Galatɩ Sɛbɛ 4 - A NAAŊMƖN PƲLƖ̃-TA-PAALAA

A GBÃGBA-BIE NƖ A BI-TƆR

¹ Nyɩ́ nyɛ a ala ɩ̃ na bʋɔrɔ ɩ̃ yel. A bie na ɩ a gã-diere, ɩ̃ wa cãa pab, ʋ sɩrɩ̃ na wɔ̃ taa nɩ a gbãgbaa a mɩnɛ ʋ na saarɩ̃ ɩ a ʋ sãa gã-diere.

² A lɛdaar ʋ na cãa pab, ʋ be na a ꞌwoꞌwuorbo nuu pʋɔ ɩ̃ a ŋmɛɛ mɩ ꞌwuoro a ʋ gã-yele, wa tara nɩ a daar ʋlɔ a sãa na ƴɔ̃w.

³ A sɩmɩ mɩ, a lɛ a mɩ dãa be sɩ. A lɛdaar sɩ na dãa cãa pab, a tẽw na pʋɔ sɩ-bʋrɔ bʋrɔ gbãgbaar sɩ dãa ɩ.

⁴ Ɩ̃-cɛ a daar ʋlɔ a Naaŋmɩn na ƴɔ̃w, ʋ ta na ʋ bar a ʋ Bie ʋ wa, a pɔw dɔw ʋ, ʋ be a Jufisɩ ƴɛr-kpɛn pʋɔ,

⁵ a mɩnɛ ʋ na faa a bala na be a ƴɛr-kpɛn pʋɔ, ɩ̃ a sɩ na tʋɔ lɩɛb ɩ a Naaŋmɩn bibiir.

⁶ Ɩ̃ a mɩnɛ nyɩ na tʋɔrɔ bɔ̃wnɔ a nyɩ sɩrɩ̃ na ɩ a Naaŋmɩn bibiir, ʋ ƴɔ̃w na a ʋ Bie Sɩɛ a nyɩ sube pʋɔ ʋ wuure yele, “Aba, ɩ̃ Sãa yaa!”

⁷ A nɔhɔ̃, faa lɛ ɩ gbãgbaa go wa, ɩ̃-cɛ bi-tɔr fʋ ɩ. Ɩ̃ a mɩnɛ fʋ na ɩ a bi-tɔr, a Naaŋmɩn nɔɔ mɩ kʋ fʋ na a ala ʋ na bin a ʋ bibiir ɩnɛ.

A POL TƖƐRƖ̃SƖ NA NYANYAA A GALATƖ POPUORBO ƖNƐ

⁸ A korĩ-cɛ, nyaa dãa bɔ̃w a Naaŋmɩn wa, ɩ̃ dãa ɩ a gbãgbaar, tʋnɔ kʋrɔ a yele ala na ma sɩrɩ̃ ɩ a Naaŋmɩn wa.

⁹ Ɩ̃-cɛ a ƴɛ̃ƴɛrɩ̃ na nyɩ bɔ̃w na a Naaŋmɩn, ɩ̃ a ala na ɩ a kpɛ̃ɛ ɩ na a Naaŋmɩn bɔ̃w nyɩ na. Ɩ̃ mɩnɛ a na lɛ ɩ a nyɩ na tʋɔ lɩɛb cen a ana yele jie na ma ɩ bom wa, na ma mɩ tɛrɛ fãgã wa? Nyɩ lɛ bʋɔrɔ na nyɩ lɛ lɩɛb ɩ a ba gbãgbaar mɩɩ?

¹⁰ Nyɩ ma de na a bibie a ba be kpee kpee, ɩ̃ ma mɩ de a cur, a daar, nɩ a yomo a ba mɩ be kpee kpee.

¹¹ Ɩ̃ jɔrɔ na dãbɩ̃ɛ a nyɩ maalfʋ ɩnɛ a mɩnɛ a ɩ̃ tʋn ɩ̃ na tʋ̃ a nyɩ sɔ̃w kɔ̃ wa lo wa.

¹² Yɛɛr, ɩ̃ sʋɔr nyɩ na bɩlɛ, nyɩ́ lɩɛb wɔ̃ a ɩ̃ kaarɩ̃ a-na-ɩ ɩ̃ mɩ lɩɛbʼã wɔ̃ a nyɩ kaarɩ̃. Nyaa dãa maal ma bier fɩ̃ɩ wa.

¹³ Nyɩ cãa na bɔ̃w áa wʋlɩ̃ ɩ̃ saa ɩ̃ wa ƴɛr a *Kirisi ƴɛr-son kʋ nyɩ a dãdãw.

¹⁴ A mɩnɛ a ɩ̃ wʋlɩ̃ na dãa ɩ nyɩ a won, ɩ̃-cɛ nyaa mel ma mɩɩ lɔb ma bar wa, ɩ̃ nyɩ ɛ̃ɛ na de ma a Naaŋmɩn sɩ-tʋnaa kaarɩ̃, mɩɩ a *Jeeju-Kirisi kaarɩ̃.

¹⁵ Nʋ̃ɔ dãa na nyɔw nyɩ, ɩ̃ nyɩnɛ a ʋna nʋ̃ɔ lɛ cen? Ɩ̃ na tʋɔ na yel a asɩmɛ a nyɩ ɩnɛ. A ala dãa ɩ sɔr be na be, nyɩ naa ꞌloorʼã a nyɩ mimie ƴɔ̃w ma.

¹⁶ A ƴɛ̃ƴɛrɩ̃ na, ɩ̃ lɩɛbʼã ɩ a nyɩ san-sʋbɔ a mɩnɛ ɩ̃ na yel nyɩ a yel-mɩ̃ɛ mɩɩ?

¹⁷ A bana nɩbɛ naa, a ɓĩɓinfʋ ba na tɛrɛ a nyɩ jie ma ɩ bõ-son wa, ɩ̃-cɛ ba bʋɔrɔ na ba ŋmaa nyɩ a ɩ̃ jie a nyɩ na ɓĩɓine a ba jie.

¹⁸ A ɓĩɓinfʋ vɩɛlɛ na a ala ɩ̃ ɩ bõ-son ɩnɛ ʋ. Ɩ̃ aa ɩ a lɛdaar tɛw ɩ̃ na ma be a nyɩ jie wa, ɩ̃-cɛ a na mɩ ɩ a daar a jaa.

¹⁹ Ɩ̃ bibiir, a mɩnɛ a na ma nyɩrɩ̃ wono a pɔw na dɔwrɔ, lɛ a mɩ wono ma wa tara nɩ a lɛdaar ba na nyɛrɛ a Kirisi a nyɩ baafʋ pʋɔ.

²⁰ Ɩ̃ tɩɩ na bʋɔrɔ ɩ̃ lɛ be a nyɩ sɔ̃w a daarʼã pʋɔ na lɛ tʋɔ ƴɛrʼɩ̃ nyɩ kɔkɩr kpee a-na-ɩ a tɩɩ na dama ma a nyɩ ɩnɛ.

A AGAAR NƖ A SARA ƳƐRƖ̃

²¹ Ɩ̃ bʋɔrɔ na ɩ̃ soor a nyɩmɩ na bʋɔrɔ nyɩ de a nyɩ mɩ̃ɛ ƴɔ̃w a ƴɛr-kpɛn pʋɔ, nyaa wõ a ala a ƴɛr-kpɛn na yel wa?

²² A-na-ɩ a yelʼã áa Abʋraham dãa na tɛrɛ bi-dabsɩ ayi. Gbãgba-pɔw na dɩ a Agaar ɩ̃ dɔw a bõ-ƴen, ɩ̃ a pɔw na sɔ a ʋ mɩ̃ɛ na dɩ a Sara ɩ̃ mɩ dɔw a bõ-ƴen.

²³ A gbãgba-pɔw ʋlɔ dɔw na a ʋ bie a mɩnɛ ba na ma dɔw a nɩrɛ, ɩ̃-cɛ a pɔw ʋlɔ na sɔ a ʋ mɩ̃ɛ dɔw na a ʋ bie tu nɩ a Naaŋmɩn pʋlɩ̃fʋ.

²⁴ A ƴɛrɩ̃ na wɔ̃ na taa nɩ sʋkpa. A pɔɔbɔ ayi miile na a pʋlɩ̃-tar ayi a Naaŋmɩn nɩ a nɩbɛ na dãa pʋlɩ̃. A Agaar na dɔwrɔ a gbãgba-bibiir miile na a pʋlɩ̃-tar ayi kãw na ɩ a Sɩnayɩ tãw pʋlɩ̃fʋ ƴɛrɩ̃.

²⁵ A Agaar ʋlɔ miile na a Sɩnayɩ tãw na be a Arabɩ wɛkar pʋɔ, ɩ̃ mɩ wɔ̃ taa nɩ a ƴɛ̃ƴɛrɩ̃ Jerujalɛm, a-na-ɩ a ʋna tẽw nɩ a ʋ nɩbɛ ba jaa be na a gbãgba-tʋmɔ pʋɔ.

²⁶ Ɩ̃-cɛ a pɔw ʋlɔ na sɔ a ʋ mɩ̃ɛ miile na a Jerujalɛm ʋlɔ na be a saa juu, ɩ̃ a ʋlɔ ɩ̃ ɩ a sɩ mã.

²⁷ A-na-ɩ a Naaŋmɩn Sɛbɛ yelʼã: “A fʋ̃ʋ pɔw ab, a fʋ̃ʋ na ma bɔ̃w a dɔwfʋ tuo wa, cɩlɛ awra nɩ, cɩɛrɛ nɩ a yele! A-na-ɩ a pɔw ʋlɔ ba na jaar bar na dɔw na bibiir gãw a pɔw ʋlɔ na cãa tɛrɛ a sɩrɛ.”

²⁸ Yɛɛr, a ala ɩ̃ ɩ a nyɩmɩ ʋ, ba dɔw nyɩ na tu nɩ a Naaŋmɩn pʋlɩ̃fʋ a Ɩjakɩ kaarɩ̃.

²⁹ Ɩ̃-cɛ a korĩ-cɛ, a ʋlɔ ba na dɔw a nɩrɛ dɔwfʋ ma hʋɔlɔ na a ʋlɔ ba na dɔw nɩ a Naaŋmɩn Sɩɛ kpɛ̃w, ɩ̃ a lɛ a mɩ be a ƴɛ̃ƴɛrɩ̃ na.

³⁰ Ɩ̃ bõ a Naaŋmɩn Sɛbɛ yel? Ʋ yelʼã: “Diw a gbãgba-pɔw nɩ a ʋ bie bar, a-na-ɩ a gbãgba-pɔw bie nɩ a pɔw ʋlɔ na sɔ a ʋ mɩ̃ɛ bie ma sɛw na lãa pɔw a ba sãa gã-yele wa.”

³¹ Ala-ɩ̃-sɔ yɛɛr, saa ɩ a gbãgba-pɔw bibiir wa, ɩ̃-cɛ a ʋlɔ na sɔ a ʋ mɩ̃ɛ bibiir sɩ ɩ.