔ ʋ na yele nɩ: “Jãjaana, dɩ a dɩb!”

³² Ɩ̃-cɛ ʋ yel ba na: “Ɩ̃ tɛrɛ na a dɩb ʋlɔ nyɩ na ma bɔ̃w wa.”

³³ Ala-ɩ̃-sɔ ba sooro na taa: “Á wa ɩ nɩrɛ wa nɩ a bõ-dɩraa na kʋ ʋ mɩɩ?”

³⁴ A Jeeju yel ba: “A ɩ dɩb ɩ na ɩ maal a ʋlɔ na tu ma pʋ-tɩɛrʋ̃, ɩ mɩ tu a tʋmɔ ala ʋ na kʋ ma baar.

³⁵ A nyɩmɩ, nyɩ ma yelʼã á cur anaan pʋɔ áa ci ŋmafʋ na ta na. Ɩ̃-cɛ a maa, ɩ̃ yele nyɩ na, nyɩ́ bɔ̃w ꞌwuor a por nyɛ, a ci mʋ̃ɔ na sɛw a ŋmafʋ.

³⁶ A ʋlɔ na ŋmara a ci gɔrʼã pɔwrɔ a ʋ yar, ɩ̃ ʋ mɩ wooro na a ci biine a baa-kɔ̃-tɛw ɩnɛ, a mɩnɛ a ʋlɔ na bʋr nɩ a ʋlɔ na ŋmara na tʋɔ lãa cɩlɛ.

³⁷ A-na-ɩ a ƴɛr-birʼã ɩ na sɩrɛ na yel: a bõ-ƴen ɓʋrʼã ɩ̃ a kãw ŋma.

³⁸ A maa, ɩ̃ tʋ nyɩ na a nyɩ cen na ŋma a ci a puo ʋlɔ pʋɔ nyɩ na ma dãa kɔ wa. A ŋmɛɛ kɔ na ɩ̃ nyɩmɩ lɩɛb de a ala ba naa dãa pɔw.”

³⁹ A Samari nɩbɛ yaw jie na be a ʋna tẽw pʋɔ sɔw na a Jeeju a-na-ɩ a ʋna pɔw dãa na man ba yel: “Ʋ yel ma na a yele ala a jaa ɩ̃ na dãa maal.”

⁴⁰ Ala-ɩ̃-sɔ a lɛ a Samari nɩbɛ na ta a Jeeju sɛ̃, ba sʋɔr ʋ na a ʋ jɛ be a ba jie, ʋ jɛ a be maal bibie ayi.

⁴¹ Ɩ̃ a yaw jie mɩ lɛ sɔw ʋ na a ala a ʋlɔ mɩ̃ɛ na ƴɛrɛ ɩnɛ,

⁴² ɩ̃ yel a pɔw: “Aa cãa ɩ a ala fʋ na dãa yel sɩ ɩnɛ sɩ sɔw wa, ɩ̃-cɛ a sɩmɩ mɩ̃ɛ, sɩ mɩ wõ na ɩ̃ mɩ bɔ̃w ka ʋlɔ ɩ̃ sɩrɩ̃ ɩ a tẽw nɩbɛ ba jaa Fafaara.”

A JAMANA YIR NƖ-KPƐ̃Ɛ BI-DABA A JEEJU NA KPƐMƐ

⁴³ A lɛ a ana bibie na tɔl baar, a *Jeeju yi na a be ɩ̃ cen a Galile,

⁴⁴ a-na-ɩ a Jeeju mɩ̃ɛ dãa na yel áa nɩbɛ maa ƴɔ̃w a Naaŋmɩn ƴɛr-hiere a ʋ mɩ̃ɛ tẽw pʋɔ wa.

⁴⁵ A lɛ ʋ na ta a Galile, a tẽw ʋlɔ nɩbɛ de ʋ na vɩlaa a-na-ɩ ba mɩ dãa na cen a *Pakɩ fɛtɩ dɩfʋ jie a Jerujalɛm, ɩ̃ ba nyɛ na a ala a jaa ʋ na dãa maal a be.

⁴⁶ Ʋ lɛ lɩɛbʼã cen a Kana be a Galile wɩɛr, na ɩ a jie ʋlɔ ʋ na dãa maal a kʋ̃ɔ a lɩɛb ɩ a dɩvɛ̃. A jamana yir nɩ-kpɛ̃ɛ be na be a Kapɛɛnam ɩ̃ tɛrɛ bie ʋ ɩ wʋlɩ̃.

⁴⁷ A lɛ ʋ na wõ áa Jeeju yi na a Jude ɩ̃ wɩ a Galile, ʋ cenʼã na sʋɔrɔ ʋ a ba lãa cen a Kapɛɛnam ʋ kpɛmɛ a ʋ bie na kpiire.

⁴⁸ A Jeeju yel ʋ: “A ala ma ɩ a nɔ-kofʋ tʋmɔ na miile a Naaŋmɩn kpɛ̃w nyɩ nyɛ wa, nyɩ maa ƴɔ̃w nyãa fɩ̃ɩ wa.”

⁴⁹ A jamana yir nɩ-kpɛ̃ɛ yel ʋ: “Nɩ-kpɛ̃ɛ, wa a sɩ cen, a mɩnɛ a ɩ̃ bie kɔ̃ bɔr wa.”

⁵⁰ A Jeeju yel ʋ: “Kul, a fʋ bie kpaarʼã,” a daba sɔw a ƴɛrɩ̃ ʋlɔ ʋ na yel ʋ ɩ̃ kul.

⁵¹ Ɩ̃ a lɛ ʋ na cãa be a sɔr pʋɔ kule, a ʋ tʋ̃tʋnbɔ tuor ʋ na ɩ̃ yel: “A fʋ bie kpaarʼã,”

⁵² ʋ soor ba: “Dabor ʋ kpɛmɛ?” a ba yel ʋ: “Jamɩ mɔtɔ̃-tuo daar a ʋ ɩ̃gan kporfʋ baar.”

⁵³ A lɛ, a sãa bɔ̃wnaa na bɔ̃w ka a daar ʋlɔ pʋɔ a Jeeju na yel ʋ áa ʋ bie kpaarʼã, ɩ̃ a ʋlɔ nɩ a ʋ yir deme ba jaa sɔw de a Jeeju.

⁵⁴ A Jeeju nɔ-kofʋ tʋn nɩ a naa ʋ na lɛ tu maal a lɛ ʋ na yi a Jude ɩ̃ cen a Galile.