Jã Sɛbɛ 12 - A NAAŊMƖN PƲLƖ̃-TA-PAALAA

A MAARƖƖ NA CIR A KÃ-NYU-VƖLAA ƳƆ̃W A JEEJU GBƐƐ PƲƆ

¹ Bibie ayʋɔb ɩ̃ cɛ ɩ̃ a *Pakɩ fɛtɩ na ta, a *Jeeju cen a Betani, na ɩ a jie a Lajaar ʋlɔ ʋ na dãa ir a kũu pʋɔ na be.

² Ba maalʼã a dɩb kʋ ʋ a be, a Martɩ ɩ a dɩb-poro, ɩ̃ a Lajaar mɩ dãa na be a nɩbɛ bala pʋɔ na lãa jɛ a dɩb par nɩ a Jeeju.

³ A Maarɩɩ de na a kã-nyu-vɩlaa ba na bʋɔlɔ a *naar na ma kpɛmɛ a dafʋ ɩɛ wa, wa nɩ cir ƴɔ̃w a Jeeju gbɛɛ pʋɔ ɩ̃ fɔfɔ nɩ ʋ a jukɔbɔ, a kãa nyuu de a yir ʋ jaa.

⁴ A Jeeju *par-tuure ƴen sʋbɔ na dɩ a Judasɩ Isikaryɔtɩ, na ɩ a ʋlɔ nɔɔ diere ʋ a juu yelʼã:

⁵ “Bõ ɩ̃ ɩ a baa dãa de a kãa na da warbie ture lɩjaata na ba kʋ a nãw deme wa?”

⁶ ꞌWaa yel a lɛ a-na-ɩ a nãw deme ben bá ʋ na wa, ɩ̃-cɛ a-na-ɩ nyanyuur ʋ ɩ, ɩ̃ a mɩnɛ a na ɩ a ʋlɔ ɩ̃ ma tɛrɛ a libie wʋɔ, ʋ ma jure na a ala ba na ƴɔnɔ a be.

⁷ Ɩ̃-cɛ a Jeeju yelʼã: “Bar a pɔw jaa jom! Bar ʋ ʋ tɛɛlɛ a kã-nyu-vɩlaa na a ɩ̃ ũufʋ bibir ɩnɛ.

⁸ Nyɩ na tɛrɛ na a nãw deme a nyɩ sɔ̃w a daar a jaa, ɩ̃-cɛ a maa, nyaa tɛrɛ ma a nyɩ sɔ̃w a daar a jaa wa.”

A LAJAAR BA NA GORO A KUFƲ

⁹ A Jufisɩ yaw jie wõ na áa *Jeeju be na a Betani, ɩ̃ na ba cen. Ɩ̃ aa ɩ a Jeeju ɩnɛ tɛw ba cen wa, ɩ̃-cɛ ba bʋɔrɔ na ba mɩ nyɛ a Lajaar ʋ na ir a kũu pʋɔ.

¹⁰ Ala-ɩ̃-sɔ a *baar-lo-nɩ-bɛrɛ mɩ goro na taa a ba na mɩ kú na a Lajaar,

¹¹ a-na-ɩ a ʋlɔ ɩnɛ a Jufisɩ yaw jie bara a baar-lo-nɩ-bɛrɛ sɔr ɩ̃ ƴɔnɔ a Jeeju nyãa.

A JEEJU NA KPƐ A JERUJALƐM-TẼW

¹² A dɩvɩɛ bio, a nɩ-yaw bala na wɩ a fɛtɩ jie wõ na áa *Jeeju tara na be a Jerujalɛm.

¹³ A lɛ, ba ɓɛlʼã a pã-bie tɩɩr vɛɛ na ba yi tuoro nɩ ʋ ɩ̃ wuure nɩ kpɛ̃w yele: “*Oojana! A Nɩ-kpɛ̃ɛ Naaŋmɩn ú be nɩ a ʋlɔ na waara nɩ a ʋ yuor! A Naaŋmɩn ú be nɩ a *Ɩsɩrayɛl jamana!”

¹⁴ A Jeeju nyɛ na a bʋ̃ɔ, do jɛ a ʋ juu, a mɩnɛ a na yel a Naaŋmɩn Sɛbɛ pʋɔ:

¹⁵ “*Sɩ̃ɔ-tẽw nɩbɛ, nyɩ taa jɔrɔ dãbɩ̃ɛ wa! Nyɩ́ nyɛ a nyɩ jamana na do a bʋ̃-bile waara nɩ.”

¹⁶ A ʋna daarʼã pʋɔ, a ʋ *par-tuurbe ma dãa bɔ̃w a par sɛr wa, ɩ̃-cɛ a lɛ a Naaŋmɩn na miilʼɩ̃ a Jeeju yo-yifʋ baar, ala ba pãa tɩɛr yuo a ala a Naaŋmɩn Sɛbɛ na dãa yel a ʋ ɩnɛ, ɩ̃ a ɩ na a ala a nɩbɛ na maal a ʋ jie.

¹⁷ A bala ba jaa na dãa be nɩ a Jeeju ɩ̃ nyɛ a Lajaar ʋ na bʋɔl ʋ yi a yaa pʋɔ lɛ ɩ a nɩ-mimir, ba mɩɩnɛ na kʋrɔ a nɩbɛ.

¹⁸ Ala-ɩ̃-sɔ nɩ-yaw tuoro na a Jeeju a-na-ɩ ba wõ na a ʋna nɔ-kofʋ tʋn ʋ na dãa maal.

¹⁹ Ɩ̃ a *Farɩsɩ nɩbɛ yele na taa: “Nyɩ nyɛ na, saa tʋɔrɔ maala bom wa; a tẽw nɩbɛ ba jaa tuure ʋ na!”

A GƖRƐKƖ NƖBƐ NA BƲƆRƆ A JEEJU

²⁰ A Gɩrɛkɩ nɩbɛ ŋmɛɛ be na a bala pʋɔ na wa a puorfʋ ɩnɛ a fɛtɩ jie be a Jerujalɛm.

²¹ Ba ta na a Fɩlɩpɩ na yi a Bɛsada-tẽw na be a Galile wɩɛr ɩ̃ yel ʋ: “Sɩ bʋɔrɔ na sɩ nyɛ a *Jeeju.”

²² A Fɩlɩpɩ cenʼã na yel a Ãdire, a ba lãa cen na yel a Jeeju.

²³ A Jeeju yel ba: “A daar ta na a Naaŋmɩn na miile nɩ a *Nɩbɛ Bie yo-yifʋ.

²⁴ Yel-mɩ̃ɛ ɩ̃ yele nyɩ, a ala ɩ̃ ɩ a ci-bir ma lo a tene kpi wa, ʋ ma jɛ na be ɩ a ci-bir bõ-ƴen, ɩ̃-cɛ a ʋlɔ ɩ̃ kpi, ʋ ma wɔ̃ na a wɔmɔ yayaw.

²⁵ A ʋlɔ na nʋ a ʋ baafʋ, ʋ na bɔr ʋ na; ɩ̃-cɛ a ʋlɔ na ꞌlaar a ʋ baafʋ a tẽw na pʋɔ, ʋ na tɛrɛ ʋ na kpɛ nɩ a baa-kɔ̃-tɛw pʋɔ.

²⁶ A ala ɩ̃ ɩ a nɩrɛ tʋnɔ na a ɩ̃ tʋn, ú tuure ma, ɩ̃ a jie ʋlɔ ɩ̃ na be, be a ɩ̃ tʋ̃tʋnɔ ʋlɔ na mɩ be. A ala ɩ̃ ɩ a nɩrɛ tʋnɔ na a ɩ̃ tʋn, a ɩ̃ Sãa na ƴɔnɔ ʋ na.

A JEEJU MANA NA A Ʋ KŨU ƳƐRƖ̃

²⁷ “A ƴɛ̃ƴɛrɩ̃ na, a ɩ̃ tɩɛrɩ̃sɩ dama ma na, ɩ̃ bõ ɩ̃ na yel? Ɩ̃́ yel a ɩ̃ Sãa ʋ faa ma a daarʼã ɩnɛ mɩɩ? Ɩ̃-cɛ má a ala ɩnɛ ɩ̃ ɛ̃ɛ wa, a na ta ma.

²⁸ Sãa, ɩ a fʋ yuor ʋ yi!” A lɛ, a kɔkɩr ƴɛrʼã be a saꞌlon yel: “Ɩ̃ dãa na maal ʋ ʋ yi, ɩ̃ ɩ̃ na lɛ maal ʋ na ʋ yi go.”

²⁹ A nɩbɛ bala na ɩraa a be ɩ̃ wonaa yelʼã a saa tanʼã, ɩ̃ a nɩŋmɛɛ yel a Naaŋmɩn sɩ-tʋnaa kãw ɩ̃ ƴɛrɛ nɩ ʋ.

³⁰ A *Jeeju yel ba: “Aa ɩ a maa ɩnɛ a ʋna kɔkɩr ƴɛrɛ wa, ɩ̃-cɛ a nyɩ ɩnɛ ʋ.

³¹ A ƴɛ̃ƴɛrɩ̃ na, a daar ta na ba na guoro a tẽw na ƴɛrɩ̃. A ƴɛ̃ƴɛrɩ̃ na, ba na irʼã *a tẽw na jamana bar.

³² Ɩ̃ a maa, a lɛ ba nɔɔ jɛwrɛ ma a ka a tẽw juu duoro nɩ, ɩ̃ na taw na a nɩbɛ ba jaa a ba wa a ɩ̃ sɛ̃.”

³³ Ʋ ƴɛrʼã a lɛ miilʼɩ̃ a bõ kũu ʋ na kpiire.

³⁴ A nɩbɛ bala yel ʋ: “Sɩ wõ na a sɩ ƴɛr-kpɛn pʋɔ áa *Kirisi na tɛrɛ na a baafʋ daadaa kpoolaa, ɩ̃ mɩnɛ fʋ ɩ ɩ̃ yel áa sɛw na a ba na jɛw a *Nɩbɛ Bie a tẽw juu do nɩ? Ala ɩ̃ ɩ a Nɩbɛ Bie ʋlɔ?”

³⁵ A Jeeju yel ba: “Daar fɩ̃ɩ tɛw a cãa na lɛ cãa be a nyɩ sɔ̃w. Nyɩ́ cere a lɛ nyɩ na cãa tɛrɛ a cãa, a mɩnɛ a libe kɔ̃ wa dũunɩ nyɩ wa. A-na-ɩ a ʋlɔ na cere a libe pʋɔ maa bɔ̃w a jie ʋ na cere wa.

³⁶ A mɩnɛ nyɩ na cãa tɛrɛ a cãa, nyɩ́ sɔw de ʋ, a mɩnɛ a nyɩ na lɩɛb ɩ a cãa deme.” A mɩnɛ a *Jeeju na ƴɛr a lɛ baar, ʋ cenʼĩ na sɔɔlɩ̃ a ba ɩnɛ.

A JUFISƖ NA MA SƆW DE A JEEJU WA

³⁷ Ɩ̃ a mɩnɛ ʋ na dãa saarɩ̃ maal a nɔ-kofʋ tʋ̃-yaw a ba nii-sɔw ɩ̃ baa sɔw de ʋ wa,

³⁸ a mɩnɛ a Naaŋmɩn ƴɛr-hiere Ejayi ƴɛrɩ̃ ʋ na dãa yel na tʋɔ maal baar. Ʋ yelʼã: “Nɩ-kpɛ̃ɛ, ala ɩ̃ sɔw a sɩ manfʋ? Ala a Nɩ-kpɛ̃ɛ miilʼɩ̃ a ʋ fãw?”

³⁹ Ɩ̃ baa tʋɔrɔ sɔwrɔ wa, a na ɩ a mɩnɛ a Ejayi na lɛ dãa yel:

⁴⁰ “A maa Naaŋmɩn ɩ̃ pɔw ba a mimie, ɩ̃ maal a ba sube a kpɛmɛ, a mɩnɛ a ba mimie kɔ̃ wa nyɛ wa, a ba kɔ̃ mɩ bɔ̃w a par a ba tɩɛrɩ̃sɩ pʋɔ wa, ɩ̃ a ba kɔ̃ mɩ lɩɛb wa a ɩ̃ jie ɩ̃ kpɛmɛ ba wa.”

⁴¹ A Ejayi yelʼã a lɛ a-na-ɩ ʋ nyɛ na a Jeeju yo-yifʋ ɩ̃ ƴɛrɛ a ʋ ɩnɛ.

⁴² A na saarɩ̃ be a lɛ ɩ̃ a Jufisɩ ni-dierbe yaw jie sɔw na de a Jeeju, ɩ̃-cɛ a *Farɩsɩ nɩbɛ ɩnɛ, baa dãa ꞌlara ƴɛrɛ a nɩbɛ na bɔ̃wnaa wa. Ba jɔrɔ na dãbɩ̃ɛ ba nɔɔ wa diw ba bar a *puorfʋ yir pʋɔ,

⁴³ a-na-ɩ ba nʋ na a pɛwfʋ ʋlɔ na yi a nɩbɛ jie gãw a Naaŋmɩn na pɛwrɛ ba.

A JEEJU ƳƐRƖ̃SƖ NƆƆ ƳƆNƆ A NƖBƐ A ƳƐRƖ̃

⁴⁴ A *Jeeju ƴɛrʼã nɩ kpɛ̃w yel: “A ʋlɔ na sɔw de ma, aa ɩ a maa tɛw ʋ sɔw de wa, ɩ̃-cɛ ʋ mɩ sɔw na de a ʋlɔ na tʋ ma.

⁴⁵ Ɩ̃ a ʋlɔ na nyɛ ma, ʋ mɩ nyɛ na a ʋlɔ na tʋ ma.

⁴⁶ A maa, ɩ̃ wa na a ka a tẽw pʋɔ ɩ a cãa, a mɩnɛ a nɩrɛ lɛ na sɔw de ma kɔ̃ cãa be a libe pʋɔ wa.

⁴⁷ A ala ɩ̃ ɩ nɩrɛ wõ na a ɩ̃ ƴɛrɩ̃sɩ ɩ̃ ma sɔw maal wa, aa ɩ maa ɩ̃ wa ƴɔnɔ ʋ a ƴɛrɩ̃ wa, a-na-ɩ maa wa ka a tẽw pʋɔ a nɩbɛ ƴɛrɩ̃ ƴɔ̃wfʋ ɩnɛ wa, ɩ̃-cɛ ɩ̃ wa na a ba faafʋ ɩnɛ.

⁴⁸ A ʋlɔ na jaar ma bar, ɩ̃ ma de a ɩ̃ ƴɛrɩ̃sɩ wa, ʋ na tɛrɛ na a ʋ ƴɛr-ƴɔnɔ. A ƴɛrɩ̃ ʋlɔ ɩ̃ na mana, ʋlɔ ɩ̃ nɔɔ ƴɔ̃w ʋ a ƴɛrɩ̃ a bibi-baaraa dayen.

⁴⁹ A-na-ɩ maa ƴɛrɛ a ɩ̃ mɩ̃ɛ ƴɛrɩ̃sɩ wa, ɩ̃-cɛ a ɩ̃ Sãa na tʋ ma, ʋlɔ ɩ̃ kʋ ma a ala na sɛw ɩ̃ ƴɛrɛ ɩ̃ mɩ mana.

⁵⁰ Ɩ̃ ɩ̃ bɔ̃w na bɔ̃w ka a ʋ ƴɛrɩ̃ tɩɩrɛ na a baa-kɔ̃-tɛw. Ala-ɩ̃-sɔ, a ala ɩ̃ na ƴɛrɛ, ɩ̃ ƴɛrɛ na a mɩnɛ a ɩ̃ Sãa na man ma.”