Galatɩ Sɛbɛ 2 - A NAAŊMƖN PƲLƖ̃-TA-PAALAA

A POL NA CEN A JERUJALƐM A NƖ-TƲNƖSƖ JIE

¹ A mɩnɛ a yomo pie-nʼanuu for bir na tɔl baar, a maa nɩ a Banabasɩ lɛ cenʼã a Jerujalɛm. Ɩ̃ mɩ tɛrɛ na a Tɩtɩ cenʼɩ̃.

² Ɩ̃ cenʼã a-na-ɩ a Naaŋmɩn ɩ̃ dãa miil ma áa sɛw na ɩ̃ ben. A mɩnɛ sɩ na kpaarɩ̃ taa nɩ a bala ɩ̃ na bɔ̃w ka a ni-dierbe ba ɩ, ɩ̃ man ba na a ƴɛr-son ʋlɔ ɩ̃ na ƴɛrɛ kʋrɔ a nɩ-bʋlsɩ, a mɩnɛ a ɩ̃ korĩ-cɛ tʋmɔ nɩ a ɩ̃ ƴɛ̃ƴɛrɩ̃ tʋmɔ kɔ̃ wa lo wa.

³ Ɩ̃-cɛ a mɩnɛ a ɩ̃ lãa-yʋɔrɔ Tɩtɩ na saarɩ̃ ɩ a Gɩrɛkɩ nɩrɛ, ɩ̃ aa dãa fɛr ʋ, ʋ na ŋmaa a yʋɔr

⁴ tuure nɩ a mɩnɛ a yɛ-kpansɩ bala na dãa sɔɔlɩ̃ kpɛ a sɩ pʋɔ na bʋɔrɔ wa. A bana nɩbɛ sɔɔlɩ̃ na kpɛ bʋɔrɔ ba jʋʋr a faafʋ ʋlɔ sɩ na pɔw a *Jeeju-Kirisi pʋɔ, a mɩnɛ a ba na tʋɔ lɩɛb sɩ a sɩ lɛ ɩ a gbãgbaar.

⁵ Saa dãa sɔw a ba ƴɛrɩ̃ fɩ̃ɩ wa, a mɩnɛ a sɩ na tɛrɛ a *Kirisi yel-mɩ̃ɛ ƴɛrɩ̃ cĩcĩ a nyɩ ɩnɛ.

⁶ A ala ɩ̃ ɩ a bala ɩ̃ na dãa tɩɛr bɔ̃w ka a ni-dierbe ba ɩ — a ala ba na dãa ɩ, ma ɩ ma bom wa, a-na-ɩ a Naaŋmɩn ma ꞌwuoro a nɩrɛ ɩ̃gan wa — a bana nɩbɛ naa ma dãa tɛrɛ jaan-kpee na dɔɔl ma wa.

⁷ Ɩ̃ ba ɛ̃ɛ na nyɛ a mɩnɛ a Naaŋmɩn na ƴɔ̃w ma a tʋn ɩ̃ na hier a ʋ ƴɛr-son kʋ a nɩ-bʋlsɩ, a mɩnɛ ʋ na mɩ ƴɔ̃w a Pɩɛr ʋ na mɩ hier kʋ a Jufisɩ.

⁸ A-na-ɩ a Naaŋmɩn ir ma ɩ̃ ɩ a *nɩ-tʋnaa a nɩ-bʋlsɩ jie, a mɩnɛ ʋ na mɩ ir a Pɩɛr ʋ ɩ a nɩ-tʋnaa a Jufisɩ jie.

⁹ A Jakɩ, a Pɩɛr nɩ a Jã a popuorbo na de a ba ɩ a ba nɩ-bɛrɛ bɔ̃w na a nason tʋn ʋlɔ a Naaŋmɩn na ƴɔ̃w ma, ɩ̃ nyɔɔr sɩ a nur puor na miile a sɩ bõ-ƴen ɩfʋ a Kirisi pʋɔ, ɩ̃ a sɩ man taa áa sɩmɩ na cen na tʋnɔ a nɩ-bʋlsɩ sɔ̃w, ɩ̃-cɛ a bala cen a Jufisɩ sɔ̃w.

¹⁰ A ala tɛw ba na yel sɩ ɩ na á sɩ bɔ̃w nɩ a nɩ-kɔmsɩ bala na be a ba sɔ̃w a Jerujalɛm: bom ʋ, na dãa be a ɩ̃ suur pʋɔ ɩ̃ na maal.

A POL NA GALA A PƖƐR A ÃTƖYƆSƖ-TẼW

¹¹ Ɩ̃-cɛ a mɩnɛ a Pɩɛr na wɩ a Ãtɩyɔsɩ, ɩ̃ gal ʋ na a nɩbɛ jaa nii-sɔw a-na-ɩ ʋ bɩɛ na.

¹² A mɩnɛ a Jakɩ nɩbɛ na ma dãa wɩ sɛr wa, ʋ ma dãa na lãa dɩrɛ nɩ a nɩ-bʋlsɩ a dɩb, ɩ̃-cɛ a mɩnɛ a Jakɩ nɩbɛ na wɩ baar, ʋ ŋmaa na dɩrɛ kpee, a-na-ɩ dãbɩ̃ɛ dãa na nyɔw ʋ a bala na ma cɛ̃pɛrɛ a yʋɔr ŋmaafʋ ƴɛrɩ̃ ɩnɛ.

¹³ A yɛɛr ŋmɛɛ na ɩ a Jufisɩ mɩ tɛrɛ na a poe ayi a Pɩɛr kaarɩ̃, cere nɩ a Banabasɩ mɩ̃ɛ wa mɩ kpɛ a ana tʋmɔ pʋɔ.

¹⁴ Ɩ̃-cɛ a mɩnɛ ɩ̃ na nyɛ a ba maalfʋ a aa cere taa nɩ a *Kirisi yel-mɩ̃ɛ ƴɛrɩ̃ wa, ɩ̃ yelʼã a Pɩɛr a nɩbɛ ba jaa nii-sɔw: “A fʋ̃ʋ na ɩ a Jufi ɩ̃ maala a nɩ-bʋlsɩ maal-bie ɩ̃ bar a Jufisɩ maalfʋ, mɩnɛ fʋ na tʋɔ fɛr a nɩ-bʋlsɩ a ba na maala a Jufisɩ kaarɩ̃?”

A ƳƆ̃W-NYÃA ƖNƐ A NƖRƐ NA TƲƆ TOR A NAAŊMƖN NII-SƆW

¹⁵ A sɩmɩ a Jufisɩ na dɔw, saa ɩ a nɩ-bʋlsɩ bala a Jufisɩ na bʋɔlɔ a maal-faar deme wa.

¹⁶ Ɩ̃-cɛ sɩ bɔ̃w na ka a nɩrɛ ma toro a Naaŋmɩn nii-sɔw a Mowisi ƴɛr-kpɛn jɔfʋ ɩnɛ wa, ɩ̃ a nɩrɛ ma torʼã a Naaŋmɩn nii-sɔw a *Jeeju-Kirisi ʋ na ƴɔ̃w a nyãa ɩnɛ. Ala-ɩ̃-sɔ, a sɩmɩ mɩ̃ɛ sɔw na de a Jeeju-Kirisi, a mɩnɛ a sɩ na tʋɔ tor a Naaŋmɩn nii-sɔw a sɩ ƴɔ̃w-nyãa sɩ na tɛrɛ a *Kirisi ɩnɛ, ɩ̃ a kɔ̃ ɩ a Mowisi ƴɛr-kpɛn jɔfʋ ɩnɛ ʋ wa. A-na-ɩ nɩrɛ kɔ̃ tor a Naaŋmɩn nii-sɔw a ƴɛr-kpɛn ʋ na jɔrɔ ɩnɛ wa.

¹⁷ Ɩ̃-cɛ a ala ɩ̃ ɩ a Kirisi ɩnɛ sɩ bʋɔrɔ sɩ tor a Naaŋmɩn nii-sɔw, ɩ̃ wa nyɛ bɔ̃w ka maal-fãa deme sɩ ɩ a nɩ-bʋlsɩ kaarɩ̃, a lɛ yelʼã áa ʋna maal-fãa naa yi na a Kirisi jie mɩɩ? A kɔ̃ ɩ a lɛ wa.

¹⁸ A ala ɩ̃ ɩ ɩ̃ lɛ nyɔw na ɩ̃ cɔɔrɔ a ƴɛr-kpɛn jɔfʋ ʋlɔ ɩ̃ na dãa sãw bar, ɩ̃ na ɩ na nɩrɛ ʋlɔ na mab a Naaŋmɩn jie.

¹⁹ A-na-ɩ a ala ɩ̃ ɩ a ƴɛr-kpɛn ʋ, ɩ̃ kpi na a kũu ʋlɔ na yi a ƴɛr-kpɛn jie, a mɩnɛ ɩ̃ na tʋɔ tɛrɛ a baafʋ ɩ nɩ a Naaŋmɩn nɩrɛ. Ba kú ma na nɩ a Kirisi a nɩ-kʋ-daa juu,

²⁰ a mɩnɛ a kɔ̃ cãa ɩ a maa sɔ a baafʋ ʋlɔ na be a ɩ̃ pʋɔ wa, ɩ̃-cɛ a Kirisi sɔ. A ɩ̃gan buur baafʋ ʋlɔ ɩ̃ na tɛrɛ a ƴɛ̃ƴɛrɩ̃ na, ɩ̃ tɛrɛ ʋ na a Naaŋmɩn Bie ɩ̃ na ƴɔ̃w a nyãa ɩnɛ, a ʋlɔ na nʋ ma ɩ̃ de tɔ a ɩ̃ ɩnɛ kpi.

²¹ Maa jaara a Naaŋmɩn wɩɛfʋ bara wa, a-na-ɩ a ala ɩ a ƴɛr-kpɛn ɩnɛ a nɩrɛ na tor a Naaŋmɩn nii-sɔw, a Kirisi kũu na ɩ na pɔrɔ.