Jã Sɛbɛ 21 - A NAAŊMƖN PƲLƖ̃-TA-PAALAA

A JEEJU NA NYƖR A Ʋ PAR-TUURBE ANUU-NʼAYI

¹ A ala na tɔl baar, a *Jeeju lɛ nyɩrʼã a ʋ *par-tuurbe a Tiberiyadi man gbẽgbere nʋɔr. Nyɛ a mɩnɛ ʋ na nyɩr ba.

² A bala na be taa ɩ na a Sɩmɔ̃ Pɩɛr nɩ a Tomasɩ ba na bʋɔlɔ a Yɩb, nɩ a Natanɩɛl na yi a Kana na be a Galile wɩɛr, nɩ a Jebede bi-dabsɩ ayi nɩ a Jeeju par-tuurbe ayi go.

³ A Sɩmɔ̃ Pɩɛr yel ba: “Ɩ̃ cere na jɩmɛ nyɔɔrfʋ.” A ba yel ʋ: “Sɩ na mɩ pɔw fʋ na lãa cenʼɩ̃.” A lɛ, ba yi na kpɛ a gbor pʋɔ cen, ɩ̃-cɛ baa nyɔw bom a ʋna tɩsɔw naa wa.

⁴ A mɩnɛ a bio na vɩɛrɛ, a Jeeju ɩraa na be a man gbẽgbere nʋɔr, ɩ̃-cɛ a par-tuurbe ma dãa bɔ̃w ka ʋlɔ ʋ wa.

⁵ A Jeeju soor ba: “Ɩ̃ bibiir, nyaa pɔw a jɩmɛ wa mɩɩ?” A ba yel ʋ: “Kpee!”

⁶ Ʋ yel ba: “Nyɩ́ lɔb a jʋɔ a gbor dʋrɩ̃ loor, ɩ̃ nyɩ na pɔw na.” A lɛ, ba lɔbʼã a jʋɔ ɩ̃ ma lɛ tʋɔrɔ tawra ʋ yire nɩ a kʋ̃ɔ pʋɔ wa, a-na-ɩ ʋ nyɩrɩ̃ na sɛw nɩ a jɩmɛ.

⁷ A *par-tuure ʋlɔ a Jeeju na nʋ yelʼã a Pɩɛr: “A Nɩ-kpɛ̃ɛ ʋ!” A lɛ a Sɩmɔ̃ Pɩɛr na wõ áa Nɩ-kpɛ̃ɛ ʋ, ʋ su na a ʋ kparʋ ɩ̃ aw lo a kʋ̃ɔmɩ (a-na-ɩ ɩ̃gan ɓuol ʋ dãa tɛrɛ).

⁸ Ɩ̃ a par-tuurbe bala na cɛ wɩ nɩ na a gbor, tawra nɩ a jʋɔ na sɛw nɩ a jɩmɛ, a-na-ɩ mɛɛtɩr kʋbaa tɛw ba dãa jãa nɩ a tene.

⁹ A mɩnɛ ba na yi a gbẽgbere juu, ba nyɛ na vũu na ꞌlere, a jɩmɛ be a ʋ juu, ɩ̃ a buru mɩ be be.

¹⁰ A Jeeju yel ba: “Nyɩ ir a jɩmɛ ala nyɩ na nyɔɔr a ƴɛ̃ƴɛrɩ̃ wa nɩ”,

¹¹ a Sɩmɔ̃ Pɩɛr kpɛ a gbor pʋɔ ɩ̃ taw a jʋɔ na sɛw nɩ a jɩ̃-bɛrɛ, yi nɩ a gbẽgbere juu. A jɩmɛ ɩ na kʋbaa lɩjaayi nɩ pie-nʼata, ɩ̃ a mɩnɛ a na saarɩ̃ waa a lɛ, a jʋɔ ma ɓer wa.

¹² A Jeeju yel ba: “Nyɩ́ wa dɩ a dɩb.” Ɩ̃ par-tuure kãw ma ꞌla soor ʋ a ala ʋ ɩ wa, a-na-ɩ ba bɔ̃w ka a Nɩ-kpɛ̃ɛ ʋ.

¹³ A Jeeju wɩ na de a buru kʋ ba ɩ̃ mɩ kʋ ba a jɩmɛ.

¹⁴ A ɩ na gbɛɛ ata a lɛ, a mɩnɛ a Jeeju na nyɩr a ʋ par-tuurbe a lɛ ʋ na ir a kũu pʋɔ.

A JEEJU NƖ A PƖƐR

¹⁵ A lɛ ba na dɩ a dɩb baar, a *Jeeju soorʼã a Sɩmɔ̃ Pɩɛr: “Jã bi-daba Sɩmɔ̃, fʋ nʋ ma na gãw a basɩmɛ mɩɩ?” Ʋ yel: “Ɔɔ. Nɩ-kpɛ̃ɛ, fʋ bɔ̃w ka ɩ̃ nʋ fʋ na.” A Jeeju yel ʋ: “Bɔ̃w ꞌwuoro a ɩ̃ peli.”

¹⁶ Ʋ soor ʋ na gbɛɛ ayi pʋɔ: “Jã bi-daba Sɩmɔ̃, fʋ nʋ ma na mɩɩ?” Ʋ yel ʋ: “Ɔɔ. Nɩ-kpɛ̃ɛ, fʋ bɔ̃w ka ɩ̃ nʋ fʋ na.” A Jeeju yel ʋ: “Bɔ̃w ꞌwuoro a ɩ̃ piir.”

¹⁷ Ʋ lɛ soor ʋ na gbɛɛ ata pʋɔ: “Jã bi-daba Sɩmɔ̃, fʋ nʋ ma na mɩɩ?” Suur sãw na a Pɩɛr a mɩnɛ a Jeeju na soor ʋ a gbɛɛ ata pʋɔ á ʋ nʋ ʋ na mɩɩ? Ala-ɩ̃-sɔ ʋ yel ʋ: “Nɩ-kpɛ̃ɛ, fʋ bɔ̃w na a yele a jaa; fʋ bɔ̃w ka ɩ̃ nʋ fʋ na.” A Jeeju yel ʋ: “Bɔ̃w ꞌwuoro a ɩ̃ piir.

¹⁸ Yel-mɩ̃ɛ ɩ̃ yele fʋ, a lɛ fʋ na dãa cãa ɩ a polbile, fʋ̃ʋ ɩ̃ ma dãa sɛ a sɩɛ gan fʋ yẽ cere nɩ a jie ʋlɔ fʋ na bʋɔrɔ. Ɩ̃-cɛ a fʋ̃ʋ wa kor baar, fʋ na jã na a nur ɩ̃ a nɩ-kpee sɛ fʋ a sɩɛ gan ɩ̃ taw fʋ cenʼɩ̃ a jie ʋlɔ fʋ na ma bʋɔrɔ fʋ cen wa.”

¹⁹ A Jeeju ƴɛrʼã a lɛ miilʼɩ̃ a kũu wɔ̃ mɩnɛ a Pɩɛr nɔɔ kpiire, a na maal a Naaŋmɩn yuor ʋ yi. A lɛ ʋ na ƴɛr a lɛ baar, ʋ yel ʋ na: “Tuure ma!”

A JEEJU NƖ A PAR-TUURE ƲLƆ Ʋ NA NƲ

²⁰ A Pɩɛr ŋmelɩ̃ na nyɛ a *par-tuure ʋlɔ a *Jeeju na nʋ ʋ tuure ba. (Ʋ ɩ na a ʋlɔ na dãa gã dɩɛl a Jeeju a lɛ ba na dɩrɛ a dɩb ɩ̃ soor ʋ: “Nɩ-kpɛ̃ɛ, ala ɩ̃ ɩ a ʋlɔ nɔɔ diere fʋ a juu?”)

²¹ A lɛ a Pɩɛr na nyɛ ʋ, ʋ soorʼã a Jeeju: “Nɩ-kpɛ̃ɛ, ɩ̃ a naa, bõ ɩ̃ nɔɔ ta ʋ?”

²² A Jeeju yel ʋ: “A maa bʋɔrɔ ʋ cãa be be wa ta nɩ a daar ʋlɔ ɩ̃ na lɩɛbɛ waara, a ɩ na fʋ ƴɛrɩ̃ mɩɩ? A fʋ̃ʋ, tuure ma!”

²³ A lɛ, a ʋna ƴɛrɩ̃ yɛrʼã pɔw a yɛɛr sɔ̃w áa ʋna par-tuure naa ma kpiire wa. Ɩ̃ a Jeeju ma yel a Pɩɛr áa ʋna par-tuure ma kpiire wa, ɩ̃-cɛ ʋ yel ʋ na: “A maa bʋɔrɔ ʋ cãa be be wa ta nɩ a daar ʋlɔ ɩ̃ na lɩɛbɛ waara, a ɩ na fʋ ƴɛrɩ̃ mɩɩ?”

²⁴ A ʋna par-tuure naa ɩ̃ de a yele asɩmɛ mana, ɩ̃ sɛb ƴɔ̃w a sɛbɛ pʋɔ, ɩ̃ sɩ bɔ̃w ka a ala ʋ na mana ɩ na yel-mɩ̃ɛ.

A ƳƐR-BAARAA

²⁵ Tʋ̃-yaw lɛ cãa na be be a *Jeeju na maal. A ala ɩ̃ ɩ ba dãa na sɛbɛ a ala a jaa bõ-ƴene-ƴene ƴɔnɔ a sɛbsɩ pʋʋr, maa sɔw ka a tẽw ʋ jaa naa tʋɔ na tɛrɛ a ana sɛbsɩ wa.