Jã Sɛbɛ 16 - A NAAŊMƖN PƲLƖ̃-TA-PAALAA

¹ “Ɩ̃ yel nyɩ na a lɛ, a mɩnɛ a bom kãw kɔ̃ wa maal nyɩa nyɩ ŋmaa yi wa.

² A Jufisɩ na diw nyɩ na bar a ba *puorfʋ yie pʋɔ, ɩ̃ a daar tara na a nɩrɛ lɛ ɩ̃ wa kú nyɩ, ʋ na tɩɛrʼã beeka a Naaŋmɩn tʋn ʋ tʋ̃ a lɛ.

³ Ba na maalʼã a lɛ, a-na-ɩ baa bɔ̃w a maa nɩ a Sãa wa.

⁴ Ɩ̃-cɛ ɩ̃ man nyɩ na a lɛ a mɩnɛ a daar ɩ̃ wa ta a ba maala nyɩ a yele ala, a nyɩ na tɩɛr bɔ̃w ka ɩ̃ dãa na yel nyɩ. “Maa dãa man nyɩ a ana yele a nyɔwfʋ jie wa, a-na-ɩ ɩ̃ dãa na cãa be a nyɩ sɔ̃w,

A NAAŊMƖN SƖƐ TƲMƆ

⁵ ɩ̃-cɛ a ƴɛ̃ƴɛrɩ̃ na, ɩ̃ cere na a ʋlɔ na tʋ̃ ma sɛ̃, ɩ̃ bõ-ƴen kãw a nyɩ pʋɔ ma mɩ soor ma a nyɩnɛ ɩ̃ cere wa.

⁶ Ɩ̃ nãw nyɩrɩ̃ na be a nyɩ jie a mɩnɛ ɩ̃ na yel nyɩ a lɛ,

⁷ ɩ̃-cɛ sɩrɛ jaa ɩ̃ yele nyɩ, a na ɩ na son a nyɩ jie ɩ̃ na cen, a-na-ɩ a maa ma cen wa, a Sõsũono kɔ̃ wa a nyɩ jie wa, ɩ̃-cɛ a maa ɩ̃ cen, ɩ̃ na tʋ̃ ʋ na ʋ wa a nyɩ sɛ̃.

⁸ Ʋ na maalʼã a tẽw pʋɔ nɩbɛ a ba bɔ̃w a ala na ɩ a maal-fãa, nɩ a ala na ɩ a torfʋ, nɩ a mɩnɛ a Naaŋmɩn nɔɔ guoro a ba ƴɛrɩ̃sɩ.

⁹ Ʋ na maal ba na a ba bɔ̃w a ba maal-fãa a-na-ɩ baa sɔw de ma wa.

¹⁰ Ʋ na mɩ maal ba na a ba bɔ̃w a torfʋ a-na-ɩ ɩ̃ cere na a Sãa sɛ̃ a nyaa lɔɔ nyɛrɛ ma wa.

¹¹ Ʋ na mɩ man ba na a ƴɛrɩ̃ guorfʋ ɩnɛ, a-na-ɩ a Naaŋmɩn gɔrʼã ƴɔ̃w *a tẽw na jamana a ƴɛrɩ̃ baar.

¹² “Ɩ̃ cãa na tɛrɛ ƴɛr-yaw na man nyɩ, ɩ̃-cɛ a ƴɛ̃ƴɛrɩ̃ na, a par bɔ̃wfʋ na kpɛmɛ nyɩ na,

¹³ ɩ̃-cɛ a lɛdaar a Yel-mɩ̃ɛ Sɩɛ nɔɔ waara, ʋ na tɔw nyɩ na a nyɩ bɔ̃w a yel-mɩ̃ɛ par ʋ jaa. A-na-ɩ ʋ kɔ̃ ƴɛrɛ a ʋ mɩ̃ɛ ƴɛrɩ̃ wa, ɩ̃-cɛ ʋ na ƴɛrɛ na a ala tɛw ʋ na wõ, mɩ mana nɩ nyɩ a yele ala nɔɔ waara.

¹⁴ Ʋ na maalʼã a ɩ̃ yuor ʋ yire a-na-ɩ ʋ na de na a ala na ɩ a ɩ̃ ben mana kʋrɔ nyɩ.

¹⁵ A yele ala a jaa a Sãa na tɛrɛ mɩ ɩ na a ɩ̃ ben, ala-ɩ̃-sɔ ɩ̃ yel áa Naaŋmɩn Sɩɛ na de na a ala na ɩ a ɩ̃ ben mana kʋrɔ nyɩ.

A NƲ̃Ɔ NA LƖƐRƐ A NÃW

¹⁶ “A na ɩ na fɩ̃ɩ ɩ̃ nyɩ kɔ̃ lɛ nyɛ ma wa, ɩ̃ a fɩ̃ɩ pʋɔ go, nyɩ na lɛ nyɛ ma na.”

¹⁷ A lɛ, a *Jeeju *par-tuurbe ŋmɛɛ sooro na taa: “Bõ ɩ̃ dɩ a lɛ ʋ na yel sɩ áa na ɩ na fɩ̃ɩ a sɩ kɔ̃ lɛ nyɛ ʋ wa, ɩ̃ a fĩɩ pʋɔ go, á sɩ na lɛ nyɛ ʋ na, nɩ a mɩnɛ ʋ na yel á ʋ cere na a Sãa sɛ̃?”

¹⁸ Ba sooro na taa: “Bõ ɩ dɩ a fĩɩ ʋ na yel? Saa bɔ̃w a ʋ ƴɛrɩ̃ ʋlɔ par wa.”

¹⁹ A Jeeju bɔ̃w na a ba bʋɔrɔ na ba soor ʋ ɩ yel ba: “A mɩnɛ ɩ na yel nyɩ áa na ɩ na fĩɩ ɩ nyɩ kɔ̃ lɛ nyɛ ma wa, ɩ a fĩɩ pʋɔ go, á nyɩ na lɛ nyɛ ma na, ala ɩnɛ nyɩ sooro taa mɩɩ?

²⁰ Yel-mɩ̃ɛ ɩ yele nyɩ, nyɩ na kono na sɔrɔ nɩ a kõ-yel-bie, ɩ̃-cɛ a tẽw pʋɔ nɩbɛ cɩlɛ. Nãw na nyɔw nyɩ na, ɩ̃-cɛ a nʋɔ na bɩɛrʼã a nyɩ nãw.

²¹ A lɛdaar a pɔw na wala, nãw ma be na a ʋ jie a-na-ɩ a ʋ won daar ta na. Ɩ̃-cɛ a lɛ ʋ na wa dɔw baar, ʋ ma hiinʼã a ʋ won bar, a-na-ɩ nʋɔ be na a ʋ jie a lɛ a bie na yi baar.

²² A lɛ ʋ mɩ, nãw mɩ be na a nyɩ jie a ƴɛ̃ƴɛrɩ̃, ɩ̃-cɛ ɩ nɔɔ lɛ nyɛ nyɩ na, a nʋɔ be a nyɩ jie, ɩ a ʋna nʋɔ naa, nɩrɛ kɔ̃ tʋɔ sãw ʋ bar wa.

²³ “A bibir ʋlɔ ɩ wa ta, nyaa lɛ sooro ma bom wa. Yel-mɩ̃ɛ ɩ yele nyɩ, a bom lɛ nyɩ na diere a ɩ yuor sʋɔrɔ nɩ a Sãa sɛ̃, ʋ na kʋ nyɩ na.

²⁴ Wa ta nɩ a ƴɛ̃ƴɛrɩ̃, nyaa dãa de a ɩ yuor sʋɔrʼɩ̃ bom wa. Nyɩ́ sʋɔr ɩ nyɩ na pɔw na, a nʋɔ na ƴala nyɩ.

A JEEJU TƲƆ NA A TẼW NA Nɩ A Ʋ FÃW

²⁵ “Sʋkpar ɩ lɔbɔ mana nɩ nyɩ a yele ala, ɩ a daar tara na ɩ kɔ̃ lɔɔ lɔb nyɩ sʋkpar wa, ɩ ɩ na man nyɩ na a Sãa ƴɛrɩ̃ a nyɩr cãa pʋɔ.

²⁶ A ʋna bibirʼãa, nyɩ na de na a ɩ yuor sʋɔrʼɩ̃ a Sãa. Ɩ̃ maa yel nyɩ a ɩ na sʋɔrʼã a Sãa a nyɩ ɩnɛ wa,

²⁷ a-na-ɩ a Sãa mɩ̃e nʋ nyɩ na, a mɩnɛ nyɩ na nʋ ma ɩ sɔw bɔ̃w ka ɩ̃ yi na a Naaŋmɩn jie.

²⁸ A Sãa jie ɩ yi ɩ wa ka a tẽw pʋɔ, ɩ a ƴɛ̃ƴɛrɩ̃ na, ɩ yire na ka a tẽw pʋɔ ɩ lɩɛbɛ cere a Sãa jie.”

²⁹ A ʋ *par-tuurbe yel ʋ: “Faa nyɛ a ƴɛ̃ƴɛrɩ̃ na fʋ na ƴɛrɛ gbelẽgbelẽ, ma lɛ cãa lɔbɔ sʋkpar wa.

³⁰ A ƴɛ̃ƴɛrɩ̃ na, sɩ pãa na bɔ̃w ka fʋ bɔ̃w na a yele a jaa, ɩ faa bʋɔrɔ nɩrɛ ʋ soor fʋ bom kãw wa, ala-ɩ̃-sɔ a sɩ sɔw bɔ̃w ka a Naaŋmɩn jie fʋ yi.”

³¹ A *Jeeju soor ba: “Nyɩ pãa na sɔw ƴɛ̃ƴɛrɩ̃?

³² A daar tara na ɩ ʋ gɔrʼã ta baar, a nyɩ na ŋma kpee kpee jɔ kul a nyɩ yie ɩ cɛ ma bar ɩ yẽ, ɩ̃ maa ɩ ɩ yẽ wa a-na-ɩ a Sãa be nɩ ma na.

³³ Ɩ̃ yel nyɩ na a lɛ a nyɩ na tɛrɛ a su-ɓaar, a-na-ɩ nyɩ be na a ɩ pʋɔ. Nyɩ na tɛrɛ na won a ka a tẽw pʋɔ, ɩ̃-cɛ nyɩ́ var suur, a-na-ɩ ɩ̃ tʋɔ na a tẽw nɩ a ʋ fãw.”