Galatɩ Sɛbɛ 6 - A NAAŊMƖN PƲLƖ̃-TA-PAALAA

SƖ́ JEWRE TAA A TOE

¹ Yɛɛr, a ala ɩ̃ ɩ kãw wa nyɔw na nɩrɛ ʋ maala bom kãw na ma vɩɛlɛ wa, a nyɩmɩ na tɛrɛ a Naaŋmɩn Sɩɛ, nyɩ́ sũo ʋ ʋ lɛ lɩɛb a ʋ maalfʋ, ɩ̃-cɛ nyɩ́ maalʼɩ̃ ʋ hɛlɛlɛ yɛ̃, mɩ bɔ̃w tɛrɛ a fʋ mɩ̃ɛ a mɩnɛ a bɩɩrfʋ kɔ̃ wa mɩ ta fʋ wa.

² Nyɩ́ jewre taa a toe, ɩ̃ nyɩ na maalʼã a ƴɛr-kpɛ̃w ʋlɔ a *Kirisi na kʋ sɩ.

³ A ala ɩ̃ ɩ a nɩrɛ tɩɛr beeka a ʋ ɩ na bom, ɩ̃ ma sɩrɩ̃ ɩ wa, ʋ bɛlɛ na a ʋ mɩ̃ɛ.

⁴ A nɩrɛ lɛ sɛw na ʋ jʋʋr a ʋ mɩ̃ɛ tʋmɔ je kãa. A ala ɩ̃ ɩ a vɩɛlɛ na ʋ na tʋɔ na bar nyãa, ɩ̃ a kɔ̃ ɩ yo-bɔb a nɩŋmɛɛ tʋmɔ jie wa.

⁵ A-na-ɩ a nɩbɛ ba jaa bõ-ƴene-ƴene toe tuofʋ be na a ba jie.

⁶ A ʋlɔ ba na jaana a Naaŋmɩn ƴɛrɩ̃ sɛw na ʋ mɩ bɔ̃w nɩ a ʋ jãjaana nɩ a ʋ yele a jaa.

⁷ Nyɩ taa bɛlɛ nyɩ mɩ̃ɛ wa. Ba maa ɓolĩ Naaŋmɩn wa. A ala a nɩrɛ na bʋr, ala ʋ ma ŋma.

⁸ A ʋlɔ na bʋr a ala a ʋ ɩ̃gan buur na bʋɔrɔ, a ala ʋ na ŋmara na ɩ na a kũu a ɩ̃gan buur ɩnɛ. Ɩ̃ a ʋlɔ na bʋr a ala a Naaŋmɩn Sɩɛ na bʋɔrɔ, a ala ʋ na ŋmara na ɩ na a baa-kɔ̃-tɛw a Naaŋmɩn Sɩɛ ɩnɛ.

⁹ Sɩ taa wa vɔwrɔ a vɩlaa maalfʋ pʋɔ wa, a-na-ɩ a ala ɩ̃ ɩ a suur mɔɔ sãw sɩ a sɩ bar wa, sɩ na ŋma na a ala sɩ na bʋrɔ a lɛ a daar nɔɔ tara.

¹⁰ Ala-ɩ̃-sɔ, a mɩnɛ sɩ na cãa tɛrɛ a daar, sɩ́ sũono a nɩbɛ ba jaa, ɩ̃ sɩ́ nyɩrɩ̃ sũono a yɛɛr bala na tɛrɛ a ƴɔ̃w-nyãa a Kirisi pʋɔ.

A ƳƐR-BAARAA NƖ A PUORFƲ

¹¹ Maa mɩ̃ɛ ɩ̃ sɛbɛ a ƴɛ̃ƴɛrɩ̃, a mɩnɛ nyɩ na nyɛ a sɛb-bi-bɛrɛ asɩmɛ.

¹² A bala na bʋɔrɔ ba fɛr nyɩ a nyɩ ŋmaa a yʋɔr ɩ na a bala na bʋɔrɔ a nɩbɛ ba kpiire ba a ɩ̃gan buur pʋɔ. Ba maala na a lɛ, a ba kɔ̃ hʋɔlɔ ba a *Kirisi kũu a nɩ-kʋ-daa juu ƴɛrɩ̃ ɩnɛ wa.

¹³ A nɩbɛ bala mɩ̃ɛ na cɛ̃pɛrɛ a yʋɔr ŋmaafʋ ƴɛrɩ̃ ma mɩ jɔrɔ a ƴɛr-kpɛn wa, ɩ̃-cɛ ba bʋɔrɔ na nyɩ ŋmaa a yʋɔr a mɩnɛ a ba na tʋɔ bʋɔrɔ a yuor a ʋna jɩbaa a nyɩ ɩ̃gan pʋɔ ɩnɛ.

¹⁴ A ala ɩ̃ ɩ a maa ʋ, maa bʋɔrɔ yuor ɩ̃ a ala ma ɩ a sɩ Nɩ-kpɛ̃ɛ *Jeeju-Kirisi kũu a nɩ-kʋ-daa juu ɩnɛ wa. A ʋ kũu lɩɛbʼã a tẽw pʋɔ yele a ɩ yel-kũusɩ a ɩ̃ jie, ɩ̃ mɩ lɩɛb ma ɩ̃ ɩ nɩ-kũu a yele ala jie.

¹⁵ A ala ɩ̃ ɩ nɩrɛ ŋmaa na a yʋɔr mɩɩ ꞌwaa ŋmaa wa, aa ɩ bom wa. A ala na ɩ a bom ɩ na fʋ ɩ nɩ-paalaa.

¹⁶ A pɩɛnfʋ nɩ a nã-bɔ̃wfʋ á be a bala ba jaa jie na tuure a ʋna sɔrʼãa, nɩ a Naaŋmɩn deme ba jaa.

¹⁷ A daarʼã pʋɔ, nɩrɛ ʋ taa lɔɔ vɔwrɔ ma go wa, a-na-ɩ a fala asɩmɛ ɩ̃ na tɛrɛ miile na a ɩ̃ ɩ na a *Jeeju gbãgbaa.

¹⁸ Yɛɛr, a sɩ Nɩ-kpɛ̃ɛ Jeeju-Kirisi sũofʋ ú be nɩ nyɩ a sɩɛ pʋɔ. *Amɛn.